प्रकाशितवाक्य 10 - सिरमौरी नौवाँ नियम

स्‍वर्गदूत औरौ नानड़ै किताब

¹ तोबै मोऐं ऐक ओका बलवान स्‍वर्गदूतौ कै ऐकी बादल़ौ शै घैरैयौंदा स्वर्ग पौरैशा उतरदै दैखा; औरौ ऐक मेघधनुष तैसकै मुंडो कै चोऊ ढौबौ थियु, औरौ तैसका चैहरा सुरज कै जैशणा चौमकौ थिया औरौ तैसकै लात जोल़ेयौंदे खोम्बे कै जैशणै थिए।

² तैणै सोंवा लात समुन्द्र पांदी राखा, औरौ डैरा लात जोमीनो पांदी राखा। तैसकै हाथौ दै ऐक नानड़ै शै किताब थै जू खोलैयौंदे थै।

³ तैसी स्‍वर्गदूतै जोर शै लैर मारी औरौ तैसकै आवाज़ शेर कै गर्जन कै जैशणै थै। जोबै सै चिलोऊवा, तौ सात तैज आवाज़ै तैसी जोवाब दिया, जू गड़गड़ाहट कै आवाज़ कै जैशणै थै।

⁴ जोबै सातो गुड़कौ कै शब्द शौणै गौवै, तौ हांव लिखणौ कारिए तैयार थिया, “पौरौ मोऐं स्वर्ग शै ऐजा शब्द शुणा, जू गुड़कै बौल़ौ तिनु गुप्‍त राख, तिनु सिरफ आपी तौड़ी ही राख।”

⁵ जैसी स्‍वर्गदूतौ खै मोऐं समुन्द्र औरौ धोरती पांदी खौड़ा दैखा थिया; तैणै आपणा सोंवा हाथ गौयण कै ढौबौ टिपा, जू शौं खाणौ कारिए थिया।

⁶ औरौ जू हमैशा जियुंदी औसौ, औरौ जैणै स्वर्ग, धोरती औरौ समुन्द्र औरौ तिथमुंजी सौब ठुँ बाणै राए। तैसकै शौं खायौ बौल़ौ कै, “ऐबै कोसी बै बात कारिए हौजौ इंतजार ना कौरणा पौड़दा। ऐबै सैजी सौबै बातौ पूरी हौए जांदी।”

⁷ यानी सातवें स्‍वर्गदूतौ कै शब्द दैणौ कै दूसौ दै, जोबै सै तुरही फूंकणौ पांदी हौंदा, तौ पौरमेशवर कै सैजी योजना पोरे हौए जांदी जू तैणै तिनु पौरमेशवर कै बातौ बौताणौवाल़ै खै बौताए राए थै जू तैसकै सेवा कौरौ थिए पौरौ ओकी लोगौ खै ना बौताई।

⁸ तोबै मोऐं औटेयौ सैजी आवाज़ शौणै जैणै स्वर्ग शै मुंआरी बात कौरे राए थै। आवाज़ै मुखै बौल़ौ, “जा, तियौं किताब खै उंढे कौर जू स्‍वर्गदूत कै हाथौ दै खोलैयौंदे औसौ, जू समुन्द्र औरौ जोमीनो पांदी खौड़ा औसौ।”

^9-10 औरौ मोऐं स्‍वर्गदूतौ कै धोरे जायौ बौल़ौ, “ऐजी नानड़ै किताब मुखै दै।” औरौ तैणै मुखै बौल़ौ, “लै, इथु खाए पा; इथका स्वाद मौं कै जैशणा मीठा औसौ, पौरौ बाद मै इथकै कौड़वाणी लैई तैरौ पेट दुखदौए। इथकारिए मोऐं सैजी किताब उंढे कौरे जू स्‍वर्गदूतै पाकड़ी राए थी औरौ सौथीखै इथका स्वाद मौं कै जैशणा मीठा थिया, पौरौ जोबै मोऐं इथुकै गौटै पोऊँ, तौ मैरौ पेट दुखदौ लागौ।”

¹¹ तोबै मुखै ऐजौ बौल़ौ, “तू जौई-जौई गुट औरौ देश कै लोगौ, जौई-जौई भाषा बौलणौ वाल़ै कै औरौ राजाओं कै ऐक बैई हौजौ बौता, जू पौरमेशवर ताखै बौताणौ कारिए बौल़ौए।”