मरकुस 8 - सिरमौरी नौवाँ नियम

यीशुए चोऊ हजार लोगौ कै खाणौ खियाऊ

¹ जोबै यीशु दिकापुलिस इलाके दा थिया, तोबै बौड़ै भीड़ तैसकै धोरे कौठै हौए, औरौ तिनुकैईं किछै खाणौ खै ना थी। यीशुए आपणै चैलै खै आपणै धोरे बौएदैबा तिनुखै बौल़ौ,

² “मुखै इयौं भीड़ौ पांदी गिणौ लागै रोई, जिथुकै ऐजे लोग तीन दूसौ दै ऊंडे मैरै साथै औसौ, औरौ इनुकैंई किछै बै खाणौ खै ना आथी।

³ जै हांव इनु घोरे भूखै ही छाड़ै दियु, तौ बाटौ पुंडे खोड़ीयों बेहोश हौए जांदै; जिथु इनु मुंजीदै कुणजैई-कुणजैई दूर दै आए रौवै।”

⁴ तैसकै चैलै तैसीखै जोवाब दिया, “इथै उजाड़ जौगैह दी इनु सौबी लोगौ कारिए ऐतरी रोटी कुकै दी लियोऊ कै ऐजै सौब रोज़े जांव?”

⁵ यीशुए तिनु कैईंदु पूछु, “तुऔं कैंई कैतरी रोटी औसौ?” तिनुऐ बौल़ौ, “आमुवा सात रोटी औसौ।”

⁶ इथकारिए तैणै लोगौ खै जोमीनो पांदी बोठणौ कै बौल़ौ। औरौ सैजी सात रोटी कौरी औरौ पौरमेशवर का धन्यवाद कौरेयौ रोटी तुड़ी, औरौ आपणै चैलै खै दैंदा लागा, कै सै लोगौ कै बीचो दी बांडी दैंव। औरौ चैलै रोटी खै बांडी दी।

⁷ तिनुकैईं दैणी नानड़ी माछी बै थी; औरौ यीशुए पौरमेशवर का धन्यवाद देएबा तिनुखै बै लोगौ कै औगौड़ियौ बांडी दी।

⁸ औरौ लोग खाऐबा रोज़े गौवै औरौ चैलै बाद मै बौचेयौंदे टुकड़ै की सात शैकड़ी भोरेयोंदे टिपी।

⁹ औरौ लोग चार हजार कै लमसम थिए, तोबै यीशुए तिनुखै छाड़ै दिए।

¹⁰ औरौ सै तौलोंई आपणै चैलै कै साथै किश्‍ती पांदी बौठैबा दलमनूता इलाके खै हौटै गौआ।

फरीसी लोगै निशान मांगै

¹¹ तोबै फरीसी लोग यीशु कै धोरे आयौ तैसीआरी बैहस कौरदै लागै। सैजै तैसीखै पोरखणा चांव थिए इथकारिए तिनुऐ स्वर्ग दा ऐक निशान दिखाणौ कै बौल़ौ, सै दैखणौ चांव थिए कै पौरमेशवरे तैसी आपणै शौकतै दै राए।

¹² तैणै तिनकै अबिशवाश कै बौजैह शै दुखी मन लैई शुशकार भोरेबा बौल़ौ, “तुऐं इयौं पीढ़ी कै लोग किथुखै निशान चांव? हांव तुऔं खै साचौ बुलू, कै इयौं पीढ़ी कै लोगौ खै कुणजाई बै निशान ना दिया जांदा।”

¹³ तोबै यीशुए फरीसी लोगौ खै छोडे़बा, आपणै चैलै कै साथी हौजौ किश्‍ती पांदी बौठै गौआ, औरौ गलील समुन्द्र कै पार कौरेयौ ओकी ढौबौ हौटै गौवै।

फरीसी लोग का खमीर

¹⁴ चैलै आपणै साथै रोटी लाणी बैसरै गौवै थिए, औरौ किश्‍ती दी तिनुकैईं ऐकैई रोटै थी।

¹⁵ यीशुए तिनु चिताऐबा बौल़ौ, “फरीसी लोगौ औरौ हेरोदेस राजा कै खमीर शै चौकश रौए।”

¹⁶ चैलै आपी मुंजी विचार कौरेयौ बौलदै लागै, “आमुए तौ रोटी लाए ना रैई इथकारिए यीशुए ऐशैखै बौल़ौ।”

¹⁷ ऐजौ जाणैबा यीशुए तिनुखै बौल़ौ, “तुऐं किथुखै आपी मुंजी विचार कौरे लौवै कै आमुए तौ रोटी बै लाए ना रैई? का तुऐं आपणै मन कै इशैक ढीठ बाणै राए, कै तुऐं इबी बै सौमझी ना रैई?

¹⁸ तुंआरी आखी औरौ कान औसौ, पौरौ तुऐं दैखै औरौ शौणै ना सौकौ। औरौ का तुऔं याद ना आथी?

¹⁹ जोबै मोऐं तिनु पाँच हजार लोगौ कै सिरफ पाँच रोटी लैई खियोऊं, तौ तुऐं बौचेयौंदे रोटी की कैतरी शैकड़ी भोरेबा टीपी?” तिनुऐ तैसीखै बौल़ौ, “बारौ शैकड़ी बोचयोंदै थी।”

²⁰ यीशुए तिनुखै बौल़ौ, “औरौ जोबै चार हजार लोगौ खै सात रोटी तुड़ी थी तौ तुऐं टुकड़ै की कैतरी शैकड़ी रोटी भोरेबा टीपी थी?” तिनुऐ तैसीखै बौल़ौ, “सात शैकड़ी रोटी की टिपी।”

²¹ यीशुए तिनुखै बौल़ौ, “का तुऐं इबी तौड़ी बै ना सौमझौ कै हांव कुण औसौ?”

आन्धा आदमी कै ठीक कौरणा

²² तोबै यीशु औरौ तैसकै चैलै बैतसैदा शहर दै ओऊवे; औरौ लोगै ऐकी आन्धै खै तैसकै धोरे लियोऊवा औरौ तैसी कैईंदी बिन्ती कौरे कै तैसीखै छुंयो ठीक कौरो।

²³ यीशुए तैसी आन्धै का हाथ पाकड़ैबा तैसीखै गांव खै बायरै लियोऊवा। औरौ तैणै आपणौ थूक आन्धै कै आखी दौ लाएबा तैसकै आखी पांदी हाथ राखा, औरौ तैसी कैईंदु पूछु, “का तैरै किछै दैखियौं औसौए?”

²⁴ तैणै आखी खोलेबा बौल़ौ, “हांव आदमी दैखी सौकु पौरौ हांव तिनु साफ-साफ ना दैखी सौकु। सै मुं बाईरे हांडदै डाल़ो कै जैशणै दैखै रौवै।”

²⁵ तोबै यीशुए दुजाल़ियो तैसकी आखी पांदी हाथ धोरे, औरौ आन्धै कै पोठाकरो दैखियु। औरौ सै ठीक हौए गौआ, औरौ सौबै साफ-साफ दैखदा लागा।

²⁶ तिथकै बाद यीशुए तैसीखै आपणै घोरो जाणौ खै बौल़ौ, “ऐजी बात गांव वाल़ै खै नी बौताया जू तांवआरी इथै हौए रौए।”

पतरस का यीशु कै मसीह मानणा

²⁷ यीशु औरौ तैसकै चैलै कैसरिया औरौ फिलिप्‍पी नोगरो कै गांव दै हौटै गौवै; औरौ बाटौ पुंडे तैणै आपणै चैलै कैईंदु पूछु, “लोग मुखै का बौल़ौ?”

²⁸ तिनुऐ जोवाब दिया, “यूहन्ना बपतिस्मा दाता; पौरौ कुणिए-कुणिए एलिय्याह; औरौ कुणिए-कुणिए पौरमेशवर कै बातौ बौताणौवाल़ा मुंजीदा ऐक बौल़ौ।”

²⁹ यीशुए तिनुखै पूछै, “पौरौ तुऐं का बिशवाश कौरौ कै हांव कुण औसौ?” पतरसे तैसीखै जोवाब दिया, “तू पौरमेशवर का भैजैयौंदा मसीह औसौ।”

³⁰ तोबै यीशुए तिनुखै चिताऐबा बौल़ौ, कै मैरै बारै मुंजी कोसी कैंई नी बौलेया जै हांव मसीहा औसौ।

यीशु कै आपणै मौरणौ कै बारै मुंजी बौताणौ

³¹ तोबै यीशु आपणै चैलै कै शिखांदा लागा, कै ऐजौ जौरुरी औसौ, कै हांव आदमी का बैटा बौहितै दुख झैलू, औरौ बुड़ेईक औरौ मुख्य यहूदी पुरोहित, औरौ यहूदी शास्त्री मुखै नोकारा सौमझेयौ मारै दैलै, पौरौ हांव ती दूसौ कै बाद जियुंदी हौंदा।

³² यीशुए ऐजै बात तिनुखै साफ-साफ बौल़ै दै। पतरस ना चांव थिया कै मसीहा दुख झेलेयो मौरे जांव, इथकारिए सै यीशु कै डांटदा लागा कै आपणै बारै दी ऐजी बातौ ना बौल।

³³ पौरौ यीशु पाछु फिरैयौ, आपणै चैलै कै ढौबौ दैखौ, औरौ पतरस खै झिड़केयो बौल़ौ, “शैतानो साए काम कौरणै बोन्द कौर! मैरै सामणै दा दूर हौ; जिथु तैरै बिचार आदमी कै जैशणै औसौ, ना कै पौरमेशवर कै जैशणै।”

यीशु पाछै चालणौ का मतलब

³⁴ यीशुए भीड़ौ समैंत आपणै चैलै खै आपणै धोरे बौएदैयौ तिनुखै बौल़ौ, “जै तुऐं मैरै चैलै बौणणे चांव, तौ तुऔं खै आपणी इछाएं छोड़णी पौड़ली। औरौ आपणा क्रूस टिपेबा मैरै पौछौड़ियौ चालणौ पोड़लो (आपणै क्रूस सोणो का मतलब औसौ दुख औरौ नेंदैया सोणै पोड़दै औरौ आपणै प्राण तक बै दैणै पोड़लै)।

³⁵ जिथु जू कुणिए इयौं धोरती पांदी आपणै जिन्दगी बौचाणौ कै कौचिश कौरला, सै हमैशा कै जिन्दगी गवांए दैला, पौरौ जू कुणिए मुं पांदी बिशवाश कौरणै औरौ सुसमाचार प्रचार कौरणौ कै बौजैह आपणै जिन्दगी गंवाला, सै स्वर्ग दै हमैशा खै जिन्दगी पाला।

³⁶ ऐक आदमी कै का भेटलो जै तैसीकै पूरी दुनिया कै चीज़ौ भेटली? औरौ पौरमेशवर कै साथी हमैशा कै जिन्दगी खोए दैला।

³⁷ हमैशा कै जिन्दगी कै बौदलै आदमी पौरमेशवर कै का दैय सौकौ?

³⁸ जू लोग ऐलो जियुंदी औसौ, औरौ सै पौरमेशवर आरी धौखा कौरौ सैजै ऐकी धोकैबाज घोरवाल़ी साए औसौ, जू मुखै औरौ मैरी शिक्षा कै ना मानौ। हांव आदमी का बैटा, जोबै पवित्र स्‍वर्गदूतौ कै साथै आपणै पिता कै महिमा कै साथै इयौं धोरती पांदी आन्दा, तोबै हांव बै तिनकै भाजै जांदा, कै तुऐं मैरै चैलै औसौ।”