प्रकाशितवाक्य 21 - सिरमौरी नौवाँ नियमनोऐं दुनिया 1 तोबै मोऐं नौवाँ स्वर्ग औरौ नोऐं धोरती खै दैखी, जिथुकै पुराणा स्वर्ग औरौ दुनिया ऐबै ना थी। औरौ ऐबै समुन्द्र बै ना थी। 2 मोऐं पवित्र शहर खै बै दैखा, जू कै नौवाँ यरूशलेम शहर औसौ, जू स्वर्ग शै पौरमेशवर कै ढौबौशा धैनै आन्दा लागै रौआ। तैसी शहर खै ऐक दुल्हन कै जैशणै तैयार कौरे लौए थै जियौं खै लुस्कै बोम्बाए राए औरौ सजाए राए औरौ जू दुल्है शै बैयाव कौरणौ कारिए तैयार औसौ। 3 तोबै मोऐं ऐक आवाज़ शौणै जू पौरमेशवर कै सिंहासन पौरैशै जोर शै आए, “दैख, ऐबै पौरमेशवर लोगौ मुंजी आपणा घोर बाणदा औरौ सै तिनकै साथै रौंदा, औरौ सै तैसकै लोग हौंदै, सै तिनु आपणै लोगौ कै रुप दै अपनांदा औरौ सै तिनकै साथै रौंदा, औरौ लोग बै तैसी आपणै पौरमेशवर कै रुप दै अपनाया कौरदै। 4 औरौ पौरमेशवर तिनकै आखी पौरैशै सौब आशु घोशै दैंदा; औरौ कुणिए बै आदमी कौलोंई बै दुख महसूस ना कौरदा या रुंदा या दर्द कै महसूस ना कौरदा औरौ ना ही मौत रौंदै, जिथुकै पुराणै दुनिया कै सौबै चीज़ौ गायब हौए गोई।” 5 औरौ जू सिंहासन पांदी बौठै रौआ थिया, तैणै बौल़ौ, “मोऐं सौबै ठुँ नौवाँ कौरे दियु।” तोबै तैणै बौल़ौ, “लैख पा, जू हांव बुलूए तू तिथपांदी बिशवाश कौरे सौकै। ऐजी बातौ निशोंक हौयौ हौंदी।” 6 तोबै तैणै मुखै बौल़ौ, “ऐजी सौबै बातौ पूरी हौए गोई। हांव अल्फा औरौ ओमेगा औसौ, यानी आदि औरौ अंत औसौ। जू कुणिए बै तीशै औसौ, हांव तैसी तिथ पाणी कै फटवाणी पौरैशौ ऐई मुंजी पिणौ कारिए दैंदा जू बिना अंत का जीवन दैंव। 7 जू जीत हासिल कौरौ, सै मुंकैई दी इनु सौबी आशीषौ खै पांदा; औरौ हांव तैसका पौरमेशवर हौंदा, औरौ सै मैरा बैटा हौंदा। 8 पौरौ सैजै जू सताव कै डौर शै मुखै छोड़े दैंव औरौ जू मुं पांदी बिशवाश कौरणा छोड़े दैंव, तिनु गन्धक कै आग दै बैगाए दैंदै। ऐशैखैई तिनु बै जू बैकार काम कौरौ, खून कौरौ, औरौ शोरीर कै गौंदै कामौ का अभ्यास कौरौ, औरौ आपणै साथियो कै प्रति जादू-टोना कौरौ, औरौ मूर्ती कै पूजा कौरौ, औरौ सारै झूठ बौलणोवाल़ै, तिनु बै गन्धक कै आग दै बैगाए दैंदै। गन्धक कै आग कै दूजै मौत बौल़ै जांदै।” मेम्ने कै दुल्हन 9 औरौ तोबै तिनु सात स्वर्गदूत, जिनुवै आदमी जाति पांदी सात आखरी पीड़ाव शै भौरेयौंदे सात छानै पैरै राए थिए, तिनुमुंजी दै ऐकीए मैरै धोरे आयौ, मुंआरी बातौ कौरी, तैणै बौल़ौ, “इथै आ, हांव ताखै दुल्हन दिखांदा जियौंका तावल़ा ही मेम्ने कै साथै बैयाव हौए जांदा।” नौवाँ यरूशलेम शहर 10 औरौ पौरमेशवर कै आत्माए मुं पांदी काबू कौरा, औरौ स्वर्गदूत मुखै ऐक बैजाए ऊंचे धारौ पांदी लौए गौआ, औरौ मोऐं पवित्र शहर खै बै दैखा, जू कै नौवाँ यरूशलेम शहर औसौ, जू स्वर्ग शै पौरमेशवर कै ढौबौशा धैनै आन्दा लागै रौआ। 11 शहर पौरमेशवर कै ढौबौशै भैटिणौ वाल़ी तैज पेयाशै लैई चौमकै रौआ थिया, औरौ तैसकौ पेयाशो बैजाए कीमती पाथर, यानी यशब नांव कै बेशकिमती पाथर कै जैशणा चौमकै रौआ थिया, औरौ कांच कै जैशणौ साफ थियु। 12 शहर कै चोऊ ढौबौ ऐक बैजाए ऊंचे दीवार थै शहरपनाह दै बारौ फाटक थिए औरौ तिनुमुंजी शै हरेक फाटक पांदी ऐक स्वर्गदूत कै रोखवाल़ी थै, औरौ तिनु फाटको पांदी इस्राएल देश कै बारौ गोत्रो कै नांव लैखै राए थिए। 13 शहर कै चोऊ दिशा दै तीन फाटक थिए: पूर्व, पश्चिम, उतर औरौ दक्षिण। 14 तिनुऐ शहर कै दीवार बारौ बौड़ै-बौड़ै पाथरो पांदी बाणै राए थी, औरौ हरेक पाथर पांदी मेम्ने कै बारौ चोणेयौंदे चैलै मुंजीदै ऐक-ऐक कौ नांव लैखयौंदा थियु। 15 सैजा स्वर्गदूत जैणै मुंआरी बात कौरे, तैसीकैईं नगर औरौ तिथकै फाटको औरौ तिथकी शहरपनाह खै नापणौ कारिए ऐक सूनै कै छड़ी दैय गौए। 16 तैसी शहर कै चार कुणै थिए औरौ चारै कुणै ऐक जैशणै थिए। स्वर्गदूतै आपणै मापणौ कै डैंगै शै शहर कै मापा: शहर कै लौम्बाए दौ हजार चार सौ किलोमीटर थी। इथकै चौड़ाए औरौ ऊंचाई इथकै लौम्बाए कै जिशैक थै। 17 तैणै शहर कै दीवार कै बै मापी: इथकै ऊंचाई लमसम छियासठ मीटर थी। जैसी माप कै स्वर्गदूतै इस्तैमाल कौरा, सै आदमी कै दवारा इस्तैमाल कौरे जाणौवाल़ै माप कै जैशणौ ही औसौ। 18 शहर खरे सूनै का बाणै राए थिया जू साफ कांचो साए चौमकौ थिया, औरौ इथकै शहरपनाह यशब कै बौणैयौंदे थी। 19 तैसी नोगर कै नीयुं हर भान्त मौंगै पाथरो लैई सँवारै राखै थै, आगलै नीयुं यशब कै, दूजै नीलमणी कै, तिजै लालड़ी कै, चौथै मरकत कै, 20 पाँचवें गोमेदक कै, छौटे माणिक्य कै, सातवें पीतमणि कै, आठवें पेरोज कै, नोऐं पुखराज कै, देशवीं लहसनिऐ कै, ग्यारवीं धुम्रकान्त कै, बारहवीं याकूत कै थी। 21 आणौ-जाणौ कै बारौ दवार बै, ऐक-ऐक मौती शै बौणैयौंदे थिए, औरौ शहरो कै शोड़कै बै, खरे सूनै शै बाणै राए थी जू साफ कांच साए चौमकौ थी। नौवें यरूशलेम शहर कै महिमा 22 मोऐं कुणजाई मन्दिर ना दैखी जिथुकै सौबिदा बौड़ा शौकतीशाली पौरमेशवर औरौ मेम्ना तैसी शहर दै औसौ। इथकारिए तिथै मन्दिर कै किछै जौरुरत ना आथी। 23 तिथै ना तौ सुरज औरौ ना ही चंद्रमा कै चौमकौणौ कै जौरुरत औसौ, जिथुकै सैजौ शहर पौरमेशवर औरौ मेम्ने कै चौमक लैई रोशन औसौ। 24 तैसी शहर कै चौमक धोरती पांदी रौणौवाल़ै सौबी लोगौ कै पेयाशो दैंव, औरौ धोरती कै सौबै राजा आपणै-आपणै दौलत कै तैसी शहर पांदी लान्दै। 25 तैसी शहर कै सौबै आणौ-जाणौ कै दवार हमैशा खुलै रौंव। सै कौलोंई बंद ना हौंव जिथुकै तिथै कौलोंई बै रात ना हौंदै। 26 दुनिया कै लोग दुनिया की सौबै खूबसूरत चीज़ौ कै औरौ दुनिया कै लोगौ कै जायदात कै तैसी शहर दै लान्दै। 27 पौरौ कुणिए बै जू अपवित्र औसौ या सैजै लोग जू बैकार काम कौरौ औरौ झूठ बौलणौ वाल़ै कै बिल्कुल बै तैसी शहरो दै रौणौ कै इजाज़त ना आथी। तैसी शहरो दै सैजैई लोग रोए सौकौ जिनकै नांव मेम्ने कै जीवन कै किताबो दै लैखै राखै। ऐजी सैजी किताब औसौ जिन्दै तिनु लोगौ कै नांव लिखी राए जिनुकैईं हमैशा कै जिन्दगी औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation