मरकुस 6 - सिरमौरी नौवाँ नियम

नासरतौ दै यीशु कै बैज्जती

¹ ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍तोबै यीशु कफरनहूम नगर शै निकल़ैयो आपणै घोरो (नासरत गांव) दा ओऊवा, औरौ तैसकै चैलै बै तैसकै साथै आए।

² विशांव कै दूसै सै यहूदी सभा-घोरो दा उपदैश दैंदा लागा; औरौ बौहितै लोग उपदैश शौणैबा हैरान हौए गौवै औरौ बौलदै लागै, “ऐसीखै ऐजी बातौ कुकै दी आंव? ऐजा कुणजा ज्ञान औसौ जू तैसीखै दैय राखा? औरौ एजा यीशु कियों शौकतै की बौजैह शै बौड़ै चौमत्कार कै काम कौरौ?”

³ तिनुऐ ऐजौ बौलेयौ यीशु का मोजाक ऊड़ोऊंवा औरौ बौल़ौ, “का ऐजा सैजा बाढ़ोए ना आथी, जू मरियम का बैटा, औरौ याकूब, योसेस, यहूदा, औरौ शमौन का भाई औसौ? का तैसकी बोईणी इथै आमु मुंजी ना रौंव?” इथकारिए तिनुऐ तैसकै बातौ पांदी बिशवाश ना कौरी।

⁴ यीशुए तिनुखै बौल़ौ, “पौरमेशवर कै बातौ बौताणौवाल़ा का आपणै गांव, औरौ आपणै घोरे, औरौ आपणै रिशतेदारौ खै छोड़ेयौ ओकते सारै ठाँव दा आदर हौं।”

⁵ इथकारिए यीशुए तिथै चौमत्कार कै काम ना कौरी, जिथुकै लोगै तैसी पांदी बिशवाश ना की औरौ थौड़ै शै बीमारों पांदी हाथ राखैयौ तिनुखै ठीक कौरे।

⁶ औरौ तिनकै बिशवाश ना कौरणौ पांदी हैरानी हौए। इथकै बाद यीशु नेड़ी बैड़ी कै गांव दा हौटा, औरौ लोगौ कै पौरमेशवर का उपदैश शिखांदा लागा।

यीशुए बारौ चैलो कै छाड़ै

⁷ तोबै इथकै बाद यीशुए बारौ चैलै खै आपणै धोरे बोईदै औरौ तिनु दो-दो कौरेयौ जौई-जौई गांव दै छाड़दा लागा, औरौ तिनु दुष्टआत्माओं खै बायरै घाड़णो का औधिकार दिया।

⁸ औरौ तैणै तिनुखै बौल़ौ कै, “आपणै बाटौ कारिए ऐक डैंगा राख सौकौ, ना तौ खाणौ कै रोटी, ना झोल़ा, ना बटुवे दै पोएसै निया।

⁹ जूते तौ लाए सौकौ पौरौ जू खोटणो तुऐं बाम्बै राए सैजै काफी औसौ।”

¹⁰ यीशुए तिनुखै बौल़ौ, “जिथै कौथी तुऐं कोसी घोरे जांव, जोबै तुऔं कुणिए आपणै घोरे बोइदो, तौ तुऐं तांव तौड़ी तैसी घोरे टिकयौंदे रौंव, जांव तौड़ी तुऐं तैसी नोगरो पौरैशै आगु नै जांव।”

¹¹ जैसी जौगैह कै लोग तुऔं खै ना अपनांव, औरौ तुंआरी ना शुणौ, तिथैदै हांडदै बैई आपणै तलवे कै धूल झाड़ै दैया, ऐजै बात तिनु चिताणो कारिए औसौ कि लोग पौरमेशवर कै औरौ शै भैटणौ वाल़ै सौजा कारिए आपी जुमैवार औसौ।

¹² तोबै चैलै जाएयो प्रचार कौरा, “तुऔं आपणै पाप कौरणै छोड़ेयौ पौरमेशवर कै पौछौड़ियौ हांडणौ चैंई।”

¹³ औरौ बौहिती दुष्टआत्माओं खै घाड़ी, औरौ बौहितै बीमार लोगौ पांदी जैतून का तेल लाएबा तिनुखै ठीक कौरे।

यूहन्ना बपतिस्मा दाता कै मौत

¹⁴ तोबै हेरोदेस राजाए बै तिनकै चौर्चा शौणै, जू काम यीशुए कौरे लौवै थिए, जिथु बौहितै लोग यीशु कै बारै दै जाणौ थिए औरौ तैसकौ नांव मोशुर हौए गौ थियु, औरौ कैई लोग यीशु कै बारै दै बौल़ौ थिए, यूहन्ना बपतिस्मा दाता मौरेयौंदे मुंजीदा जियुंदी हौए गौआ, इथकारिए तैणै चौमत्कार कै काम प्रगट कौरे लौवै।

¹⁵ औरौ ओकी लोगै बौल़ौ, “ऐजा तौ पौरमेशवर कै बातौ बौताणौवाल़ा एलिय्याह औसौ।” पौरौ कैई लोगै ऐशै बौल़ौ, “ऐजा पौरमेशवर कै बातौ बौताणौवाल़ा औसौ, तिनु साए जूंजे पुराणै सौमय दै पौरमेशवर कै बातौ बौताणौवाल़ै थिए।”

¹⁶ हेरोदेस राजाए ऐजौ शौणैबा बौल़ौ, “जैसी यूहन्ना बपतिस्मा दाता को मुंड मोऐं कोटवाऐ दियु थियु, सै मौरेयो जियुंदा हौए गौआ।”

^17-18 हेरोदेस राजाए कैई दूस आगै आपणै भाई फिलिप्पुसे कै घोरवाल़ी हेरोदियास आरी बियाव कौरे राए थिया। पौरौ यूहन्नाए राजा कै बौल़ौ, “कै ताखै मूसा कै कानून कै हिसाब शै आपणै भाई कै घोरवाल़ै राखणै ठीक ना आथी, जिथु तैरा भाई इबी जियुंदा औसौ।” इथकारिए हेरोदेस राजाए लोगौ खै छाड़ैयो यूहन्ना कै पाकड़ैबा कोयदी दा पाए राए थिया।

¹⁹ इथकारिए हेरोदियास तैसीआरी बैर राखौ थी औरौ सै चांव थी, कै तैसीखै मारै दियु, पौरौ ऐशैखै ना हौए सौकी।

²⁰ जिथु हेरोदेस यूहन्ना खै धरमी औरौ पवित्र आदमी जाणैबा तेसिदा डौरौ थिया, औरौ तैसकै कोयदै दै बै रक्षा कौरौ थिया। औरौ यूहन्ना कै बातौ शौणैबा बैजाए होड़बड़ाए जांव थिया, पौरौ तोबै बै सै तैसकी बातौ शुणणी पसन्द कौरौ थिया।

²¹ ऐकी दूसै, हेरोदेस राजाए आपणा जन्म दूसौ का नियोता दिया। तैणै आपणै प्रधानों औरौ सेनापतियो, औरौ गलील जिले कै बौड़ै लोग बोइदै। ऐसी दूसै, हेरोदियास कै यूहन्ना खै मारणौ का ऐक मौका बैटा।

²² ऐसी मोके पांदी हेरोदियास कै बैटी भीतरै आए, औरौ नाचेबा हेरोदेस खै औरौ तैसकै पोऊंणै कै खुश कौरे; तोबै राजाए बाईटी खै बौल़ौ, “तू जू किछै मुं कैंईदौ मांगली हांव ताखै दियुंबा।”

²³ औरौ तैणै शौं कौरेयौ बौल़ौ, “जू किछै तू मांगलै हांव ताखै दियुंबा, चाए तू मैरौ आधौ राज्य तौड़ी मांगली।”

²⁴ तियैं बायरै जाऐबा आपणी माँ कैईंदु पूछु, “हांव का मांगु?” तियैं बौल़ौ, “यूहन्ना बपतिस्मा दाता को मुंड मांगै पा।”

²⁵ सै तौलोंई राजा कै धोरे भीतरै आए, औरौ तैसी कैईंदै बिन्ती कोरी, “हांव चोऊ कै तू इबी यूहन्ना बपतिस्मा दाता को मुंड काटैयौ मुखै ऐकी थालौ दौ मोंगाऐ दै।”

²⁶ तोबै राजा बैजाए उदास हौआ, पौरौ आपणी शौं औरौ पोऊंणै की बौजैह शै तियांरी बात टाल़ै ना सोकी।

²⁷ औरौ राजाए तौलोंई ऐक सिपाही खै आज्ञा देएयो छाड़ा, कै तैसकौ मुंड काटैयौ मैरै धोरे लाव।

²⁸ सैनिके ज़ेलो पुंडे जायौ तैसकौ मुंड काटैयौ ऐकी थालौ दौ धोरेयौ, औरौ तियौं बाईटी खै दैय दियु, औरौ बाईटीऐ आपणी माँ खै दियु।

²⁹ ऐजौ शौणैबा यूहन्ना कै चैलै आए, औरौ तैसकै लाश खै लोए गौवै औरौ कब्रो दै राखै।

यीशुए पाँची हज़ारो आदमी कै खाणौ खियांव

³⁰ जोबै चोणेयौंदे चैलै पाछु आयौ यीशु कै धोरे कौठै होवे, तोबै जू किछै तिनुऐ कौरे राव थियु, औरौ शिखोऊ थियु, सौबै तैसीकैईं बौतौऊं।

³¹ यीशुए चैलै कै बौल़ौ, “आव आमुए ऐकी शुनशान जौगैह दै हांडेबा जिथै आमु इकली रौए सौकु औरौ दैणी विशांव कौरे सौकु।” जिथु बौहितै लोग आन्दै जांदै रौंव थिए, औरौ इयौं बौजैह शै तिनु खाणौ का मौका बै ना भैटौ थिया।

³² इथकारिए सै किश्‍ती पांदी जाऐबा, शुनशान जौगैह दै इकली हौटै गौवै।

³³ पौरौ बौहितै लोगै तिनुखै जांदै बैई दैखै औरौ जाणै पोऊँ कै सै कुकै जांदै लागै रौवै। इथकारिए सौब नोगरो कै लोग कौठै हौयौ समुन्द्र कै किनारे-किनारे दै हौयौ दोऊड़ै, औरौ समुन्द्र कै ओकी ढौबौ यीशु औरौ तैसकै चैलै कै तिथै पोऊंचणौ दै औगौड़ियौ ही पौंचै गौवै।

³⁴ यीशुए उदे आयौ बौड़ै भीड़ दैखै, औरौ तिनु पांदी तरस खोऊवा, जिथुकै सै तिनु भेड़ो कै साए थिए, जिनका कुणिए रोखवाल़ा ना आथी, औरौ सै तिनुखै पौरमेशवर कै राज्य कै बारै दो बौहितै बातौ शिखांदा लागा।

³⁵ बैल़खै कै सौमय यीशु कै चैलै तैसकै बौलदै लागै, “ऐजै शुनशान जौगैह औसौ, औरौ बैल़खौ हौए गौ।

³⁶ लोगौ कै छाड़ै दै कै चोऊ ढौबौ कै गांव औरौ बस्तियौं दै जाऐबा, आपी कै किछै खाणौ खै मोलै लियांव।”

³⁷ यीशुए चैलै खै जोवाब दिया, “तुऐं ही तिनुखै खाणौ खै दैंव।” तिनुऐ यीशु कै बौल़ौ, “का आमै दो शो दूसौ कै धियाड़ै की रोटी मोलै लोऊँ, औरौ तिनुखै खेयांऊ?”

³⁸ यीशुए तिनुखै बौल़ौ, “जायौ दैखौ तुऔं कैई कैतरी रोटी औसौ?” तिनुऐ पौता कौरेयौ बौल़ौ, “आमुकैंई पाँच रोटी औरौ दो माछी औसौ।”

³⁹ तोबै यीशुए तिनुखै आज्ञा दै, कै सौबी खै होरी-होरी घासो पांदी पाँति-पाँति दै बौठाल़े दैंव।

⁴⁰ सै सौ-सौ औरौ पचाश-पचाश कौरेयौ पाँति-पाँति बौठै गौवै।

⁴¹ यीशुए तिनी पाँच रोटी औरौ दो माछी कौरी, औरौ स्वर्ग कै ढौबौ दैखैयो पौरमेशवर का धन्यवाद कौरा, औरौ रोटी तौड़ै-तौड़ेयो चैलै खै दैन्‍दा लागा, कै सै लोगौ खै बान्डो, औरौ सैजी दो माछी बै तिनु सौबी मुंजी बान्डै दी।

⁴² सौबै खाएयो छौकै गौवै।

⁴³ जोबै सौबीए खाणौ खाए पोऊँ तोबै चैलै रोटी औरौ माछी कै बौचेयौंदे टुकड़ै की बारौ शैकड़ी भोरेयो टिपी।

⁴⁴ जिनुवै रोटी खाई, सै पाँच हजार मौरोद थिए, औरौ तिनुऐ बैटमाणिशौ औरौ नानड़िया कै गिनतै ना की।

यीशु पाणी पांदी चाला

⁴⁵ तोबै यीशुए तौलोंई आपणै चैलै खै किश्‍ती पांदी बोठणौ खै मोजबूर कौरे कै सै तैसदै आगै पार बैतसैदा शहर खै निकल़ै जांव, तांव तौड़ी हांव लोगौ खै आगु डियाल़ु।

⁴⁶ तिनुखै आगु डियाल़ेयो सै धारो पांदी प्रार्थना कौरदा हौटा।

⁴⁷ जोबै फिरै कै वकतौ किश्‍ती गलील समुन्द्र कै बीचो दै थी, औरौ यीशु इकली किनारे पांदी थिया।

⁴⁸ यीशुए दैखौ कै चैलै कै किश्‍ती चोलांदै बैई बौहितै मुशकिल हौए रौए थी, जिथु जोराल़े हावा बैरवें कै बोए रौए थी। झीशो रात कै बियाणौ दै आगै यीशु झीलो पांदी चालैयौ तिनकै धोरे ओऊवा; औरौ तिनुदा आगै निकल़ै जाणौ चांव थिया।

⁴⁹ पौरौ चैलै यीशु कै झीलो पांदी चालदै दैखा, औरौ डौरेयौ लैरौ मारी, तिनुऐ जाणौ कै सै भूत औसौ।

⁵⁰ जिथु सौबै तैसी दैखैयो घबराए गौवै थिए। पौरौ यीशुए तौलोंई तिनुआरी बातौ की औरौ बौल़ौ, “हिम्मत राखौ: हांव औसौ; डौरेया नै।”

⁵¹ तोबै सै तिनकै धोरे किश्‍ती पांदी ओऊवा औरौ हवा रौकै गौए औरौ सै बौहितै हैरान हौए गौवै।

⁵² हालांकि तिनुऐ दैखै राए थियु कै यीशुए पाँच हजार मौरदो कै रोटी खियाए रैई थी पौरौ सै इबी तौड़ी तैसकै शौकतै कै बारै मुंजी बिल्कुल ना सौमझै रैई थी, जिथुकै तिनकै मन हौजौ बै बिशवाश कौरणौ शै ढीठ हौए रौवै थिए।

गन्नसरतौ दा बीमारों कै ठीक कौरणा

⁵³ यीशु औरौ तैसकै चैलै किश्‍ती शै गलील झील कै पार कौरेयौ गन्नेसरत प्रदेश दै पोऊंचे, औरौ किश्‍ती किनारे पांदी बानै।

⁵⁴ जोबै सै किश्‍ती पांदी दै उदे उतरे, तौ लोग तौलोंई तैसीखै पौछौड़ियौ,

⁵⁵ नेड़ी-बैड़ी कै जिले दै दोऊड़ै, औरौ बीमारों खै ल़ौहथौ पांदी राखैयौ, औरौ तिनु टेपेयो तियौं जौगैह दै लौए गौवै, जिथै तिनुऐ लोगौ खै बुलदै शौणै राए थिए, कै यीशु तिथै हौटै रौआ थिया।

⁵⁶ औरौ जिथै कौथी सै गांव, नोगर, या बोसतिदा जांव थिया, लोग बीमारों खै बोजारों की जौगैह दै धोरेयौ तैसीकैईं दै बिन्ती कौरौ थिए, कै सै तिनु आपणै खोटणो कै पालै खै ही छुणौ दैंव: औरौ जैतरै तैसीखै छुओं थिए, सौबै ठीक हौए जांव थिए।