प्रकाशितवाक्य 15 - सिरमौरी नौवाँ नियमप्रकोप शै भौरेयौंदे सूनै कै सात डौंगै 1 जोबै सैजौ खत्म हौए गौ, तौ मोऐं गौयण दा ऐक ओका निशान दैखा जू कै बैजाए अनौखा औरौ बैजाए डौरावणा थिया। तिथै सात स्वर्गदूत थिए जू सात जौई-जौई तरह कै समस्याए नियौंदे थिए। सैजी समस्याए आखरी औसौ जिथुकै जोबै सै खत्म हौए जांदी तोबै पौरमेशवर का गुस्सा खत्म हौए जांदा। 2 औरौ मोऐं किछै दैखौ जिथकै चौड़ाए समुन्द्र कै जैशणै थी, ऐजै आग मिलेयौंदे शीशै कै जैशणै दैखियौं थै। औरौ तैसी समुन्द्र कै किनारे पांदी जू शीशै कै जैशणा थिया, मोऐं बौहितै लोगौ कै खौड़ै हौएयौंदै दैखै। सै सैजै लोग थिए जिनुवै तिथु राकस कै हराए राए थियु, जिथुकै तिनुऐ तिथकै पूजा कौरणौ शै मौना कौरे दियु थियु, तिनुऐ तिथकै मूर्ती कै पूजा कौरणौ शै औरौ तैसी नम्बर का निशान छपवाणौ शै मौना कौरे दियु थियु जिथका मतलब तिथकौ नांव औसौ। सैजै हौराणौ वाल़ै तैसी समुन्द्र कै किनारे खौड़ै थिए, तिनुऐ तिनु तारवाल़ै गाजै-बाजै कै पाकड़ै राए थिए जू तिनु पौरमेशवर कै ढौबौशै दैय राए थिए। 3 सैजै ऐक ऐशणौ गीत गांव थिए जैशैकै पौरमेशवर कै सेवक मूसाए बैजाए औगौड़ियौ गाए राए थियु। तिनुऐ यीशु कै महिमा कौरणौ कारिए, जू कै ऐक मेम्ने साए औसौ, ऐशैकै खै गौऊं: “ओए रै सौबिदा बौड़ा शौकतीशाली प्रभु पौरमेशवर, जू किछै तुऐं कौरे राए सै महान औरौ अनौखा औसौ। तू सौबी देशो का राजा औसौ, तू जू बै कौरे सोही औरौ धरमी औसौ।” 4 “ओए रै प्रभु, सौबी लोगौ कै दवारा तैरा आदर कौरा जांव, औरौ सै सौबै जोणे तैरै नांव कै इज्जत कौरौ, जिथुकै सिरफ तू ही पवित्र पौरमेशवर औसौ। हरेक राज्य कै सौबै लोग तैरै धोरे आंव, औरौ सै तैरी आराधना कौरौ, जिथुकै तैरै धरम कै काम सौबै जोणे आछी तरह शै जाणौ।” 5 इथकै बाद मोऐं दैखौ, कै स्वर्गो दौ इनु लोगै गीत गाणौ बन्द कौरे दियु, तोबै मोऐं दैखौ कै मन्दिर खोलेयौंदो थियु। जू कै मिलापवाल़ै तोम्बू साए औसौ। 6-7 औरौ तोबै सात स्वर्गदूत जिनु आखरी सात मुसीबतौ कै लौयौ जाणौ थियु, तैसी मन्दिर शै बायरै निकल़ै। सै चोमकैयौंदे चिटै लुस्कै बाम्बैयौंदे थिए औरौ तिनकी छाती कै चोऊ ढौबौ कै सूनै की पाटी बै थी। तोबै चार जियुंदी प्राणीयों मुंजीदै ऐकीए हरेक स्वर्गदूत कै पौरमेशवर कै ढौबौशै जू हमैशा जियुंदी औसौ, गुस्से शै भौरेयौंदा ऐक-ऐक सूनै का डौंगा दिया। 8 मन्दिर पौरमेशवर कै महिमा औरौ अनौखी शौकतै शै आणौवाल़ै धुऐं शै भोरै गौआ। तांव तौड़ी कुणिए बै मन्दिर दै ना जाए सौकी जांव तौड़ी कै सैजी सात मुसीबतौ खत्म ना होई गोई जिनु सात स्वर्गदूतै लाए राए थिए। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation