प्रकाशितवाक्य 7 - सिरमौरी नौवाँ नियम

ऐक अंतराल

^1-2 इथकै बाद, मोऐं चार स्‍वर्गदूतौ कै दुनिया कै चोऊ कुणै दै खौड़ै हौएयौंदै दैखै। तिनु स्‍वर्गदूतौ खै दुनिया कै मुसीबतौ शै नुकसान पोऊंचाणौ का पौरमेशवर कै ढौबौशा औधिकार भैटी रौआ थिया, चाहै सै समुन्द्र दी हौं या माटी पांदी। तिनुऐ दुनिया कै चोऊ कुणै शै बागूर कै रौक दै, ताकि समुन्द्र दै, औरौ माटी पांदी औरौ जोंगलो दै बागूर ना बौं। मोऐं ऐक ओका स्‍वर्गदूत कै पूर्व दिशा दा प्रकट हौंदै बैई दैखा। तैसीकैईं जियुंदी पौरमेशवर कै मोहर थी। तैसी स्‍वर्गदूतै जोराल़े धाव मारैयौ तिनु चोऊ स्‍वर्गदूतौ खै बौइदै औरौ बौल़ौ:

³ “जांव तौड़ी आमै आपणै पौरमेशवर कै दासो कै माथै पांदी मुहर नी लाए दियु, तांव तौड़ी धोरती औरौ समुन्द्र औरौ डाल़ो खै नुकसान नी पोऊंचाया, ताकि सै तिनु पौरैशानी शै दुखी नी हौंव।”

इस्राएल कै ऐक लाख चौवालीस हजार लोग

⁴ जोबै स्‍वर्गदूतै निशान लाणा पूरा कौरे दिया, तोबै कुणिए मुखै बौतौऊ कै सैजै लोग जिनकै माथै पांदी स्‍वर्गदूतै पौरमेशवर कै मुहर शै निशान लोऊवा, तिनकै गिनती 144,000 थी। ऐजै सौबै लोग इस्राएल देश कै बारौ गोत्रो मुंजीदै थिए।

⁵ स्‍वर्गदूतै यहूदा कै गोत्र मुंजीदै बारौ हजार लोगौ पांदी मुहर लाए, रूबेन कै गोत्र शै बारौ हजार पांदी, गाद कै गोत्र मुंजीदै बारौ हजार पांदी।

⁶ आशेर कै गोत्र मुंजीदै बारौ हजार पांदी, नप्ताली कै गोत्र मुंजीदै बारौ हजार पांदी, मनश्शे कै गोत्र मुंजीदै बारौ हजार पांदी।

⁷ शमौन कै गोत्र मुंजीदै बारौ हजार पांदी, लेवी कै गोत्र मुंजीदै बारौ हजार पांदी, इस्साकार कै गोत्र मुंजीदै बारौ हजार पांदी,

⁸ जबूलून कै गोत्र मुंजीदै बारौ हजार पांदी, यूसुफ कै गोत्र मुंजीदै बारौ हजार पांदी, औरौ बिन्‍यामीन कै गोत्र मुंजीदै बारौ हजार पांदी मुहर लाए।

कौल़ेश शै ऐक बौड़ी भीड़

⁹ इथकै बाद मोऐं दैखौ कै लोगौ कै ऐक इशैक बौड़ी भीड़ थी कै कुणिए बै तिनु सौबी कै गिणै ना सौकौ थिए। सै दुनिया कै सौबी जाति, गोत्र, राष्ट औरौ भाषा मुंजीदै थिए। सै सिंहासन औरौ मेम्ने कै औगौड़ियौ खौड़ै थिए। तिनुऐ चिटै लुस्कै बाम्बै राए थिए औरौ सौबी आदमीए आपणै-आपणै हाथौ दी खजूरो की डाल़ी पाकड़ी रैई थी जू कै ऐक तैयारो कै निशानी कै जैशणा थिया

¹⁰ औरौ जौरौ कै धाव दैयौ बौल़ौए, “अमारै पौरमेशवर कै बौड़ाए हौंव जू सिंहासनों पांदी बौठैयोंदा औसौ, औरौ मेम्ने कै बौड़ाए कौरौ! सिरफ तू ही औसौ जू मोक्ति दैय।”

¹¹ सौबै स्‍वर्गदूत सिंहासन कै चोऊ ढौबौ औरौ पुराणिया कै औरौ चार जियुंदी प्राणीयों कै चोऊ ढौबौ खै खौड़ै थिए, तिनु सौबीए सिंहासन कै सामणै मुंडो झुकायो पौरमेशवर कै आराधना कौरे।

¹² तिनुऐ बौल़ौ, आमीन, “अमारै पौरमेशवर, आमै हमैशा तैरी महिमा कौरु, ताखै धन्यवाद औरौ आदर दियु! आमै मानुए कै तू पूरा ज्ञानवान औसौ, औरौ शौकतीशाली औसौ, जू हमैशा कारिए सौबी कामौ कै कौरणौ कै लायक औसौ! आमीन।”

¹³ इथु पांदी पुराणिया मुंजीदौ ऐकीए मुंकैई बौल़ौ, “ऐजा चिटै खोटणो बाम्बैयौंदे कुण औसौ? औरौ कुकै दै आए रौवै?”

¹⁴ मोऐं तैसीखै बौल़ौ, “ओए रै स्‍वामी, हांव ना जाणु पौरौ तू जाणै।” तैणै मुंकैई बौल़ौ, ऐजै सैजै लोग औसौ, जिनुवै बौड़ै कोष्ट महसूस कौरे। इनुवे आपणै लुस्कै कै मेम्ने कै लोऊ शै धोए पाए औरौ सै चिटै हौए गौवै, इथका मतलब ऐजा औसौ कै तिनकै पापौ कै मिटाए दिए गौवै।

¹⁵ “ऐसी बौजैह शै सै पौरमेशवर कै सिंहासन कै सामणै खौड़ै औसौ, औरौ सै हर सौमय दूसौ औरौ फिरै पौरमेशवर कै घोरे दै तैसकै सेवा कौरौ; औरौ सैजा जू सिंहासन पांदी बौठौए, तिनुमुंजी रौंदा औरौ तिनकै दैखभाल कौरदा।”

¹⁶ “सै तोबै भूखै औरौ प्यासै ना हौन्दै; औरौ सुरज तिनु हौजौ कौलोंई ना जोल़ादा, औरौ ना कुणजै गर्मी तिनु जौल़ादै।

¹⁷ जिथुकै मेम्ना जू सिंहासन कै बीचौ दा औसौ, तिनकै दैखभाल कौरदा; तैशैखैई जैशै ऐक चौराणौवाल़ा आपणी भेड़ो कै दैखभाल कौरौ; औरौ सै तिनु ताजै पाणी पिणौ कारिए निया कौरदा जू लोगौ खै जीवन दैंव, औरौ पौरमेशवर तिनकै आखी पौरैशै सौब आशु घोशै दैंदा।”