तीतुस 1 - सिरमौरी नौवाँ नियम

शुभकामनाएँ

¹ मोऐं, पौलुसे ताखै ऐजी चिट्ठी लैखै लोए, जू पौरमेशवर का सेवक औरौ यीशु मसीह का चोणेयौंदा चैला औसौ, मुखै पौरमेशवर कै चोणेयौंदे लोगौ कै बीच मुंजी बिशवाश कै मोजबूत औरौ साची शिक्षाओं कै जाणणौ कै मौदद कौरणौ कारिए भैजै राए ताकि सै ऐशणा जीवन जियौं जू पौरमेशवर कै खुश कौरौ।

² इथका नतीजा ऐजा औसौ, कै लोग पौरमेशवर कै साथै हमैशा रौणौ कै आशा कौरौ, जिथुकै पौरमेशवर कौलोंई झूठु ना बौल़ौ, तैणै दुनिया कै बाणणौ दा आगै वादा कौरे राए थिया कै तैसकै लोग सौदा कारिए जियुंदी रौंदै।

³ औरौ ऐबै बिल्कुल ठीक सौमय पांदी, पौरमेशवरे ऐसी सुसमाचार कै अमारै सामणै दैय राए औरौ आमै इथका प्रचार सौबी मुंजी कौरु। पौरमेशवर औरौ अमारै उध्दारकर्ताए ऐजै आज्ञा दैंदै बैई मुखै जुमैवारी दै कै तैसी कारिए ऐजा काम कौरु।

⁴ मोऐं ऐजै चिट्ठी तीतुस कै लैखै लोए। तू मैरै बैटै कै जैशणा औसौ जिथुकै तू बै मसीह दा बिशवाश कौरे जैशै हांव कौरु: हांव प्रार्थना कौरु कै पिता पौरमेशवर औरौ अमारै उध्दारकर्ता मसीह यीशु तुऔं अनुग्रह औरौ शान्तै दैंदा रौंव।

क्रेते टापू दा तीतुस का काम

⁵ हांव ताखै इथकारिए क्रेते टापू दा छोड़ेयौ ओऊवा थिया ताकि तू तिथै की कलीसिया की मुसीबतौ कै ठीक कौरे सौकै जिनु ठीक कौरणौ का मुंकैई सौमय ना थी औरौ क्रेते टापू कै सौब शहर दै अगुवे कै चुणी पा। इथकै बारै मुंजी ताखै मैरी बौतायौंदे बातौ याद राखणी चैंई:

⁶ ऐक अगुवे कै निर्दोष औरौ आपणी घोरवाल़ी कै प्रति वफादार हौणौ चैंई औरौ तैसकै नानड़िया शोरीर कै इछाओं पांदी चालणौ वाल़ै नी हौंव, औरौ माँ-बापू का आदर कौरणौवाल़ै हौंव।

⁷ जिथुकै ऐक अगुवे कै पौरमेशवर का भण्‍डारी हौणौ की बौजैह शै निर्दोष हौणौ चैंई; औरौ ना हठीला, ना गुस्से बाज, ना पियक्कड़, ना मारपीट कौरणौवाल़ा औरौ ना नीच कमाई का लालची हौणा चैंई।

⁸ पौरौ पौऊंणै का आदर कौरणौवाल़ा, भोलाए का चाणो वाल़ा, सौब्री, धरमी, पवित्र औरौ भावनाओं पांदी काबू राखणौ वाल़ा; हौणा चैंई।

⁹ तैसी यीशु मसीह कै बारै मुंजी साची सौंदेश पांदी पाका बिशवाश हौणा चैंई जू सौंदेश आमुए तैसी शिखाए राए थिया ताकि सै ओकी लोगौ कै सोही शिक्षा मानणौ कारिए हौंसला दैय सौकौ औरौ साथ कै साथ लोगौ कै सामणै विरोधियों कै पौल खोले सौकौ।

पाखंडी शिक्षक

¹⁰ मोऐं ऐशै इथकारिए बौल़ै लो जिथुकै बौहितै यहूदी बिशवाशी औरौ बकवादी औरौ धौखा दैणौवाल़ै लोग साची शिक्षा का विरोध कौरदै। ऐजै लोग चांव कै सारै मसीही लोग यहूदियों कै नियमौ का पालन कौरौ, खास कौरेयौ खतने कै नियम का पालन कौरौ

¹¹ इनु लोगौ की शिक्षा का विरोध कौरणा चैंई: जिथुकै सै गौलत शिक्षाओं कै शिखायौ पूरै परिवार का नाश कौरे दैंव। इथकारिए सै ऐशै कौरेयौ धन कमाणा चांव।

¹² क्रेत टापू कै ऐक आदमीए जैसीकै लोग ऐक बुध्दिमान कवि मानौ थिए, तैणै बौल़ै राए, कै क्रेती टापू कै लोग हमैशा झूठु बौल़ौ। सै जोंगली जानवर कै जैशणा बर्ताव कौरौ। तिनु दाल़िद औसौ औरौ सौदा जादा खाणौ खांव।

¹³ क्रेते टापू कै लोगौ कै बारै मुंजी ऐजी बातौ साची औसौ। इथकारिए तिनु सख्ताई शै चैतावणी दैया कौर, कै सै यीशु मसीह कै बारै मुंजी साची शिक्षाओं पांदी बिशवाश कौरौ।

¹⁴ यहूदी लोगौ कै झूठी कहाणियो औरौ तिनु झूठै आदमियों की आज्ञाओं पांदी मन नै लाव, जू सौचाई शै भौटकाए दैंव।

¹⁵ तिनु लोगौ कारिए जिनकै दिल दै ऐशणै पाप वाल़ै विचार ना आथी, तिनु कारिए सौबै चीज़ौ शुध्द औसौ, औरौ जू बुरै लोग औसौ औरौ जू लोग यीशु पांदी बिशवाश ना कौरौ, तिनु कारिए सौबै चीज़ौ अशुध्द औसौ जिथुकै तिनकै दिल पूरी तरह शै बुरै हौए गौवै।

¹⁶ ऐजै झूठै शिक्षक बौल़ौ, कै आमै पौरमेशवर खै जाणुए, पौरौ तिनकै बर्ताव साफ रुप शै दिखांव कै सै तैसीकै ना जाणौ, जिथुकै सै नफरत शै भोरेयौंदे औरौ आज्ञा ना मानणोवाल़ै औसौ, औरौ सै किछै बै आछै काम कौरणौ कै लायक ना आथी।