रोमियों 4 - सिरमौरी नौवाँ नियम

अब्राहम बिशवाश लैई धरमी बौणा

¹ ऐबै आमै यहूदी हौणौ कै नातै आपणै पुराणिया अब्राहम कै बारै मुंजी का बुलू? तैसी कियों बौजैह शै धरमी गिणा गौआ?

² जिथुकै जै अब्राहम आछै कामौ लैई धरमी ठोहराया जांदा, तौ तैसीकै घमण्‍ड कौरणौ कै बौजैह हौंदै, पौरौ सै आपणै आछै कामौ की बौजैह शै पौरमेशवर कै सामणै घमण्‍ड ना कौरे सौकौ।

³ पवित्र शास्त्र का बौल़ौ? ऐजौ कै, “अब्राहमै पौरमेशवर कै वादै पांदी बिशवाश कौरा, औरौ पौरमेशवरे तैसी धरमी साबित कौरा।”

⁴ काम कौरणौवाल़ै कै धियाड़ी दैणै दान ना आथी, पौरौ हक सौमझा जांव।

⁵ पौरौ जू आदमी पौरमेशवर का पक्ष पाणौ कारिए काम ना कौरौ पौरौ जू पापी लोगौ खै धरमी ठोहराणो वाल़ै पौरमेशवर पांदी बिशवाश कौरौ, तैसका बिशवाश तैसी कारिए धार्मिकता गिणा जांव।

⁶ ऐशैखैई, राजा दाऊदे लैखै राए, कै जैसी आदमी कै पौरमेशवर कामौ कै बिना धरमी गिणौ, तैसी आशीष बै दैंव:

⁷ “धन्‍य औसौ सैजै जिनकै अधरम माफ हौए, औरौ जिनकै पाप तैणै माफ कौरे दियै।

⁸ धन्‍य औसौ सैजा आदमी जैसकै पापौ का लैखा पौरमेशवर ना लोन्दा।”

⁹ तौ ऐजै धन्‍य वचन, का खतनावाल़ै ही कारिए औसौ, या बिना खतनावाल़ै कारिए बै औसौए? आमुए सैजौई लो बौल़ै जू पवित्र शास्त्र बौल़ौ, “अब्राहमै पौरमेशवर कै वादै पांदी बिशवाश कौरा, औरौ पौरमेशवरे तैसी धरमी साबित कौरा।”

¹⁰ तौ अब्राहम कोलो धरमी गिणा गौआ? का जौल़ौ तैसका खतना हौआ थिया या जौल़ौ तैसका खतना ना हौए रैई थी? खतने कै हालत दा नी पौरौ बिना खतने कै हालत दा ही पौरमेशवरे तैसी धरमी गिणा।

¹¹ पौरमेशवरे तैसी खतना हौणौ दै आगैई धरमी साबित कौरे राए थिया, खतने का निशान ऐजौ दिखांव कै पौरमेशवर तैसी धरमी सौमझौ। पौरमेशवर बिशवाश कौरणौवाल़ौ का आत्मिक पिता औसौ पौरौ जिनका खतना ना हौए रैई। तोबै बै सैजै लोग आपणै बिशवाश कै जरिए ही धरमी गिणै जालै।

¹² औरौ अब्राहम खतना कौरेयौंदे का पुराणिया औसौ, जू ना सिरफ खतना पांदी आश राखदै बैई औसौ, पौरौ जिनुकैईं तैशणा बिशवाश औसौ, जैशणा अमारै पुराणिया अब्राहम का थिया, जू तैणै खतना कौरणौ दै आगै कौरे राए थिया।

¹³ पौरमेशवरे अब्राहम औरौ तैसकी आणौवाल़ी पीढ़ी शै वादा कौरा कै सै तिनु इयौं दुनिया कै वारिस बाणदा। ऐजा वादा इथकारिए ना कौरे रैई थी जिथुकै अब्राहमै मूसा कै कानून का पालन कौरे राए थिया, पौरौ पौरमेशवर दा तैसकै बिशवाश की बौजैह शै तैसी धरमी साबित कौरा।

¹⁴ जिथुकै जै दुनिया पांदी औधिकार राखणौ का वादा पौरमेशवरे तिनु लोगौ कै दैय राखा, जू मूसा कै कानून का पालन कौरौ, तौ बिशवाश बैकार औरौ प्रतिज्ञा ऐई गौए।

¹⁵ मूसा कै कानून ना मानणोवाल़ौ पांदी पौरमेशवर गुस्सा हौंव, औरौ जिथै मूसा कै कानून ना आथी तौ तिथै तिथकै टाल़मटाल़ी बै ना आथी।

¹⁶ इथकारिए लोगै बिशवाश कै दवारा अनुग्रह ही शै पौरमेशवर का वादा पौऊवा। इयौं बौजैह शै अब्राहम कै सौबी संतानो कै ऐजा वादा भैटी सौकौ। जू सिरफ मूसा कै कानून मानणोवाल़ै कै ना आथी, पौरौ ऐजा सौबी आदमी कै औसौ जू अमारै पुराणिया अब्राहम कै जैशणा बिशवाश शै जीवन जियौं।

¹⁷ पवित्र शास्त्र बौल़ौ, “मोऐं ताखै बौहुती जाति का पुराणिया ठोहराए राखा” पौरमेशवर कै नोज़रो दा अब्राहम अमारा पिता औसौ। तैणै तैसी पौरमेशवर पांदी बिशवाश कौरा, जू मौरेयौंदे कै जियुंदी कौरौ औरौ तिनु चीज़ौ कै बै वजूद दी लांव जिथका वजूद ना आथी।

^18-19 पौरमेशवरे अब्राहम कै बौल़ौ कै तैसकै भौरिशै संतान हौंदै, पौरौ अब्राहमै दैखौ कै संतान पौयदा कौरणौ कारिए सै बूढ़ा औसौ, जिथुकै सै लमसम शौई सालो का हौए गौआ थिया। तैसकै घोरवाल़ी सारा बै ऐबै संतान पौयदा ना कौरे सौकौ थै। ऐबै जोबै कै तैसकै पिता बौणणौ कै उमीद ना दैखै रैई थी, तोबै बै तैसका बिशवाश कमजोर ना होई। सै बिशवाश औरौ आशा कै साथै मोजबूत रौआ।

²⁰ औरौ ना ही अबिशवाशी हौयौ पौरमेशवर कै प्रतिज्ञा पांदी शक की, पौरौ बिशवाश दा मोजबूत हौयौ पौरमेशवर कै महिमा कौरे,

²¹ औरौ निशोंक हौयौ जाणौ कै जियौं बातौ कै पौरमेशवरे प्रतिज्ञा कौरे राए, सै तियौं पूरा कौरणौ दा शौकतीशाली औसौ।

²² अब्राहम कै बिशवाश की बौजैह शै, पौरमेशवरे तैसीकै धरमी साबित कौरा।

²³ औरौ ऐजा वचन कि, “अब्राहम कै पौरमेशवर पांदी बिशवाश कौरणौ कै दवारा धरमी साबित कौरा,” ना सिरफ तैसी कारिए लैखै रैई,

²⁴ पौरौ आमु कारिए बै पौरमेशवर धरमी साबित कौरौ, जै आमु पौरमेशवर पांदी बिशवाश कौरु, जैणै अमारै प्रभु यीशु कै मौरेयौंदे मुंजीदा जियुंदी कौरा, तौ आमु बै बिशवाश की बौजैह शै धार्मिक मानै जांदै।

²⁵ यीशु अमारै पापौ कारिए मौरे गौआ, औरौ पौरमेशवर आमु धरमी बाणणौ कारिए तैसी औटेयौ जियुंदी कौरा।