प्रकाशितवाक्य 14 - सिरमौरी नौवाँ नियम

मेम्‍ना औरौ ऐक लाख चौवालीस हजार लोग

¹ इथकै बाद, मोऐं किछै औकौ दैखौ, मोऐं सिय्योन धारो कै चुटी पांदी मेम्ने खै खौड़ा हौएयौंदा दैखा। तैसकै साथै ऐक लाख चौवालीस हजार लोग थिए, तिनकै माथै पांदी मेम्ने कौ नांव औरौ तैसकै पिता कौ नांव लैखैयौंदे थियु।

² औरौ मोऐं स्वर्ग पौरैशै कोसी कै आवाज़ शौणै जू कै झरणै कै गर्जणो कै जैशणै तैज औरौ गड़गड़ाहट कै आवाज़ कै जैशणै ऊंची थी। जू शाद मोऐं शुणा सैजा शाद तैशणा थिया, जैशणा शाद लोग आपणै गाजै-बाजै बौजांदै बैई निकाल़ौ।

³ 144,000 लोग सिंहासन, चार जियुंदी प्राणी औरौ पुराणियो कै सामणै खौड़ै थिए; तिनुऐ ऐक नौवाँ गीत गाए लौआ थिया, जिथुकै सिरफ सैजैई शिखै सौकौ थिए। सिरफ सैजैई जिनुकै पौरमेशवरे धोरती पांदी रौणौवाल़ै लोगौ कै बीच मुंजी शै छुड़ाए राए थिए।

⁴ ऐजै सैजै औसौ जू पवित्र जीवन जियौंए। ऐजै तिनु लोगौ कै जैशणै औसौ, जिनुवै ऐक बैई बै नाजायज सौमबंध ना बाणी औरौ ना ही इनुवे कौलोंई कियौंई चीज़ौ कै पूजा कौरे, ऐजै सिरफ मेम्ने कै ही आराधना कौरौ जिथै मेम्ना जांव, ऐजै लोग तैसकै पौछौड़ियौ हौए जांव। ऐजै सैजै औसौ जिनुकै धोरती कै सौबी आदमियों शै जौई कौरे राए। जैशै लोग आपणै खेतौ कै फसल का सौबिदा आछा हिस्सा पौरमेशवर कै दैंव तैशैखैई ऐजै लोग बै आपणै जीवन कै पूरी पवित्रता कै साथै पौरमेशवर औरौ मेम्ने कै दैंव।

⁵ तिनुऐ कौलोंई झूठु ना बौल़ै रैई। तिनुमुंजी किछै गौलत ना आथी।

तीन स्‍वर्गदूतौ कै घोषणा

⁶ औरौ मोऐं ऐक ओकी स्‍वर्गदूतौ कै गौयणी दा ऊंचे पांदी उड़दै बैई दैखा। तैसी स्‍वर्गदूतै तैसी सुसमाचार खै कौरे राए थिया जू कौलोंई ना बौदलौ, तैणै दुनिया दै रौणौवाल़ै लोगौ दै, सौब देशो कै, सौबी गोत्र औरौ सौबी भांत कै भाषा दै सुसमाचार कै घोषणा कौरे।

⁷ तैणै जोर शै बौल़ौ, “पौरमेशवर शै डौरौ औरौ तैसका आदर कौरौ जिथुकै ऐबै सैजा सौमय आए गौआ जोबै सै लोगौ का न्याय कौरला। तैसकै आराधना कौरौ, जिथुकै सै सैजा औसौ जैणै स्वर्ग, धोरती, समुन्द्र औरौ पाणी कै झरणै बाणै राए।”

⁸ तिथै ऐक ओका स्‍वर्गदूत थिया जू आगलै स्‍वर्गदूत कै पाछै ओऊवा औरौ बौल़ौ, “ऐबै ऐजौ शहर नाश हौए गौ। बाबेल शहर बुरी तरह शै नाश हौए गौ। ऐसी शहरै सौबी आदमी की बिरादारी कै आपणै सुरो कै नोशे दै टुन कौरे दियै, बाबेल शहर कै लोगै शोरीरो कै कुर्कमौ कै बौजैह शै धोरती कै सौब देशो कै लोगौ कै तैशणैई पाप कौरणौ कारिए उकसोऊवे थिए। जैशै मानौ बाबेल शहर कै लोगै दुनिया कै लोगौ कै सूर पिणौ कारिए दै, औरौ ऐजी बात लोगौ कै पौरमेशवर शै सौजा भैटणौ कै बौजैह बौणल़ै।”

^9-10 तोबै इनु दुईनै स्‍वर्गदूतौ कै बाद ऐक ओका तीजा स्‍वर्गदूत ओऊवा औरौ सै जोर शै बौल़ौऊवा, “जू कुणिए तैसी राकस औरौ तैसकै मूर्ति कै पूजा कौरौ, औरौ जू कुणिए आपणै माथै या आपणै हाथौ पांदी तैसकै छाप लांव, तैसी सख्ताई शै पौरमेशवर सौजा दैंदा। ऐजौ ऐशै हौंदौ जैशै तिनु लोगै बिना मिलावट कै सूर पी रालै, जिनु पौरमेशवरे आपी तिनकै कटौरै दै पाए राए जू पौरमेशवर कै गुस्से खै दिखांव। पौरमेशवर तिनु लोगौ खै पवित्र स्‍वर्गदूतौ औरौ मेम्ने कै सामणै आग औरौ गन्धक शै मानसिक औरौ शारीरिक पीड़ा दा सौतांदा।

¹¹ आग शै निकल़णौ वाल़ा धुआँ जू तिनु सताव सैजा हमैशा ऊबा जांव। रात-दूस तिनका सताए जाणा ना रुकदा, जिथुकै तिनुऐ राकस कै औरौ तैसकै मूर्ती की पूजा कौरे, औरौ तिनुऐ तैसी राकस कै नांव कै छाप लोए।”

¹² जिथुकै ऐजी बातौ हौंदी लागै रोई, इथकारिए पौरमेशवर कै लोगौ खै सब्र राखणा चैंई। ऐजै सैजै लोग औसौ जू पौरमेशवर कै आज्ञाओं खै मानौ औरौ ईमानदारी शै यीशु कै पाछैदै चालौ।

¹³ तोबै मोऐं स्वर्ग शै कोसी कै बौलदै बैई शुणु, औरौ तैणै मुखै बौल़ौ: “इनु बातौ खै इथै लिख। ऐबै शै, सैजै लोग खुशनसीब औसौ जू पौरमेशवर पांदी भोरोशा कौरदै बैई मौरे गौवै।” तोबै पवित्र आत्मा इथैशा सहमत हौआ, तैणै बौल़ौ, “ऐजौ साचौ औसौ। सैजै खुशनसीब औसौ जिथुकै सै आपणै कड़ी मैहनत शै विशांव पांदै औरौ जू काम तिनुऐ कौरे राए तिथ कारिए तिनु इनाम दैय जांदा।”

धोरती कै फसल कै कटणी

¹⁴ तोबै मोऐं ऐक चिटा बादल़ दैखा, औरौ मोऐं कोसी कै दैखा जू ऐक आदमी कै जैशणा थिया, जू बादल़ो पांदी बौठै रौआ थिया। तैसकै मुंडो पांदी सूनै का मुकुट थिया औरौ हाथौ दै ऐक तैज धार वाल़ी दरांती थै।

¹⁵ तोबै ऐक ओका स्‍वर्गदूत जू कै चौथा स्‍वर्गदूत औसौ पौरमेशवर कै सौंदेश खै लैयौ तैसी मन्दिर शै बायरै ओऊवा जू स्वर्ग दा औसौ। तैणै बादल़ौ पांदी बौठैयौंदे आदमी खै जोर दैयौ बौल़ौ, “शाख कै काटणौ का सौमय आए गौआ। इथकारिए ऐबै आपणै दरांती चोलाव, औरौ शाख कै काटैया कौरौ।”

¹⁶ इथकारिए, सैजा आदमी जू बादल़ौ पांदी बौठै रौआ थिया, धोरती पांदी आपणी दरांती शै काटदा लागा औरौ तैणै पूरी धोरती कै शाख कै कटाए कौरे।

¹⁷ तोबै ऐक ओका स्‍वर्गदूत मन्दिर पौरैशा निकल़ा, जू स्वर्ग दा औसौ, औरौ तैसीकैईं बै ऐक तैज धार वाल़ी दरांती थै।

¹⁸ तोबै ऐक ओका स्‍वर्गदूत जू कै छौठा स्‍वर्गदूत औसौ जू बैदी पांदी आग शै धूप जौल़ाणौ कै जुमैवारै निभांव। औरौ ऐजी बैदी तैसी मंदिर कै नेड़िक औसौ जू स्वर्ग दै औसौ ऐजा छौठा स्‍वर्गदूत तिथैदा बायरै ओऊवा। तैणै चिलायौ तैसी स्‍वर्गदूत शै जैसकैंई चौखै दरांती औसौ बौल़ौ, “धोरती पांदी अंगूरो कै झुमकै पाकै रौवै! तिनु आपणी तैज धार वाल़ी दरांती शै काटै पा।”

^19-20 तोबै स्‍वर्गदूतै तिनु अंगूरो खै काटै दियै जू धोरती पांदी थिए औरौ तिनु कौठै कौरे। तैणै अंगूरो खै ऐक बौड़ै रसकुण्डों दै फेरकाए दियै। इथका मतलब ऐजा औसौ कै पौरमेशवर खतरनाक सौजा दैंदा। अंगूरो खै शहर कै बायरै पिलकाए गौवै। तिथै जिथपांदी अंगूरो खै पिलकाए राए थिए, सै तैतरो डुंगु थियु, जैतरो कै घोड़े कै मुंड कै ऊंचाई हौंव जौल़ौ तैसी लगाम शै पाकड़ै जांव। औरौ लोऊ तीन सौ किलोमीटर तौड़ी बौए गौ।