प्रकाशितवाक्य 9 - सिरमौरी नौवाँ नियम

पाँचवें तुरही

¹ जोबै पाँचवें स्‍वर्गदूतै तुरही फोकै, तौ मोऐं स्वर्ग शै धोरती पांदी ऐक तारा गिरदै बैई दैखा, औरौ तारै खै सैजी चाबै दैय गौए जू तैसी गौढै कै खोले सौकौ जिथकै गहराई का कौलोंई अन्त ना हौए सौकौ।

² तैणै तैसी गौढै कै खौला, औरौ तैसी गौढै पौरैशौ बौड़ै भट्टी जैशणौ धुआँ ओऊवा, औरौ सुरज औरौ हावा तैसी गौढै कै धूएँ लैई छिपै गौवै।

³ तैसी धूएँ पौरैशौ धोरतियौं पांदी चिचलै निकल़ै, औरौ तिनु बिच्‍छू साए लोगौ खै डंक मारणौ कै शौकतै भैटी।

^4-5 जैशै कोसी खै बिच्छू कै डंक मारणौ शै दर्द हौंव, तैशैखैई इनु चिचलै खै पाँच मीनै तौड़ी तिनु लोगौ खै तड़पाणौ कै रजामंदी दैय राए थै, जिनकै माथै पांदी पौरमेशवर कै मोहर का निशान ना थी। पौरौ तिनु ना तौ धोरती कै घास खै, ना कोसी पौधे खै, औरौ ना ही कोसी डाल़ो खै नुकसान पोऊंचाणा थिया।

⁶ तिनु पाँच मीनै दै लोग मोरणो का तरीका जौले, पौरौ सै मौरे ना सौकदै। सै मौरणौ कै इछा कौरदै, पौरौ सै मौरे ना सौकदै।

⁷ ऐजै चिचलै घोड़े कै जैशणै दैखैयो थिए, जू युध्द दै जाणौ कारिए तैयार हौं। तिनुऐ आपणै मुंडौ पांदी किछै बाम्बै राए थियु जू सूनै कै मुकुट जैशणौ जाणियौ थियु। तिनकै मुँह लोगौ कै मुँह कै जैशणै थिए।

⁸ तिनकै बाल बैटमाणिशौ कै बाल़ौ कै जैशणै लाम्बै थिए। तिनकै दांद शेर कै दांदो कै जैशणै मोजबूत थिए।

⁹ आपणी छाती पांदी तिनुऐ लोहे कै बाणैयौंदा कवच बाम्बै राए थिए। जोबै सै उड़ांव थिए, तौ सै ऐशणै आवाज़ कौरौ थिए जैशै घोड़े लौड़ाई पांदी जाणौवाल़ै रथों खै खिंचदै बैई कौरौ।

¹⁰ तिनकै बिछुओं कै जैशणै पूँछ औरौ डंक थिए। सै आपणै पूँछ कै डंक कै साथै पाँच मीनै तौड़ी लोगौ खै नुकसान पोऊंचाणौ दै काबिल थिए।

¹¹ ऐक राजा औसौ जू तिनु काबू कौरौ। सै सैजैई दुष्ट दूत औसौ जिनिए गौढै खै खौलै राए थिया इब्रानी भाषा दा तैसकौ नांव दौ अबद्दोन औसौ, औरौ यूनानी भाषा दा, अपुल्योन औसौ, जिथका मतलब औसौ, सै जू नाश कौरौ।

¹² पाँच मीनै कै बाद ऐजी मुसीबत खत्म हौए जांदी। पौरौ इथकै बाद बै दौ ओकी मुसीबत आणौवाल़ी औसौ।

छौठे तुरही

¹³ इथकै बाद, छौठे स्‍वर्गदूतै आपणै तुरही फोकै, जोबै तैणै ऐजौ फूंकु तौ मोऐं पौरमेशवर कै सामणै धूप जौल़ाणौ कै सूनै कै बैदी कै चोऊ कुणै शै ऐक आवाज़ शौणै,

¹⁴ औरौ आवाज़ै छौठे स्‍वर्गदूत शै बौल़ौ, जैणै तुरही खै पाकड़ै राए थै, “ऐबै तिनु चोऊ दुष्ट दूत खै खौलै दै जू फरात नांव कै बौड़ी नोंदी कै किनारे पांदी बानैयौंदे औसौ।”

¹⁵ इथकारिए ऐबै सैजै चारै दुष्ट दूत खोले दियै। सैजै आगै दै ही तैयार थिए औरौ तिनु बौल़ै राए थियु कै ऐसी सौमय, ऐसी दूस, ऐसी मीनै औरौ ऐसी साल कारिए इंतजार कौरौ औरौ ऐबै ऐजौ आए गौ थियु। तिनु दुनिया कै ऐक हिस्सा लोगौ खै मार दैणै थिए।

¹⁶ तिथै घुड़शवार सैनिकौ कै ऐक बौड़ै फौज लोड़ाई पांदी जाणौ कारिए कौठै हौए, जिनकै गिनतै मोऐं बीश करोड़ शौणै।

¹⁷ सै घोड़े औरौ तिनकै शवार जिनु हांव दर्शन दै दैखु, सै ऐशैखै दैखैयो थिए: तिनकै कवच आग साए लाल, गैहरी नीली औरौ गन्धक कै जैशणी पीली थै। घोड़े कै मुंड शेरो कै मुंडौ जैशणै जाणियौ थिए, तिनकै मुँह बाटी आग, धुआँ औरौ गन्धक निकल़ौ थै।

¹⁸ इनु तीनै समस्याए, जू कै घोड़ो कै मुँह शै निकल़णौ वाल़ै आग, धुआँ औरौ गन्धक थै, सौबै आदमी मुंजीदै ऐक तिहाई खै मारै दै दियै।

¹⁹ पौरौ तिनु घोड़ो कैई लोगौ खै मारणौ कारिए दौ जौई चीज़ौ थी, आगलै तौ सैजी जू तिनकै मुँह शै निकल़ौ थै, दूजै तिनकै पूँछो दै थी। जिथुकै तिनकै पूँछ शोंगोऊं कै जैशणी थी, तिंदै लोगौ खै काटणौ कारिए मुंड थिए।

^20-21 पौरौ बाकी कै लोग जू तिनु पौरैशानी शै आगै नी मौरे रैई थी, तिनुऐ ऐबै बै आपणै बुरै कामौ शै पाप कौरणै ना छुड़ी। हत्या कौरणै, बाण बौणाटा, गौलत सौमबंध औरौ चोरी कौरणै ना छुड़ी। तिनुऐ दुष्टआत्माओं औरौ आपणै हाथौ शै बौणेयौंदी चीज़ौ कै पूजा कौरणै बै ना छुड़ी, जैशैकै सूनै या चांदी या पीतलो या पाथर या लाकड़ी शै बौणेयौंदी मूर्ती। सैजी मूर्ती, ना दैख सौकौ, ना शौणै सौकौ, औरौ ना ही हांडै सौकौ।