रोमियों 6 - सिरमौरी नौवाँ नियमपाप कारिए मुर्दै, पौरमेशवर कारिए जियुंदै 1 तौ आमै का बुलू? पौरमेशवर आपणै अनुग्रह की बौजैह शै अमारै पापौ कै माफ कौरौ। पौरौ आमु ऐशै नी सुंचणौ चैंई, चालौ आमै पाप कौरदै रोऊं कै अनुग्रह बैजाए हौंव। 2 ना! बिल्कुल नी! आमै जोबै पाप कारिए मौरे गौवै, औरौ इथकारिए आमु पाप वाल़ै काम नी कौरणै चैंई। तौ तोबै औगौड़ियौ कै तिथमुंजी कैशै जीवन बितौऊं? 3 का आमै जाणुए कै आमु सौबीए जैतरै यीशु मसीह कै साथै ऐक हौणौ कारिए बपतिस्मा लौआ तौ आमै तैशैखैई मौरे गौवै जैशै सै मौरा थिया। 4 इथकारिए जोबै आमुए बपतिस्मा लौआ तौ ऐजौ ऐशै थियु जैशै आमु मसीह कै साथै मौरे गौवै औरौ तैसकै साथै दफनाए बै दियै। ताकि जैशैखै मसीह, पौरमेशवर पिता कै महिमा कै दवारा मौरेयौंदे मुंजीदा जियुंदी हौए गौआ, तैशैखैई आमै बै ऐक नौवें तरीकै शै जीवन जिंदै। 5 जिथुकै जै आमै तैसकै मौत कै समानता दै, बपतिस्मे कै दवारा तैसकै साथै कौठै हौए रौवै, तौ निशोंक तैसकै मौरेयौंदे मुंजीदै जियुंदी हौणौ कै समानता दै तैसकै साथै कौठै हौए जांदै। 6 जिथुकै आमै जाणुए कै अमारा पुराणा पापवाल़ा स्वभाव मसीह कै साथै क्रूसो पांदी चौढ़ाए गौआ, ताकि अमारै शोरीर दै पाप वाल़ा स्वभाव खत्म हौए जांव, औरौ आमै आगै कै पाप कै गुलामी दै ना रोऊं। 7 जिथुकै जोबै आमै मसीह कै साथै मौरे गौवै तौ आमु पाप कै शौकतै शै आज़ाद हौए गौवै। 8 इथकारिए जै आमै मसीह कै साथै मौरे गौवै, तौ अमारा बिशवाश ऐजा औसौ कै तैसकै साथै जिंदै, 9 जिथुकै आमै जाणुए कै मसीह मौरेयौंदे मुंजीदा जिंदा हौआ औरौ हौजौ कौलोंई ना मौरदा। मौत का तैसी पांदी ऐबै कुणजाई औधिकार ना आथी। 10 जिथुकै मसीह जोबै मौरे गौआ तौ पाप कारिए ऐकैई बैई मौरे गौआ; पौरौ जू जीवन सै ऐबै जियौं, सै पौरमेशवर कै सेवा कौरणौ कारिए जियौं। 11 ऐशैखैई तुऐं बै आपी कै पाप की शौकतै कारिए मौरेयौंदे सौमझौ, पौरौ पौरमेशवर कारिए मसीह यीशु दै पौरमेशवर कै सेवा कारिए जियौं। 12 इथकारिए पाप वाल़ी इछाओं कै आपणै जीवन पांदी राज्य ना कौरणौ दैव, औरौ आपणी पाप वाल़ी इछाओं कै हिसाब शै काम ना कौरौ। 13 औरौ ना शोरीर कै अंगो कै बुरै मकसदो कारिए सौंपौ पौरौ आपी कै मौरेयौंदे मुंजीदै जियुंदी हौयौ जाणैबा, आपणै जीवन पौरमेशवर कै सौंपौ, औरौ आपणै शोरीर कै अंगो कै सोही काम कौरणौ कारिए पौरमेशवर कै सौंपौ। 14 तोबै तुऔं पांदी पाप कै शौकतै का कुणजाई औधिकार ना आथी, जिथुकै तुऐं मूसा कै कानून कै अधीन नी पौरौ पौरमेशवर कै अनुग्रह कै अधीन जियौं। पाप कै गुलामी शै, पौरमेशवर कै सेवक 15 तौ का हु? जिथुकै आमै मूसा कै कानून कै अधीन नी, पौरौ पौरमेशवर कै अनुग्रह कै अधीन औसौ, इथकारिए आमु पाप नी कौरणै चैंई। 16 तुऐं जाणौए कै जोबै तुऐं आपी कै कोसी कै गुलाम हौणौ कारिए दैय दैंव तौ सैजा आदमी तोंवारा मालिक हौए जांव औरौ तुऔं सैजौई कौरणौ चैंई जू सै बौल़ौए। पाप कै गुलामी तुऔं मौत कै ढौबौ लौए जांव, जोबै कै पौरमेशवर कै आज्ञा मानणी तुऔं कै धार्मिक जीवन कै ढौबौ लौए जांव। 17 तुऐं पाप कै गुलाम थिए, पौरौ ऐबै तुऐं तिनु शिक्षाओं का पालन कौरे राए, जू तुऔं भैटी रोई। इयौं बौजैह शै हांव पौरमेशवर का धन्यवाद कौरु, कै तुऐं जू पाप कै गुलाम थिए ऐबै मन शै तैसी उपदैश कै मानणोवाल़ै हौए गौवै, जू शिक्षा तुऔं दैय राए थी, 18 औरौ पौरमेशवरे तुऔं पाप कै शौकतै शै छुड़ाए राए बल्कि तुऐं पौरमेशवर कै दास बौणै गौवै ताकि सैजौ कौरौ जू सोही औसौ। 19 मोऐं गुलामी का ऐजा उदारण तुऔं खै इथकारिए दिया ताकि तुऐं इनु कामकै सौमझै सौकौ कै मोऐं का शिखाए लो। जैशै तुऐं आपणै शोरीरो कै अंगो कै अशुध्दता औरौ कुकर्म कै दास कौरेयौ सौंपै राए थिए, तैशैखैई ऐबै आपणै अंगो खै पवित्रता कारिए धार्मिक जीवन जिणौ कारिए सौंपै दैव। 20 जोबै तुऐं पाप कै गुलाम थिए, तौ तोंवारै भीतरै धार्मिक काम कौरणौ कै कुणजै इछा ना थी। 21 आपणै पुराणै जीवन शै तुऔं का फायदा भैटौ? तुऐं इथकी बौजैह शै सिरफ शर्मिंदा हौंव, जिथुकै तिनु कामौ का नतीजा मौत औसौ। 22 पौरौ ऐबै पाप शै आज़ाद हौयौ औरौ पौरमेशवर कै दास बोणेयो ऐबै तुऐं तिनु कामौ कै कौरौ जू पवित्रता कै ढौबौ लौए जांव, औरौ तिथका अन्त सौदा कै जिन्दगी औसौ। 23 जिथुकै पाप वाल़ै कामौ का नतीजा तौ मौत औसौ, पौरौ जू वरदान पौरमेशवर आमु दैंव, सै सौदा कै जिन्दगी औसौ जू अमारै प्रभु मसीह यीशु दै औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation