प्रकाशितवाक्य 11 - सिरमौरी नौवाँ नियम

दो गवाह

¹ तोबै मुखै नापणौ कारिए ऐक डैंगा दिया औरौ पौरमेशवरे मुखै बौल़ौ, “जा औरौ मैरै मन्दिर औरौ बैदी का माप लो औरौ तिनु लोगौ कै गिनती कौर जिनिए तिथैशै मैरै आराधना कौरी लोए।”

² मन्दिर कै बायरै आँगण खै नी नापैया; जिथुकै सै तिनु लोगौ खै दैय राए जू पौरमेशवर खै ना जाणौ, सै बियाल़िस मीनै तौड़ी मैरै पवित्र शहर यरूशलेम पांदी राज्य कौरदै।

³ तैसी सौमय, “हांव आपणै दो आदमी खै भैजदा जू मैरै साची सौंदेश कै घोषणा कौरदै। सै टाट वाल़ै लुस्कै बाम्बदै औरौ सै ऐक हजार दो सौ साठ दूसौ तौड़ी मैरै सौंदेश कै घोषणा कौरदै।”

⁴ इनु दो गवाहो कै तुलना दो जैतून कै डाल़ औरौ दो दियोटो शै कौरे राए ऐजै दो आदमी, प्रभु कै सामणै खौड़ै रौंव, प्रभु जू सारै दुनिया का पौरमेशवर औसौ, तैसकै सामणै खौड़ै रौंव।

⁵ जै कुणिए तिनुखै नुकसान पोऊंचाणा चांव, तौ तिनकै मुँओं पौरैशै आग निकल़ैयो तिनकै बैरी खै भस्म कौरौ, औरौ जै कुणिए तिनुखै नुकसान पोऊंचाणा चाला, तौ जौरुर इयौं रीति सै मारा जाला।

⁶ तिनु औधिकार औसौ कै गौयण खै बंद कौरौ, कै तिनकी हौणौवाल़ी बातौ कै दूसौ दै बादल़ ना बौरशो, औरौ तिनुखै सौबी पाणी पांदी औधिकार औसौ कै तिथु लोऊ बाणौ, औरौ जोबै-जोबै चांव तोबै-तोबै धोरती पांदी कैई किसम कै मुसीबत लेयालै।

⁷ जोबै दो गवाह पौरमेशवर कै सौंदेश का प्रचार कौरे पांदै, तौ सैजा राकस जू डुंगै गौढै पौरैशा निकल़दा, सै तिनु दो लोगौ कै साथै लौड़दा, तिनु हरांदा औरौ तिनुखै मारै दैंदा।

⁸ तिनकी लाशो तैसी बौड़ै शहर यरूशलेम कै शोड़कै पांदी पोड़ैयौंदी रौंदी, जिथै तिनका प्रभु क्रूसो पांदी टांगै दिया थिया। ऐसी शहरो कै निशान कै रुप दा सदोम या मिस्र देश ऐजै नांव दैय राए, जिथुकै ऐसी शहरो कै लोग बैजाए बुरै औसौ, जैशै सदोम औरौ मिस्र देश कै रौणौवाल़ै लोग थिए।

⁹ औरौ सारै गोत्रो, सारै भाषाओं, सारै ठाँव औरौ राज्य मुंजीदै लोग तिनु दो गवाहो कै लाशो कै साढ़े तीन दूसौ तौड़ी दैखदै पौरौ सै कोसी खै बै तिनकै लाशो कै दबाणो कै रजामंदी ना दैंदै।

¹⁰ तिनकै मौरणौ शै आगै, तिनु दो गवाहै पौरैशानी लैई लोगौ कै इशैक पौरैशान कौरे राए थिए कै जोबै लोगै शुणु कै सै मौरे गौवै, तौ सै बैजाए खुश हौए गौवै। इशैक कै सै खुशी शै जशन मौनांदै लागै, औरौ ऐकी-दूजै कै तौफे दैंदै लागै।

¹¹ पौरौ साढ़े तीन दूसौ कै बाद पौरमेशवरे तिनुदै आपणै साँस पाए औरौ सै जियुंदी हौए गौवै; औरौ सै खौड़ै हौए गौवै, औरौ सैजै सौबै जिनुवै दैखौ कै सै ऐबै औटेयौ जियुंदी थिए, बैजाए घबराए गौवै।

¹² इथकै बाद, तिनु दु लोगै ऐकी आदमी खै बौलांदै बैई शुणा, जैणै तिनुकै जोर शै धाव मारै औरौ बौल़ौ, “इथै ऊबै आव!” जोबै तिनकै दुशमनै दैख लौ थियु, तोबै सै ऐकी बादल़ौ शै घैरैयौंदे ऊबै स्वर्ग दै हौटै गौवै।

¹³ तैसी सौमय यरूशलेम शहर दौ ऐक बौहितु बौड़ौ भुईचोल़ ओऊ, औरौ शहर कै इमारतौ का देशवाँ हिस्सा ढौल़ै गौआ, औरौ तैसी भुईचौलौ लैई सात हजार आदमी मौरे गौवै, औरौ जू लोग बौचै गौवै थिए, सै डौर कै मारै रुंदै लागै औरौ तैसी पौरमेशवर की महानता कै महिमा कौरदै लागै जू स्वर्ग दा थिया।

¹⁴ दूजै मुसीबत खत्म हौए गौए; पौरौ इथकै बाद बै तिजै मुसीबत तावल़ै आणौवाल़ी औसौ।

सातोंई तुरही

¹⁵ जोबै सातवें स्‍वर्गदूतै तुरही फोकै, तौ मोऐं स्वर्ग दी बौड़ी धाव मारदै बैई शुणा: “दुनिया दा ऐबै हौजौ कुणिए ना आथी जू राज कौरौ। सिरफ अमारा प्रभु पौरमेशवर औरौ तैसका चोणेयौंदा मसीह। औरौ सै हमैशा-हमैशा कारिए राज कौरदा।”

¹⁶ औरौ चौबीशौ पुराणिया जू पौरमेशवर कै सामणै आपणै-आपणै सिंहासनों पांदी बौठै रौवै थिए, सै सौबै झौकै गौवै औरौ पौरमेशवर कै आराधना कौरे,

¹⁷ ऐजौ बौलदै लागै, “ओए रै सौबिदा बौड़ा शौकतीशाली प्रभु पौरमेशवर जू औसौए औरौ जू थिया, आमु सौथीखै तैरा धन्यवाद कौरु, जिथुकै तुऐं ऐबै आपणै अनौखी शौकतै दिखाए राए औरौ तुऐं ऐबै धोरती पांदी आपणा राज शुरु कौरे दिया।

¹⁸ सैजै लोग जू तांव पांदी बिशवाश ना कौरौ सै तैरै खिलाफ औसौ, जिथुकै ऐबै सैजा सौमय आए गौआ कै तैरा गुस्सा तिनु पांदी आंव, औरौ सैजा सौमय कै तू मौरेयौंदे का न्याय कौर, ऐबै सैजा सौमय बै औसौ जौल़ौ तू तिनु पौरमेशवर कै बातौ बौताणौवाल़ै खै इनाम दैंदा जू तैरी सेवा कौरौ, औरौ तिनु सौबी लोगौ खै जू तैरा डौर मानौ, सैजै जू खास मानै जांव औरौ जू खास ना मानै जांदै, जोबै कै तैसी सौमय तू तिनुखै नाश कौरे दैंदा, जिनुवै धोरती पांदी विनाश कौरे राए।”

¹⁹ औरौ पौरमेशवर का जू मन्दिर स्वर्ग दा औसौ, सै खोले गौआ, औरौ तैसकै मंदिर दा तैसकी कौरार का सन्‍दूक दैखिया, औरौ गुड़कौ, औरौ शोब्द औरौ बिजली औरौ भुईचोल़ हौंदै लागै, औरौ गौयण शै बर्फ कै पाथरो कै साथै बैजाए बारिश हौए।