प्रकाशितवाक्य 16 - सिरमौरी नौवाँ नियम

आगला डौंगा

¹ तिथकै बाद मोऐं मन्दिर पौरैशै ऐक जोरो कै आवाज़ खै स्‍वर्गदूतौ शै ऐजौ बौलदै शौणै, “जा धोरती कै लोगौ पांदी पौरमेशवर कै ढौबौशै सौजा खै रिताए दै जू तिनु सात डौंगै दै औसौ।”

² इथकारिए आगलै स्‍वर्गदूतै जू तैसकै डौंगै दो थियु सैजौ धोरती पांदी रिताए दियु। तोबै तिनु लोगौ खै जिनुपांदी राकस कै छाप थै या जिनुवै तैसकै मूर्ति कै पूजा कौरे राए थै, तिनु लोगौ पांदी दर्दनाक औरौ खतरनाक फोड़े निकल़ै।

दूजा डौंगा

³ दूजै स्‍वर्गदूतै जू तैसकै डौंगै दो थियु तिथु समुन्द्र पांदी रिताए दियु, तौलोंई समुन्द्र ऐक मौरेयौंदे आदमी कै लोऊ कै जैशणौ हौए गौ औरौ इथकारिए, समुन्द्र दै रौणौवाल़ै सौब ठुँ मौरे गौवै।

तीजा डौंगा

⁴ तिजै स्‍वर्गदूतै जू तैसकै डौंगै दो थियु सैजौ नोंदी औरौ पाणी कै झौरनै पांदी रिताए दियु, औरौ सैजौ लोऊ बौणै गौ।

⁵ औरौ मोऐं तैसी स्‍वर्गदूतौ खै जैसी सारै पाणी पांदी औधिकार औसौ, पौरमेशवर शै ऐजौ बौलदै शुणा, “ओए रै पवित्र पौरमेशवर, तू सैजाई औसौ जू सौमय कै शुरुआत शै लैयौ इबी तौड़ी औरौ हमैशा कारिए ना बौदलौ, ताखै ऐशैखै न्याय कौरणौ का औधिकार औसौ।

⁶ जिथुकै तिनुऐ तैरै लोगौ औरौ पौरमेशवर कै बातौ बौताणौवाल़ै खै मारै दियै औरौ तिनका लोऊ बौऊवा, इथकारिए ऐबै तू तिनु लोऊ पिणौ कारिए दैं। ऐजौ तिनु कारिए सोही भुगतान औसौ।”

⁷ मोऐं औटेयौ कोसी खै बैदी पौरैशा बौलदै बैई शुणा, “ओए रै सौबिदा बौड़ा शौकतीशाली प्रभु पौरमेशवर, हौर ऐजौ साचौ औसौ जैशैखै तू लोगौ खै सौजा दैय सैजौ ठीक औरौ साचौ औसौ।”

चौथा डौंगा

⁸ चौथै स्‍वर्गदूतै जू तैसकै डौंगै दो थियु सैजौ सुरज पांदी रिताए दियु, औरौ सुरज खै हौजौ जादा गरम हौणौ कै छूट दैय गौए औरौ इथ बौजैह शै लोग इथकै जादा औरौ खतरनाक सैकौ लैई जौल़ै गौवै।

⁹ लोग इयौं तैज गर्मी शै जौल़ै गौवै, औरौ तिनुऐ पौरमेशवर खै नेंदैया कौरे, जिथुकै सैजाई थिया जैसकैंई तिनु समस्या पांदी औधिकार थिया। तिनुऐ ऐबै बै आपणै पापौ शै पश्‍चाताप ना कौरी, तिनुऐ ऐबै बै पौरमेशवर कै महानता खै ना मानी।

पाँचवाँ डौंगा

¹⁰ पाँचवें स्‍वर्गदूतै जू तैसकै डौंगै दो थियु सैजौ तैसी राकस कै राज्य पांदी रिताए दियु, औरौ सैजा राज्य जिथपांदी राकस राज्य कौरौ थिया इनारै वाल़ा हौए गौआ। लोग आपणी जीभ काटदै लागै जिथुकै सै तिनु पीड़ो औरौ फोड़ो कै सैहन ना कौरे सौकौ थिए जू पीड़ो सै महसूस कौरौ थिए।

¹¹ औरौ आपणी पीड़ो औरौ गुमड़ौ कै बौजैह शै स्वर्ग कै पौरमेशवर कै नेंदैया कौरे; ऐबै जौबेकै तिनकै हालत खराब थै, तोबै बै तिनुऐ पाप कौरणै ना छुड़ी औरौ ना तिनु बुरै कामौ खै छोड़े जू तिनुऐ कौरे लौवै थिए।

छौठा डौंगा

¹² छटै स्‍वर्गदूतै जू सौजा तैसकै डौंगै दै थै, सैजौ तियौं बौड़ै नोंदी फरात पांदी रिताए दियु, इथका नतीजा ऐजा हौआ कै, नोंदी कु पाणी शोकै गौ औरौ इथ बौजैह शै पूर्व दिशा कै राजा आपणै सैना नियौ तियौं नोंदी कै पार कौरे सौकै।

¹³ इथकै बाद मोऐं तीन दुष्टआत्माओं खै दैखी जू मेंढक कै जैशणी दैखैयो थी। जू कै ऐक अजगर कै मुँह बाटी बायरै आई, ऐक आगलै राकस कै मुँह शै, औरौ ऐक दूजै राकस कै मुँह बाटी बायरै आई, यानी सैजा जैणै झूठा सौंदेश दैय राए थिया।

¹⁴ इनु दुष्टआत्माओं कैई चौमत्कार कौरणौ कै शौकतै थै औरौ तिनुऐ जायौ तिनु लोगौ खै कौठै कौरे जू इयौं दुनिया कै सौबै देशो दै राज्य कौरौ थिए ताकि सै सौबिदा बौड़ा शौकतीशाली प्रभु पौरमेशवर कै महान दूसौ पांदी तैसकै खिलाफ लोड़ाए लौड़णौ कारिए जांव।

^15-16 दुष्टआत्माएं शासको खै औरौ तिनकै सैनाओं खै तैसी ठाँव पांदी कौठै कौरे जिथु इब्रानी भाषा दौ हर-मगिदोन बौल़ै जांव। इथकारिए प्रभु यीशुए बौल़ौ, “ऐजी बात शुणौ। मैरौ आणौ चोर कै आणौ कै जैशणौ एकदम हौंदौ। धन्‍य औसौ सैजा आदमी जू मैरै आणौ पांदी बिजैयोंदा रौंव, औरौ आपणै लुस्कै तैयार राखौ। तोबै सै नांगै ना हौंदै औरौ किछै बै तिनु शर्मिंदा ना कौरदै चाहै सै बायरै बैजाए लोगौ कै बीच बै जालै।”

सातवाँ डौंगा

¹⁷ सातवें स्‍वर्गदूतै जू तैसकै डौंगै दो थियु सैजौ हावा दो रिताए दियु, औरौ मोऐं शुणु, तिथै सैजा थिया जू स्वर्ग कै मन्दिर कै भीतरै पौरैशा पौरमेशवर कै सिंहासन शै बौलाए रौआ थिया, “सौब ठुँ हौए गौ।”

¹⁸ औरौ तैसी सौमय बिजली, औरौ गड़गड़ाहट औरौ बादल़ गुड़कौंदौ लागौ, औरौ शोब्द औरौ ऐशणौ डोराणौ भुईचोल़ ओऊ, कै जौल़ौ दै ऊबै आदमी दुनिया दै रौंदै लागै रौवै, तौलौ दै ऊबै ऐशणै नाश कौरणौवाल़ै भुईचोल़ कौलोंई ना आए रैई।

¹⁹ बाबेल का बौड़ा शहर तीन टुकड़ै दा बौंटे गौआ, औरौ पूरै दुनिया कै सौब शहर खत्म हौए गौवै। जिथुकै पौरमेशवरे सैजौ पूरु कौरौ जिथका तैणै बाबेल कै लोगौ कै सौजा कै बारै मुंजी वादा कौरे राए थिया। ऐसी शहर कै पौरमेशवर कै ढौबौशै सख्त सौजा दैय जांदै। ऐजौ ऐशै ही हौंदौ जैशै तिनुऐ बिना पाणी मिलीयौंदी सूर खै पी रालै, जिथुकै पौरमेशवरे आपी तैसी डौंगै कै रिताए राए जू तैसकै गुस्से खै दिखांव। इथका मतलब ऐजा औसौ कै सै बिना कोसी कोमलता कै तिनुआरी पूरी तरह शै गुस्सा हौंदा।

²⁰ तैसी सौमय, समुन्द्र कै सौबै टापू एकदम डोबै गौवै औरौ ऐबै कुणजैई पाहाड़ ना थी।

²¹ बौड़ै-बौड़ै शौरू गौयण शै लोगौ पांदी छुटै, जिनका हरेक शौरू का वजन लमसम पचाश किलोग्राम थिया। इथका नतीजा ऐजा हौआ, कै तिनुऐ पौरमेशवर कै नेंदैया कौरे जिथुकै तिनु पौरमेशवर कै दवारा तिनु पांदी भैजैयौंदे समस्या कै बौजैह शै जादा पीड़ो सैहणी पौड़ी।