मरकुस 14 - सिरमौरी नौवाँ नियम

यीशु कै मारणौ कै चाल चाले

¹ दु दूसौ कै बाद फसह को तैयार औरौ अखमीरी रोटी को तैयार शुरु हौणौवाल़ौ थियु। मुख्य यहूदी पुरोहितो औरौ यहूदी शास्त्री इयौं बातौ की ताको दै थिए कै यीशु खै कैशैखै धौखै शै उंढा पाकड़ैबा मारै दीं।

² पौरौ बौल़ौ थिए, “कि आमुखै तैयारो कै दूसै ऐशै नी कौरणौ चैंई, कोदी ऐशै नी हौंव कै लोगौ मुंजी खून-खोराबा हौंव।”

कीमती इत्र

³ तौदी कै दूसै, जोबै यीशु बै बैतनिय्‍याह गांव दा तैसी शमौन कै घोरे खाणौ खांदा बौठै रौआ थिया, जैसीखै लोग कोढ़ी शमौन कै नांव शै जाणौ थिए औरौ यीशुए तैसीखै कोढ़ शै ठीक कौरे राए थिया, तोबै तिथै ऐक बैटमाणिशै संगमरमर कै पाथरो कै बासणौ दो जटामांसी को मौंगौ, औरौ शूचु औरौ खुशबूदार इत्र लियोऊ, औरौ बासणौ को बील तौड़ेयो इत्र खै तैसकै मुंडौ पांदी रिताए दियु।

⁴ पौरौ किछै लोग आपी मुंजी रिशाऐबा बौलदै लागै, “जै तियैं ऐतरो मौंगौ इत्र यीशु पांदी पैरियों बोरबाद कौरौ।

⁵ जिथुकै ऐजौ इत्र तौ ऐकी सालो कै कमाए कै बोराबर औसौ जू ज्यादा कीमतौ दु बैकेबा कंगालो खै बांडै जाए सौकौ थियु।” औरौ सैजै तियौंखै बैजाए झिड़कदै लागै।

⁶ यीशुए बौल़ौ, “इयौं छोड़े दैव; औरौ इयौं पौरैशान नी कौरौ, मुं पांदी इत्र पायौ इयैं आछै टोल सांडी राए।

⁷ कंगाल तौ तोंवारै साथै सौदा रौंव, औरौ तुऐं जौल़ौ चांव तोलो तिनुआरी भोलाए कौरे सौकौ, पौरौ हांव तोंवारै साथै सौदा ना रौंदा।

⁸ इयैं मैरै मौरणौ शै औगौड़ियौ, मैरै मुंडो दो इत्र रितोऊ, कै मैरै शोरीर कै दफनाणो का संस्कार कौरा जांव, बस जू काम तियौं कारिए आसान थिया, सैजौ तियैं कौरौ।

⁹ हांव तुऔं खै साचौ बुलू कै सारै दुनिया दा जिथै कौथी सुसमाचार प्रचार कौरा जाला, तिथै इयौंकै औरौ ऐसी कामौ कै चौर्चा बै याद कौरे जालै।”

यहूदा का यीशु कै साथी धौखा

¹⁰ तोबै यहूदा इस्‍करियोती जू बारौ चैलै मुंजीदा ऐक थिया, मुख्य यहूदी पुरोहित कै धोरे हौटा, औरौ बौतौऊं कै सै यीशु थोम्बाणो खै तिनकी मौदद कौरदा।

¹¹ सैजै ऐजौ शौणैबा खुशी होवे, औरौ तैसीखै पोएसै दैणौ खै राजी होवे, औरौ सै धौखै शै यीशु कै थोम्बाणो कै ताको दा थिया।

आखरी भोज

¹² अखमीरी रोटी कै तैयारो कै आगलै दूसै, जिथै सै फसह कै मेम्ने कै बल़ि कौरौ थिए, यीशु कै चैलै तैसी कैईंदु पूछु, “तू आमुखै कुकै भैजणौ चांए, कै आमै फसह कै खुशी मोनाणौ खै खाणौ बौणाणौ कै तैयारी कौरु कै आमै इथु खाए सौकु?”

¹³ तैणै आपणै चैलै मुंजीदै दु खै ऐजौ बौलेबा छाड़ै, “यरूशलेम नोगरो दै जाव, औरौ ऐक आदमी पाणी का घोड़ा टिपेबा तुऔं भैटदा, तैसकै पौछौड़ियौ हौए जाया।

¹⁴ औरौ सै जैसी घोरो दा जाला, तैसी घोरो कै ठोगड़े खै बौलेया ‘गुरु बौल़ौ, कै मैरै पोऊंणै को घोर जिथपुंडा हांव आपणै चैलै कै साथै फसह खोऊं कुकै औसौ?’

¹⁵ सै तुऔं खै शोहे-लैबेंयौंदा, औरौ तैयार कौरेयौंदा उपला बौड़ा कमरा दिखाला, तिथै आमु कारिए तैयारी कौरौ।”

¹⁶ दो चैलै निकल़ैयो नोगरो दै आए औरौ जैशैखै तैणै तिनुखै बौल़ै राए थियु, तैशैखैई पोऊ, औरौ तिनुऐ फसह का खाणा तैयार कौरा।

¹⁷ जोबै बैल़खै हौ, तौ सै बारौ चैलो कै साथै तैसी घोरो दा ओऊवा।

¹⁸ जोबै तिनुऐ बौठैबा खाणौ खाए लो थियु, तौ यीशुए बौल़ौ, “हांव तुऔं कैंई साचौ बुलू कै तुऔं मुंजीदा ऐक, जैणै मैरै साथै खाणौ-खाए लो, मुखै थोम्बाला।”

¹⁹ जोबै तिनुऐ ऐजी बातौ शुणी, तौ सैजै दुखी हौवे औरौ तिनुऐ तैसी शै एकेक कौरेयौ सवाल पूछै, “का सैजा हांव औसौ?”

²⁰ तैणै तिनुखै बौल़ौ, “सै बारौई मुंजीदा ऐक औसौ, ऐक आदमी जैणै आपणै रोटी मैरै साथै तैसी पोकवानो दै डुबोए लोए जिथमुंजी दु आमै सौबीए खाए लो।

²¹ हांव, आदमी का बैटा मोरी जोऊंबा जिथुकै ऐजै बात शास्त्रो दै लैखै राए। पौरौ तैसी आदमी कै सख्त सौजा भैटदी जू मुखै धौखै शा थोम्बाला। जै सैजा आदमी पौयदा नी हौंदा तौ तैसी आदमी कारिए आछै बात थी।”

चैलै कै साथी प्रभु भोज

²² जोबै तिनुऐ खाए ही लोव थियु, यीशुए रोटी कौरी, औरौ पौरमेशवर कै धन्यवाद कौरेयौ तुड़ी, औरौ आपणै चैलो खै दी, औरौ बौल़ौ, “लौ औरौ खाव, ऐजा मैरा शोरीर औसौ।”

²³ तोबै तैणै अंगूर कै रस शै भौरेयौंदा छाना कौरेयौ पौरमेशवर कै धन्यवाद कौरा, औरौ आपणै चैलो खै दिया; औरौ तिनु सौबीए तिथ पौरैशौ पियु।

²⁴ औरौ तैणै तिनुखै बौल़ौ, “ऐजौ अंगूर को रस मैरै लोऊ कै जैशणौ औसौ। मैरौ लोऊ लोगौ कै ढौबौशौ बलिदान कै भैषो दो पैरो जांदो। इयौं बात लैई सैजी कौरार साबित हौलै जू पौरमेशवरे आपणै लोगौ आरी बाणै लोए।

²⁵ हांव तुऔं कैंई साचौ बुलू, कै अंगूर का रस तैसी दूसौ तौड़ी हौजौ कौलोंई ना पींदा, जांव तौड़ी पौरमेशवर का राज्य दा नौवाँ अंगूरो का रस ना पियुं।”

²⁶ तोबै यीशु औरौ तैसकै चैलै पौरमेशवर कै गीत गाऐबा यरूशलेम शहरो शै बायरै आयौ जैतून कै धारो पांदी हौटै जू नेड़िक थियु।

पतरस कै बारै दी भविष्यवाणी

²⁷ जोबै सै धारो पांदी जांदै लागै रौवै थिए, तोबै यीशुए तिनुखै बौल़ौ, “ऐलो रातै ही तुऐं सौबै मुखै छोड़ेयौ भागी जालै, जैशैकै पवित्र शास्त्र दो मैरै बारै मुंजी लैखै राए: ‘हांव आपणै लोगौ कै रोखवाल़ै खै मारै दियुबा, औरौ भेड़ो उंढी-पुंढी बैखरै जाली।’

²⁸ पौरौ हांव आपणै जियुंदी हौणौ खै बाद तुऔं दा औगौड़ियौ गलील जिले खै जांदा औरौ तिथै भैटदा।”

²⁹ पतरसे तैसीखै बौल़ौ, “जै बैशक सौबै ताखै छोड़ेयौ भागी जालै पौरौ हांव ना भागदा।”

³⁰ यीशुए तैसीखै बौल़ौ, “हांव ताखै कै साचौ बुलू, कै ऐलोई रातै कै कुकड़ै कै दो बैई बांक दैणौ दै औगौड़ियौ तू तीन बैई भाजै जांदा, कै तू मुखै ना जाणै!”

³¹ पौरौ तैणै हौजौ बै जोर देएबा बौल़ौ, “जै मुखै तैरै साथै मौरणौ बै पोड़लो तौ हांव ऐजौ कौलोंई ना बौलदा कै हांव ताखै ना जाणु।” ऐशैखैई सौबी चैलै बै बौल़ौ।

गतसमनी बागो दै यीशु कै प्रार्थना

³² तोबै यीशु औरौ तैसकै चैलै गतसमनी नांव कै ऐकी बागो दै पौऊंचै; औरौ तैणै आपणै चैलै खै बौल़ौ, “इथै बौठै रौया, जांव तौड़ी हांव पौरमेशवर शै प्रार्थना कौरु।

³³ औरौ सै पतरस औरौ याकूब औरौ यूहन्ना खै आपणै साथै दैणी औगौड़ियौ लौए गौआ; औरौ यीशु बौहिता दुखी औरौ व्याकुल हौंदा लागा।”

³⁴ औरौ तैणै बौल़ौ, “हांव ऐतरा दुखी औसौ कै मैरै ऐशैखै जाणियौ कै हांव मौरणौ पांदी औसौ: तुऐं इथै रूको, औरौ बिजेयोंदे रौया।”

³⁵ तोबै यीशु दैणिक औगौड़ियौ हौटा। औरौ आपणै घुंडू नियुड़ाएयो आपणा मुँह जोमीनो ढौबौ कौरेयौ पौरमेशवर शै प्रार्थना कौरदा लागा, जै हौए सौकौ तौ ऐजा दुख का सौमय मुं कैईंदा टोल़े जांव।

³⁶ औरौ बौल़ौ, “ओए रै पिता, ओए रै पिताजी, तू तौ सौबै ठुँ कौरे सौकै; मुखै ऐसी दुखो कैईंदा बौचाए दै: तोबै बै जैशैखै हांव चोऊं तैशैखै नी, पौरौ जू तू चांए तैशैखैई हौंव।”

³⁷ जोबै यीशु पाछु ओऊवा औरौ तीनै चैलै कै सौतेयौंदै दैखैयो शमौन पतरस खै बौल़ौ, “का तू सोतै रौआ? का तू ऐक घड़ी बै ना बिज़ सौकी?

³⁸ जागदै औरौ प्रार्थना कौरदै रौंव कै जोबै तोंवारै परीक्षा हौलै तोबै तुऐं मुं पांदी बिशवाश कौरणा बंद नी कौरौ। तोंवारा दिमाक ठीक कौरणा चांव, पौरौ तोंवारै शोरीरो दै ताकत कै कमी औसौ।”

³⁹ यीशु हौजौ तिथैदा आगु हौटा, औरौ तियौंई बातौ कै प्रार्थना कौरदा लागा।

⁴⁰ तोबै आयौ तैणै तिनुखै सौतेयौंदै दैखै, जिथुकै सै निंदराल़े रौवै थिए; औरौ ना जाणौ थिए कै तैसीकै का जोवाब दैणा।

⁴¹ तोबै तिजाल़ियों आयौ तिनुखै बौल़ौ, “ऐबै सौतेयौंदै रौया औरौ बिशांव कौरेया, बस ऐबै सौमय आए गौआ, दैखौ हांव आदमी का बैटा पापियों कै हाथ थोमाए जांदा।

⁴² बिजौ, औरौ चालौ! दैखौ, जैणै मुखै थोम्वाणौ कै मौदद कौरे लोए, सैजा नेड़िक पौंचै गौआ।”

गतसमनी बागो दा यीशु कै धौखै दा थोमाणा

⁴³ यीशुए ऐजौ बौल़ै ही लौ थियु, कै यहूदा इस्‍करियोती जू बारौ चैलै मुंजीदा ऐक थिया, औरौ सै तिथै ऐकी बौड़ी भीड़ौ आरी ओऊवा जिनुवै तलवार औरौ हथियार आपिआरी लाए राए थिए। इनु कै मुख्य यहूदी पुरोहित औरौ यहूदी शास्त्री औरौ बुड़ेईके भैजै राए थिए।

⁴⁴ यीशु कै पाकड़णौवाल़ै यहूदाए भीड़ौ खै ऐजौ औगौड़ियौ ही बौताए राए थियु, कै जैसीखै हांव प्यार शै हौंगटा दियुंबा सैजाई औसौ, तैसी पाकड़ैबा सोंवा कौरेयौ लोए जाए।

⁴⁵ औरौ यहूदा ओऊवा, औरौ तौलोंई यीशु कै धोरे जाऐबा बौल़ौ, “ओए रै गुरुजी!” औरौ तैसीखै हौंगटै लौआ।

⁴⁶ तोबै तिनुऐ तैसी पाकड़ेयो बोन्दी बाणा।

⁴⁷ तिनु चैलै मुंजीदै जू नेड़िक खौड़ै थिए, ऐकीए तलवार खिंचेबा महायहूदी पुरोहित कै नोकर पांदी चौलाए, औरौ तैसका कान काटै दिया।

⁴⁸ यीशुए तिनुखै बौल़ौ, “का तुऐं डाकू जाणैबा मुखै बोन्दी बौणाणौ कै तलवारी औरौ लाठी लोएबा निकल़ै रौवै?

⁴⁹ हांव तौ हर दूस यरूशलेम मन्दिरो दा तोंवारै साथै रौयौ उपदैश दियु थिया, औरौ तोबै तुऐं मुखै बोन्दी ना बाणी: पौरौ ऐजौ इथकारिए हौए रौ कै पवित्र शास्त्र की बातौ पूरी हौंव।”

⁵⁰ ऐशैखैई सौब चैलै तैसीखै छोड़ेयौ भागै गौवै।

⁵¹ ऐक जवान आपणै नांगै शोरीरो पांदी चादर ओढ़ेयो तैसकै पौछौड़ियौ हौए गौआ; औरौ लोगै तैसीखै उंढा थामणा चोऊवा।

⁵² पौरौ सै चादर छोड़ेयौ नांगा ही दौड़ै गौआ।

यीशु महासभा कै धोरे

⁵³ तोबै सै यीशु खै महायहूदी पुरोहित कै घोरे लोऐ गौवै; औरौ सौब मुख्य यहूदी पुरोहित औरौ बुड़ेईक औरौ यहूदी शास्त्री तेसकागी कौठै हौए गौवै।

⁵⁴ पतरस दूर ही दूर यीशु कै पौछौड़ियौ-पौछौड़ियौ महायहूदी पुरोहित कै घोरो कै आँगणो कै भीतरै तौड़ी हौटा, औरौ मन्दिरो कै रोखवाल़ै आरी बौठैबा आग सेकदा लागा।

⁵⁵ मुख्य यहूदी पुरोहित औरौ यहूदी महासभा कै सौब खुमल़ाटू यीशु खै मारै दैणौ कै तैसकै विरोध दै गवाही कै ताको दै थिए, पौरौ कुणिए गवाही ना भैटी।

⁵⁶ जिथुकै बौहितै तैसकै खिलाफ झूठी गवाही दैय लोए थी, पौरौ तिनकी गवाही ऐकी दूजै आरी ना मिलो थी।

⁵⁷ तोबै किछै लोग ऊबै बिजैबा तैसकै विरोध दै ऐजै झूठी गवाही दैय,

⁵⁸ “आमै ऐसीखै ऐजौ बौलदै शौणै राए ‘हांव ऐसी हाथौ कै बाणैयोंदै मन्दिरो खै ढाल़ै दियुंबा, औरौ ती दूसौ दा ओका बाणुबा, जू हाथौ लैई ना बाणै रैली।’”

⁵⁹ इयौं बातौ पांदी बै तिनकै गवाही ऐकी दुजैआरी ना मिलो थी।

⁶⁰ तोबै महायहूदी पुरोहित महासभा कै सामणै खौड़ै हौयौ यीशु कैईंदु पूछु, “तू जोवाब काए ना दैय? इनु लोगै तैरै खिलाफ दै गवाही दैय लौए?”

⁶¹ पौरौ सै चुपी खौड़ा रौआ, औरौ किछै जोवाब ना दी। महायहूदी पुरोहिते तैसीखै हौजौ पूछु, “जैसी पौरमेशवर कै आमै आराधना कौरु का तू तैसी पौरमेशवर का बैटा मसीह औसौ?”

⁶² यीशुए बौल़ौ, “हौर हांव औसौए: तुऐं मुखै, आदमी कै बैटै खै सौबिदा शौकतीशाली पौरमेशवर कै सोऐं ढौबौ बौठेयौंदा राज कौरदै दैखलै, औरौ तुऐं मुखै स्वर्गो शा गौयणी कै बादल़ौ पांदी आन्दै बैई दैखलै।”

⁶³ जोबै महायहूदी पुरोहिते यीशु कै ऐजै बात शौणै तोबै तैणै इयौं बातौ शै गुस्सा हौयौ आपणै खोटणो चिरेयौ बौल़ौ, “ऐबै आमु हौजौ गवाहो कै का जौरुरत औसौ?

⁶⁴ तुऐं यीशु खै पौरमेशवर कै नेंदैया कौरदै बैई शौणै राए, इयौं बातौ पांदी तोंवारा का फोएसला औसौ?” तिनु सौबीए फौसला कौरा जै यीशु पौरमेशवर कै बैज्जती कौरणौ का दोषी औसौ, इथकारिए ऐसीखै मौरणौ कै सौजा दैव।

⁶⁵ तोबै कुणिए तौ तेसपान्दी थुकदै लागै, औरौ कुणिए तैसकौ मुं खोटदे लागै औरौ तैसदै घूसै मारदै रौवै, औरौ तैसीखै बौलदै लागै, जै तू पौरमेशवर कै बातौ बोताणौ वाल़ा औसौ तौ बोता तावंदी कुणै लाए। औरौ मन्दिरो कै रोखवाल़ै तैसीखै पाकड़ैबा तैसदै पोटाकै लाए।

पतरस को भाजै जाणौ औरौ रुणु

⁶⁶ जोबै पतरस धैनै आँगणो दा आगी कै धोरे थिया, तौ महायहूदी पुरोहित की नोकरानीयो मुंजी दी ऐक तिथै आए।

⁶⁷ औरौ पतरस खै आग तापदै दैखा औरौ तैसीखै ढौबौ टकटकी लाएबा बौलदै लागी, “तू बै तौ तैसी नासरत गांव कै यीशु आरी थिया।”

⁶⁸ सै भाजै गौआ, औरौ बौल़ौ, “हांव ना जाणु औरौ ना सौमझु कै तुऐं का बौल़ै लौ।” तोबै सै तिथै बायरै आँगणो कै दियौल़ी दा हौटा; औरौ कुकड़ै बांक दैय दै।

⁶⁹ सैजी दासी तैसी दैखैयो तिनुकैईं जू तिथै ही थिए, हौजौ बौलदै लागै, “ऐजा आदमी बै तिनु यीशु कै चैलै मुंजीदा ऐक औसौ।”

⁷⁰ पौरौ सै हौजौ बै साचा बौणा। औरौ बिस्तौड़ी तिनुऐ जू तैसकै नेड़िक खौड़ै थिए हौजौ पतरस कैईंदु पूछु, “जौरुर तू यीशु कै चैलो मुंजीदा ऐक औसौ; जिथुकै तू गलील जिले का औसौ, औरौ तैरी भाष गलील जिले कै जैशणी औसौ।”

⁷¹ तोबै पतरस बार-बार शौं खान्दा लागा, औरौ ऐजौ बौलदा लागा, “जै हांव झूठा हौऊंबा तौ पौरमेशवर मुखै जौरुर सौजा दैला हांव तैसी आदमी कै ना जाणु जैसकै बारै मुंजी तुऐं बौल़ै लौ।”

⁷² तोबै तौलोंई दुजाल़ियो कुकड़ै बांक दै औरौ पतरस खै सैजै बात जू यीशुए तैसीखै बौल़ै राए थै याद आए, “कुकड़ै कै दो बैई बांक दैणै दै आगै तू तीन बैई मुखै भाजै जांदा।” पतरस इयौं बातौ सोंचैयो बैजाए दुखी हौआ औरौ जोर-जोर शै रुन्दा लागा।