प्रकाशितवाक्य 1 - सिरमौरी नौवाँ नियम

जानकारी

¹ ऐजी किताब तिनु बातौ का जिक्र कौरौ जू पौरमेशवरे यीशु मसीह खै दिखाए राए। पौरमेशवरे तैसी दिखोऊ ताकि सै आपणै दासो खै तिनु घोटनाओ कै बारै मुंजी बौताए सौकौ जू तावल़ी ही पूरी हौंदी। यीशुए आपणै स्‍वर्गदूत खै तैसी सौंदेश कै साथै मैरै धोरे यानी आपणै दास यूहन्ना कै धोरे भैजा।

² यूहन्नाए सैजौ सौब ठुँ लिखु, जू तैणै दैखौ, यानी सैजा सौंदेश जू पौरमेशवर कै ढौबौशा आए रौआ थिया औरौ सैजौ सौब ठुँ जू यीशु मसीहे बौल़ै राए थियु।

³ पौरमेशवर हर तैसी आदमी खै आशीष दैंदा जू इनु हौणौवाल़ी बातौ खै ओकी खै पौढ़ेयौ शुणांव, औरौ सै हरेक तैसी आदमी खै आशीष दैंदा जू इनुखै शुणौए औरौ इनु मानौए। जिथुकै ऐजी बातौ तावल़ी ही हौंदी।

सातो कलीसियाओं खै यूहन्ना का स्वागत

⁴ मोऐं यूहन्नाए, ऐजी चिट्ठी तुऔं सात कलीसियाओं कै बिशवाशी लोगौ कारिए लैख लौए जू एशिया प्रदेश दै रौं: हांव प्रार्थना कौरु कै पौरमेशवर जू औसौए, औरौ जू हमैशा थिया, औरौ जू आणौवाल़ा औसौ; औरौ तिनु सात स्‍वर्गदूत कै ढौबौशै, जू पौरमेशवर कै सिंहासन कै सामणै औसौ, तुऔं अनुग्रह औरौ शान्तै भैटौ।

^5-6 औरौ यीशु मसीह कै ढौबौशै तुऔं खै अनुग्रह औरौ शान्तै भैटौ, जैसकै वचन पांदी बिशवाश कौरे सौकौ, सैजाई औसौ जू मौरेयो हौजौ जियुंदी हौए गौआ औरौ सै इयौं दुनिया कै सौबी राज्यो दा शासक औसौ। औरौ यीशु मसीह आमुआरी प्यार कौरौ। सै आमु कारिए मौरे गौआ औरौ तैणै अमारै पापौ कै सौजा खै खत्म कौरे दी। इथ बौजैह शै आमु पुरोहितो का ऐक परिवार बौणै गौवै, जू तैसकै पिता पौरमेशवर कै सेवा कौरौ। इथकारिए यीशु मसीह खै महिमा औरौ औधिकार हमैशा भैटदी रौंव। आमीन।

⁷ शुणौ, सै बादल़ौ कै साथै आणौवाल़ा औसौ; हरेक आदमी तैसी दैखदा, औरौ सैजै लोग जू तैसकै मौत कारिए जुमैवार थिए, सैजै बै तैसी आन्दै बैई दैखदै औरौ धोरती कै सारै लोग जोर शै रुंदै जोबै सै तैसी दैखदै। हां ऐशै हौंदौ। आमीन।

⁸ पिता पौरमेशवर बौल़ौ, “हांव अल्फा औरौ ओमेगा औसौ, यानी कै, शुरुआत औरौ अंत औसौ। हांव ही औसौ जू औसौए, जू थिया, औरौ जू आणौवाल़ा औसौ, हांव सौबिदा बौड़ा शौकतीशाली औसौ।”

यूहन्ना कै मसीह का दर्शन

⁹ हांव यूहन्ना, मसीह भाई औसौ, औरौ यीशु कै साथै मैरी एकजुटता कै बौजैह शै हांव तोंवारै साथै पौरमेशवर कै राज्य दा, दुखो दा, औरौ तिनु सैहणौ कै शौकतै दा शामिल औसौ, मुखै पतमुस टापू पांदी कैदी बाणैयौ छाड़ा जिथुकै हांव पौरमेशवर कै सौंदेश का औरौ यीशु दवारा प्रकट कौरे गौवै सौचाई का प्रचार कौरु थिया।

¹⁰ विशांव कै दूसै पवित्र आत्मा मुं पांदी ओऊवा, मोऐं तुरही कै आवाज़ जैशणै ऐक ऊंची आवाज़ आपणै पाछैदै आन्दै बैई शौणै,

¹¹ “आवाज़ै बौल़ौ, जू किछै तू दैखै, तिथु किताब दो लिखयो तिनु सात कलीसियाओं खै भैज जू इनु शहरो दै औसौ: यानी कै इफिसुस, स्मुरना, पिरगमुन, थुआतीरा, सरदीस, फिलदिलफिया, औरौ लौदीकिया खै।”

¹² तोबै हांव ऐजौ दैखणौ कारिए पाछु ढौबौ फिरा कै मुंआरी बातौ कुणै कौरे लोई। जोबै हांव फिरा, तौ मोऐं सात दियोटो खै पेयाशै कै साथै दैखै।

¹³ औरौ तिनु दियोट कै बीच ऐक जुणा आदमी का जैशणा दैखैयो थिया, सै लाम्बै लुस्कै बाम्बैयौंदा थिया जू तैसकै लातो तौड़ी पौऊंचौ थियु। उपले छाती कै चोऊ ढौबौ ऐक सूनै का पाटा बानै राए थिया।

¹⁴ तैसकै मुंडो कै बाल चिटै ऊन कै जैशणै या बर्फ कै जैशणै चिटै थिए। तैसकी आखी आगी कै लोपटो कै जैशणी चौमकै रोए थी।

¹⁵ तैसकै लात पीतलो कै जैशणै चौमकै रौए थिए जू तैज गरम आगी दै चौमकौ; औरौ जोबै सै बौल़ौऊवा तौ तैसकै आवाज़ ऐशणै थै जैशणै ऐक बौड़ै झरणै कै आवाज़ हौं।

¹⁶ सै आपणै सोऐं हाथौ दै सात तारै लौएयौंदे थिया, औरौ तैसकै मुं पौरैशै पोईनी दौ धार वाल़ी तलवार निकल़ौ थी, तैसका चैहरा तैशणा ही चौमकिला चौमकै रौआ थिया, जैशै सुरज दूसौ दुफारियौ कै चौमकौ।

¹⁷ जोबै मोऐं तैसी दैखा, तौ हांव तौलोंई तैसकै लातो पांदी रिड़ै गौआ। हांव ऐक मौरेयौंदे आदमी कै जैशणा हौए गौआ। पौरौ तैणै मुं पांदी आपणा सोंवा हाथ राखैयौ ऐजौ बौल़ौ, “डौरेया नी; हांव आगला औरौ आखरी औसौ, हांव सैजा औसौ जू हमैशा जियुंदी औसौ,

¹⁸ हांव एकबेई मौरे गौआ थिया पौरौ ऐबै हांव जियुंदी औसौ औरौ हांव हमैशा जियुंदी रौंदा। दैख हांव युग-युग जियुंदी औसौ; मुंकैई मौत औरौ पताल़ की चाबी औसौ।”

¹⁹ “जू तुऐं दैख राए, तिथु लैख पा, यानी सैजी दुईनै बातो जू इबी हौंदी लागै रैई औरौ जू बाद मै हौंदी।”

²⁰ ऐबै हांव बौतांदा कै मैरै सोऐं हाथ कै सात तारै का, का मतलब औसौ जू कै आगै पौता ना थी। इथका मतलब ऐजा औसौ: सात तारै तिनु स्‍वर्गदूतौ खै दिखांव जू सात कलीसियाओं कै रोखवाल़ी कौरौ औरौ सात दियोट सात कलीसियाओं खै दिखांव।