रोमियों 8 - सिरमौरी नौवाँ नियमपवित्र आत्मा कै दवारा जीवन 1 इयौं बौजैह शै ऐबै जू मसीह यीशु दै औसौ, तिनु पांदी सौजा कै आज्ञा ना आथी। 2 जिथुकै पवित्र आत्मा जू मसीह यीशु कै ढौबौशा आंव तुऔं जीवन दैला औरौ पाप औरौ मौत शै आज़ाद कौरदा। 3 जिथुकै जू काम मूसा कै कानून अमारै पापी स्वभाव दै कमजोर हौयौ ना कौरे सौकी, तैसी काम कै पौरमेशवरे कौरा, यानी आपणै ही बैटै कै अमारै जैशणा आदमी हौणौ कारिए, औरौ अमारै पापौ कै बलिदान हौणौ कारिए भैजा। आपणै बैटै कै शोरीर कै दवारा पौरमेशवरे पाप कै शौकतै कै मिटाए दी। 4 इथकारिए कै धार्मिक नियम जू अमारै पापी स्वभाव कै हिसाब शै नी पौरौ पवित्र आत्मा कै हिसाब शै चालैयौ, निभाए जांव। 5 सैजै लोग जू पापी स्वभाव कै दवारा काबू कौरे जांव सैजै लोग पाप कै बातौ कै बारै मुंजी सुंचौए, पौरौ सैजै लोग जू पवित्र आत्मा कै दवारा चलाए जांव सै तिनु बातौ कै बारै मुंजी सुंचौ जू आत्मा कै खुश कौरौ। 6 आपणै पापी स्वभाव कै आपणै मन पांदी काबू दैणा मौत कै ढौबौ लौय जांव। पौरौ आत्मा कै आपणै मन पांदी काबू दैणौ शै जीवन औरौ शान्तै भैटौ। 7 जिथुकै पापी स्वभाव कै हिसाब शै जीवन जिणौ वाल़ा आदमी पौरमेशवर शै बैर राखणा औसौ, जिथुकै ना तौ पापी स्वभाव पौरमेशवर कै नियम-कानून कै अधीन औसौ, औरौ ना नियम-कानून का पालन कौरे सौकौ। 8 औरौ जू पापी स्वभाव कै काबू दै औसौ, सै पौरमेशवर कै खुश ना कौरे सौकौ। 9 पौरौ जोबै कै पौरमेशवर का पवित्र आत्मा तुऔं दा बौसौ, तौ तुऐं पापी स्वभाव कै काबू दै ना आथी, पौरौ पवित्र आत्मा कै काबू दै औसौ। जै कोसी दी मसीह कै आत्मा ना आथी तौ तैसका मसीह शै नाता ना आथी। 10 जै मसीह तुऔं दा औसौ, तौ आत्मा तुऔं जीवन दैंव जिथुकै तुऐं पौरमेशवर कै साथै सोही ठोहराए गौवै। 11 औरौ जै पौरमेशवर कै आत्मा जैणै यीशु मसीह कै मौरेयौंदे मुंजीदा जियुंदी कौरे राखा तुऔं दा बौसेयौंदा औसौ, तौ जैणै मसीह कै मौरेयौंदे मुंजीदा जियुंदी कौरा, सै तोंवारै नाश हौणौवाल़ै शोरीर कै आपणै आत्मा कै दवारा जियुंदी कौरदा। आत्मा कै दवारा मसीह कै संतान 12 तौ ओए रै बिशवाशी भाईयों, आमु आज्ञा मानणै चैंई पौरौ सैजौ नी जू अमारा पापी स्वभाव चांव कै आमै कौरु। 13 जिथुकै जै तुऐं पापी स्वभाव कै हिसाब शै जियौंए, तौ पौरमेशवर शै जौई हौए जालै, पौरौ जै तुऐं पवित्र आत्मा कै शौकतै लैई सैजौ कौरणौ बंद कौरे दैंव जू तुंआरा पापवाल़ा स्वभाव चांव, तोबै तुऐं जियुंदी रौंदै। 14 इथकारिए जैतरै लोग पौरमेशवर कै आत्मा कै हिसाब शै चालौ, सैजैई पौरमेशवर कै संतान औसौ। 15 जिथुकै तुऔंखै गुलामी कै आत्मा ना भैटी रैई, कै तुऐं औटेयौ पौरमेशवर शै डौरौ पौरौ पौरमेशवरे आमु पवित्र आत्मा कै संतान बाणै राए, जिथलैई आमै ओए रै बापू, ओए रै पिता बौलेयौ पुकारू। 16 पौरमेशवर का पवित्र आत्मा आपी अमारी आत्मा कै साथै गवाही दैंव, कै आमै पौरमेशवर कै नानड़िया औसौ। 17 औरौ जै नानड़िया औसौ, तौ वारिस बै, यानी पौरमेशवर कै वारिस औरौ मसीह कै सौरे वारिस औसौ। जै आमै यीशु साए दुखो कै सैहन कौरु, तौ आमै तैसकै महिमा दै शामिल हौंदै। कौल़ेश शै महिमा तौड़ी 18 हांव निशोंक हौयौ जाणु कै जू दुख औरौ कौल़ेश आमुए सैहन कौरे लौवै, सैजी महिमा जू पौरमेशवर आमु दैंदा लागै रौआ, तियौं महिमा कै आगै ऐजै दुख किछै बै ना आथी। 19 जिथुकै सारी दुनियाए बौड़ी आशा भोरी नोज़रो लैई पौरमेशवर कै संतानो कै प्रगट हौणौ कै ठोल़नाए कौरे लोए। 20 जिथुकै जू किछै बै पौरमेशवरे बाणौ, तौ तिनु बाणैयौंदे चीज़ै आपणै कीमत खोए दै, इथकारिए नी कै सै आपी चांव थिए, पौरौ इथकारिए कै पौरमेशवरे ऐशै कौरौ। पौरौ तोबै बै आशा औसौ। 21 सारी दुनिया विनाश शै आज़ाद हौए जालै औरौ तैसकै संतानो कै साथै महिमामय आज़ादी दै शामिल हौंदै। 22 जिथुकै आमै जाणुए, कै जौल़ौ दा ऊबा आदमै पाप कौरा, तौलौ शै लोयो इबी तौड़ी पौरमेशवर कै बाणैयौंदी सारी दुनियाए पीड़ो सैहन कौरे लोई, जैशैकै होल़किंदी बैई ऐक बैटमाणिश पीड़ो सैहन कौरौ। 23 औरौ सिरफ ऐजी सारी दुनिया ही ना आथी जू पीड़ो सैहन कौरौ, पौरौ आमै बै पवित्र आत्मा कै दवारा हौणौवाल़ी महिमा का स्वाद चाखदै, जोबै कै आमै भीतरै ही भीतरै शुशकार भौरु; पौरौ आमुए ऐबै तैसी सौमय का इंतजार कौरे लौआ जोबै पौरमेशवर आमु आपणै नानड़िया बाणणौ कारिए ऊबा निला औरौ अमारै शोरीर कै सौबै दुष्टता शै छुटकारा कौरला। यानी आमु नौवें शोरीर दैयौ अमारै शोरीरो कै आज़ाद कौरदा। 24 ऐबै जोबै पौरमेशवरे आमु बौचाए राए, तौ आमुकैंई ऐजी आशा औसौ। पौरौ जोबै तुऐं किछै पाणौ कै इछा कौरे लोए तौ जू तुऔं कैंई आगै दो औसौ, सैजी आशा ना आथी। कुणिए बै तियौं चीज़ौ खै पाणौ कै इछा ना कौरौ जू तैसीकैईं आगै दी औसौ। 25 पौरौ आमु किछै ऐशणौ भैटणौ कै उमीद औसौ, जू आमुकैंई इबी तौड़ी ना आथी, इथकारिए आमु सब्र कै साथै तांव तौड़ी ठोल़ु जांव तौड़ी कै आमु सैजी चीज़ भैटी नी जांव। 26 ऐशैखैई पवित्र आत्मा बै अमारै मौदद कौरौ जोबै पौरमेशवर दा अमारा भोरोशा कमजोर औसौ, जिथुकै आमै ना जाणु कै, प्रार्थना कैशैखै कौरणी चैंई; पौरौ पवित्र आत्मा आपी ही ऐशणी शुशकार भोरेयौ अमारै खातिर बिन्ती कौरौ जू ब्याँ कौरणौ शै बायरै औसौ, 27 पौरमेशवर जाणौए, कै पवित्र आत्माए का बौल़ै लो? जिथुकै पवित्र आत्मा, पवित्र लोगौ कै खातिर पौरमेशवर कै इछा कै हिसाब शै बिन्ती कौरौ। 28 औरौ आमै जाणुए, कै जू लोग पौरमेशवर आरी प्यार राखौ, पौरमेशवर तिनु लोगौ कै खातिर सौबी चीज़ौ कै ऐक आछै अन्त पांदी लांदा जू तैसीआरी प्यार कौरौ। यानी तिनु कारिए जू तैसकै इछा शै चोणे राए। 29 जिथुकै जिनु तैणै आगै दै उंडै चोणे राए औरौ तिनुकै आगै ही दै उंडै ठोहराए राए ताकि सै आपणै बैटै कै जैशणा हौए जाला औरौ तैसका बैटा सौबी भाईयों मुंजीदा जैठा हौंदा। 30 तोबै जिनु कारिए पौरमेशवरे आगैई तय कौरे राए तिनु चोणे बै राए, औरौ जिनु चोणे राए, तिनु धरमी साबित कौरे राए, औरौ जिनु धरमी साबित कौरे राए, तिनकै साथै आपणै महिमा बै बांडै राए। पौरमेशवर का हमैशा का प्यार 31 तौ आमै इनु बातौ कै बारै मुंजी का बुलू? जै पौरमेशवर अमारै ढौबौ औसौ, तौ कुणिए बै आमु हराए ना सौकौ। 32 पौरमेशवरे आपणै बैटै कै आपी कारिए ना राखी, पौरौ तैसीकै अमारै खातिर आपणै दुशमन कै सौंपै दिया, सै आमु सैजौ सौबै ठुँ बै दैंदा जू वादा तैणै आमुआरी कौरे राए। 33 कुणिए बै आमु पांदी पौरमेशवर कै सामणै आरोप ना लाए सौकौ जिथुकै सै आमु धरमी साबित कौरौ। 34 कुणिए बै अमारै निंदा ना कौरे सौकौ जिथुकै ऐजा यीशु मसीह औसौ, जू अमारै खातिर मौरे गौआ औरौ मौरेयौंदे मुंजीदा जियुंदी हौआ, औरौ जू अमारै तरफ शै अमारै खातिर बिन्ती कौरौ। 35 कुणिए बै आमु मसीह कै प्यार शै जौई ना कौरे सौकौ, ना कौल़ेश, ना दुख, ना लोगौ का सताव, ना काल़, ना नंगाई, ना जोखिम, इनु चीज़ौ मुंजीदै ऐक बै आमु मसीह कै प्यार शै जौई ना कौरे सौकौ। 36 जैशैखै पवित्र शास्त्र दो लैखै राए, “पौरमेशवर कै खातिर आमु हर सौमय मौत का खतरा रौंव; आमु मौरणौ वाल़ी भेड़ो कै जैशणै गिणै राए।” 37 पौरौ इनु सौबी बुरी बातौ दै आमु तैसकै दवारा जैणै आमुआरी प्यार कौरा, जीत पूरी तरह शै अमारै औसौ। 38 जिथुकै हांव निशोंक हौयौ जाणु कै आमुखै यीशु मसीह कै प्यार शै कुणिए बै जौई ना कौरे सौकै, ना मौत, ना जीवन, ना स्वर्गदूत, ना गौयणै कै शौकतै, ना वर्तमान, ना भविष्य, ना शौकतै, ना ऊंचाई, 39 ना गहराई औरौ ना पूरी दुनिया दै कुणजै चीज़ आमु पौरमेशवर कै तैसी प्यार शै जौई कौरे सौकौ, जू आमु प्रभु यीशु मसीह कै दवारा भैटी रौआ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation