तीतुस 2 - सिरमौरी नौवाँ नियम

साची शिक्षा कै मानौ

¹ पौरौ तीतुस ताखै ऐजौ जौरुरी औसौ कै ताखै बिशवाशियौं कै सिरफ सैजौई शिखाणौ चैंई जू यीशु मसीह कै बारै मुंजी साची शिक्षाओं कै हिसाब शै औसौ।

² बुजूर्ग मर्द कै आपी पांदी काबू राखणा चैंई औरौ ऐशैखै बर्ताव कौरणा चैंई ताकि लोग तिनका आदर कौरौ औरौ सौमझदारी शै बर्ताव कौरणा चैंई। तिनु पौरमेशवर पांदी मोजबूती शै बिशवाश कौरणा चैंई, औरौ ओकी लोगौआरी सौचाई शै प्यार कौरणा चैंई औरौ सैहनशोकती राखणै चैंई।

³ तैशैखैई बुजूर्ग बैटमाणिशौ आरी तैशणा बर्ताव कौरौ जू पौरमेशवर कै प्रति भोक्‍ती का जीवन जियौं। सै निन्दा कौरणौवाल़ी नी हौणी चैंई, औरौ ना पिणौ वाल़ी हौणी चैंई; पौरौ ओकी खै आछी बातौ शिखाणौ वाल़ी हौणी चैंई।

⁴ ताकि सै ऐक आछा उदारण दिखाए सौकौ औरौ जवान बैटमाणिशौ कै सलाह दैणौ कै लायक हौंव औरौ सौमझाए सौकौ कि तिनु आपणै घोरवाल़ै औरौ नानड़िया आरी कैशै प्यार राखणा चैंई।

⁵ औरौ सौमझदार औरौ आपणै घोरवाल़ै कै प्रति वफादार हौंव, औरौ आपणै घोर कै सम्भाल़णो वाल़ी हौंव, औरौ आपणै-आपणै घोरवाल़ै कै औधिकार का आदर कौरणौवाल़ी हौंव ताकि कुणिए बै पौरमेशवर कै सौंदेश कै बारै मुंजी बुरी बातौ नै कौरे सौकौ।

⁶ ऐशैखैई जवान मर्द खै बै सोमझाव कै सै आपी पांदी काबू राखणौवाल़ै हौंव औरौ बिन्ती कौरेयौ सै बुध्‍दिमानी शै काम कौरौ।

⁷ ताखै सौबी बातौ दै उदारण कै रुप दै आछै काम कौरणै चैंई, जिथका औकै लोग सौदा पालन कौरे सौकौ। जोबै तू बिशवाशियौं खै पौरमेशवर कै बारै मुंजी शिखाए, तौ ताखै आछै मकसद कै साथै शिखाणौ चैंई औरौ ऐशैखैई लोग तैरा आदर कौरलै।

⁸ औरौ सैजौ शिखा जू साचौ औसौ औरौ जिथकै लोग काट ना कौर सौकौ, ताकि तैरै दुशमन शरमाए जांव जिथुकै किछै बै ऐशणौ बुरु ना हौंदौ जू सै अमारै खिलाफ बौल़ै सौकौ।

⁹ गुलामो कै शिखा की सै सौदा आपणै मालिको की आज्ञा कै मानौ, तिनु तैशैखैई कौरणौ कारिए बौल जू तिनकै मालिको कै खुश कौरौ, औरौ सै मालिको कै पाछु जोवाब ना दैंव;

¹⁰ चोरी चलाकी नै कौरौ; पौरौ साबित कौरौ कै तुऐं सौदा ईमानदार रौंदै, तिनु ऐशणा बर्ताव कौरणा चैंई, ताकि लोग तिनका बर्ताव दैखैयो तिनका आदर कौरौ ताकि ऐशणाई बर्ताव पौरमेशवर कै बारै मुंजी सौंदेश शुणणौ कै बौजैह बौणौ।

¹¹ बिशवाशी कै ऐशैखै शिखा जिथुकै पौरमेशवरे सौबी लोगौ कै पापौ शै छुड़ाणो कै बाट दिखायौ आपणै दया दिखाए राए।

¹² आपणै अनुग्रह शै पौरमेशवर आमु शिखांव कै तैशैखै बर्ताव कौरणा बंद कौरौ, जू तैसी खुश ना कौरौ, तिनु चीज़ौ की लालसा कौरणै बंद कौरौ जिनकै इछा अबिशवाशी कौरौ, औरौ जौबेकै आमै इबी इयौं दुनिया पांदी ही औसौ तौ बुध्दिमानी शै औरौ धार्मिकता कै साथै ऐशैखै काम कौरु जिथलैई पौरमेशवर खै खुशी भैटौ।

¹³ पौरमेशवर कै खुश कौरणौवाल़ा जीवन जीणो कै दवारा आमै उमीद कै साथै प्रभु कै पाछु आणौ कै आशा राखु, औरौ सैजौ दूस जोबै अमारा प्रभु यीशु मसीह जू अमारा महान पौरमेशवर औरौ उध्दारकर्ता औसौ, आपणै सारै महिमा कै साथै धोरती पांदी पाछु आला।

¹⁴ यीशु मसीह आमु कारिए बलिदान हौए गौआ ताकि आमै सौबै जोणे पापौ शै आज़ाद हौए सौकु औरौ आमु संस्कार दै शुध्द हौए सौकु ताकि आमै तैसकै खास लोग बौणै जोऊं, जू भले काम कौरणौ कै बौड़ै इछा राखौ।

¹⁵ इथकारिए, तीतुस हांव चोऊं कै तू क्रेते टापू कै बिशवाशियौं खै ऐजी बातौ शिखाए जू मोऐं ताखै बौताए रैई। आपणै लोगौ खै हौंसला दै औरौ जिथै जौरुरत औसौ, तिथै तिनुमुंजी सुधार कौर। ताखै ऐशै कौरणौ का पूरा औधिकार औसौ, कुणिए बै तैरै बैज्जती नै कौरौ।