मरकुस 9 - सिरमौरी नौवाँ नियमयीशु का रुप बौदलै गौआ ( मत्ती 17:1-13 ; लूका 9:28-36 ) 1 तोबै यीशुए चैलै औरौ भीड़ौ खै बौल़ौ, “हांव तुऔं कैंई साचौ बुलू, तुऔं मुंजी शै किछै लोग जू इथै खौड़ै औसौ, सै दैखलै कै तिनकै मौरणौ दै औगौड़ियौ पौरमेशवर का राज्य ऐक शौकतीशाली भैषो दा आए रौआ।” 2 छोई दूसौ कै बाद यीशुए पतरस औरौ याकूब औरौ यूहन्ना खै आपणै साथै नियै, औरौ ऐकी धारो पांदी हौटै गौवै; औरौ जोबै सै तिथै इकली थिए, तिनकै सामणै यीशु का भैष बौदलै गौआ। 3 औरौ तैसकै खोटणो ऐशणै चौमकौन्दै लागै औरौ चिटै हौए गौवै। कि धोरती पांदी कुणिए बै ऐशणै चिटै ना कौरे सौकौ। 4 औरौ तोबै दो जोणे पौरमेशवर कै बातौ बाताणौवाल़ै देखिऐ ऐक मूसा थिया औरौ औका एलिय्याह थिया; सै यीशु कै साथै पौलै रौवै थिए। 5 ऐजौ देखिबा पतरसे यीशु खै बौल़ौ, “ओए रै गुरुजी, अमारै इथै रौणा आछौ औसौ: इथकारिए आमै तीन तोम्बू बौणौऊंबे, ऐक तांव कारिए, ऐक मूसा कारिए, ऐक एलिय्याह कारिए।” 6 पतरस ना जाणौ थिया कै का बुलू, जिथुकै सै बौहितै डौरे गौवै थिए। 7 तोबै ऐक बादल़ तिनु पांदी छाए गौआ, औरौ तिनुऐ तैसी बादल़ौ पौरैशा पौरमेशवर कै ऐजौ बौलदै शुणा कै, “ऐजा मैरा लाड़कु बैटा औसौ; ऐसकी शुणौ।” 8 तोबै चैलै एकदम चोऊ ढौबौ दैखौ, औरौ यीशु कै छोडे़बा, आपणै साथै ओकी कोसी खै ना दैखी। 9 जोबै यीशु औरौ तैसकै तीन चैलै धारो पांदी दै उदे आन्दै लाग रौवै थिए, यीशुए तिनुखै चिताऐबा बौल़ौ, कै कोसी कैई ऐजौ नी बौताया तुऐं का दैखौ, जांव तौड़ी कै हांव, आदमी का बैटा, मौरेयौंदे पौरैशा हौजौ जियुंदी ना होई जोऊं। 10 तिनुऐ इनु बातौ खै आपी मुंजी राखी; औरौ आपी मुंजी पोलदे लागै, “कै मौरेयौंदे मुंजीदा जियुंदी हौणौ का, का मतलब औसौ?” 11 औरौ चैलै तैसी कैईंदु पूछु, “कै यहूदी शास्त्री किथुखै बौल़ौ, कै एलिय्याह मसीह दा औगौड़ियौ आला?” 12-13 यीशुए तिनुखै जोवाब दिया, “कै ऐजै बात साची औसौ कै पौरमेशवरे एलिय्याह कै छाड़णौ कारिए वादा कौरे राए थिया कै सै आगै आयौ सौब ठुँ सुधारै दैन्दा। पौरौ हांव तुऔं खै बौतौऊं एलिय्याह औगौड़ियौ आए रौआ औरौ अमारै ठोगड़े तैसीआरी जैशैकै चोऊ तैशैखै बुरा बर्ताव कौरा, पौरौ तुऐं ऐजौ सोंचै कौरेया कै मुं आदमी का बैटै कै बारै दै पवित्र शास्त्र दो किथु लैखै राव, कै सै बैजाए दुख झैलला औरौ तैसी नोकारा जांदा।” दुष्टआत्मा पौरैशा छुटकारा ( मत्ती 17:14-20 ; लूका 9:37-43 ) 14 जोबै यीशु औरौ तैसकै तीन चैलै ओकी चैलो कै धोरे पाछु ओऊवे, तौ तिनुऐ दैखौ तिनकै चोऊ ढौबौ खै बौड़ै भीड़ लागै रौए औरौ यहूदी शास्त्रीए तिनकै साथै बैहस कौरे लोए थी। 15 जैई लोगै यीशु खै दैखा सौबै लोग बौहितै हैरान हुवे, औरौ तैसकै ढौबौ दौड़ैबा तैसीखै नमशकार कौरा। 16 यीशुए तिनु कैईंदु पूछु, “तुऐं इनु आरी का बैहस कौरे लोए?” 17 भीड़ौ मुंजीदा ऐकीए तैसीखै जोवाब दिया, “ओए रै गुरु, मोऐं आपणा बैटा तैरै धोरे लाए राए, जैसदै ऐक दुष्टआत्मा औसौ, जिंए तैसीकै गुंगा कौरे राखा। 18 जोबै सैजी दुष्टआत्मा तैसी आपणै काबू दा कौरौ, तौ तैसी धोरती दा पोटकै दैंव। औरौ तैसकै मुँओं बाटी शेपो आंव, औरौ दांद चाकौ, औरौ टोटरा फिर जांव। मोऐं तैरै चैलै खै दुष्टआत्मा निकल़णौ खै बौल़ौ, पौरौ ऐजी तिनकै बश कै बात ना आथी।” 19 ऐजौ शौणैबा यीशुए तिनुखै जोवाब देएबा बौल़ौ, “ओए रै बिशवाश ना कौरणौवाल़ै लोगौ, हांव कोलो तौड़ी तोंवारै साथै रौंदा? औरौ कोलो तौड़ी तुऔं झैलदा? तैसी भैईया खै मैरै धोरे लियांव।” 20 तोबै तिनुऐ तैसी तैसकै धोरे लियोऊवा। औरौ जोबै दुष्टआत्माएं यीशु खै दैखा, तौ दुष्टआत्माएं तौलोंई तैसी भैईया कै जोमीनो दा पोटकै दिया, औरौ तैसकै मुँओं बाटी शेपो निकल़दी लागी औरौ सै धैनै पुंडा पुलंटिदा लागा। 21 यीशुए तैसकै पिता कैईंदु पूछु, “ऐसकै ऐजी हालत कोलो दै उंढी औसौ?” तैणै बौल़ौ, “नानड़ै दै उंढी। 22 ऐसकै मारणौ कारिए, दुष्टआत्माएं ऐसीखै कौलोंई आग औरौ कौलोंई पाणी मुंजी फेरकाए दैंव; पौरौ जै तू किछै कौरे सौकै, तौ आमु पांदी दया कौर।” 23 यीशुए तैसीखै बौल़ौ, “तुऔं कै शक नी हौणा चैंई कै हांव ऐजौ कौरे सौकु! जै कुणिए आदमी मुं पांदी बिशवाश कौरौ तौ तैसी कारिए सौब ठुँ हौए सौकौ।” 24 भैईया कै बापूए तौलोंई बौल़ौ, “ओए रै प्रभु, हांव बिशवाश कौरु, तू मैरै शक कै दूर कौर।” 25 जोबै यीशुए दैखौ, कै लोगै हौजौ बै दौड़-दौड़ैबा जादा भीड़ कौठी कोरी लोए, तौ तैणै दुष्टआत्मा खै ऐजौ बौलेबा ताडै़, “ओए रै गुंगी औरौ जायरै कौरणौवाल़ै दुष्टआत्मा, हांव ताखै हुकम दियु, तैसी पौरैशै निकल़ै जा, औरौ तैसदै कौलोंई बै पाछु नी आया।” 26 तोबै तैणै लैरौ मारी, औरौ दुष्टआत्माएं तैसीखै मोकड़ैबा, निकल़ै गौए; औरौ भैईया मौरेयौंदे जैशणा लागै रौआ थिया, औरौ बौहितै लोग बौलदै लागै, कै ए तौ मौरे गौआ। 27 पौरौ यीशुए तैसका हाथ थाम्बैयौ तैसीखै खौड़ा कौरा, औरौ सै खौड़ा हौए गौआ। 28 जोबै यीशु घोरे ओऊवा, तौ तैसकै चैलै इकली जाऐबा तैसी कैईंदु पूछु, “आमै किथुकै दुष्टआत्मा कै बायरै ना घाड़ी सोकी?” 29 यीशुए तिनुखै बौल़ौ, “ऐशणी दुष्टआत्मा बिना प्रार्थना औरौ उपवास कै लोगौ पौरौशी बायरै ना गाड़ीयौं।” यीशु कै आपणी मौत कै बारै मुंजी दुजाल़ियो बौलणौ ( मत्ती 17:22-23 ; लूका 9:43-45 ) 30 बाद मै, यीशु औरौ तैसकै चैलै तियौं जौगैह कै छोडे़बा गलील जिले बाटी हौटै। यीशु ना चांव थिया कै कोसी कैंई पौता चालौ कै सै कुकै औसौ, 31 जिथुकै यीशु आपणै चैलै खै साथी जादा वकत बितायेबा तिनुकै शिखाणौ चांव थिया। औरौ तिनुखै बौल़ौ थिया, “हांव आदमी का बैटा, बौयरै कै हाथौ लैई थोम्बाया जांदा, औरौ ऐजै लोग मुखै मारै दैंदै; औरौ हांव मौरणौ कै ती दूसौ कै बाद हौजौ जियुंदा हौए जोऊंबा।” 32 पौरौ ऐजी बात चैलै कै सौमझ दी ना ऐई, औरौ सै तैसी कैईंदु पूछणो शै डौरौ थिए। चैलो मुंजीदा सौबिदा बौड़ा कुण औसौ? ( मत्ती 18:1-5 ; लूका 9:46-48 ) 33 तोबै यीशु हौजौ कफरनहूम नगर दा ओऊवा; औरौ घोरे आयौ तैणै तिनु कैईंदु पूछु, “बाटो पुंडे तुऐं कोसी बातौ पांदी चौर्चा कौरे लोए थी?” 34 पौरौ सै चुपी रौवै, जिथुकै बाटौ पुंडी तिनुऐ आपी मुंजी ऐजै चौर्चा कौरे लोए थी, कै आमु मुंजीदा बौड़ा कुण औसौ? 35 तोबै यीशु बोठेयो बारौ चैलै खै बोईदै, औरौ तिनुखै बौल़ौ, “जै कुणिए बौड़ा बौणणा चांव, तौ सैजा सौबिदा नानड़ा औरौ सौबिका सेवक बौणौ।” 36 औरौ तैणै ऐक भैईया खै आपणै धोरे खौड़ा कौरा। तैणै भैईया कै हौंगटै दा लोयो औरौ आपणै चैलै खै बौल़ौ, 37 “जू कुणिए मैरै नांव शै इनु जैशणै नानड़िया मुंजी शै कोसी ऐकी कै अपनांव, सै मुखै अपनांव। औरौ जू कुणिए मुखै अपनांव, सै सौथी कै पौरमेशवर कै अपनांव, जैणै मुखै छाड़ै राए।” 38 तोबै यूहन्नाए यीशु खै बौल़ौ, “ओए रै गुरु, आमुए ऐकी आदमी खै तैरै नांव कै शौकतै शै दुष्टआत्माओं खै घाड़दै बैई दैखा, औरौ आमुए तैसीखै मोना कौरौ, कै ऐशैखै नै कौर, जिथुकै सै आमु जैशणा तैरा चैला ना आथी।” 39-40 यीशुए बौल़ौ, “जू अमारै खिलाफ ना आथी, सै अमारै ढौबौ औसौ इथकारिए जू कुणिए मैरै शौकतै लैई चौमत्कार कै काम कौरौ। सै मैरै बारै मुंजी बुरु ना बौल़ै सौकौ इथकारिए तैसी ना रौकौ। 41 जू कुणिए तुऔं खै ऐक गिलास पाणी इथकारिए पियांव कै तुऐं मसीह कै चैलै औसौ तौ हांव तुऔं खै साचौ बुलू कै पौरमेशवर जौरुर तैसी आदमी का भोला कौरदा।” यीशु कै पौरखणौ कै बारै मुंजी बौताणौ ( मत्ती 18:6-9 ; लूका 17:1-2 ) 42 जै कुणिए इनु नानड़ै लोगौ मुंजी शै जू मुं पांदी बिशवाश कौरौ, औरौ तैसकै पाप कौराणौ कै बौजैह बौणौ तैसी कारिए आछौ हौल़ौ कै ऐक बौड़ै चाकी का पाथर तैसकै टाटु दा टांगै दैंई औरौ तैसी समुन्द्र दा पाए दैंई, जिथुकै तैसीकै ऐजै बुरै सौजा औसौ। पौरौ पौरमेशवर तैसीखै इदै बै बुरै सौजा दैला। 43 पाप कौरणौ कै सौब बौजैह खै आपणै जिन्दगी शै दूर कौरौ, जैशैकै तुऐं आपणा ऐक हाथ काटै लौआ, जू कै तुऔं लैई पाप कौरांव। पौरौ तुऔं खै ऐजौ ठीक औसौ कै तुऐं दुईनै हाथ हौयौ बै नरको दै जाणौ शै स्वर्ग दै टुंडै हौयौ जालै। 44 नरको दै सौबी कै शोरीरो खै खाणौवाल़ै कीड़ै औसौ, जू कौलोंई ना मोरो; औरौ आग हिशणै कौलोंई कम ना हौंव। 45 पाप कौरणौ कै सौब बौजैह खै आपणै जिन्दगी शै दूर कौरौ, जैशैकै तैरा लात तांव लैई पाप कौरांव तौ तैसी काटै दै। लोंगड़ा हौयौ स्वर्गो दो जाणौ ताखै ठीक औसौ। इथकै बौजैह कै दो लात हौंदै बैई नरको दा पांव। 46 जिथै तिनका कीड़ा ना मोरो औरौ आग ना हिशौ। 47 जै तैरै आख तांव लैई पाप कौरांव तौ तियौं निकाल़ै दै। काणा हौयौ पौरमेशवर कै राज्य दो जाणौ ताखै इदु ठीक औसौ कै दु आखी हौंदै बैई बै नरको दा फेराकाए जांव। 48 नरको दै सौबी कै शोरीरो खै खाणौवाल़ै कीड़ै औसौ, जू कौलोंई ना मोरो; औरौ आग हिशणै कौलोंई कम ना हौंव। 49 सौबी जोणे कै आगी लैई शुद्ध कौरदै, जैशैकै नुणौ लैई ऐक बलिदान शुद्ध हौंव। 50 नूण ऐक जौरुरी चीज़ औसौ, पौरौ जै नुणौ का स्वाद बिगड़ै जांव, तौ तिथु कियों चीज़ौ लैई नुणाटौ कौरलै? तुऔं दै नुणौ कै जैशणै गुण हौणै चैंई, औरौ ऐकी दुजैआरी शान्तै सै रौणौ चैंई। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation