प्रकाशितवाक्य 2 - सिरमौरी नौवाँ नियम

इफिसुस शहर प्रेमहीन कलीसिया

¹ तैणै मुखै ऐजौ बै बौल़ौ, इफिसुस शहर कै कलीसिया कै स्‍वर्गदूत खै ऐजा सौंदेश लिख: हांव सैजाई औसौ जू आपणै सोऐं हाथौ दै सात तारै नियौ राखु औरौ जू सूनै की सात दियोटो कै बीचो दा हांडु, हांव जू बुलूए सैजौ शुण:

² हांव जाणुए कै तू का कौरे, तू कैशै मैहनत कौरे औरौ कौलोंई हार ना मानै; हांव जाणुए कै तू बुरै लोगौ कै झूठी शिक्षाओं कै सैहन ना कौरे। तुऐं तिनु लोगौ कै जांचै राए जू बौल़ौए कै सै चोणेयौंदे चैलै औसौ पौरौ सौथीखै आथी ना, औरौ तुऐं तिनु झूठै पाए राए।

³ तुऐं सब्र शै दुख खै सैहन कौरे जिथुकै तू मुं पांदी बिशवाश कौरे औरौ तोबै बै मुं पांदी तैरा बिशवाश मोजबूत औसौ।

⁴ पौरौ मुखै तांवआरी ऐजी शिकायत औसौ: कै ऐबै तू मुंआरी तैशणा प्यार ना कौरे जैशणा प्यार तू मुंआरी तोबै कौरे थिया जौल़ौ तुऐं आगलै बैई मुं पांदी बिशवाश कौरा थिया।

⁵ इथकारिए याद कौर कै तू शुरुआत शै मुंआरी कैशणा प्यार कौरे थिया औरौ ऐबै तू मुखै तैशैखैई प्यार ना कौरे। इयौं बात शै पाप कौरणै छोड़े दै औरौ मुंआरी तैशैखैई प्यार कौरणा शुरु कौर जैशै तू शुरुआत शै कौरे थिया। जै तू ना बौदला तौ हांव तैरै धोरे आन्दा औरौ जिथै तैरै दिवट राखै राए तिनु तिथैदै हटाए दैंदा।

⁶ पौरौ ऐक आछै बात औसौ जू तू कौरे। सैजी ऐजै औसौ कै तू नीकुलइयों कै दवारा शिखाए जाणौवाल़ै बुरै कामौ शै नफरत कौरे, ठीक तैशैखैई जैशै हांव नफरत कौरु।

⁷ जिनु कुणिए मैरी बात शुणी लोए, सै ध्यान शै शोणेया कै पवित्र आत्मा कलीसियाओं शै का बौल़ौ: जूंजे लोग जीत पालै, तिनु हांव जीवन दैणौवाल़ै डाल़ शै फोल़ खाणौ कै इजाज़त दैंदा, जू पौरमेशवर कै स्वर्गीय बागौ दै औसौ।

स्मुरना सताएयौंदी कलीसिया

⁸ स्मुरना शहर कै बिशवाशी लोगौ कै मंडली कै स्‍वर्गदूत खै ऐजौ लिख: हांव आगला औरौ आखरी औसौ, हांव एकबेई मौरे गौआ थिया। पौरौ ऐबै हांव जियुंदी औसौ, औरौ हमैशा जियुंदी रौन्दा, जू हांव ऐजौ बुलू तिथु शुणौ:

⁹ हांव जाणुए कै ताखै सोताए गौआ औरौ तू गरीब औसौ। पौरौ आत्मिक मामलै दा तू बैजाए सैठ औसौ। हांव तिनु लोगौ कै बारै मुंजी जाणुए जू दावा कौरौ कै सैजै पौरमेशवर कै चोणेयौंदे लोग औसौ, पौरौ आथी ना। सै तैरै बारै मुंजी बुरी बातौ बौल़ौ, पौरौ सौथीखै सै तैसी गुट कै लोग औसौ जू शैतान का औसौ।

¹⁰ तिनु दुखो शै डौरेया नी जू ताखै भैटौ। शैतान तुऔं मुंजीदै किछै लोगौ कै थोम्बाला औरौ तुऔं कोयदी दा पाए दैंदा ताकि सै तुंआरी परीक्षा कौरे सौकौ। तुऐं दस दूसौ तौड़ी बौड़ी मुसीबतौ कै महसूस कौरदै। पौरौ मुं पांदी बिशवाश कौरणा कौलोंई नी छोड़ेया, चाहै तुऔं जान शै बै मारै दैंव, जिथुकै हांव तुऔं खै तुंआरी जीत का इनाम कै रुप दा सौदा कि जिन्दगी दैंदा।

¹¹ जिनु कुणिए मैरी बात शुणी लोए, सै ध्यान शै शोणेया कै पवित्र आत्मा कलीसियाओं शै का बौल़ौ: जू लोग जीत हासिल कौरौ, तिनु तियौं मौत शै कुणजाई नुकसान ना हौंदा, जोबै पौरमेशवर आखरी न्याय कौरला।

पिरगमुन शहर-सौमझौता कौरेयौंदे कलीसिया

¹² पिरगमुन शहर कै कलीसिया कै स्‍वर्गदूत कै ऐजौ लिख: हांव ही औसौ जैसी कैई तैज दो धार वाल़ी तलवार औसौ। हांव ताखै ऐजौ बुलू:

¹³ हांव जाणुए कै तू तैसी ठाँव दा रौए जिथै शैतान राज्य कौरौ। तू मुं कारिए बिशवाश लायक बौणेयौंदा रौआ, औरौ मुं पांदी बिशवाश कौरणा कौलोंई बंद ना कौरी। तुऐं तैसी सौमय बै बिशवाश कौरा जोबै तिनुऐ अन्तिपास खै तिथै मारै दिया जिथै शैतान राज्य कौरौ।

¹⁴ पौरौ मुखै तांवआरी ऐजी शिकायत औसौ, जिथुकै तू तिनु लोगौ का विरोध ना कौरे जू झूठी शिक्षा दैंव, जैशैखै पौरमेशवर कै बातौ बौताणौवाल़ै बिलामै पुराणै सौमय दै दैय राए थै। बिलामै राजा बालाक कै शिखोऊ कै इस्राएल देश कै लोगौ खै पाप कौरणौ कारिए उकसाणौ कारिए का कौरणौ चैंई। तैणै तिनु मूर्ति खै चौढ़ाएयौंदो भोजन खाणौ औरौ बुरै ढंग शै जीणु शिखोऊ।

¹⁵ तैशैखैई, तुऔं मुंजी किछै लोग औसौ जू नीकुलइयों कै गुट की शिक्षाओं कै मानौ।

¹⁶ इथकारिए पाप कौरणा छोड़ी दैव, जै तू बुरै काम कौरणै बंद नी कौरला तौ हांव तावल़ा आन्दा औरौ तिनु लोगौ खै खिलाफ तियौं तलवारै लैई लौड़दा, जू मैरै मुँह शै निकल़ौ, जू मैरा वचन औसौ।

¹⁷ जिनु कुणिए मैरी बात शुणी लोए, सै ध्यान शै शोणेया कै पवित्र आत्मा कलीसियाओं शै का बौल़ौ: सैजै लोग जू जीत हासिल कौरौ, हांव तिनु तैसी मन्ना मुंजी दु किछै दैंदा जू छिपैयौंदा औसौ। हांव तिनु सोबी खै ऐक चिटा पाथर बै दियुंबा, जिथपांदी ऐक नौवाँ नांव लैखयौंदा हौंदा। जू आदमी तैसी पाए दैला, तैसी छोड़ेयौ कुणिए बै तैसी नांव खै ना जाणै सौकदा।

थुआतीरा शहर भ्रष्ट कलीसिया

¹⁸ थुआतीरा शहर कै कलीसिया कै स्‍वर्गदूत कै ऐजौ लिख: “पौरमेशवर कै बैटै कै ढौबौशा ऐजा सौंदेश औसौ जैसकी आखी आगी कै लोपटो कै जैशणी चौमकै रोए थी औरौ जैसकै लात पीतलो कै जैशणै चौमकै रौए, जू तैज गरम आगी दै चौमकौ; हांव ताखै ऐजौ बुलू:

¹⁹ हांव जाणुए कै तू का कौरे, औरौ हांव जाणुए कै तुऐं ऐकी दुजैआरी प्यार कौरौ औरौ तुऐं मुं पांदी मोजबूती शै भोरोशा कौरौ। हांव जाणुए कै तुऐं कैशै ऐकी दूजै कै मौदद कौरे, औरौ तुंआरी सैहणौ कै योग्यता बै जाणुए। हांव जाणुए कै तुऐं ऐबै इनु भले कामौ कै तैसी सौमय शै जादा कौरे लौवै जोबै तुऐं मुं पांदी आगलै बैई बिशवाश कौरा थिया।

²⁰ पौरौ मुखै तुऔंआरी ऐजी शिकायत औसौ, कै तुऐं तियौं बैटमाणिश इजेबेल खै झूठी शिक्षा फोयलाणो दैंव। सै बौल़ौए कै सै ऐक पौरमेशवर कै बातौ बौताणौवाल़ी औसौ, पौरौ आपणी शिक्षाओं लैई सै मैरै लोगौ खै गौलत सौमबंध कै पापौ दै शामिल हौणौ कारिए औरौ मूर्ति खै चौढ़ाए जाणौवाल़ै खाणौं खाणौ कारिए भरमांव।”

²¹ मोऐं तियौं बैटमाणिशौ इजेबेल कै पाप कौरणै छोड़े दैणौ का मौका दिया, पौरौ सै तिनु बुरै कामौ खै बंद कौरणौ शै मना कौरौ।

²² इथकारिए, हांव तैसी बीमार कौरे दैंदा। औरौ जू तियौंकै साथै गौलत सौमबंध बाणौ, हांव तिनुखै खतरनाक दुख सैहणौ कै बौजैह बौणदा, जांव तौड़ी सैजै जू बुरा काम कौरौ, तिथैशै रुकणौ खै तैयार ना हौए जांव।

²³ हांव तिनु लोगौ खै मारै दैंदा जू तियौं की शिक्षाओं खै मानौ, औरौ सौबै कलीसियाएं जाणै पांदी कै हांव ही औसौ जू हरेक आदमी कै विचारो औरौ मकसदो कै परख कौरु। हांव तुऔं मुंजीदै हरेक कै तिनकै कामौ कै हिसाब शै फोल़ दैंदा।

^24-25 पौरौ थुआतीरा शहर दै तुऐं बाकी लोगै तियौं झूठी शिक्षा खै ना मानी। तुऐं तिथमुंजी हिस्सा ना लोई जिथु तियौंकै चैलै “शैतान की गैहरी बातौ बौल़ौ।” हांव तुऔं खै बुलू कै हांव तुऔं कुणजै औकै खास आज्ञा ना दुं, सिवाए इथकै कै जांव तौड़ी हांव ना आन्दा तांव तौड़ी मुं पांदी मोजबूती शै बिशवाश कौरणा जारी राखौ।

²⁶ सैजै लोग जू जीत हासिल कौरौ, औरौ जू आखरी सौमय तौड़ी मैरी आज्ञा खै मानौ, हांव तिनु देशो पांदी राज्य कौरणौ का औधिकार दैंदा।

²⁷ हांव तिनु राज्य कौरणौ का सैजाई औधिकार दैंदा जैशै मैरै पिताए मुखै दैय राए। तिनका राज्य लोहे कै जैशणा मोजबूत हौंदा जू ना टूटौ, औरौ तिनकै दुशमन टुटेयौंदे माटी कै बासणौ कै जैशणै हौंदै।

²⁸ हांव तैसी आपणै जीत खै दिखाणौ कारिए बियाणौ का तारा दैंदा।

²⁹ जिनु कुणिए मैरी बात शुणी लोए, सै ध्यान शै शोणेया कै पवित्र आत्मा कलीसियाओं शै का बौल़ौ।