प्रकाशितवाक्य 8 - सिरमौरी नौवाँ नियम

सातोंई मोहर-तुरहियाँ औरौ सूनै कौ धूपदान

¹ जोबै मेम्ने सातवें मोहर खोले, तौ सैजै जू स्वर्ग दै थिए आधै घाण्टे तौड़ी शान्त हौए गौवै।

² औरौ मोऐं तिनु सातो स्‍वर्गदूतौ खै जू पौरमेशवर कै सामणै खौड़ै रौंव, दैखै, औरौ तिनु सात तुरहियाँ दैय दी।

³ तिथैदा, ऐक ओका स्‍वर्गदूत ओऊवा औरौ वेदी कै धोरे खौड़ा हौआ। तैसी स्‍वर्गदूतै धूप जौल़ाणौ कारिए सूनै शै बौणेयौंदा धूपदान लोऊवा औरौ तैसी पौरमेशवर कै सौबै पवित्र लोगौ कै प्रार्थनाओं कै साथै जौल़ाणौ कारिए बौहितै धूप दियै। तैणै धूप औरौ प्रार्थनाओं खै तैसी सूनै कै बैदी पांदी जोल़ाए दियै, जू पौरमेशवर कै सिंहासन कै सामणै थिए।

⁴ जोबै तैणै ऐशै कौरौ, तौ धूप पौरैशा धुआँ पौरमेशवर कै लोगौ की प्रार्थनाओं कै साथै औटेयौ पौरमेशवर कै सामणै हौटा।

⁵ तोबै स्‍वर्गदूतै धूपदान नियौ बैदी पांदी शै जोल़ेयौंदे अंगारो लैई भोरै दियु, औरौ धोरती पांदी रिताए दियु, औरौ गुड़कौ, औरौ शोब्द औरौ बिजली औरौ भुईचोल़ हौंदै लागै।

⁶ औरौ सैजै सात कै सात स्‍वर्गदूत जिनुकैईं सात तुरहियाँ थी, फूंक मारणौ कै तैयार हुवे।

आगलै तुरही

⁷ आगलै स्‍वर्गदूतै आगलै तुरही बौजाए, तौलोंई लोऊ लैई मिलीयौंदी बौहितै सारी शौरू कै बौरखा औरौ आग धोरती पांदी छुटै। इयौं बौजैह शै धोरती का ऐक तिहाई हिस्सा जौल़ै गौआ, औरौ ऐक तिहाई हिस्सा डाल़ो का जौल़ै गौआ, औरौ सौबै हौरो घास बै जौल़ै गौ।

दूजै तुरही

⁸ दूजै स्‍वर्गदूतै तुरही फोकै, ऐशै किछै जू ऐक बौड़ै जोल़ेयौंदे पाहाड़ कै जैशणा दैखियौं थियु, समुन्द्र दौ रिड़ै गौ। इयौं बौजैह शै समुन्द्र बै ऐक तिहाई लोऊ हौए गौ,

⁹ समुन्द्र दै रौणौवाल़ै ऐक तिहाई जानवर मौरे गौवै। इथुवै समुन्द्र कै ऐक तिहाई जहाजो खै बै नाश कौरे दियै।

तिजै तुरही

¹⁰ तिजै स्‍वर्गदूतै तुरही फोकै, औरौ ऐक बौड़ा तारा जू मशाल कै जैशणा जौल़ौ थिया, स्वर्ग शै छुटा, इयौं बौजैह शै नोंदी कै ऐक तिहाई पांदी, औरौ तिनु ताजै पाणी कै औगल़ौ पांदी पौड़ौ।

¹¹ जैसी बौजैह शै पाणी का सैजा हिस्सा कौडुवा औरौ जैहरीला हौए गौआ। औरौ इथु पिणौ वाल़ै बौहितै कै मौत हौए गौए, औरौ तैसी तारै कौ नांव कौडुवा राखै गौआ।

चौथी तुरही

¹² चौथै स्‍वर्गदूतै तुरही फोकै, औरौ सुरज कै ऐक तिहाई, औरौ चांद कै ऐक तिहाई औरौ तारै कै ऐक तिहाई पांदी औरौ किछै टौकरोऊ औरौ नुकसान हौए गौआ, इथै तौड़ी कै, दूसौ कै ऐक तिहाई सौमय तौड़ी सुरज ना चौमकी औरौ चंद्रमा औरौ तारै रात कै ऐक तिहाई सौमय तौड़ी ना चौमकी।

¹³ जोबै मोऐं औटेयौ दैखौ, मोऐं ऐक बाज खै गौयण दै ऊंचे उड़दै बैई दैखौ औरौ ऊंचे शब्द लैई ऐजौ बौलदै बैई शुणु, “जोबै आखरी तीन स्‍वर्गदूत तिनु तुरही खै फूंकौ जू तिनु दैय राए, तोबै दुनिया कै सौबै लोगौ पांदी आणौवाल़ै मुसीबतौ बैजाए ही खतरनाक औसौ। धोरती कै रौणौवाल़ै पांदी, हाय, हाय, हाय!”