रोमियों 15 - सिरमौरी नौवाँ नियमओकी का भार उठाणा 1 आमै जू बिशवाश दै मोजबूत औसौ जाणुए कै इनु बातौ लैई कुणजाई फर्क ना पौड़ौ, पौरौ आमु तिनु सिरफ आपी कै खुश कौरणौ कारिए ना कौरे सौकु। आमु तिनु लोगौ कै शकौ औरौ डौर पांदी सुंचणौ चैंई जू इनु बातौ कै गौलत मानौ। 2 आमु मुंजीदै हरेक आपणै साथी बिशवाशी कै साथै ऐशै कौरणौ चैंई जू तैसकै मनो कै खुशी कौरौ तैसकै बिशवाश कै मोजबूत कौरणौ दै मौदद कौरौ। 3 जिथुकै मसीहे आपी कै खुशी ना कौरी, पौरौ जैशैखै पवित्र शास्त्र दो लैखै राए, “जिनु लोगै तैरै बैज्जती कौरे, तिनुऐ मैरै बै बैज्जती कौरे।” 4 जैतरी बातौ आगै पवित्र शास्त्र दी लैखै रैई, सैजी अमारी ही शिक्षा खातिर लैखै राए, कै पवित्र शास्त्र शै जू आमु धीरज औरौ हिम्मत भैटौ ताकि आमु तिंदै आशा राखै सौकु कै पौरमेशवरे जू वादा कौरे राए थिया, सै पूरा कौरदा। 5 हांव प्रार्थना कौरु कै पौरमेशवर आमु सब्र औरौ उत्साह दैंव ताकि मसीह यीशु कै पाछैदै चालदै बैई आपी मुंजी एकता दै रौंव। 6 ताकि तुऐं सौबै ऐकी साथै मिलैयौ, अमारै प्रभु यीशु मसीह कै परमपिता पौरमेशवर कै स्तुति कौरौ। मिलैयौ पौरमेशवर कै महिमा 7 इथकारिए, ऐकी दूजै कै अपनांव, तोबै, जैशैकै मसीहे तुऔं अपनाए राए, ताकि लोग पौरमेशवर कै तारीफ कौरौ। 8 इथकारिए हांव बुलू मसीह, यहूदियों का सेवक ऐजौ बौताणौ कारिए बौणा, कै पौरमेशवर वादै खै पूरा कौरणौ कारिए साचा औसौ, जू तैणै तिनकै पुराणिया शै कौरे राए थिए। 9 औरौ बैगानै यहूदी लोग बै पौरमेशवर कै दया कै बौजैह शै पौरमेशवर कै स्तुति कौरौ, जैशैखै पवित्र शास्त्र बौल़ौ, “इथकारिए हांव बैगानै यहूदी लोगौ मुंजी तैरै स्तुति कौरदा, औरौ तैरै नांव का भजन गांदा।” 10 तोबै, कोसी ठाँव पांदी, पवित्र शास्त्र दो ऐजौ बै लैखै राए, “ओए रै बैगानै यहूदी कै सौबै लोगौ, पौरमेशवर कै लोगौ कै साथै खुशी मोनांव।” 11 तोबै, कोसी ठाँव पांदी, पवित्र शास्त्र दो ऐजौ लैखै राए, “ओए रै बैगानै जाति कै सौबै लोगौ, प्रभु कै स्तुति कौरौ; औरौ ओए रै राज्य-राज्य कै सौबै लोगौ; तैसकै तारीफ कौरौ।” 12 औरौ तोबै पौरमेशवर कै बातौ बौताणौवाल़ै यशायाह नांव का आदमी बौल़ौ, “यिशै कै ऐक वंश प्रगट हौला, औरौ सै बैगानै यहूदी लोगौ पांदी राज कौरदा, बैगानै यहूदी लोग शै तैणै जू वादा कौरे राए थिया तैसी पूरा कौरदा औरौ सै तिनु बौचांदा।” 13 हांव प्रार्थना कौरु कै पौरमेशवर जू आशा का दाता औसौ तैसी पांदी तुंआरै बिशवाश कौरणौ कै बौजै शै सै तुऔं पूरी तरह शै आनन्द औरौ शान्तै शै भौरी दैंव, कै पवित्र आत्मा कै अनौखी शौकतै लैई तुंआरै आशा बौढ़दै जांव। यरूशलेम शहर शै इलुरिकुम 14 ओए रै मैरै बिशवाशी भाईयों; हांव आपी बै तोंवारै बारै मुंजी निशोंक हौयौ जाणु, कै तुऐं आपी बै भले लोग औसौ औरौ तुऐं पूरी तरह शै जाणौ कै तुऔं का कौरणौ चैंई औरौ ऐकी दूजै कै शिखांदै रौव। 15 तोबै मोऐं कौथी-कौथी याद दियाणौ कारिए तुऔं बैजाए हिम्मत कौरेयौ लिखु, ऐजौ तैसी अनुग्रह कै बौजैह शै हौं, जू पौरमेशवरे मुखै दैय राए। 16 कै हांव बैगानै यहूदी लोगौ कारिए मसीह यीशु का सेवक हौयौ ऐक यहूदी पुरोहित कै जैशणा पौरमेशवर शै भैटेयौंदा सुसमाचार कै सेवा कौरु; ताकि बैगानै यहूदी लोगौ कै पौरमेशवर कै खातिर ऐक भैंट कै रुप दै दियै जांव जिथलैई सै खुशी औसौ, औरौ जिनु पवित्र आत्माए पवित्र बौणणौ कारिए जौई कौरे राए। 17 इथकारिए हांव यीशु मसीह कै बौजैह शै पौरमेशवर कै सेवा पांदी गर्व कौरे सौकु। 18 जिथुकै मसीहे मैरै दवारा जू कौरे राए हांव ऐजौ बौलणौ कारिए हिम्मत वाल़ा औसौ, हांव बैगानै जाति कै लोगौ कै पौरमेशवर का पालन कौरवाणौ मुंजी काबिल औसौ। जोबै तिनुऐ मैरै शब्दो कै शुणै औरौ मैरै कामौ कै दैखै तिनुऐ यीशु मसीह पांदी भोरोशा कौरा। 19 औरौ पवित्र आत्मा कै दवारा मुखै दैय गोई अनौखी शौकतै शै हांव अनौखै काम औरौ चौमत्कार कौरु इथकारिए जिथै बै हांव यरूशलेम शहर शै इल्लुरिकुम प्रदेश तौड़ी हौटा, तौ मोऐं तिथै सौबी लोगौ कै, यीशु मसीह कै बारै मुंजी सुसमाचार शुणौऊवा। 20 पौरौ मैरै मन कै चाहत ऐजी औसौ, सुसमाचार का प्रचार तिनु प्रदेशो दा हौंव, जिथै यीशु मसीह कै बारै मुंजी इबी तौड़ी ना शुणाए रैई, हांव तैसी घोर बाणणौवाल़ै मिस्त्री कै जैशणा औसौ, जू कोसी ओकी कै नीयुं पांदी ना चिणो। 21 पौरौ हांव तैसी बात कै पूरा कौरणा चोऊं जू पवित्र शास्त्र बौल़ौ, तैशैखैई हौंव, “जिनु तैसकै बारै मुंजी कौलोंई ना बौल़ै रैई, सैजै दैखदै औरौ जिनुवै कौलोंई तैसकै बारै मुंजी ना शौणै रैई सै सौमझदै।” रोम देश कै जाणौ कै तैयारी 22 इथकारिए हांव तोंवारै धोरे आणौ शै बार-बार रौकै गौआ। 23 पौरौ ऐबै इनु प्रदेशो दै जिनु लोगै मसीह कै बारै मुंजी ना शौणै रैई, तिनु बै सुसमाचार शुणाणौ का काम पूरा कौरे दिया, औरौ बैजाए सालो दै उंढे मुखै तोंवारै धोरे आणौ का मन औसौ। 24 इथकारिए जोबै हांव इसपानिया देश कै जांदा तौ मुखै आशा औसौ, कै तैसी यात्रा दा तुंआरी मुलाकात कौरु, औरौ जोबै हांव तुंआरी संगति लैई आनंदित हौए जोऊं, तौ हांव चोऊं कै तुऐं इसपानिया देश कै यात्रा कारिए मैरी मौदद कौरौ। 25 पौरौ इबी तौ हांव पौरमेशवर कै पवित्र लोगौ कै भैंट दैणौ कै खातिर यरूशलेम शहर कै जांदा लागै रौआ। 26 जिथुकै मकिदुनिया औरौ अखाया प्रदेशो कै लोगै आपणी इछा शै ऐशै कौरणौ का फोयसला कौरा, जू यरूशलेम शहर दै पौरमेशवर कै लोग औसौ औरौ जू गरीब औसौ तिनुकै किछै दान दैंव। 27 तिनुऐ ऐजौ खुशी शै कौरौ सै यरूशलेम शहर कै रौणौवाल़ै लोगौ कै कर्जदार औसौ, जिथुकै बैगानै यहूदी लोगै यरूशलेम शहर कै रौणौवाल़ै बिशवाशियौं शै सुसमाचार कै आत्मिक आशीषै पैई, इथकारिए तिनकै जाणियुं कै इथकै बौदलै सै कम शै कम तिनुकै धन कै मौदद कौरे सौकौ। 28 इथकारिए, हांव सौबिदा आगै यरूशलेम शहर कै जांदा लागै रौआ ताकि तिनु ऐजी कौठै कौरेयौंदे मौदद राशि दियु। तिथकै बाद, तोबै हांव रोम देश दा आयौ तुऔंआरी भैटिणौ कै बाद इसपानिया देश दा जांदा। 29 औरौ हांव जाणुए कै जोबै हांव तोंवारै धोरे आन्दा, तौ मसीह तुऔं पूरै तरह शै आशीष दैंदा। 30 ओए रै बिशवाशी भाईयों; प्रभु यीशु मसीह दै अमारै बिशवाश कै बौजैह शै औरौ पवित्र आत्माए जू आमु प्यार दैय राए, तिथकै बौजैह शै, हांव तुंआदै बिन्ती कौरु, कै तुऐं मैरै खातिर पौरमेशवर शै बैजाए ही ईमानदारी शै प्रार्थना कौरौ। 31 कै हांव यहूदिया प्रदेश कै अबिशवाशियौं शै ठीक ठाक बौचेयौ रोऊं, जू चीज़ मोऐं यरूशलेम शहर कै आगु नी लोए, तिथलैई तिथै रौणौवाल़ै पवित्र लोग आनंदित हौए जांदै। 32 औरौ हांव पौरमेशवर कै इछा लैई तोंवारै धोरे आनन्द कै साथै आयौ तोंवारै साथै विशांव कौरु। 33 हांव प्रार्थना कौरु कै पौरमेशवर, जू शान्तै दैंव, तुऔं सौबी कै साथै रौंव। आमीन। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation