प्रकाशितवाक्य 22 - सिरमौरी नौवाँ नियमजीवन कै पाणी कै नोंदी 1 तोबै स्वर्गदूतै मुखै ऐक नोंदी दिखाए जिंदु जिन्दगी कौ पाणी थियु। पाणी साफ कांचो कै जैशणौ चौमकौ थियु। ऐजौ पौरमेशवर औरौ मेम्ने कै सिंहासन शै बौंहदौ लाग रौ थियु। 2 नोंदी पौरमेशवर औरौ मेम्ने कै सिंहासन तौड़ी शै बौं थी, औरौ शहर कै चौड़ै शोड़क बाटी जांव थी। नोंदी कै हरेक किनारे पांदी जीवन दैणैवाल़ै डाल़ लागै रौवै थिए जू कै हर साल बारौ बैई फल़ दैंव थिए, यानी हर मीनै दै ऐक बैई दुनिया कै लोग तिनु पातौ का इस्तैमाल कौरेयौ आपणै बीमारी शै ठीक हौए जांव थिए। 3 जैसी कोसी आदमी या चीज़ौ पांदी पौरमेशवर का शराप औसौ सैजै शहर दै ना हौन्दै। पौरमेशवर औरौ मेम्ने का सिंहासन शहर दा हौंदा, औरौ तैसकै सेवक तैसकै सेवा कौरदै। 4 सै पौरमेशवर कै आमणै-सामणै दैखदै, औरौ पौरमेशवर कौ नांव तिनकै माथै पांदी लैखयौंदो हौन्दौ। 5 तोबै कौलोंई रात ना हौन्दै, औरौ शहर कै लोगौ कै दिवे या सुरज कै पेयाशै कै जौरुरत ना हौंदै, जिथुकै पौरमेशवर आपी तिनु पांदी पेयाशो दैन्दा। औरौ जू लोग तिथै हौन्दै सै हमैशा कारिए राज कौरदै। यीशु मसीह कौ औटेयौ पाछु आणौ 6 तोबै स्वर्गदूतै मुंकैई बौल़ौ, “ऐजी सौबै बातौ जू ताखै बौताए रैई, साची औसौ औरौ पूरी तरह शै बिशवाश कौरणौ लायक औसौ। जिथुकै प्रभु पौरमेशवर जैसीए पौरमेशवर कै बातौ बौताणौवाल़ै कै आपणा आत्मा दैय राए थिया। सैजाई औसौ जैणै मुखै, जू कै तैसका स्वर्गदूत औसौ, ताखै सैजौ बौताणौ कारिए भैजै राए जू कै तावल़ो हौणौवाल़ौ औसौ।” 7 “औरौ दैख, हांव तावल़ा ही आणौवाल़ा औसौ; धन्य औसौ सैजै, जू इयौं किताबो दी लिखैयौंदी हौणौवाल़ी बातौ का पालन कौरौ।” 8 हांव यूहन्ना सैजाई औसौ, जैणै इनु चीज़ौ कै दैखी औरौ शुणी। औरौ जोबै मोऐं शुणु औरौ दैखौ, तौ जू स्वर्गदूत मुखै ऐजी बातौ दिखांव थिया, हांव तैसी स्वर्गदूत कै आराधना कौरणौ कारिए तैसकै लातो पांदी रिड़ै गौआ। 9 पौरौ तैणै मुखै बौल़ौ, “दैख, ऐशै नी कौर; मैरी आराधना नी कौर। पौरमेशवर ही औसौ जैसकै ताखै आराधना कौरणै चैंई। जिथुकै हांव बै तैरै जैशणा औरौ पौरमेशवर कै बातौ बौताणौवाल़ै कै जैशणा औरौ जू इयौं किताबो की बातौ मानौए, तिनकै जैशणा ऐक सेवक औसौ।” 10 तोबै तैणै मुखै बौल़ौ, “इयौं किताबो की भविष्यवाणी कै सौंदेश कै लोगौ शै नी छिपा। इनु चीज़ौ कै पूरा हौणा का सौमय नेड़िक आए गौआ। 11 औरौ इथकारिए जू कुणिए बुरै औरौ घिनौने काम कौरौ, तिनु तिनकै बुरै औरौ घिनौने काम कौरदै ही रौणौ दैणै चैंई। ऐशैखैई जू कुणिए बै आछै औरौ पवित्र काम कौरौ, तिनु तिनकै आछै औरौ पवित्र कामौ कै कौरदौ रौणौ चैंई।” यीशु मसीह कलीसिया कारिए गवाही 12 तोबै प्रभु यीशुए बौल़ौ: “हांव तावल़ाई आन्दा, औरौ जू-जू बै आदमीए कौरे राए, हांव तिनु तिनकै कामौ कै दैखैयो इनाम औरौ सौजा दैन्दा।” 13 “हांव अल्फा औरौ ओमेगा औसौ, यानी आदि औरौ अंत औसौ।” 14 धन्य औसौ सैजै, जिनुवै आपणै लुस्कै कै मेम्ने कै लोऊ लैई धोए राए, औरौ इथकारिए तिनु शहर दा फाटको मुंजीदै हौयौ जाणौ का औरौ जीवन कै डाल़ो शै फल़ खाणौ का अधिकार हौंदा। 15 पौरौ जिनकै काम शर्मनाक औसौ, औरौ आपणै साथियो कै प्रति जादू-टोना कौरौ, औरौ गौलत सौमबंध राखौ, हथयारै औरौ मूर्ती कै पूजा कौरौ, औरौ सैजै जू झूठु बौल़ौ, सै कौलोंई बै शहर दै ना जाए सौकदै। 16 मोऐं, यीशुए आपणै स्वर्गदूत खै तोंवारै धोरे इनु बातौ कै घोषणा कौरणौ कारिए भैजै राए जू पौरमेशवर कै लोगौ कै समूह मुंजी औसौ। हांव राजा दाऊद का वंशज औसौ; हांव ही औसौ, जू तैसी तारै साए औसौ जू सुरज निकल़णौ कै सौमय बै दैखियौं औरौ मुखै बियाणु का तारा बौल़ौ। 17 पौरमेशवर का आत्मा औरौ मेम्ने कै दुल्हन यीशु कैई बौल़ौ, “ताखै पाकौ आणौ चैंई।” सौबै जू ऐजौ शुणु, तैसी बै ऐजौ बौलणौ चैंई, “आ!” जू कुणिए बै तिशा औसौ, सै इथै आव। सैजौ पाणी पियौ जू जीवन दैंव, जू कै तिनु सौबी कै मुफ्त दौ भैटौ जू इथुकै पिणु चांव। चैतावणी 18 हांव यूहन्ना सौबी आदमी कै चैतावणी दियु जू इनु बातौ कै बारै मुंजी सौंदेश कै शुणुए जू इबी हौन्दी लाग रौई औरौ आणौवाल़ै सौमय दी हौन्दी, जू मोऐं इयौं किताबो दी लिख रैई: जै कुणिए बै इनु सौंदेश मुंजीदौ किछै बै बौढ़ाव, तौ पौरमेशवर तोंवारै सौजा कै बौढ़ाए दैंदा। सै तुऔं तिनु पौरैशानी शै मारदा जिथकै बारै मुंजी मोऐं इयौं किताबो दौ बौताए राए। 19 औरौ जै कुणिए ऐशणा आदमी हौला जू इयौं किताबो दी भविष्यवाणी कौरेयौंदी बातौ मुंजी दी किछै बै हौटाला, तौ पौरमेशवर तैसीयादी सैजी आशीषौ उंढी कौरदा जिथकै बारै मुंजी इयौं किताबो दौ बौताए राए। पौरमेशवर जीवन कै डाल़ो कै फल़ खाणौ औरौ पवित्र शहर दै हौणौ का तैरा औधिकार बै उंढा कौरदा। 20 यीशु इनु सौबी वचनो कै गवाही दैंव, औरौ सै बौल़ौ, “हां, हांव तावल़ा आणौवाल़ा औसौ।” मोऐं यूहन्नाए जोवाब दिया, आमीन। ओए रै प्रभु यीशु आ। 21 हांव प्रार्थना कौरु कै प्रभु यीशु का अनुग्रह पवित्र लोगौ कै साथै रौंव। आमीन! |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation