प्रकाशितवाक्य 3 - सिरमौरी नौवाँ नियमसरदीस शहर मौरेयौंदे कलीसिया 1 सरदीस शहर कै कलीसिया कै स्वर्गदूत खै ऐजा सौंदेश लिख: ऐजा सौंदेश तैसकै ढौबौशा औसौ जू सात तारै खै आपणै हाथौ दै लैयौ राखौ औरौ जू पौरमेशवर कै सात आत्माओं खै भैजौ, ऐजौ बौल़ौ कै, हांव तैरै कामौ खै जाणुए, कै तू मुं दा बिशवाश लायक बिशवाशी लागै तौ औसौ, पौरौ सौथीखै तू ऐबै मैरै पौछौड़ियौ ना चालै। 2 इथकारिए जागै जा! मुं पांदी तैरा जू किछै भरोसा बाकी रोए रौआ, सैजा मोजबूत कौरौ, ताकि ऐजौ पूरी तरह शै खत्म ना हौए जांव। हांव जाणुए कै तैरी कमी बैजाए बौड़ै औसौ जिथुकै जू तुऐं कौरे लो पौरमेशवर तिंदा खुश ना आथी। 3 तियौं शिक्षा कै याद कौर जू तुऐं बैजाए औगौड़ियौ शौणै राए थै औरौ बिशवाश कौरे राए थिया। जू ताखै शिखाए राए थियु तिथकै पौछौड़ियौ चाल, आपणै गौलत कामौ शै पाप कौरणै छोड़े दै। जै तू गौलत काम कौरेया कौरे तौ हांव एकदम आन्दा, जैशै ऐक चोर आंव, औरौ तू तैसी सौमय खै बै ना जाणै सौकदा जौल़ौ हांव ताखै सौजा दैणौ कारिए आए जांदा। 4 पौरौ सरदीस शहर दै तोंवारै बीच किछै ही लोग औसौ, जू पाप शै अशुध्द ना हौए रैई, सै शुध्द चिटै लुस्कै बाम्बैयौ मैरै साथै चालदै, जिथुकै सै इथ लायक औसौ। 5 सैजै जू जीत पालै तिनु बै तिनकै चिटै लुस्कै बोम्बाए जांदै। हांव तिनकै नांव किताब मुंजीदै ना हटांदा जिथमुंजी पौरमेशवरे तिनु लोगौ कै नांव लैख राए जिनु सौदा कै जिन्दगी भैटदै। हांव आपणै पिता कै सामणै औरौ तैसकै स्वर्गदूतौ कै सामणै ऐजौ साबित कौरदा कै सै मैरै औसौ। 6 जिनु कुणिए मैरी बात शुणी लोए, सै ध्यान शै शोणेया कै पवित्र आत्मा कलीसियाओं शै का बौल़ौ। फिलदिलफिया शहर ईमानदार कलीसिया 7 फिलदिलफिया शहर कै कलीसिया कै स्वर्गदूत खै ऐजा सौंदेश लिख: ऐजा सौंदेश तैसकै ढौबौशा औसौ जू पवित्र औरौ साचा औसौ, सैजौ जैसी कैई दाऊद कै राज्य पांदी औधिकार औसौ। जै सै दरवाज़ा खोलो, तौ कुणिए बै तैसी बंद ना कौरे सौकौ। औरौ जै सै तैसी बंद कौरे दैंव, तौ कुणिए बै तैसी खोले ना सौकौ, हांव जू बुलूए सैजौ शुण, 8 हांव तैरै कामौ खै जाणुए, हांव जाणुए कै तू ताकतवाल़ा ना आथी। पौरौ जू मोऐं ताखै बौल़ौ सैजी बात तुऐं मानै। तुऐं मुं पांदी बिशवाश कौरे राए। इथकारिए, मोऐं ताखै ऐक दरवाज़ा खोले राए, जिथु कुणिए बंद ना कौरे सौकौ। 9 हांव तिनु लोगौ कै बारै मुंजी जाणुए जू दावा कौरौ कै सैजै पौरमेशवर कै चोणेयौंदे लोग औसौ, पौरौ सौथीखै आथी नी, सै झूठु बौल़ौ, पौरौ सौथीखै सै तैसी गुट कै लोग औसौ जू शैतान का औसौ। हांव ऐशै कौरदा, कै सै आयौ तैरै सामणै रिड़दै, औरौ ऐजौ जाणै पांदै, कै मोऐं तांवआरी प्यार राखै राए। 10 तुऐं मैरै सौंदेश कै मानै राए ताकि जोबै तू दुख उठाए तौ तिनु सब्र लैई सैहन कौरे सौकै। इयौंई बौजैह शै, हांव ताखै बौड़ी परीक्षा कै सौमय दा तैरी रक्षा कौरदा। परीक्षा का ऐजा सौमय इयौं दुनिया कै सौब लोगौ पांदी आन्दा। 11 हांव तावल़ा ही आणौवाल़ा औसौ; इथकारिए आपणै बिशवाश दा मोजबूत बौणेयौंदा रौ ताकि कुणिए बै तैरा इनाम छीणै ना सौकौ। 12 सैजै जू जीत पालै सै पौरमेशवर कै मन्दिर दै खोम्बे कै जैशणै हौंदै, जैसकै हांव सेवा कौरु औरौ तिनु तैसी कौलोंई छोड़णा ना पौड़दा। हांव तैसकै शोरीर पांदी मैरै पौरमेशवर कै शहर कौ नांव लिखदा, ऐजौ सैजौई औसौ जैसी नौवाँ यरूशलेम शहर बौला जांव। ऐजा सैजाई औसौ जू स्वर्ग शै, यानी मैरै पौरमेशवर कै ढौबौशा धैनै आन्दा। हांव तैसकै शोरीर पांदी मैरा नौवाँ नांव बै लिखदा। 13 जिनु कुणिए मैरी बात शुणी लोए, सै ध्यान शै शोणेया कै पवित्र आत्मा कलीसियाओं शै का बौल़ौ। लौदीकिया शहर कै गुनगुनी कलीसिया 14 लौदीकिया शहर कै कलीसिया कै स्वर्गदूत खै ऐजा सौंदेश लिख: ऐजा सौंदेश तैसकै ढौबौशा औसौ जैसी आमीन बौला जांव। सै बिशवाश योग्यता कै साथै पौरमेशवर कै बारै मुंजी सौचाई कै प्रकट कौरौ, औरौ हांव सैजा औसौ जैसकै दवारा पौरमेशवरे सौब चीज़ौ कै रचना कौरे राए, हांव जू बुलूए सैजौ शुण: 15 हांव तैरै कामौ खै जाणुए, कै तू ना तौ मुं पांदी आपणै बिशवाश शै मुकरे औरौ ना ही मुखै पूरै मन शै प्यार कौरे। हांव चोऊं कै तू मैरा इन्कार कौरे दै या मुंआरी पूरै मन शै प्यार कौर। 16 मुखै पौता औसौ कै तू ना तौ मुं पांदी आपणै बिशवाश शै मौना कौरे औरौ ना ही मुखै पूरै मन शै प्यार कौरे, पौरौ, जिथुकै तू मैरै ढौबौ आपणै बिशवाश दा सिरफ आधा-अधूरा औसौ, इथकारिए हांव ताखै छौड़णौ पांदी औसौ। 17 तू सुंचै कै तू सैठ औसौ औरौ तांव कैई सैजौ सौब औसौ जिथकै ताखै जौरुरत औसौ, पौरौ तू ना जाणै कै इथकै सौचाई ऐजी औसौ कै तांव पांदी तरस आणा चैंई। जिथुकै सौचाई ऐजी औसौ कै तू गरीब औसौ, तांव कैई लुस्कै ना आथी, औरौ तू आन्धा औसौ। 18 इथकारिए हांव ताखै चैतावणी दियु कै ताखै मुं कैईंदु शुध्द सूनु खरीदणो चैंई ताकि तू सौथीखै सैठ बौणै सौकै। ताखै मुंकैई आपणै बाम्बणौ कारिए चिटै लुस्कै बै खौरीदणै चैंई ताकि तैरा शोरीर ढौकैयौंदा रौंव औरौ तू शर्मिंदा ना हौए। औरौ ताखै आपणी आखो का इलाज कौराणौ कारिए मुं कैईंदै दवाई बै खौरीदणी चैंई ताकि तू दैख सौकै। 19 हांव जैसीआरी प्यार कौरु, तैसी हांव शिखोऊं औरौ सौजा दियु ताकि सै आछै बौणै जांव। इथकारिए भोलाए कौरणौ दै लागै रौ, पाप वाल़ै काम कौरणै बंद कौरे दैव। 20 शुणौ, तोंवारै मन दै रौणौ कारिए, हांव तैसी आदमी कै जैशणा औसौ जू घोर कै बायरै खौड़ा औसौ औरौ दरवाज़ा खटखटांव। जै तुऐं मैरी आवाज़ खै शुणौए औरौ मैरै खातिर आपणा मन खोलो तौ हांव भीतरै आन्दा औरौ आमु ऐकी-दूजै कै साथै संगति कौरदै। 21 सैजै लोग जू जीत पालै सैजै लोग मैरै साथै मैरै सिंहासन पांदी बौठदै, तैशैखैई जैशै मोऐं जीत पाए राए औरौ आपणै पिता कै साथै तैसकै सिंहासन पांदी बौठै गौआ। 22 जिनु कुणिए मैरी बात शुणी लोए, सै ध्यान शै शोणेया कै पवित्र आत्मा कलीसियाओं शै का बौल़ौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation