प्रकाशितवाक्य 20 - सिरमौरी नौवाँ नियमशैतान खै 1000 साल कारिए अथाह कुण्ड दा पाणा 1 तोबै मोऐं ऐक स्वर्गदूत खै स्वर्ग पौरैशा उतरदै बैई दैखा; जैसकै हाथौ दै गौढै की चाबी, औरौ ऐक बौड़ै जंजीर थी। 2-3 तैणै अजगर कै यानी पुराणै सांपौ कै जैसी शैतान बै बौल़ौए, पाकड़ै पाए। तैणै तैसी बानै दिया औरौ तैसी गौढै उदा फेरकाए दिया, तैणै दरवाज़ा बंद कौरे दिया, औरौ तिथपांदी मोहर लाए दै ताकि तैसी ऐक हजार साल तौड़ी उंढा नी खौल़ौ। इथकारिए, तैसी सौमय कै दौरान, शैतान ऐक हजार साल तौड़ी लोगौ कै धौखा ना दैय सौकौ। तिथकै बाद, तैसी हौजौ थोड़ै सौमय कारिए रिहा कौरे दैंदै। मसीह कै साथै 1,000 साल तौड़ी राज कौरणा 4 औरौ तोबै मोऐं किछै सिंहासन दैखै, जिनुपांदी बौठणौवाल़ै कै मुंडो खै काटै गौवै थिए जिथुकै तिनुऐ यीशु कै सौंदेश औरौ पौरमेशवर कै वचन कै घोषणा कौरे राए थै। इनु लोगै राकस या तैसकै मूर्ति कै पूजा ना कौरे रैई थी। औरौ इनुवे आपणै माथै या हाथौ पांदी राकस कै छाप ना लाए राए थी। सै औटेयौ जियुंदी हौए गौवै थिए औरौ सिंहासनों पांदी बौठै गौवै। पौरमेशवरे तिनु राज कौरणौ का औधिकार दिया, औरौ तिनुऐ मसीह कै साथै ऐक हजार साल तौड़ी राज्य कौरा। 5-6 ऐजै लोग जियुंदी कौरे जाणै वाल़ौ मुंजी सौबीदै आगै जियुंदी कौरे जांदै, औरौ ऐजै लोग खास कौरेयौ धन्य औरौ पवित्र औसौ। ओकी मौत कै तिनु पांदी कुणजै शौकतै ना आथी। सै पौरमेशवर कै औरौ मसीह कै पुरोहित हौंदै औरौ मसीह कै साथै ऐक हजार साल तौड़ी राज्य कौरदै। ऐसी ऐक हजार साल शै आगै कोसी ओकी मौरेयौंदे लोगौ खै मौरेयौंदे मुंजीदै जियुंदी ना कौरी। शैतान का विनाश 7 जोबै हजार साल पूरै हौए जांदै तौ शैतान कोयदै खाने पौरैशा छोड़े जांदा। 8 औरौ सै तिनु देशो खै धौखा दैणौ कारिए बायरै आए जांदा जू पूरै दुनिया दै बिखरेयौंदे औसौ। इनु देशो कै नांव गोग औरौ मागोग बौल़ै जांव। शैतान तिनु सौबी कै ऐक ठाँव पांदी कौठा कौरदा जिथै सै लौड़ाए कौरदै। सै बैजाए सारै हौंदै ऐशणै कै कुणिए तिनु समुन्द्र कै किनारे कै रेत कै जैशणै गिणै ना सौकदै। 9 शैतान कै सैना पूरै दुनिया दै फोयलै गौए औरौ तिनुऐ तैसी शहर दा कब्जा कौरा, जिथु आरी पौरमेशवर प्यार कौरौ, जिथै तैसकै लोग रौंव थिए। पौरौ पौरमेशवर कै ढौबौशी, स्वर्ग पौरैशै आग बायरै आए औरौ पूरी सैना खै नष्ट कौरे दी। 10 इथकै बाद शैतान पाकड़ै जांदा, जैणै देश-देश कै लोगौ खै भरमाए औरौ तैसी गन्धक कै आग दा फेरकाए दैंदै, यानी तियौं आग दा जू झील कै जैशणै बौड़ै औसौ। राकस औरौ झूठै पौरमेशवर कै बातौ बौताणौवाल़ै खै आगै ही तिथै बैगाए राए थिए। औरौ तिथै तियौं आग दै तिनु हमैशा कारिए रात औरौ दूस सताए जांदै। चिटा महा सिंहासन औरौ आखरी न्याय 11 तोबै मोऐं ऐक चिटा सिंहासन दैखा जिथपांदी पौरमेशवर बौठै रौआ थिया, पौरौ तिथै जिथै पौरमेशवर बौठै रौआ थिया, तिथैशै धोरती औरौ स्वर्ग सौबै गायब हौए गौवै, औरौ कोसीए बै तिनु औटेयौ ना दैखी। 12-13 औरौ मोऐं मौरेयौंदे लोगौ खै सिंहासन कै सामणै खौड़ै होयोंदै दैखै, यानी तिनुकै जू छौटे दर्जै औरौ बौड़ै दर्जै कै लोग औसौ। सैजै लोग जू समुन्द्र दै डुबेयो मौरे गौवै थिए, औरौ कब्रो दै कै सौबै मौरेयौंदे लोग, औरौ सैजै सौब लोग जू मौरेयौंदे कै ठाँव पांदी थिए, सैजै सौबै तैसी सिंहासन कै सामणै खौड़ै हुवे, सैजी किताब खोले गौए जिथमुंजी तिनु लोगौ कै नांव लैख राए थिए जिनुकैईं सैजा जीवन थिया जिथका कुणजाई अंत ना आथी। सैजै किताब बै खोले गौए जिथमुंजी लोगै जू-जू कौरे राए सैजौ लैख राए थियु, औरौ हर आदमीए जू किछै कौरे राए थियु तिथकै हिसाब शै तिनका न्याय कौरा गौआ, जू तिनु किताबो दो लैख राए थियु। 14-15 सैजै सौब लोग जिनकै नांव जीवन कै किताब दो ना लैख राए थै, तिनु आग कै झील दै बैगाए दियै। इथकै बाद, ऐबै मौत ना आथी, ऐबै मौरेयौंदे का कुणजाई ठाँव ना आथी, जिथुकै सैजै सौब लोग जिनकै नांव जीवन कै किताब दै ना लैखै रैई थिए तिनु आग कै झील दै बैगाए दियै। इथुकै ही औकै मौत बौल़ै जांव, औरौ आग कै झील कै सौजा कै मौत बौल़ै जांव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation