प्रकाशितवाक्य 12 - सिरमौरी नौवाँ नियम

बैटमाणिश औरौ खतरनाक अजगर

¹ जोबै सैजौ खत्म हौए गौ, तौ तिथै ऐक अनौखा निशान थिया जू गौयण दा दैखा जाए सौकौ थिया। जिथुकै चांद पांदी खौड़ै हौएयौंदी ऐक बैटमाणिश प्रकट हौए जियैं ऐशणै लुस्कै बाम्बै राए थिए जू सुरज कै जैशणै चौमकौ थिए। तियैं आपणै मुंडौ पांदी ऐक मुकुट लाए राए थियु जिंदै बारौ तारै थिए।

² सैजी बैटमाणिश होल़किणु वाल़ी थै, औरौ तियौं का जन्म दैणौ का सौमय आए गौआ। औरौ सै नानड़िया दैणौ कै पीड़ो कै बौजैह शै लेलयाए रौए थै।

³ ऐक ओका निशान गौयण दा दैखिया, ऐक बैजाए बौड़ा अजगर थिया, जू शैतान औसौ। ऐसकै सात मुंड थिए औरौ हरेक मुंडौ पांदी मुकुट थिया औरौ ऐसकै दस शींग थिए।

⁴ औरौ तैसकै पूँछै गौयण कै तारै कै ऐक तिहाई खै खिंचैयौ धोरती पांदी फेरकाए दियै, औरौ सैजा बौड़ा अजगर तियौं बैटमाणिशौ कै सामणै खौड़ा हौए गौआ ताकि तियांरै बौच्चै खै पौयदा हौंदै ही खाए जांव।

⁵ तोबै तियौं बैटमाणिशै ऐकी लोड़कै खै जन्म दिया पौरौ तैसी बौड़ा सांप ना खाए सौकी जिथुकै तैसी तावल़ा उंढा कौरा गौआ औरौ पौरमेशवर औरौ तैसकै सिंहासन पांदी लाए गौआ। सैजा लड़का ऐक लोहे कै छड़ी कै साथै यानी पूरै औधिकार कै साथै सौब देशो पांदी राज्य कौरदा।

⁶ औरौ सैजी बैटमाणिश तैसी शुनशान जौगैह कै भागै गौए, जिथै पौरमेशवरे तियौं कारिए ठाँव कै तैयार कौरे राए थिया कै तिथै सै ऐक हजार दौ सौ साठ दूसौ तौड़ी पालै जांव।

अजगर स्वर्ग शै बायरै फेरकाए गौआ

⁷ तोबै स्वर्ग पांदी लोड़ाए हौए, पौरमेशवर कै मुख्य स्‍वर्गदूतौ मुंजीदै ऐकीए जैसकौ नांव मीकाईल औसौ, आपणै अधीन आणौवाल़ै ओकी दूतौ कै साथै, बौड़ै अजगर कै खिलाफ लोड़ाए लौड़ै। औरौ बौड़ा सांप औरौ तैसकै दूतै मीकाईल कै खिलाफ लोड़ाए लोड़े।

⁸ अजगर लौड़ाए हारै गौआ। अजगर औरौ तैसकै दूत स्वर्ग दै ना रौए सौकी।

⁹ इथकारिए तैसी औरौ तैसकै दूतौ खै धोरती पांदी फेरकाए दियै। ऐजा बौड़ा अजगर, सैजाई औसौ जू बैजाए सौमय औगौड़ियौ शोंगोऊं कै भैष दा दैखैयो थिया, जैसी शैतान या दोष लाणौ वाल़ा बै बौला जांव। ऐजा सैजाई औसौ जू इयौं दुनिया कै लोगौ खै धौखा दैंदा आए रौआ।

¹⁰ तोबै मोऐं स्वर्ग दै कोसी कै जोर शै ऐजौ बौलदै शुणा, “ऐबै अमारा पौरमेशवर आपणै लोगौ कै बौचांदा! औरौ ऐबै सै आपणी शौकतै का इस्तैमाल कौरदा औरौ राजा कै भैष दा राज कौरदा! ऐबै तैसका मसीह दुनिया पांदी आपणै औधिकार का दावा कौरदा! जिथुकै ऐबै शैतान अमारै पौरमेशवर कै सामणै खौड़ै हौयौ अमारै बिशवाशी भाईयों पांदी दूसौ-रातै दोष ना लांदा। तैसी स्वर्ग पौरैशा बायरै फेरकाए राए।

¹¹ अमारै बिश‍वाशीयै शैतान कै हराए राए। तिनुऐ तैसी मेम्ने कै लोऊ कै शौकतै शै हराए राए, जू तिनु तिनकै पापौ शै छुड़ाणो कारिए मौरे गौआ। तिनुऐ तैसी हराए दिया जिथुकै तिनुऐ ऐजा बिशवाश बौणायौ राखा कै मेम्‍ना तिनका पौरमेशवर थिया। हालांकि तिनु सताए गौवै या इथै तौड़ी कै मारै दियै गौवै, पौरौ सै तैसी मानणौ शै पाछु ना फिरी।

¹² इथकारिए तुऔं सौबी खै खुश हौणौ चैंई जू इथै स्वर्ग दै रौंव। पौरौ तुऐं जू धोरती पांदी औसौ औरौ जू समुन्द्र दै औसौ तुऔं पांदी तरस खाणा चैंई, जिथुकै दुष्टआत्माओं का अगुवा शैतान धैनै तोंवारै धोरे आए गौआ। सै सौथीखै बैजाए गुस्सा औसौ जिथुकै सै जाणौए कै तावल़ाई ही तैसका अंत हौए जांदा।”

बैटमाणिश सताए गौए

¹³ जोबै बौड़ै अजगरे महसूस कौरौ कै हांव धोरती पांदी गिराए गौआ, तौ तियौं बैटमाणिशौ खै जिंयारै बैटा हौए रौआ थिया, तियौं का पीछा कौरा।

¹⁴ पौरौ पौरमेशवरे इयौं बैटमाणिशौ खै बाज कै दो बौड़ै पाख दियै ताकि सै तैसी ठाँव कै ऊड़ाए जांव जू जौगैह शुनशान जौगैह दै तियौं कारिए तैयार कौरे राए। औरौ तिथै साढ़े तीन सौ साल तौड़ी तियौंकै दैखभाल कौरे गौए ताकि बौड़ा अजगर तियौं तौड़ी ना पौंचै सौकौ।

¹⁵ तोबै अजगर तियौं बैटमाणिशौ कै ढौबौ आपणै मुँह शै नोंदी कै जैशणौ पाणी बौवाए दियु ताकि बाढ़ तियौं बौवायौ लौय जांव।

¹⁶ पौरौ ठीक तैसी सौमय तिथै कै जोमीन फाटै गौए औरौ सैजौ सौबै पाणी जू अजगर कै मुँह बाटी निकल़ौ थियु, जोमीन दु सोमाए गौ औरौ बैटमाणिश कै मौदद कौरे।

¹⁷ इथकै बाद सैजा अजगर तियौं बैटमाणिशौ पांदी बैजाए गुस्सा हौआ। इथकारिए अजगरे बैटमाणिशौ कै वंश कै खिलाफ लोड़ाए कै घोषणा कौरे दै। यानी तिनु लोगौ कै खिलाफ जू पौरमेशवर कै आज्ञाओं खै मानौ औरौ यीशु कै दवारा शिखाए गोई साची शिक्षाओं कै मानणौ दै मोजबूत बौणैयौंदे रौव।

¹⁸ तोबै सैजा अजगर हौटै गौआ औरौ समुन्द्र कै किनारे पांदी खौड़ा हौए गौआ।