मरकुस 1 - सिरमौरी नौवाँ नियम

यूहन्ना बपतिस्मा दाता का सौंदेश

¹ पौरमेशवर का बैटा यीशु मसीह कै बारै मुंजी सुसमाचार कै शुरुआत ऐशैखै औसौ।

² जैशैखै यशायाह पौरमेशवर कै बातौ बौताणौवाल़ै कै पवित्र शास्त्र दौ लैखै राखौ: “दैख, हांव आपणै सौंदेश दैणौवाल़ै कै तैरै औगौड़ियौ भैजु, तोबै सै लोगौ कै बौताए सौकौ कै सै तैरै आणौ कारिए आपी खै तैयार कौरौ।

³ उजाड़ जौगैह दै ऐकी धाव दैणौवाल़ै कै धाव रौए शौणै कै, प्रभु कै खातीरदारी कारिए आपणै मनो खै तैयार कौरौ, औरौ तैसकै आणौ कारिए आपी खै सुधारौ।”

⁴ सैजा सौंदेश दैणै वाल़ा यूहन्ना औसौ। जू उजाड़ जौगैह दा बपतिस्मा दैंव थिया, औरौ लोगौ खै बौल़ौ थिया कै पाप कौरणा छोड़े दैव, बपतिस्मा लोव, औरौ पौरमेशवर तोंवारै पाप माफ कौरला।

⁵ यहूदिया प्रदेश कै, औरौ यरूशलेम शहर कै रौणौवाल़ै बौहितै लोग निकल़ैयो तैसकै धोरे हौटै, औरौ आपणै पापौ खै मानेबा यरदन नोंदी दा तैसी कैईंदा बपतिस्मा लौआ।

⁶ यूहन्ना ऊँटौ कै बाल़ो कै बुणेयोंदे खोटणो बाम्बौ थिया, औरौ आपणै कमर दा चामड़े का पाटा बानै राखौ थिया, औरौ जोंगलो का मौं औरौ चिचलै खाया कौरौ थिया।

⁷ औरौ ऐजा प्रचार कौरौ थिया, “मैरै बाद सैजा आणौवाल़ा औसौ, जू मुं दा बै शौकतीशाली औसौ; हांव तौ ऐसी लायक बै ना आथी कै ऐकी दास कै जैशै झोकैबा तैसकै बूटो कै तशमै खोले सौकु।

⁸ मोऐं तौ तुऔं खै पाणी लैई बपतिस्मा दैय राए पौरौ सै तुऔं खै पवित्र आत्मा लैई बपतिस्मा दैन्‍दा।”

यीशु का बपतिस्मा

⁹ इनु दूसौ दा यीशुए नासरत गांव पौरैशा गलील जिले दा आयौ, यरदन नोंदी दा यूहन्ना कैईंदा बपतिस्मा लौआ।

¹⁰ औरौ जोबै सै पाणी पौरैशा निकल़ैयो बायरै ओऊवा, तौ तौलोंई तैणै स्वर्ग खै खोलदै औरौ पवित्र आत्मा खै कबूतर कै जैशणै आपी पांदी उतौरदे दैखा।

¹¹ तोबै पौरमेशवरे स्वर्ग पौरैशौ यीशु खै बौल़ौ, “तू मैरा लाड़कु बैटा औसौ, हांव तांवदा खुश औसौ।”

यीशु कै पोरखा

¹² तिथकै बाद पवित्र आत्माए तौलोंई यीशु खै उजाड़ जौगैह कै ढौबौ खै निया।

¹³ औरौ सै उजाड़ जौगैह दा चाल़ीश दूसौ तौड़ी रौआ औरौ शैतानै तैसीखै पोरखा; औरौ सै जोंगली जानवरो कै साथै रौआ; औरौ स्‍वर्गदूत तैसकै सेवा कौरदै रौवै।

गलील जिले दा यीशु का सौंदेश

¹⁴ कैई दूसौ कै बाद, जोबै यूहन्ना खै ज़ेलो पुंडा डाकै दिया, तोबै यीशु गलील जिले दा हौटा औरौ लोगौ मुंजी पौरमेशवर कै राज्य का सुसमाचार का प्रचार कौरा।

¹⁵ औरौ तैणै बौल़ौ, “पौरमेशवरे जैसी दूसौ कै कौरार दैय राखै थी सैजौ दूस आए गौ, औरौ पौरमेशवर का राज्य नेड़िक आए गौआ; पाप कौरणै छोड़े दौ औरौ सुसमाचार पांदी बिशवाश कौरौ।”

चोऊ मोछुवारै कै बोईदै

¹⁶ ऐकी दूसै जोबै यीशु गलील झील कै किनारे-किनारे पांदी जांदै बैई, शमौन औरौ तैसका नानड़ा भाई अन्द्रियास खै झील दै जाल फेरकांदै दैखै; जिथुकै सै मोछुवारै थिए।

¹⁷ यीशुए तिनुखै बौल़ौ, “आव, मैरै चैलै बौणौ, इबी तौड़ी तौ तुऐं माछी पाकड़ो थिए। पौरौ ऐबै हांव तुऔं खै शिखोऊंबा कै लोगौ खै मैरै चैलै कैशैखै बौणाणै।”

¹⁸ औरौ तिनुऐ तौलोंई आपणै माछी पाकड़णो का काम कौरणा छोड़े दिया औरौ तैसकै चैलै बौणणौ कारिए तैसकै साथै हौटै गौवै।

¹⁹ औरौ दैणिक औगौड़ियौ जाऐबा, तैणै जब्दी का बैटा याकूब औरौ तैसका भाई यूहन्ना खै, किश्‍ती पांदी जालो खै सोनालदै बैई दैखै।

²⁰ तैणै तौलोंई तिनुखै बौल़ौ, “मैरै साथै उंढे आव औरौ मैरै चैलै बौणौ” औरौ सै आपणै पिता जब्दी खै मजदूरो कै साथै किश्‍ती पांदी छोडे़बा तैसीआरी आगु हौटै, औरौ यीशु कै चैलै बौणै।

दुष्टआत्मा वाल़ा आदमी खै छुटकारा

²¹ यीशु औरौ तैसकै चार चैलै कफरनहूम नगर दै ओऊवे, औरौ सै ओकी विशांव कै दूसै यहूदी सभा-घोरो दा जाऐबा उपदैश दैंदा लागा।

²² औरौ लोग तैसकै उपदैश लैई हैरान हौवे; जिथुकै सै तिनुखै यहूदी शास्त्री कै जैशणै नी, पौरौ साची औधिकार कै साथै उपदैश दैंव थिया।

²³ तैसी सौमय, तिनकै यहूदी सभा-घोरो दा ऐक आदमी थिया, जैसदै ऐक दुष्टआत्मा थी।

²⁴ तैणै जोर शै लैर मारैयौ बौल़ौ, “ओए रै नासरत गांव कै यीशु, अमारै तांवआरी किछै लैणा दैणा ना आथी? कै तू आमुखै नाश कौरदा आए रौआ? हांव ताखै जाणुए, तू कुण औसौ? तू ही सैजा पवित्र आदमी औसौ, जू पौरमेशवर कै ढौबौशा आए रौआ!”

²⁵ यीशुए दुष्टआत्मा खै ऐजौ बौलेयौ झिड़की, “चुपी रौ; औरौ ऐसी पौरैशै निकल़ै जा।”

²⁶ तोबै दुष्टआत्मा तैसीखै मौरौड़यौ, औरौ जोरो कै लैर मारैयौ तैसी पौरैशै निकल़ै गौए।

²⁷ इयौं बातौ लैई सौबै लोग हैरान हौयौ आपी मुंजी पूछदै लागै, “ऐजै का बात औसौ? ऐजा तौ नौवाँ ही उपदैश औसौ! सै औधिकारो कै साथै दुष्टआत्मा खै बै झिड़कै दैंव, औरौ सै तैसकै आज्ञा मानौ।”

²⁸ इथकै बाद यीशुए जू चौमत्कार कौरे राए थिया इथ बोजे शै तैसकौ नांव गलील जिले कै नेड़िक कै सारै प्रदेशो दो फोयलै गौ।

बीमारों कै ठीक कौरणै

²⁹ जोबै यीशु औरौ तैसकै चैलै यहूदी सभा-घोरो शै निकल़ै, तोबै सै याकूब औरौ यूहन्ना कै साथै शमौन औरौ अन्द्रियास कै घोरे हौटै।

³⁰ औरौ शमौन कै शाशु तापो दै पौड़ै रौए थी, औरौ तिनुऐ तौलोंई तियांरै बारै मुंजी यीशु कैंई बौल़ौ कै सै बीमार औसौ।

³¹ तोबै यीशुए तियांरै धोरे जाएयो हाथ थाम्बैयौ तियौंखै ऊबी बिजाल़ै; औरौ तियौं का ताप उतरी गौआ, औरौ सै तिनकै सेवा कौरदै लागी।

³² बैल़खै कै सौमय जोबै सुरज डोबै गौआ तौ तैसी नोगरो कै बौहितै लोग जू बीमार थिए, औरौ जिनुदी दुष्टआत्माएं थी, लोगै तिनु तैसकै धोरे नियै।

³³ औरौ बौहितै लोगौ कै भीड़ घोरो बाइरै कौठै हौए गौए।

³⁴ तैणै बौहितै खै जू कैई भान्त कै बीमारियों लैई दुखी थिए, ठीक कौरे; बौहितै दुष्टआत्माओं खै गाड़ी; औरौ दुष्टआत्माओं खै बौल़ाणौ ना दी, जिथुकै सै तैसीखै पोछैयाणौ थी। कै यीशु ही पौरमेशवर का बैटा औसौ।

³⁵ ओकी दूसै झीशो इनारै दा ही, यीशु ऊबा बेजैबा, ऐक शुनशान जौगैह दा हौटा औरौ तिथै प्रार्थना कौरदा लागा।

³⁶ तोबै शमौन औरौ तैसकै साथी तैसीखै जोन्दै लागै।

³⁷ जोबै सै भैटा, तौ तैसीखै बौल़ौ, “सौबी लोगै ताखै जौए लौआ।”

³⁸ यीशुए तिनुखै बौल़ौ, “उंढे आंव; आमै कोसी नेड़िक बस्तियौं दै जोऊंबे, कै हांव इथकारिए आए रौआ कै लोगौ मुंजी आछै खोबर का प्रचार कौरु।”

³⁹ ऐशैखैई सै सारै गलील जिले कै बौहितै जौगैह दा तिनकै यहूदी सभा-घोरो दा जायौ प्रचार कौरदा औरौ दुष्टआत्माओं खै निकाल़दा रौआ।

यीशु का कोढ़ कै रोगी खै ठीक कौरणा

⁴⁰ ऐक दूस ऐक कोढ़ी आदमी यीशु कै धोरे ओऊवा, तैणै तैसीकैईं दै बिन्ती कौरे, औरौ तैसकै सामणै घुंडू नियुड़ाऐबा तैसीखै बौल़ौ, “जै तैरै मौरजी औसौ तौ तू मुखै ठीक कौरे दै।”

⁴¹ तैणै तैसी पांदी गिणायो आपणा हाथ तैसी पांदी राखा, औरौ तैसीखै छौयौ बौल़ौ, “हांव चोऊं, कै तू ठीक हौए जाए।”

⁴² औरौ तौलोंई तैसका कोढ़ आछा कौरेबा ठीक हौए गौआ, औरौ सै औटेयौ शुध्द हौए गौआ।

⁴³ तोबै तैणै तैसीखै चैतावणी दैयौ छाड़ै दिया,

⁴⁴ औरौ तैसीखै बौल़ौ, “दैख, कोसी कैंई बै किछै नै बौलेया, पौरौ यरूशलेम मंदिरो दा जाऐबा आपी खै यहूदी पुरोहित खै दिखा जै तू ठीक हौए गौआ। जू किछै बात मूसाए कोढ़ ठीक हौए जाणौ कै बारै मुंजी दैय राए थी तिथकै हिसाब शै पौरमेशवर कारिए बलिदान चौढ़ा, तोबैई यहूदी पुरोहित सौबी लोगौ खै बौताए सौकौ कै तू ठीक हौए गौआ।”

⁴⁵ पौरौ सै बायरै जाऐबा इयौं बातौ का बौहिता प्रचार कौरदा लागा औरौ इथै तौड़ी फौईलांदा लागा, कै इनु बातौ कै बौजैह शै यीशु तोबै खुलमखुल्ला नोगरो दा ना जाए सौकी, पौरौ यीशु नोगरो दा बायरै शुनशान जौगैह दा रौआ; औरौ तोबै बै चोऊ ढौबौशै लोग यीशु कै धोरे आन्दै रौवै।