फिलेमोन 1 - सिरमौरी नौवाँ नियमशुभकामनाएँ 1 ओए रै फिलेमोन मोऐं पौलुसे इयौं चिट्ठी कै लैखै लोए औरौ हांव यीशु मसीह कै बारै मुंजी प्रचार कौरणौ की बौजैह शै कोयदखाने दा औसौ। हांव औरौ अमारा बिशवाशी भाए तीमुथियुस तुऔं नमशकार कौरौ। तू अमारा प्यारा दोस्त औसौ औरौ तू मसीह कारिए तैशैखैई काम कौरे जैशैखै आमै कौरु। 2 मोऐं ऐजै चिट्ठी अमारै बिशवाशी बोईण अफफिया, औरौ बिशवाशी भाई अरखिप्पुस कै, जू ऐक योध्दा कै जैशणा पौरमेशवर कै सेवा कौरौ औरौ जू कलीसिया तोंवारै घोरे कौठै हौंव तिनु कारिए लैखै लोए। 3 अमारा पिता पौरमेशवर औरौ अमारा प्रभु यीशु मसीह तुऔं अनुग्रह औरौ शान्तै दैंदा रौंव। धन्यवाद औरौ प्रार्थना 4 हांव जोबै बै प्रार्थना कौरु सौदा तांव कारिए पौरमेशवर का धन्यवाद कौरु। 5 जिथुकै लोग मुखै बौतांव कै तू प्रभु यीशु पांदी बिशवाश कौरणौ दा बौणेयौंदा औसौ, औरौ ऐजौ बै कै तू पौरमेशवर कै सौबै पवित्र लोगौ आरी प्यार कौरे। 6 हांव प्रार्थना कौरु कै बिशवाशी लोगौ कै साथै तैरै संगति बौढ़दै जांव, ताकि तू तिनु सौबी आछी चीज़ौ कै सौमझै सौकै जू पौरमेशवरे आमु दैय रैई, ऐजौ सौबै मसीह कै महिमा कारिए औसौ। 7 जिथुकै ओए रै बिशवाशी भाई, हांव बैजाए खुशी औरौ उत्साहित होऊं जोबै ओकीआरी तैरै प्यार कै दैखु, इथकारिए कै तैरै दवारा पौरमेशवर कै लोग तरो ताजा हौए जांव। उनेसिमुस कारिए बिन्ती 8-9 इयौं बौजैह शै हांव ताखै मसीह दा ऐक बिशवाशी हौणौ कै नातै सोही काम कौरणौ कारिए बुलू। हांव मसीह दा चोणेयौंदा चैला हौणौ कै नातै ताखै ऐजौ कौरणौ का आदैश दैय सौकु। पौरौ मोऐं सिरफ तावकैंई दौ ऐजौ ही पूछै लो जिथुकै हांव जाणुए कै तू मुखै औरौ आपणै बिशवाशी आरी प्यार कौरे। हांव, पौलुस बूढ़ा आदमै औसौ औरौ इबी हांव कोयदखाने दा औसौ जिथुकै हांव यीशु मसीह कै सेवा कौरु। 10 हांव उनेसिमुस कारिए बिन्ती कौरु, जू मैरै बैटै कै जैशणा औसौ। जोबै हांव कोयदी खाने दा थिया तौ ऐजा ऐबै मसीह दा मैरा बैटा बौणै गौआ। 11 सै तौ आगै तैरै किछै कामौ का ना थी, पौरौ ऐबै तैरै औरौ मैरै आमु दु कारिए बौड़ै काम का औसौ। 12 मोऐं उनेसिमुस कै तैरै धोरे पाछु छाड़ै लौआ जैसी आरी हांव दिल शै प्यार कौरु। 13 हांव तैसी आपणै मौदद कारिए इथी राखणा चोऊं थिया जौबेकै हांव यीशु मसीह कै बारै मुंजी सुसमाचार प्रचार कौरणौ कै बौजैह शै कोयदखाने दा औसौ। सै इथै मैरै मौदद कौरणौ कारिए तैरै जौगैह लोए सौकौ थिया जिथुकै हांव जाणुए कै तू मैरै मौदद कौरणा चांए। 14 जै तू राजी ना आथी तौ हांव तैसीकै आपणै धोरे इथै ना राखणा चोऊं, पौरौ हांव ऐजौ चोऊं कै तू ऐजी मौदद इथकारिए कौरे जिथुकै तू इथु खुशी शै कौरणा चांए ना कै दबाव शै। 15 शायद पौरमेशवरे उनेसिमुस कै इथकारिए किछै सौमय तौड़ी तांव कैईंदा दूर भागणौ कै रजामंदी दी ताकि सै मसीह पांदी बिशवाश कौरे सौकौ औरौ तू सौदा कारिए तैसी आपणै साथै राखै सौकै। 16 पौरौ ऐबै सै सिरफ तैरा सेवक नी पौरौ सेवक दा बै बौड़ा औसौ औरौ ऐबै सै तैरा प्यारा बिशवाशी भाई औसौ। हांव तैसीआरी बैजाए प्यार कौरु पौरौ ताखै तैसीआरी हौजौ बै जादा प्यार कौरणा चैंई जिथुकै सै तोंवारा सेवक औसौ औरौ मसीह दा ऐक भाई औसौ। फिलेमोन कै आज्ञा मानणौ लैई हौंसला 17 जै तू मुखै आपणा सहयोगी सौमझै, तौ जोबै उनेसिमुस तैरै धोरे पाछु आन्दा तौ तू तैसकै साथै खुशी शै बर्ताव कौरेया जैशै तू मैरा स्वागत कौरे। 18 औरौ जै तैणै तैरा किछै बै नुकसान कौरे राए, या सै तैरै कियौंई बै चीज़ौ का कर्जेदार औसौ, तौ हांव सौबै ठुँ चुकाए दैंदा। 19 मोऐं पौलुसे आपणै हाथौ लैई लैखै लौ कै हांव इथु चुकाए दैंदा हालांकि तू औगौड़ियौ दो ही जाणै कै जै हांव तैरै मौदद नै कौरदा, तौ तू आपी शै ऐसी नौवें जीवन कै ना जौए सौकदा, इथकारिए तू आपणै पूरै जीवन भर मैरा कर्जदार औसौ। 20 ओए रै मैरै प्यारे दोस्त, ऐजै खोशे मुखै प्रभु दी तैरै ढौबौशै भैट जांव। तू मसीह दा मैरै जीवन कै हरा भरा कौरे दै। 21 जैशै मोऐं ताखै लैखै लो, मुखै यकीन औसौ कै तू सैजौई कौरदा जू मोऐं ताखै बौल़ै राए। हांव जाणुए कै जू मोऐं बौल़ै राए तू तिंदु बै जादा कौरदा। 22 औरौ ऐक बात हौजौ ऐजै बै कै मुं कारिए आपणै घोरे ऐक कमरा तैयार राख जिथुकै मुखै आशा औसौ कै पौरमेशवर तोंवारै प्रार्थनाओं का जवाब दैंदा औरौ जोबै हांव कोयदखाने पौरैशा छुटेयो आन्दा तौ तुऐं मुखै औटेयौ दैखदै। आखरी शुभकामनाएँ 23 इपफ्रास, जू यीशु मसीह का प्रचार कौरौ सै मैरै साथै कोयदखाने दा औसौ सै तुऔं नमशकार कौरौ। 24 मरकुस, औरौ अरिस्तर्खुस औरौ देमास औरौ लूका जू मैरै साथै प्रभु का काम कौरौ, इनका ताखै नमशकार। 25 हांव प्रार्थना कौरु कै अमारै प्रभु यीशु मसीह का अनुग्रह तुऔं पांदी बौणेयौंदा रौंव। आमीन |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation