रोमियों 10 - सिरमौरी नौवाँ नियम

इस्राएल देश कै सुसमाचार कै जौरुरत

¹ ओए रै बिशवाशी भाईयों, मैरै मन कै इछा औरौ पौरमेशवर शै मैरै प्रार्थना औसौ कै इस्राएल कै लोगौ खै पौरमेशवर बौचांव।

² जिथुकै हांव तिनुकै गवाही दियु, कै तिनुखै पौरमेशवर कै खातिर जोश रौंव, पौरौ पौरमेशवर कै सेवा कैशै कौरणै चैंई, इथकै बारै मुंजी तिनकै सौमझ सोही ना आथी।

³ जिथुकै सैजै लोग पौरमेशवर कै धार्मिकता कै साबित कौरदै बैई, आपणै तरीकै शै धरमी बोणणौ कै कौचिश कौरौ, औरौ ना आपी कै पौरमेशवर कै धार्मिकता कै अधीन कौरौ।

⁴ जिथुकै मसीह कै आणौ शै मूसा कै कानून का मकसद पूरा हौए गौआ इथकारिए जू कुणिए मसीह पांदी बिशवाश कौरौ पौरमेशवर तैसी धरमी साबित कौरौ।

उध्दार सौबी कारिए औसौ

⁵ जिथुकै पवित्र शास्त्र दै मूसा कै कानून धार्मिकता कै बारै मुंजी बौल़ौ: “जू आदमी मूसा कै कानून का पालन कौरौ, सै मूसा कै कानून लैई जियुंदी रौंदा।”

⁶ पौरौ जू धार्मिकता बिशवाश शै औसौ, तिथकै बारै मुंजी पवित्र शास्त्र ऐजौ बौल़ौ, “आपी कै ऐजौ ना बौल़ौ कै कुण अमारै उध्दार कै खातिर स्वर्ग तौड़ी ऊबा जाला, मसीह खै धैनै धोरती पांदी लाणौ कारिए?”

⁷ आपणै मन दो ऐजौ ना बौल़ौ कै मसीह कै मौत शै जिंदा कौरणौ कारिए कुण मौरेयौंदे कै दुनिया दा पताल़ो तौड़ी जाला?

⁸ इयौं बातौ का मतलब ऐजा औसौ कै, “आपणै मुँह लैई मानै पा औरौ आपणै मन लैई अपनांव,” कै जू सौंदेश बौतांव कै आमु पौरमेशवर पांदी भोरोशा कौरणा चैंई, औरौ ऐजाई आमै प्रचार कौरु।

⁹ इथकारिए जै तुऐं आपणै मुँह लैई लोगौ कै सामणै यीशु मसीह कै प्रभु जाणैयौ अपनांव, औरौ आपणै मन दा ऐजा बिशवाश कौरौ कै पौरमेशवरे मसीह कै मौरेयौंदे मुंजीदा जियुंदी कौरा, तौ पौरमेशवर तैरा उध्दार कौरदा।

¹⁰ आमै आपणै मन शै बिशवाश कौरु, औरौ इथकारिए आमु पौरमेशवर कै साथै धरमी साबित होऊं। औरौ अमारै मुँह कै अंगीकार अमारै बिशवाश कै दिखांव जिथलैई आमै बौचाए जोऊं।

¹¹ जिथुकै पौरमेशवर कै बातौ बौताणौवाल़ै यशायाह नांव कै आदमीए मसीह कै बारै मुंजी पवित्र शास्त्र दो लैखै राए, “जू कुणिए तैसी पांदी बिशवाश कौरला सै बैज्जत ना हौंदा।”

¹² यहूदी औरौ बैगानै यहूदी लोगौ मुंजी किछै भैद ना आथी, इथकारिए कै पौरमेशवर सौबी का प्रभु औसौ औरौ सै आपणै सौबी लोगौ खै बौचांव, जू तैसीकै मौदद कारिए पुकारौ।

¹³ जिथुकै पवित्र शास्त्र दो ऐजौ लैखै राए: “प्रभु तिनु सौबी लोगौ कै बौचांदा जू तैसकै नांव कै पुकारौ।”

इस्राएल देश कै लोगै सुसमाचार कै ना औपनेई

¹⁴ पौरौ बिशवाश कौरणौ शै लोग पौरमेशवर शै मौदद मांगै सौकौ, औरौ प्रभु पांदी बिशवाश कौरणौ कारिए लोगौ खै तैसका वचन शुणणा चैंई, औरौ जिनु लोगै प्रभु कै बारै मुंजी ना शौणै रैई, तौ बिशवाशी लोगौ कै चैंई कै सै यीशु मसीह कै बारै मुंजी तिनुकै बौतांव।

¹⁵ औरौ इदै आगै कै सुसमाचार शुणाणौ वाल़ै जायौ तिनु बौताए सौकौ, सुसमाचार शुणाणौ वाल़ै खै भैजणै जौरुरी औसौ, इथकारिए पवित्र शास्त्र बौल़ौ, “तिनकै पांव किशैक सुन्दर औसौ, जू आछी बातौ का सुसमाचार शुणांव!”

¹⁶ पौरौ सौबीए तैसी सुसमाचार पांदी बिशवाश ना कौरी। पौरमेशवर कै बातौ बौताणौवाल़ै यशायाहै बौल़ौ, “ओए रै प्रभु, कोसीए बै अमारै सौंदेश पांदी बिशवाश ना कौरी।”

¹⁷ इथकारिए बिशवाश तोबै आंव जोबै कुणजाई सौंदेश शुणौए औरौ ऐजा सौंदेश मसीह कै बारै मुंजी वचन औसौ।

¹⁸ पौरौ हांव बुलू, कै यहूदी लोगै निशोंक हौयौ मसीह कै बारै मुंजी सौंदेश शौणै राए, जिथुकै पवित्र शास्त्र दु लैखै राखौ, “सुसमाचार शुणाणौ वाल़ै कै सौंदेश सारै दुनिया पांदी, औरौ तिनकै वचन दुनिया कै हर जौगैह दै पोऊंचे गौवै।”

¹⁹ तोबै बै हांव बुलू, कै ऐजौ साचौ औसौ कै इस्राएल देश कै लोगौ खै मसीह कै बारै मुंजी सौंदेश सौमझ ओऊवा। आगै तौ प्रभुए पौरमेशवर कै बातौ बौताणौवाल़ै मूसा कै दवारा बौल़ै राए, “हांव ऐक ऐशणै देश कै दवारा जू ऐक देश ही ना आथी, तुऔं दा ज़लन पौयदा कौरदा, हांव तुऔं ऐक ऐशणै देश कै दवारा गुस्सा दिलांदा, जिंदै सौमझ ही ना आथी।”

²⁰ पौरमेशवर कै बातौ बौताणौवाल़ै यशायाहै बौड़ै हिम्मत कै साथै बौल़ौ कै प्रभु बौल़ौ, “जू मुखै नी जौंओ थिए, तिनुऐ मुखै पाए दिया, औरौ जू मुखै पूछौ बै ना थिए, तिनु पांदी हांव प्रगट हौए गौआ।”

²¹ पौरौ इस्राएल देश कै लोगौ कै बारै मुंजी पौरमेशवरे, पौरमेशवर कै बातौ बौताणौवाल़ै कै दवारा बौल़ौ, “हांव दूस भोरै ऐक आज्ञा ना मानणोवाल़ै औरौ झोगड़ा कौरणौवाल़ै लोगौ खै आपणै धोरे बौईदणो कारिए इंतजार कौरदा रौआ।”