प्रकाशितवाक्य 13 - सिरमौरी नौवाँ नियम

समुन्द्र मुंजीदै निकल़ै दो राकस

¹ मोऐं ऐक राकस समुन्द्र पौरैशा निकल़दै बैई दैखा, जैसकै सात मुंड थिए औरौ हरेक मुंडौ पांदी मुकुट थिए। तैसकै शींगौ पांदी दस राजमुकुट औरौ तैसकै हरेक मुंडौ पांदी पौरमेशवर को ऐक नांव लैखै राए थियु जिथका इस्तैमाल कौरणा का तैसी कुणजाई औधिकार ना थी।

² जू राकस मोऐं दैखा, सै चीते कै जैशणा थिया, औरौ तैसकै लात भालू कै जैशणै, औरौ मुँह शेरो कै जैशणौ थियु। अजगरे ऐसी राकस खै आपणै शौकतै दैय दै औरौ धोरती पांदी राज्य कौरणौ का औधिकार दैय दिया।

³ तैसी राकस कै मुंडौ पांदी ऐकी घाव का निशान थिया जू तैसकै मौत कै बौजैह बौणै सौकौ थै। पौरौ घाव ठीक हौए गौआ थिया। इथकारिए धोरती कै सौबै लोग हैरान हौए गौवै औरौ राकस कै चैलै बौणै गौवै।

⁴ सौबी लोगै अजगर कै पूजा कौरे जिथुकै तैणै तैसी राकस खै औधिकार दैय राखा थिया, तिनुऐ तैसी राकस कै बै पूजा कौरे। तिनुऐ बौल़ौ, “कुणिए ओका तैसी राकस कै जैशणा शौकतीशाली ना आथी। कुणिए बै तैसीआरी लोड़े ना सौकौ।”

⁵ राकस कै आपणै बारै मुंजी जोशीणौ औरौ पौरमेशवर कै नेंदैया कौरणौ का औधिकार भैटा औरौ ऐशैखै तैणै पौरमेशवर कै बैज्जती कौरे। तैसी बियाल़िस मीनै तौड़ी काम कौरणौ का औधिकार भैटा।

⁶ राकसै पौरमेशवर खै नेंदैया कौरणै शुरु कौरे, कै सै तैसकै नांव कै खिलाफ औरौ तैसी ठाँव कै खिलाफ बौल़ौ जिथै पौरमेशवर रौंव यानी स्वर्ग कै, औरौ तिनु सौबी लोगौ कै खिलाफ जू स्वर्ग दै रौंव।

⁷ राकस कै आपणै बारै मुंजी जोशीणौ का औधिकार भैटा, कै पौरमेशवर कै पवित्र लोगौ कै साथै लौड़ौ, औरौ तिनु हरांव, औरौ तैसीखै लोगौ कै ऐक इशैक बौड़ी भीड़ औरौ हरेक कुल, लोग, भाषा औरौ जाति शै थिए तिनु सौबी पांदी औधिकार दैय गौआ।

⁸ धोरती पांदी रौणौवाल़ै सौबै लोग तैसकै पूजा कौरदै लागै। सिरफ तिनु लोगै तैसकै पूजा ना कौरी जिनकै नांव दुनिया कै बाणै जाणै शै आगै ही जीवन कै किताब दै लिखै राए थै। ऐजी जीवन कै किताब तैसी मेम्ने कै किताब औसौ जैसी बलिदान कै रुप दै मारै गौआ थिया।

⁹ जिनु कुणिए मैरै बात शौणै लोए, सै ध्यान शै शोणेया कै पवित्र आत्मा कलीसियाओं शै का बौल़ौ।

¹⁰ जिनु लोगौ खै कोयद कौरा जाणा तय औसौ, सैजै निशोंक हौयौ कोयद कौरे जांदै, औरौ जिनु कारिए तय औसौ कै सै औकै लोगौ कै दवारा तलवार शै मारै जांदै, तौ सैजै निशोंक हौयौ तलवार शै ही मारै जांदै। इथकारिए जौरुरी औसौ कै पौरमेशवर कै लोग तिनु मुशकिलो खै सैहन कौरौ जू सै महसूस कौरौ औरौ बिशवाश कौरणौ दै मोजबूत रौंव।

धोरती मुंजीदा निकल़ा राकस

¹¹ तोबै मोऐं ऐक ओका राकस खै धोरती पौरैशा निकल़दै बैई दैखा, ऐसकै दो शींग थिए जैशै मेम्ने कै हौंव। पौरौ जोबै ऐजा बौल़ौऊवा तौ तैसकै आवाज़ अजगर कै जैशणै थै।

¹² तैणै तियौं शौकतै का इस्तैमाल कौरा जू तैसीखै तैसी राकस कै दवारा भैटी रौए थै जैसका जान लोणो वाल़ा घाव ठीक हौए गौआ थिया। तैणै दुनिया कै सौब लोगौ शै जबरदस्ती तैसी आगलै राकस कै पूजा कौरणौ कारिए बौल़ौ।

¹³ ऐजा दूजा राकस अनौखा निशान दिखांव थिया, इथै तौड़ी कै लोगौ कै दैखदै-दैखदै गौयण पौरैशै आग खै धैनै लांव थिया कै धोरती पांदी छुटौ।

¹⁴ बैजाए सारै लोग औकै राकस कै तिनु अनौखै कामौ शै चकित हौयौ धौखा खाया जू सै आगलै राकस कै शौकतै शै दिखांव थिया। दूजै राकसै लोगौ खै बौल़ौ कै सै तैसी आगलै राकस कै पूजा कौरणौ कारिए मूर्ति बाणौ, जू हथियार शै घायल हौए गौआ थिया, पौरौ औटेयौ ठीक हौए गौआ थिया।

¹⁵ औकै राकस खै आगलै राकस कै मूर्ति बाणैयौ तैसी जियुंदी कौरणौ का औधिकार दैय गौआ, ताकि राकस कै मूर्ति बौल बै सौकौ औरौ तिनु लोगौ खै मारै दैंव जू तैसी राकस कै मूर्ति कै पूजा ना कौरौ।

¹⁶ औरौ औकै राकसै साधारण औरौ खास, सैठ औरौ गरीब, दास या जू दास ना थी यानी सौबी लोगौ खै मजबूर कौरे कै सै आगलै राकस कौ नांव आपणै सोऐं हाथौ पांदी या आपणै माथै पांदी छपवांव।

¹⁷ सिरफ सैजै ही जिनुपांदी ऐजी छाप थै किछै खरीदै या बैकै सौकौ थिए। सैजी छाप आगलै राकस कौ नांव थियु या तैसकै नांव खै दिखाणौ वाल़ा ऐक नम्बर थिया।

¹⁸ इनु सौमझणौ कारिए ज्ञान कै जौरुरत औसौ। पौरौ जैसी ज्ञान औसौ, सै ऐजा पौता लाए सौकौ कै ऐसी राकस कै नम्बर का मतलब का औसौ। जिथुकै ऐजा ऐक आदमी कौ नांव औसौ। ऐजा नम्बर (666) छौ सौ छियासठ औसौ।