प्रकाशितवाक्य 17 - सिरमौरी नौवाँ नियम

बैटमाणिश औरौ लाल रंग का राकस

¹ जिनु सात स्‍वर्गदूतौ कैई सैजै सात डौंगै थिए, तिनुमुंजी दै ऐकीए आयौ मुंकैई ऐजौ बौल़ौ, हांव ताखै दिखांदा कै पौरमेशवर कैशै तियौं बौड़ी वेश्या खै सौजा दैंदा, जू ऐक ऐशणै ठाँव पांदी बौठौ, जिथै बैजाए नोंदी औसौ।

² जियौं आरी धोरती कै राजाए गौलत काम कौरे राए, औरौ धोरती कै रौणौवाल़ै तिथकै गौलत काम कै सूर शै मतवाल़ै हौए गौवै थिए।

³ तोबै आत्मा कै मौदद शै, स्‍वर्गदूत मुखै रेगिस्थान दै लौय गौआ, औरौ मोऐं तिथै ऐक बैटमाणिश खै दैखी जू ऐक राकस पांदी शवार थै जू लाल रंग का थिया। तिथकै सात मुंड औरौ दस शींग थिए। तैसका शोरीर तिनु नांवौ लैई छिपैयौंदा थिया जू पौरमेशवर कै नेंदैया कौरौ।

⁴ ऐजी बैटमाणिश बैंगनी औरौ लाल रंग कै लुस्कै बाम्बैयौंदे थै, तियैं आपणै शोरीर खै सूनै कै गैहणे, कीमती पाथरो औरौ मौंगै मौती लैई सजाए राए थिया, आपणै सोऐं हाथौ दै तियैं सूर लैई भौरेयौंदा ऐक सूनै का गिलास पाकड़ै राए थिया, जू तियौंकै गौंदै कामौ औरौ गौलत कामौ कै दिखांव।

⁵ तियैं माथै पांदी, ऐक नांव लिखु जिथका ऐक छिपैयौंदा मतलब औसौ। ऐजौ ऐशैखै थियु, “हांव बौड़ै शहर बाबेल औसौ। हांव सारै वेश्याओं कै माँ औसौ औरौ सैजी औसौ जू दुनिया कै सौबै गौंदै कामौ कै माँ औसौ।”

⁶ औरौ मोऐं दैखौ कै सैजी बैटमाणिश पौरमेशवर कै लोगौ कै लोऊ शै नोशे दै थै, यानी तिनु लोगौ कै जिनु लोगौ कै मारै दियै थिए जिथुकै सैजै यीशु कै प्रति बिशवाश लायक थिए हांव बैजाए हैरान हौआ।

बैटमाणिश औरौ जानवर का मतलब

⁷ तैसी स्‍वर्गदूतै मुंकैई बौल़ौ, “हैरान नी हौया। हांव इयौं बैटमाणिश, औरौ तैसी राकस का, जैसपांदी सै शवार औसौ, औरौ जैसकै सात मुंड औरौ देश शींग औसौ, हांव ताखै इथका गुप्‍त मतलब बौतौऊं।”

⁸ सैजा राकस जिथु तुऐं इबी दैख राए, ऐकी सौमय जियुंदी थिया, पौरौ ऐबै जियुंदी ना आथी; सै डुंगै गौढै पौरैशा बायरै आणौवाल़ा औसौ औरौ पौरमेशवर तैसी पूरी तरह शै नाश कौरे दैंदा। धोरती पांदी रौणौवाल़ै लोग जिनकै नांव पौरमेशवरे धोरती कै बाणणौ दै औगौड़ियौ जीवन कै किताबो दो ना लिखी, सै सौबै हैरान हौए जांदै जोबै सै ऐसी जानवर खै दैखदै। ऐकी सौमय सै जियुंदी थिया; ऐबै सै जियुंदी ना आथी; पौरौ सै औटेयौ पाछु आन्दा।

⁹ इनु सौमझणौ कारिए ज्ञान कै जौरुरत औसौ। जानवर कै सात मुंड तैसी शहर कै सात धारौ खै दिखांव जिथै ऐजी बैटमाणिश राज्य कौरौ। सै सात राजाओं कै दिखांव।

¹⁰ तिनुमुंजी दै पाँच तौ आगै ही मौरे गौवै, औरौ तिनु मुंजीदा ऐक ऐबै राजा औसौ; आखरी वाल़ा इबी तौड़ी आए ना रैई, पौरौ जौल़ौ सै आला, तौ सै सिरफ दैणिक सौमय कारिए शासन कौरदा।

¹¹ जू राकस आगै थिया, औरौ ऐबै ना आथी, सै आपी ही आठवाँ राजा औसौ; पौरौ सैजा आठवाँ राजा आगै सात राजाओं मुंजीदा ऐक औसौ। औरौ आखरी दै तैसी राजा खै निशोंक हौयौ हमैशा कारिए सौजा दैय जांदै।

¹² सैजै दस शींग जू तुऐं आगै दैख राए थिए, तिनु दस राजाओं खै दिखांव जिनुवै इबी शासन कौरणा शुरु ना कौरे रैई। तिनु दस राजाओं खै तैसी राकस कै साथै मिलैयौ शासन कौरणौ कै रजामंदी दी, पौरौ तिनका शासन सिरफ दैणिक सौमय हौंदा।

¹³ इनु सौब दस राजाओं का ऐकै मकसद औसौ, औरौ सै आपणै-आपणै शौकतै औरौ औधिकार राकस खै दैय दैंदै।

जीत मेम्ने कै औसौ

¹⁴ सैजै मेम्ने कै खिलाफ लौड़ाए कौरदै, पौरौ मेम्‍ना तिनु हराए दैंदा, जिथुकै सै प्रभुओं का प्रभु औरौ राजाओं का राजा औसौ। मेम्ना आपणै बुएदैहौंदै, चोणेयौंदे औरौ बिशवाश लायक चैलै कै साथै तिनु पांदी जीतै जांदा।

¹⁵ स्‍वर्गदूतै मुंकैई ऐजौ बै बौल़ौ: “जू पाणी तुऐं आगै दैख राए थियु, जिथपांदी सैजी वेश्या बौठै रौए थै, सै सारै दुनिया कै लोगौ खै, कैई देश कै लोगौ खै औरौ कैई तरह कै लोग, जाति, देश औरौ भाषाओं खै दिखांव।

¹⁶ सैजा सौमय आन्दा जौल़ौ राकस तिनु दस राजाओं कै साथै जू तैसकै साथै औसौ, तियौं वेश्या आरी नफरत कौरदै जू तिथपांदी बौठै रौए। सै तियौं पांदी हमला कौरदै, तियौं नांगै कौरदै, सै तियौंकै मांस कौ हिस्सा खांदै, औरौ बाकी कै फोकै दैंदै।”

^17-18 सैजी बैटमाणिश जियौं तुऐं दैख राए थै, सैजी ऐजा बौड़ा शहर औसौ जू धोरती पांदी सौबी राजाओं पांदी शासन कौरौ। ऐजी चीज़ै तिथकै साथै हौए रोई, जिथुकै पौरमेशवरे आपणै मकसदो खै पूरा कौरणौ कारिए तिनकै मनो कै चौलाए राए। ऐजी बौजैह औसौ कै तिनुऐ आपणा औधिकार राकस खै दैय राए कै सै शासन कौरौ, जांव तौड़ी कै सैजौ पूरु ना हौए जांव जू पौरमेशवरे बौल़ै राए।