प्रकाशितवाक्य 6 - सिरमौरी नौवाँ नियम

आगलै मोहर चिटै घोड़े पांदी शवार

¹ तोबै मोऐं दैखौ कै मेम्ने तिनु सात मुहरो पौरैशै ऐकी खै खोली; औरौ मोऐं चार जियुंदी प्राणी मुंजीदै ऐकी खै पुकारेयौ शुणु। तैसकै आवाज़ गुड़कौ कै जैशणै थै। तैणै बौल़ौ, “ऐबै जा, औगौड़ियौ बौढ़।”

² तोबै तिथै मैरै चिटै रंग का घोड़ा दैखिया, औरौ तैसका शवार धनुष लेईयौंदा औसौ: औरौ तैसी ऐक मुकुट दैय गौआ, औरौ सै स्वर्ग शै बायरै धोरती पांदी हौटै गौआ, तैसकै जैशणै जू आगै शै ही जय पाए राए, औरौ औटेयौ शै विजैई हौंदा।

दूजै मोहर युद्ध

³ जोबै मेम्ने दूजै मुहर खौलै, तौ मोऐं दूजै प्राणी खै ऐजौ बौलदै शुणु, “ऐबै जा औगौड़ियौ बौढ़।”

⁴ औरौ ऐक चोमकदार लाल घोड़ा तैसी ठाँव शै बायरै ओऊवा जिथै सिंहासन राखै राए। पौरमेशवरे तैसी पांदी बौठैयौंदे खै दुनिया पांदी लोगौ खै ऐकी दुजैआरी लौड़वाणो कै शौकतै दै, ताकि सै लौड़ेई दै ऐकी दूजै कै मारै दैंव। ऐसी मकसद कारिए पौरमेशवरे ऐसी शवार कै ऐक बौड़ी तलवार बै दै।

तिजै मोहर काल़

⁵ जोबै मेम्ने तिजै मोहर खौलै, तौ मोऐं तिजै प्राणी खै ऐजौ बौलदै शुणा, “ऐबै जा औगौड़ियौ बौढ़।” औरौ तोबै मोऐं दैखौ कै ऐक काल़ा घोड़ा बायरै ओऊवा; औरौ तैसकै शवार कै हाथौ दै ऐक ताकडै़ औसौ।

⁶ मोऐं शुणु कै तिनु चारै जियुंदी प्राणीयों कै बीचो दा कुणिए बौलाए रौआ थिया जू ऐक आदमी कै जैशणा थिया: “आणौवाल़ै सौमय दा धोरती पांदी काल़ पौड़दा औरौ ऐकी दूसौ कै धियाड़ी सिरफ ऐक किलो चौऊल़, या सिरफ तीन किलो जौ खरीदणो कै बराबर हौंदी। पौरौ तेल औरौ अंगूर कै रोस का नुकसान नी हौणौ दैया।”

चौथी मोहर मौत

⁷ औरौ जोबै मेम्ने चौथै मोहर खौलै, मोऐं चौथै जियुंदी प्राणी खै ऐजौ बौलदै शुणु: “ऐबै जा औगौड़ियौ बौढ़।”

⁸ तोबै मोऐं ऐक पियौल़ा घोड़ा दैखा; घोड़े की शवारी कौरणौवाल़ै का नांव मौत औसौ। औरौ अधोलोक तैसकै पौछौड़ियौ-पौछौड़ियौ चालै रौआ थिया। औरौ तिनु धोरती पांदी रौणौवाल़ै हरेक चार लोगौ मुंजीदै ऐकी खै मारणौ का औधिकार भैटा। तिनुऐ तिनु तलवार शै मारै दियै, तिनुऐ तिनु भूख लैई मारै दियै, तिनुऐ तिनु बुरी-बुरी बीमारी शै मारै दियै, औरौ तिनुऐ तिनु जोंगली जानवरो शै बै मोरवाए दियै।

पाँचवें मोहर शहीद

⁹ जोबै मेम्ने पाँचवें मोहर खोले, तौ मोऐं बैदी कै धैनै दैखौ, तिथै तिनु लोगौ कै आत्माए थी जू मारै गौवै थिए जिथुकै तिनुऐ पौरमेशवर कै वचन कै बौताए राए थिया औरौ सै आपणै बिशवाश शै पौछौड़ियौ ना मुड़ी कै यीशु तिनका प्रभु औसौ।

¹⁰ औरौ तिनुऐ बौड़ै शब्द लैई पुकारेयौ पौरमेशवर शै बौल़ौ, “ओए रै पवित्र, औरौ साची प्रभु; तू धोरती पांदी रौणौवाल़ै तिनु बुरै लोगौ खै तावल़ै सौजा किथु ना दैय? आमै बिन्ती कौरु कै तू तिनु लोगौ कै बर्ताव का बौदला लौ जिनुवै आमु मारै दियै।”

¹¹ तिनुमुंजी दै हरेक खै चिटै लुस्कै दैय गौवै। औरौ पौरमेशवरे तिनुखै बौल़ौ, “इबी कारिए आराम कौरौ, जिथुकै इबी बै किछै साथी सेवक औरौ तोंवारै साथी बिशवाशी औसौ जिनु तोंवारै जैशणै ही मारै जांदै। जोबै मौरे जाणौ वाल़ौ कै गिनतै पोरे हौए जालै, तोबै ही हांव बौदला लोन्दा।”

छौठे मोहर आतंक

¹² औरौ जोबै मोऐं मेम्ने कै छौटे मोहर खौलदै बैई दैखी, तौ ऐक बैजाए बौड़ा भुईचोल़ ओऊवा; औरौ सुरज का रंग मोटे काल़े काम्बलो कै जैशणा काल़े रंग दा बौदलै गौआ औरौ पूरै चन्द्रमा का रंग लोऊ कै जैशणा लाल हौए गौआ।

¹³ तारै गौयण पौरैशै धोरती पांदी ऐशै छुटै जैशै डाल़ पौरैशै काचै फोल़ छुटौ, जोबै ऐक तैज हावा तिनु हिलांव।

¹⁴ गौयण तैसी कागज़ कै जैशणी गायब हौए गौए जैसी लोपेटै राए हौला औरौ सौबी धारे औरौ समुन्द्र कै सौबै टापूए आपणै ठाँव बौदलै दियै।

¹⁵ इथका नतीजा ऐजा हौआ कै धोरती कै सौबै लोग जिनुमुंजी राजा, औरौ प्रधान, औरौ ठोगड़ा, औरौ धनवान, औरौ शौकतीशाली लोग, औरौ हरेक गुलाम, औरौ हरेक आज़ाद आदमी, धारो कै गुफाओ औरौ चट्टानो दै जायौ चुरीए;

¹⁶ औरौ धारो, औरौ चट्टानो शै बौलदै लागै, “आमु पांदी रिड़ जाव औरौ अमारै रक्षा कौर ताकि सैजा जू सिंहासन पांदी बौठेयौंदा औसौ, आमु दैख ना सौकौ औरौ मेम्ने कै सौजा शै छिपाए दैव;

¹⁷ जिथुकै सैजौ खतरनाक दूस आए गौ जोबै पौरमेशवर औरौ मेम्‍ना सौबी कै सौजा दैंदा, औरौ कुणिए बै ऐसी सौजा शै बौचै ना पांदै।”