रोमियों 13 - सिरमौरी नौवाँ नियम

प्रधान कै अधीन

¹ हरेक आदमी प्रधान औधिकारियो कै अधीन रौया; जिथुकै सारै औधिकार पौरमेशवर कै ढौबौशै औसौ; औरौ जू औधिकारी औसौ, सैजै पौरमेशवर कै दवारा ही ठोहराए राए।

² इथकारिए जू कुणिए इनु औधिकारियो का विरोध कौरौ, सै पौरमेशवर कै नियम का विरोध कौरौ, औरौ विरोध कौरणौवाल़ै सौजा पांदै।

³ जिथुकै जै कुणिए आछै काम कौरौ, तौ तैसी औधिकार शै डौरणो कै जौरुरत ना आथी। पौरौ जै सै बुरै काम कौरौ तौ तैसी डौरणो कै जौरुरत औसौ, निडर हौयौ औधिकारियो कै साथै आछा काम कौर, तौ सै तुऔं आदर दैंदै;

⁴ जिथुकै औधिकारी लोग तोंवारै मौदद कौरणौ कारिए पौरमेशवर कै तरफ शै सेवक औसौ। पौरौ जै तू बुराई कौरला, तौ डौर, जिथुकै तिनुवागे तुऔं सौजा दैणौ का औधिकार औसौ। औरौ सै पौरमेशवर कै सेवक इथकारिए औसौ, ताकि सै तिनु लोगौ कै सौजा दैंव जिनुवै गौलत काम कौरे लौवै।

⁵ तोंवारै तिनकै अधीन हौणौ सिरफ इथकारिए नी कै तुऐं सौजा शै बौचै जांव बल्कि इथकारिए कै तोंवारा विवेक बै शुध्द रौंव।

⁶ इथकारिए कर बै दौ, जिथुकै शासन कौरणौवाल़ै पौरमेशवर कै सेवक औसौ, आपणी जूमैवारियौ कै निभाणो कारिए सै आपी कै दैय दैंव।

⁷ इथकारिए जैसी जू किछै दैय जाणौ सौंपै राए, तैसी सैजौ दैव; जैसी कर चैंई, तैसी कर दैव; जैसी मामला चैंई, तैसी मामला दैव, जैसदै डौरणो चैंई, तैसीदै डौरौ; जैसका आदर कौरणा चैंई तैसका आदर कौरौ।

पड़ोसी आरी प्यार

⁸ आमु सौबी कै सिरफ ऐकी बातौ का कर्जदार हौणौ चैंई, औरौ सैजौ ऐजौ औसौ कै आमु सौबै कै ऐकी दुजैआरी प्यार राखणा चैंई; जिथुकै जू ओकीआरी प्यार राखौ, तैणै ही मूसा कै कानून पूरै कौरे राए।

⁹ जिथुकै मूसा कै कानून दी कैई आज्ञाए औसौ जैशैकै, “गौलत सौमबंध नी बाणैया, खून नी कौरेया, चोरी नी कौरेया, लालच नी कौरेया,” औरौ इनु कै छोड़ेयौ औकै कुणजै बै आज्ञा हौंव तौ सौब का सारांश इयौं आज्ञा दा पाया जांव, “तू आपणै पड़ोसी शै तैतरा प्यार कौर जैतरा आपी आरी कौरे।”

¹⁰ प्यार, पड़ोसी कै किछै बुराई ना कौरौ, जू प्यार कौरौ, सै मूसा कै कानून कै पूरा कौरौ।

मसीह कै धारण कौरणा

¹¹ तुऔं कै ऐकी दुजैआरी प्यार कौरदै रौणौ चैंई जिथुकै सैजा सौमय नेड़िक औसौ जोबै पौरमेशवर आमु इयौं बुरै दुनिया शै बौचांदा। जोबै आमु आगली बैई मसीह पांदी बिशवाश कौरु थिए, तैसी दूसौ कै हिसाब शै ऐबै मसीह आमु बौचाणौ कारिए औटेयौ पाछु आणौ कु दूस नेड़िक औसौ।

¹² इयौं बुरै दुनिया दा रौणौ का अमारा सौमय ऐकी राती कै खत्म हौए जाणौ कै जैशणा लमसम खत्म हौए गौआ, औरौ सैजा सौमय बै नेड़िक औसौ जोबै मसीह पाछु आन्दा। आमु तिनु बुरी चीज़ौ कै बंद कौरे दैणै चैंई जू लोग इनारै दै कौरौ। आमु तिनु हथियारों कै इस्तैमाल कौरणै चैंई जू इनारै दै इस्तैमाल कौरे जांव।

¹³ आमु आपणा बर्ताव ठीक कौरे दैणा चैंई, तिनु लोगौ साए जू पेयाशै दै रौंव, औरौ इनारै दै ना रौंव, ना कै लीलाक्रीड़ा, औरौ पियक्‍कड़, ना गौलत सौमबंध दै औरौ लुचपन दै, औरौ ना झोगड़े औरौ ना ज़लन दै हौयौ बर्ताव कौरौ।

¹⁴ पौरौ प्रभु यीशु मसीह तुऔं आरी सुरक्षा बौणै जांव, जिथकै दवारा तुंआरी रक्षा हौए सौकौ, औरौ पापी स्‍वभाव कै इछाओं खै पूरा कौरणौ कै कौचिश ना कौरौ।