मरकुस 15 - सिरमौरी नौवाँ नियमपिलातुस का यीशु आदा सवाल ( मत्ती 27:1-2 ; 11-14 ; लूका 23:1-5 ; युहन्ना 18:28-38 ) 1 झीशींदै मुख्य यहूदी पुरोहित, बुड़ेईक, औरौ यहूदी शास्त्री औरौ महासभा मुंजीदै सौबी लोगै सलाह कौरेयौ यीशु खै न्याय कौरणौ कारिए यहूदिया जिले कै रोम देश कै राज्यपाल पिलातुस कै हाथौ दा सौंपै दिया। 2 राज्यपाल पिलातुसे तैसी कैईंदु पूछु, “का तू यहूदियों का राजा औसौ?” यीशुए तैसीखै जोवाब दिया, “तुऐं आपी ही लौ बौल़ै।” 3 मुख्य यहूदी पुरोहिते यीशु पांदी बौहिती बातौ का दोष लाए लौआ थिया। 4 इथकारिए राज्यपाल पिलातुसे तैसीखै हौजौ पूछु, “का तू किछै जवाब ना दैणा चांए, दैख इनुवे तांव पांदी कैतरी बातौ का दोष लाए लौआ?” 5 यीशु तोबै बै चुप्पी रौआ; इथपांदी पिलातुस खै बै बैजाए हैरानी हौए। यीशु कै मारणौ का आदैश ( मत्ती 27:15-26 ; लूका 23:13-25 ; युहन्ना 18:39-19:16 ) 6 आई बोशो राज्यपाल पिलातुस आपणै भोवार कै हिसाब शै जैसीखै लोग चांव थिए, फसह कै तैयारो पांदी तैसी ऐकी कैदी कै आज़ादी दैंव थिया। 7 औरौ तौदी कै दूसौ बरअब्बा नांव का ऐक आदमी जू ओकी कोयदी आरी कैद दा थिया, जैणै रोम सरकारो कै खिलाफ लोड़ाई मुंजी कैई लोगौ खै मारै दिए थिए। 8 भीड़ राज्यपाल पिलातुस कै धोरे आए औरौ तैसीकैईं दै बिन्ती कौरदै लागै, जैशैकै तू आमु कारिए कौरदा आए रौआ तैशैकैई तू ऐकी कैदी खै आज़ाद कौर। 9 पिलातुसे तिनुखै जोवाब दिया, “का तुऐं चांव, कै हांव तुऔं कारिए यहूदी लोगौ कै राजा खै छोड़े दियु?” 10 जिथुकै सै जाणौ थिया, कै मुख्य यहूदी पुरोहिते यीशु खै रिशो कै बौजैह शै थोम्बाया राए। 11 पौरौ मुख्य यहूदी पुरोहिते लोगौ खै उकसोऊवे, कै सै राज्यपाल पिलातुस शै यीशु कै बौदलै बरअब्बा ही कै आज़ाद कौरणौ कै मांग कौरौ। 12 ऐजौ शोणेयो पिलातुसे तिनु कैईंदु हौजौ पूछु, “तौ जैसीखै तुऐं यहूदियों का राजा बौल़ौ, तैसकौ हांव का कौरु?” 13 तोबै भीड़ै बैजाए रोल़ा पाड़ा, “यीशु खै क्रूसो पांदी किलियों खत्म कौरौ!” 14 पिलातुसे तिनुखै बौल़ौ, “किथुखै, ऐणै का बुरु कौरे राए?” पौरौ भीड़ै हौजौ बै रोल़ा पाड़ा, “तैसीखै क्रूसो पांदी किलियों खत्म कौरौ।” 15 तोबै पिलातुसे भीड़ौ खै खुश कौरणौ कै बौजैह शै, बरअब्बा खै तिनु कारिए छोड़े दिया, औरौ यीशु दै कौड़ै लाएबा रोमी सैनिकौ खै दैय दिया, कै क्रूसो पांदी किलियों खत्म कौरौ। यीशु कै बैज्जती ( मत्ती 27:27-31 ; युहन्ना 19:2-3 ) 16 तोबै राज्यपाल पिलातुस कै सैनिके यीशु खै महल कै आँगणो दा निया (जिथु प्रीटोरियुम बौल़ौ मतलब राज्यपाल पिलातुस का शाही घोर बौल़ौ थिए) औरौ सौबै सैनिक पलटन खै बौएदै। 17 औरौ यीशु कै ठाटै पाड़नो खै, तोबै सैनिके तैसीखै शाही बैंजनी खोटणो बोम्बाए औरौ कांडे को मुकुट लाऐबा तैसकै मुंडौ पांदी राखौ, औरौ तैसीखै जोताणौ कै, रोल़ा पाड़ैयो दिखावा कौरदै लागै, औरौ बौल़ौ कि तू यहूदियों का राजा हमैशा जिवंदी रोए औरौ तैरी जय-जयकार होंदी रौंव 18 औरौ ऐजौ बौलेबा तैसीखै नमशकार कौरदै लागै, “ओए रै यहूदियों कै राजा, नमशकार!” 19 तिनुऐ तैसकै मुंडौ पांदी बार बार डैंगै कै लाए, औरौ तैसी पांदी थूकु, औरौ घुंडू नियुड़ायो तैसीखै ढाल़ कौरदै रौवै। 20 जोबै तिनुऐ तैसका ठाटा कौरे पाए, तौ तैसी पौरैशै बैंजनी खोटणो उंढे खोलाएबा तैसकै ही खोटणो बोम्बाए; औरौ तोबै तैसीखै क्रूसो पांदी चौढ़ाणौ कारिए शहरो दा बायरै लोए गौवै। यीशु कै क्रूसो पांदी चौढ़ौऊवा ( मत्ती 27:32-44 ; लूका 23:26-43 ; युहन्ना 19:17-27 ) 21 सिकन्दर औरौ रूफुस का पिता शमौन, ऐक कुरेनी शहर का आदमी थिया, जू गांव पौरैशा शहरो कै आन्दा लागै रौआ थिया तिथ बाटी हौटा; सैनिके तैसी जोरै पाकड़ा कै तैसकौ क्रूस टिपेबा आगु नियौ जैसी ठाँव दा यीशु कै क्रूस पांदी टांगणा थिया। 22 सैनिके यीशु खै गुलगुता नांव जौगैह पांदी, जिथका मतलब खोपड़ी कै जौगैह औसौ, लियोऊवा। 23 तोबै सैनिके तिथै यीशु खै गन्धरस नांव की दवाई अंगूर कै रसो मुंजी मिलायौ दी, ताकि तैसकै पीड़ नी लागौ, पौरौ यीशु दवाई पिणौ कै भाजै गौआ। 24 तोबै तिनुऐ तैसीखै क्रूसो पांदी चौढ़ौऊवा औरौ तैसीखै खोटणो पांदी चिट्ठी पाए, कै कोसी खै का भैटदौ, तिथुकै बांडै दैंव। 25 लमसम झीशो कै नौ बोजे, जोबै तिनुऐ तैसीखै क्रूसो पांदी टांगा। 26 सैनिके यीशु कै मुंडो पांदी क्रूसो दै ऐक तौकती किली, औरौ तिंदा तैसकै खिलाफ आरोप लिखा, “यहूदियों का राजा।” 27 तिनुऐ तैसकै साथै दो डाकू, ऐक तैसकै सोऐं ढौबौ औरौ ऐक डैरै ढौबौ क्रूसो पांदी चौढ़ाए। 28 (ऐशैखैई पवित्र शास्त्र का सैजा वचन पूरा हौआ, जू मसीहा कै बारै मुंजी बौतांव थिया, कै सै अपराधी कै जैशणा गिणा जाला)। 29 औरौ बाटौ पुंडे जाणौवाल़ै लोग आपणै मुंड हिंजाल़ै-हिन्जालेबा तैसीकै ऐजौ बौलेयौ नेंदैया कौरदै लागै कै, “का रै मन्दिरो का ढाल़णौवाल़ा, औरौ ती दूसौ दा बाणणौवाल़ा! 30 क्रूसो पांदी दा उदा ओतरेयो आपी खै बौचा।” 31 ऐशैखैई मुख्य यहूदी पुरोहित, यहूदी शास्त्री कै साथै, आपी मुंजी ठाटै शै बौल़ौ थिए, “ऐणै ओकी खै तौ बौचाए, पौरौ आपी खै ना बौचाए सौकी। 32 ऐजा आदमी जू दावा कौरौ, कै हांव इस्राएल देश का राजा औरौ मसीहा औसौ, जै सै ऐबै क्रूसो पांदी दा उदा ओतरेयो आपणी बात साबित कौर दैला, तौ आमै दैखैयो बिशवाश कौरुबै कै ऐजाई अमारा राजा औसौ।” औरौ जू तैसकै साथै क्रूसो पांदी टांगेयोंदै थिए, सैजै बै तैसकै नेंदैया कौरौ थिए। यीशु कै मौत ( मत्ती 27:45-56 ; लूका 23:44-49 ; युहन्ना 19:28-30 ) 33 दूसौ दुफ़ारीए लमसम बारौ बोजे सारै देशो दो इनारौ पौड़ै गौ, औरौ लमसम ती बोजे तौड़ी रौ! 34 लमसम ती बोजे यीशुए बौड़ै शब्द शै पुकारैबा बौल़ौ, “इलोई, इलोई, लमा शबकतनी?” जिथका मतलब ऐजा औसौ, “ओए रै मैरै पौरमेशवर तुऐं मुखै किथुखै छोड़े दिया?” 35 तिनी लोगौ मुंजी शै जू तैसकै सामणै खौड़ै थिए, तिनुमुंजी दै कुणिए आपी मुंजी ऐजौ शौणैबा बौल़ौ, “दैखौ, ऐणै पौरमेशवर कै बात बोताणौ वाल़ा एलिय्याह खै आपणी मौदद खै बोएदी लौआ।” 36 औरौ तिनु मुंजीदा ऐकीए दौड़ैबा सपंज कै खाटे अंगूर कै रस मुंजी डुबोयो औरौ डैंगै पांदी राखैयौ तैसीखै चुशणौ कै दियु औरौ बौल़ौ, “रौकै जाव; दैखुबै कै एलिय्याह ऐसीखै बौचाणौ आन्दा कै ना।” 37 तोबै यीशु बौड़ै शब्द शै लेलयाऐबा मौरे गौआ। 38 औरौ सैजा मोटा पोरदा जू यरूशलेम मन्दिर दा टांगेयोंदा थिया, जू सौबी लोगौ खै पौरमेशवर कै हाजरी दै रौणौ शै रौकौ थिया, ऊपरौ दा धैनै तौड़ी चिरेयौ दो टुकड़ै हौए गौआ। 39 जू सूबेदार तैसकै सामणै खौड़ा थिया, जोबै तैणै यीशु खै ऐशैखै लेलयाऐबा मौरदेबेई दैखा तौ, तैणै बौल़ौ, “कि इयौं बातौ दा किछै बै शक ना आथी कै ऐजा आदमी पौरमेशवर का बैटा थिया।” 40 बौहिती बैटमाणिशै बै दूर दो दैखै लौ थियु: तिनुमुंजी दै मगदेला गांव कै मरियम थी, औरौ ठिकड़ै याकूब औरौ योसेस कै माँ मरियम, औरौ सलोमी थी। 41 जोबै यीशु गलील जिले दा प्रचार कौरदा घुमै रौआ थिया तौ ऐजी तीन बैटमाणिशौ तैसकै चैली बौणैयौं तैसीआरी हौए जांव थी औरौ तैसकै सेवा कौरेया कौरौ थी, औरौ ओकी बौहिती बैटमाणिशौ बै थी, जू यीशु कै साथै यरूशलेम शहर दी आए रैई थी, तिनिए बै यीशु खै दूरकै दा दैखी लौआ थिया। यूसुफ कै कब्रो दा यीशु कै दफनाया ( मत्ती 27:57-61 ; लूका 23:50-56 ; युहन्ना 19:38-42 ) 42 जैसी दूसै यीशु कै क्रूसो पांदी टांगा सैजौ दूस तैयारी को दूस थियु, जिथका मतलब औसौ विशांव कै दूसौ दो औगौड़ियौ को दूस। बैल़खै का सौमय शुरु हौंदै ही यहूदी भोवार कै हिसाब शै लोग कुणजै टोल नै सांडै सौकौ थिए। 43 जोबै सुरज डोबै गौ, तोबै यूसुफ नांव का ऐक आदमी जू अरिमतियाह शहरो का रौणौवाल़ा थिया सैजा ओऊवा जू यहूदी महासभा का माना गिणयौंदा आदमी थिया। तैणै पौरमेशवर कै राज्य कै आणौ कै ठोल़नाए कौरे लोए थी। यूसुफ हिम्मत कौरेयौ कै राज्यपाल पिलातुस कै धोरे हौटा औरौ तैसीयादै यीशु कै लाश क्रूसो शै उतारणो औरौ दफनाणो कै इजाज़त मांगै। 44 पिलातुस खै बिशवाश ही ना होई जै यीशु ऐतरा शोट मौरे गौआ; औरौ तैणै सूबेदार खै बौएदैयौ पूछु, “का ऐजै बात साची औसौ, जै यीशु कोलो मौरे रौआ थिया?” 45 तोबै पिलातुसे बुलो कै यीशु कै लाश, यूसुफ दफनाणो कै नै सौकौ। 46 तोबै तैणै ऐक मलमल कै चादर मोलै लोए, औरौ यीशु कि लाश उतारेयो तियौं चादरी दी लोपेटै, औरौ ऐकी कब्रो दै जू चट्टान दै खोणे राए थी राखै, औरौ कब्रो कै दवारो कै जौगैह पांदी ऐक बौड़ा गोल़ पाथर मोहर लाणौ कै रोड़काए दिया। 47 मगदेला गांव कै मरियम औरौ औकै मरियम जू याकूब औरौ योसेस की माँ थी तिनुऐ दैखी लौ थियु कै तैसीखै कुकै राखै राए। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation