रोमियों 5 - सिरमौरी नौवाँ नियमपौरमेशवर शै मैल-मिलाप 1 इथकारिए जोबै आमै आपणै बिशवाश लैई धरमी बौणै गौवै, तौ अमारै प्रभु यीशु मसीह कै दवारा पौरमेशवर कै साथै अमारा मेलमिलाप हौए रोआ। 2 अमारै बिशवाश की बौजैह शै, मसीहे आमु ऐसी अनुग्रह दै लाए राए जिथै आमै इबी खौड़ै औसौ, औरौ आमै निशोंक औरौ खुशी कै साथै पौरमेशवर कै महिमा कै साझा कौरणौ कै आशा दैखु। 3 सिरफ ऐजौ ही नी, पौरौ आमै कौल़ेशौ औरौ पौरैशानी दै हौंव, तोबै बै खुशी हौए सौकौ, जिथुकै आमै जाणुए कै जोबै आमै दुख दै हौयौ जोऊं तोबै आमै हौजौ बै जादा सब्र राखणा शिखु, 4 औरौ पौरमेशवर आमु अपनावंए जोबै आमु सब्र औरौ आशा राखु। 5 औरौ आशा लैई शर्म ना हौंव, जिथुकै पवित्र आत्मा जू पौरमेशवरे आमु दैय राए तैसकै दवारा पौरमेशवर का प्यार अमारै मनो कै आपणै प्यार लैई भोरै राए। 6 जिथुकै जोबै आमै कमजोर ही थिए, तौ पौरमेशवर दवारा ठौहरायौंदे सौमय पांदी मसीह आमु अधरमी लोगौ कारिए मौरा। 7 कोसी कै ऐकी धरमी आदमी कारिए मोरणा मुशकिल औसौ। पौरौ हौए सौकौ कै कुणिए सौथी कै आछै आदमी कारिए मौरणौ कै तैयार हौए जांव। 8 पौरौ पौरमेशवर आमु पांदी आपणै प्यार कै भोलाए इयौं तरीकै लैई प्रगट कौरौ, कै जोबै आमु पापी ही थिए तौलोंई मसीह आमु कारिए मौरा। 9 तौ जोबै कै आमु, धरमी साबित कौरे राए जिथुकै मसीह आमु कारिए मौरा औरौ अमारै पापौ कारिए आपणा लोऊ बौऊवा। 10 जिथुकै जोबै आमै पौरमेशवर कै बौयरै थिए तौ तैसकै बैटै कै मौत कै दवारा तैणै अमारै साथै मैल-मिलाप बाणा, इथकारिए आमु निशोंक हौयौ ऐजै बात जाणुए कै अमारा तैसकै साथै मैल-मिलाप का सौमझौता हौए रौआ तौ सै आमु बौचांदा जिथुकै मसीह जियुंदी औसौ। 11 औरौ सिरफ ऐजौ नी, पौरौ ऐबै तौ अमारै प्रभु यीशु मसीह दवारा पौरमेशवर आरी अमारा मैल-मिलाप हौए रौआ; इथकारिए आमु पौरमेशवर दै खुशी औसौ। आदम दै मौत, औरौ मसीह दा जीवन 12 इथकारिए जैशै ऐकी आदमी आदम कै दवारा, पाप इयौं दुनिया दा ओऊवा, औरौ आदम ही आगला आदमी औसौ जैसी पौरमेशवरे बाणै राए थिया औरौ आदमै पाप कौरा, औरौ सै मौरे गौआ, औरौ सौबी लोगौ पांदी मौत आए, जिथुकै सौबै लोग आदम कै संतान औसौ, इथकारिए जोबै आदमै पाप कौरा तौ सौबीए पाप कौरा औरौ पापवाल़ा स्वभाव फौयल़दा गौआ। 13 पौरमेशवर कै दवारा मूसा कै कानून दैय जाणौ दै आगै बै पाप दुनिया दा थिया। पौरौ ऐसी पाप कै पाप ना गिणी जिथुकै इबी तौड़ी टाल़मटाल़ी कारिए कुणजैई बै मूसा कै कानून दैय ना रैई थी। 14 तौ बै आदम शै लैयौ मूसा तौड़ी सौबी लोगै पाप कौरा औरौ सै सौबै मौरे गौवै, जिनुवै तैसी आदम, जू किछै तरीकै दा तैसी आदमी कै जैशणा थिया औरौ किछै तरीकै दा तैसदा जौई थिया जू आणौवाल़ा थिया। 15 पौरौ आदम का पाप तैसी वरदान कै जैशणा ना आथी जू पौरमेशवर आमु आपणै अनुग्रह शै दैंव। जिथुकै ऐक आदमी का पाप बौहितै लोगौ कारिए मौत लांव। पौरौ पौरमेशवर का अनुग्रह औरौ धार्मिकता कै वरदान जू तैणै आमु दैय राए, तिथकै कीमत बौहितै लोगौ कारिए तिदै कौथी जादा औसौ। औरौ यीशु मसीहे ऐक आदमी कै रुप दै आपणै अनुग्रह लैई जू कौरौ, तैणै ऐजौ पूरु कौरौ। 16 पौरमेशवरे जू वरदान आमु दैय राए सै आदम कै पाप कै जैशणा ना आथी। जिथुकै सिरफ ऐक पाप की बौजैह शै सौजा आए। पौरौ चाहै आमुए बैजाए पाप कौरे राए, तोबै बै पौरमेशवरे आमु ऐक ऐशणा अनुग्रह दिया जैणै आमुखै पौरमेशवर कै नज़र दै धरमी बाणै दियै। 17 जिथुकै जोबै ऐक आदमी कै पाप की बौजैह शै सौबै लोगौ पांदी मौत आए, तौ जू लोग अनुग्रह औरौ धार्मिकता कै वरदान भरपूरी शै पांव सै ऐक आदमी कै, यानी यीशु मसीह कै दवारा जौरुर पाप औरौ मौत शै जीतै जांदै। 18 इथकारिए जैशै ऐक पाप सौबै आदमियों कै सौजा कै बौजैह हौए, तैशैखैई ऐक धार्मिकता कै काम बै सौबै आदमियों कै जीवन कारिए धरमी साबित कौरे जाणौ कै बौजैह हौए। 19 जिथुकै जैशै ऐक आदमी कै आज्ञा ना मानणौ लैई बौहितै लोग पापी ठौहरौ, तैशैखैई ऐक आदमी कै आज्ञा मानणौ लैई बौहितै लोग धरमी साबित कौरे जांदै। 20 मूसा कै कानून इथकारिए दैय राए ताकि सौबै लोग दैखै सौकौ कै सै कैतरै पापी थिए। पौरौ जोबै लोगै जादा शै जादा पाप कौरे, तिथै पौरमेशवरे जू अनुग्रह दिखोऊवा सै जादा शै जादा हौआ। 21 कै जैशै सौबै लोगै पाप कौरा औरौ सै सौबै मौरे गौवै, तैशैखैई अमारै प्रभु यीशु मसीह कै दवारा पौरमेशवर का अनुग्रह तिनु धरमी औरौ सौदा कै जिन्दगी दैंदा। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation