फिलिप्पियों 4 - सिरमौरी नौवाँ नियमपौलुस कै सलाह 1 इथकारिए ओए रै मैरै प्यारे भाईटु, हांव तुऔंआरी बैजाए प्यार कौरु औरौ मोऐं तुऔंआरी भैटिणौ का इंतजार कौरे लौआ। मैरै प्यारे साथियो तुऐं लोग मैरी खुशी औरौ मुकुट औसौ, प्रभु मुंजी आपणै बिशवाश पांदी मोजबूत बौणैयौंदे रौव। 2 हांव यूओदिया औरौ सुन्तुखे दुईनै बोईणी शै बिन्ती कौरु कै सै प्रभु दै एकता शै रौंव। 3 ओए रै साची सहयोगी सुजूगस, हांव तांव कैईंदै बिन्ती कौरु कै तू तिनु बैटमाणिशौ का मैल मिलाप कौरणौ मुंजी मौदद कौर, जिथुकै तिनुऐ मैरै साथै सुसमाचार फौयलणौ मुंजी क्लेमेंस औरौ मैरै बाकी सहयोगी कै साथै मैहनत कौरे राए जिनकै नांव जीवन कै किताबो पांदी लैखैयौंदे औसौ। सौदा खुश रौंव 4 प्रभु दै सौदा खुशी रौव; हांव हौजौ बुलू, खुशी रौव। 5 सौबै लोग तोंवारै कोमल स्वभाव कै जाणै पांव। प्रभु झट ही आणौवाल़ा औसौ। 6 कियौंई बातौ कै फिकर ना कौरौ; पौरौ हरेक पौरैशानी मुंजी अमारै निवेदन प्रार्थना औरौ बिन्ती कै दवारा धन्यवाद कै साथै पौरमेशवर खै धोरे लाए जांव। 7 तोबै पौरमेशवर तुऔं शान्तै दैंदा। जू शान्तै आदमी कै सौमझ शै बायरै औसौ, मसीह यीशु मुंजी तोंवारै मनो औरौ तोंवारै विचारो कै रक्षा कौरदै। इनु बातौ पांदी गोर कौरौ 8 इथकारिए ओए रै भाईटु जू-जू बातौ साची औसौ, औरौ आदर कै लायक औसौ, औरौ जू-जू बातौ धरमी औसौ, औरौ जू-जू बातौ पवित्र औसौ, औरौ जू-जू बातौ सुन्दर औसौ, औरौ जू-जू बातौ मनो कै भाणो वाल़ी औसौ, औरौ जू-जू बातौ बैजाए आछी औसौ, औरौ जू-जू बातौ तारीफ कै लायक औसौ, तिनु पांदी ध्यान कौरेया। 9 जू बातौ तुऐं मुंवादी शैखै रैई, औरौ पाए रैई औरौ शौणै रैई, औरौ मुं दी दैखै रैई, तिनका पालन कौरेया कौरौ, तोबै शान्तै का पौरमेशवर तोंवारै लोगौ कै साथै रौन्दा। भैंट कारिए धन्यवाद 10 हांव प्रभु दा बौहिता खुशी औसौ, कै ऐबै ऐतरै दूसौ कै बाद तुऐं ऐजा विचार कौरा औरौ मैरै मौदद कौरणौ कारिए मुखै पौयसै भैजै; पाका तुऔं शुरु दा ऐजा विचार थिया, पौरौ तुऔं मौका ना भैटी। 11 ऐजौ नी कै मोऐं इथकारिए बौल़ै लो कै जू मैरै चैंई थियु सैजौ सौबै मुंआगो ना आथी, जिथुकै मोऐं ऐजौ शैखै राए कै जियौं पौरैशानी दा हांव औसौ, तिंदु संतुष्ट रौणौ शैखै पोऊँ। 12 हांव दैणिक मुंजी बै रौणौ जाणुए औरौ भरपूरी कै साथै बै रौणौ जाणुए सौबी बातौ औरौ सौबै पौरेशानियो मुंजी बै संतुष्ट रौणौ जाणुए, जोबै मुंआगै खाणौ कारिए भौरिशौ हौंव औरौ जोबै मुंआगै खाणौ कारिए बैजाए कम हौंव दु बातो दौ खुश रौणौ शिखी पौऊ। 13 मसीह जू मुखै शौकतै दैंव तैसकै मौदद शै हांव सौबै ठुँ कौरे सौकु। 14 तोबै तुऐं भला कौरा कै मैरै कौल़ेश दै मुखै पौयसै दैणौ कै दवारा मैरै सहयोगी हुवे। 15 ओए रै फिलिप्पी शहर कै लोगौ, तुऐं आपी बै जाणौए कै तोंवारै बीच मुंजी सुसमाचार प्रचार कै शुरुआत दै मकिदुनिया प्रदेश शै आपणै यात्रा शुरु कौरेयौ हांव आगु हौटै गौआ। तोबै तुऔं छोड़ेयौ ओकी कोसी कलीसिया कै लोगै लैण दैण कै बारै मुंजी मैरी मौदद ना कौरी। 16 ऐशैखैई जोबै हांव थिस्सलुनीके शहर दा थिया तोबै बै तुऐं दो बैई पौयसै भैजैयो मैरी जौरुरत दै मैरै मौदद कौरे। 17 हांव ऐजौ इथकारिए ना लिखु कै हांव तुऔं कैईंदै पौयसै कै मौदद चोऊं पौरौ हांव चोऊं कै ऐजौ तिनु आछी चीज़ौ कै सूची मुंजी शामिल कौरौ जू तुऐं आगै दौ ही कौरे राए औरौ जिथकारिए पौरमेशवर तुऔं इनाम दैंदा। 18 मुंआगो सौब ठुँ औसौ, बल्कि बैजाए जादा औसौ; जू चीज़ौ तुऐं इपफ्रुदीतुस कै हाथौ दी भैजै रैई थी तिनु पायौ हांव छौकै गौआ। सैजी चीज़ौ मुं कारिए तिथु मीठै खुशबू वाल़ी बलिदान कै जैशणी औसौ, जू मुख्य यहूदी पुरोहित पौरमेशवर कै चौढ़ांव जू कै पौरमेशवर कै अपनाणै कै लायक औसौ औरौ तैसीकै खुश कौरौ। 19 औरौ मैरा पौरमेशवर बै आपणै तैसी धन कै हिसाब शै जू महिमा सहित मसीह यीशु दै औसौ, तोंवारै हरेक जौरुरत कै पूरै कौरदा। 20 अमारै पिता पौरमेशवर कै महिमा जुग-जुग हौन्दै रौंव। आमीन। नमशकार औरौ आर्शीवाद 21 यीशु मसीह दै सौबै पवित्र लोगौ कै मैरी तरफ शै नमशकार बौल़ौ। जू बिशवाशी भाई मैरै साथै औसौ सैजै बै तुऔं नमशकार बौल़ौ। 22 सौबै पवित्र लोग खास कौरेयौ जू महाराजा कै महल दै जू बिशवाशी औसौ तुऔं खै नमशकार बौल़ौ। 23 अमारै प्रभु यीशु मसीह का अनुग्रह तुऔं सौबी कै साथै रौंव। आमीन। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation