रोमियों 11 - सिरमौरी नौवाँ नियम

इस्राएल देश पांदी पौरमेशवर कै दया

¹ इथकारिए हांव पूछु, का पौरमेशवर आपणै लोगौ कै छोड़े दियै? ना! बिल्कुल नी! हांव बै तौ इस्राएली औसौ, अब्राहम कै वंश औरौ बिन्‍यामीन कै गोत्र पौरैशा औसौ।

² पौरमेशवरे आपणै लोगौ खै ना छुड़ी; जिनु तैणै आगै दै ही चोणे राए: तुऐं जाणौए कै पवित्र शास्त्र पौरमेशवर कै बातौ बौताणौवाल़ै एलिय्याह कै कहाणी दु का बौल़ौ; कै सै इस्राएल देश कै लोगौ कै खिलाफ पौरमेशवर शै शिकायत कौरौ?

³ तैणै बौल़ौ, “ओए रै प्रभु, तिनुऐ पौरमेशवर कै बातौ बौताणौवाल़ै कै मारै दियै, औरौ तैरी बेदियों कै नाश कौरे दी; औरौ हांव ही सिरफ ऐकै आदमी औसौ जू इबी तौड़ी तैरै पौछौड़ियौ चालै रौआ, औरौ सै मैरी बै जान लोणे चांव।”

⁴ पौरौ पौरमेशवरे एलिय्याह कै बौल़ौ, “मोऐं आपणै खातिर सात हजार मर्द कै राखै राए, जिनुवै झूठै बाल देवता कै मूर्ति कै आराधना ना कौरी।”

⁵ ऐशैखैई ऐसी सौमय बै, पौरमेशवर कै अनुग्रह शै दैणिक यहूदी लोग औसौ जिनुकै पौरमेशवरे आपणै साची लोगौ कै रुप दै चोणे राए।

⁶ पौरमेशवर का तिनु चुणणा अनुग्रह लैई हौए रौआ, ऐजौ भले कामौ खै कौरणौ कै दवारा ना होई रैई। पौरौ जै कामौ कै दवारा औसौ, तौ अनुग्रह तोबै अनुग्रह ना रोई।

⁷ भलैई इस्राएल देश कै लोग पौरमेशवर कै साथै धरमी बौणणौ कै कौचिश कौरौ पौरौ सै नाकाम रौवै, जोबै कै जिनु लोगौ कै पौरमेशवरे चोणे राए सै तिनकै साथै धरमी बौणणौ कै कौचिश कौरौ, औरौ बाकी लोगौ कै जिद्दी बाणै दियै औरौ पौरमेशवर कै बात शुणणौ शै मोना कौरे दियु।

⁸ पौरमेशवर कै बातौ बौताणौवाल़ै यशायाह कै दवारा पवित्र शास्त्र दो बौल़ै राए, “पौरमेशवरे तिनु ऐलो कै दूसौ तौड़ी सुस्त दिमाक दैय राए, सैजै दैखदै बैई बै ना दैखौ, औरौ शुणौ तौ औसौ पौरौ किछै बै ना सौमझौ।”

⁹ राजा दाऊद बौल़ौ, “जैशै सै एकदम पाकड़ै जांव जोबै कै सै आपणै दावतो मुंजी औसौ जैशै ऐक चिड़कुलु ऐकी जाल दौ ऐकदम पाकड़ै जांव या ऐक गोरु जू गौढै दौ ऐकदम शै छुटै जांव ताकि तिनुकै ठीक शै सौजा भैटौ,

¹⁰ तिनकै मन दो बै इनारौ हौए जांव ताकि सै सच कै ना सौमझौ, औरौ सै हमैशा बोझ औरौ पौरैशानी दै रौंव।”

इस्राएल देश का मना कौरणा आखरी ना आथी

¹¹ तौ हांव बुलू का जोबै इस्राएल देश कै लोग मसीह पांदी बिशवाश ना कोरी, तौ तोबै कौलोंई ना बिशवाश कौरलै? ना! बिल्कुल नी! पौरौ तिनकै आज्ञा ना मानणौ कै बौजैह शै बैगानै यहूदी लोगौ कै उध्दार भैटदा, ताकि इस्राएल कै लोगौ कै ज़लन हौए जांव।

¹² इथकारिए जै इस्राएल कै लोगौ का अबिशवाश बैगानै यहूदी लोगौ कै भोलाए कि बौजैह बौणौ, तौ इस्राएल कै लोगौ कै पौरमेशवर कै धोरे पाछु जाणौ पांदी सौथीखै बैगानै जाति कारिए बौहितु आछौ हौए जांदो।

¹³ हांव तुऔं बैगानै यहूदी लोगौ शै ऐजी बातौ बुलू। जोबै कै हांव बैगानै यहूदी लोगौ कारिए चोणेयौंदा चैला औसौ, तौ हांव आपणै सेवकाई पांदी घमण्‍ड कौरु,

¹⁴ ताकि कोसी रीति शै हांव आपणै लोगौ मुंजी ज़लन पौयदा कौरे सौकु तिनुमुंजी दै कैईंयौं कै मोक्ति कौरौऊं।

¹⁵ जिथुकै जोबै इस्राएल कै लोगौ कै छोड़े दैणौ कै बौजैह शै दुनिया कै लोगौ का पौरमेशवर कै साथै मैल-मिलाप हौआ, तौ तिनकै मसीह कै स्‍वीकार कौरणा, ऐक मौरेयौंदे आदमी कै औटेयौ जियुंदी हौए जाणौ कै जैशणा हौंदा।

¹⁶ हांव यहूदी लोगौ कै बारै मुंजी तुऔं ऐक उदारण दियु। ऐजा आमु यहूदी लोगौ का भोवार औसौ, जोबै आमु रोटी बाणणौ कारिए आटो बाटु, तौ आमै पौरमेशवर कै भैंट दैणौ कै मुट्ठी भोरेयो आटो कौरु। जै सैजी ऐक मुट्ठी पौरमेशवर कै औसौ, तौ इथका मतलब औसौ कै पूरु आटो बै तैसकौ औसौ। तैशैखैई जै जड़ पौरमेशवर कै औसौ, तौ डाल़ी बै पौरमेशवर कै औसौ।

¹⁷ इस्राएल कै लोग ऐक आछै जैतून कै डाल़ो कै डाल़ी कै जैशणै औसौ औरौ पिता अब्राहम, इसहाक औरौ याकूब तैसी डाल़ कै जड़ कै जैशणै औसौ। बैगानै यहूदी लोग जोंगली जैतून कै डाल़ कै डाल़ी औसौ, जू कलम कौरेयौ तिनु काटैयौंदी शाई कै जौगैह दी तैसी डाल़ दी लाए राए, ऐबै सैजी शाई तैसी जड़ कै खुराक कै हकदार औसौ।

¹⁸ तौ तुऐं आपी कै तिनु काटैयौंदी शाई शै बौढ़ेयौ ना सौमझौ। जै तुऐं बौढ़ेयौ सौमझौ, तौ याद राखौ कै तुऐं जड़ कै ना संभाल़ो, बल्कि जड़ ही तुऔंखै संभाल़ो।

¹⁹ तुऐं आपणै मन दो ऐजौ नी सोंचैया कै पौरमेशवरे यहूदी लोगौ कै तिनु शाई कै जैशणै ठुकराए दिए जू ऐक डाल़ शै तौड़ै जांव, ताकि सै बैगानै यहूदी लोगौ कै अपनाए सौकौ, जू तिनु शाई कै जैशणै औसौ जिनु कलम दैय राए।

²⁰ ऐजौ साचौ औसौ, सै तौ अबिशवाश कै बौजैह शै तौड़ै गोई, पौरौ तू बिशवाश दा बौणेयौंदा रौंव, इथकारिए घमण्डी नी हौं, पौरौ डौर मानैया,

²¹ जिथुकै जोबै पौरमेशवरे आछी शाई पांदी दया ना कौरी, तौ सै तुऔं पांदी दया ना कौरदा।

²² इथकारिए पौरमेशवर कै दया औरौ सख्ताई पांदी ध्यान दैंव! जू बिशवाश शै भौटकै! तिनु पांदी सख्ताई, पौरौ तुऔं पांदी दया हौए रौए, तुऐं तैसकै दया दै बौणैयौंदे रौव, नही, तौ काटैयौ जौई कौरे दियै जालै।

²³ जै इस्राएली लोग बै बिशवाश कौरणा शुरु कौरौ, तौ तिनु औटेयौ डाल़ दै कलम कै जैशणै लाए जालै, जिथुकै पौरमेशवर तिनु जोड़े सौकौ।

²⁴ कोसी जोंगली शाई का कोसी आछै डाल़ का हिस्सा बोणणा स्‍वभाव कै खिलाफ औसौ। औरौ तुऐं जू यहूदी ना आथी ऐक जोंगली जैतून कै डाल़ो पौरैशी काटैयौंदे शाई कै जैशणै औसौ, औरौ ऐक आछै जैतून कै डाल़ दै शामिल हौए गौवै। पौरौ सैजै यहूदी लोग ऐक शाई कै जैशणै औसौ जू आछै डाल़ो दै बौढ़ै थिए, तिनु निशोंक हौयौ औटेयौ आपणै डाल़ दै मिलाए सौकौ।

²⁵ ओए रै बिशवाशी भाईयों, हांव ना चोऊं कै तुऐं ऐसी भैद शै अणजाण रौंव ऐशै ना हौंव कै तुऐं आपी पांदी घमण्‍ड कौरदै लागौ, ऐजौ साचौ औसौ कै इस्राएल देश कै किछै लोग बिशवाश कौरणौ कै तैयार ना आथी, पौरौ जोबै पौरमेशवर पांदी बिशवाश कौरणौवाल़ै बैगानै यहूदी लोगौ कै गिनती पूरै हौए जालै, तौ इस्राएल कै लोग बिशवाश कौरदै औरौ पौरमेशवर कै धोरे पाछु आए जांदै।

²⁶ ऐजौ हौणौ कै बाद सौबै इस्राएल देश कै लोग उध्दार पांदै; जैशैखै पवित्र शास्त्र दो लैखै राए, “बौचाणौवाल़ा यरूशलेम शहर शै आन्दा, औरौ अभक्‍ति कै याकूब शै दूर कौरदा,

²⁷ औरौ तिनकै साथै मैरै ऐजी कौरार हौन्दी, जोबै कै हांव तिनकै पापौ खै माफ कौरदा।”

²⁸ यहूदी लोग पौरमेशवर कै दुशमन औसौ जिथुकै सै सुसमाचार पांदी बिशवाश ना कौरणा चांव, औरौ ऐजौ तुऔं कारिए फायदा बौणै गौआ। पौरौ पौरमेशवर तिनु प्यार कौरौ जिथुकै तैणै तिनु आपणै खातिर चोणे राए। इयौं बातौ का तैणै तिनकै पुराणिया शै वादा कौरे राए थिया।

²⁹ जिथुकै पौरमेशवर आपणै अनुग्रह शै, औरौ बुलाहट शै कौलोंई बै आपणा मन ना बौदलौ।

³⁰ जिथुकै जैशै बैगानै लोगै आगै पौरमेशवर कै आज्ञा ना मानी, पौरौ इबी इस्राएली लोगौ कै आज्ञा ना मानणौ शै बैगानै लोगौ पांदी दया हौए।

³¹ तैशैखैई तिनुऐ बै ऐबै आज्ञा ना मानी कै तुऔं पांदी जू दया हौंव इथलैई तिनु पांदी बै दया हौंव।

³² जिथुकै पौरमेशवर सौबी लोगौ कै ठुकराणो कै रजामंदी दैंव, ताकि सै सौबी लोगौ पांदी आपणै दया दिखाए सौकौ।

³³ आहा, पौरमेशवर कै अनुग्रह का धन औरौ बुध्‍दि औरौ ज्ञान कैतरै गंभीर औसौ! कुणिए बै तैसकै फोयसलै कै बखान ना कौरे सौकौ; औरौ ना ही कुणिए तैसकै बाटो कै जाणै सौकौ!

³⁴ “प्रभु कै विचारो कै कुणिए बै ना जाणै सौकौ, औरौ ना ही कुणिए तैसका सलाहकार बौणै सौकौ,

³⁵ औरौ कोसीए पौरमेशवर खै किछै ना दी कै पौरमेशवर कै तैसी सैजौ पाछु दैणौ पौड़ौ।”

³⁶ जिथुकै सौब ठुँ पौरमेशवर शै आंव। तैणै सौब ठुँ बाणै राए, औरौ सौब ठुँ तैसकौ ही औसौ। तैसकै महिमा जुग-जुग हौन्दै रौंव। आमीन।