मत्ती 8 - सिरमौरी नौवाँ नियमकोढ़ी रोगी कै ठीक कौरणा ( मर 1:40-45 ; लूका 5:12-16 ) 1 जोबै यीशु धारो पौरैशा उदा ओऊवा, तौ ऐक बौहितै बौड़ै भीड़ तैसकै पाछैदै हांडदै लागै। 2 औरौ ऐक कोढ़ी तैसकै धोरे ओऊवा औरौ घुंडू नियुड़ाऐबा बौल़ौ, “ओए रै प्रभु जै तैरै मौरजी औसौ तौ तू मुखै ठीक कौरे दै।” 3 यीशुए हाथ बौढ़ायौ खै तैसी छुआ औरौ बौल़ौ, “हांव चोऊं, कै तू ठीक हौए जाए।” औरौ सै तावल़ा ही कोढ़ शै ठीक हौए गौआ। 4 यीशुए तैसीखै बौल़ौ, “दैख कोसी कैई नै बौलेया पौरौ जाऐबा आपी खै यहूदी पुरोहित खै दिखा औरौ जू मूसाए कोढ़ ठीक हौए जाणौ कै बारै मुंजी बौताए राए थियु तिथकै हिसाब शै पौरमेशवर कारिए बलिदान चौढ़ा, ताकि लोगौ कै पौता लागै सौकौ कै तू ठीक हौए गौआ।” सूबेदार कै बिशवाश पांदी यीशु कै तारीफ ( लूका 7:1-10 ; युहन्ना 4:43-54 ) 5 औरौ जोबै यीशु कफरनहूम नगर दा ओऊवा तौ ऐक रोमी सूबेदारे तैसकै धोरे आयौ तैसीयादै बिन्ती कौरे। 6 “ओए रै प्रभु, मैरा सेवक घोरे औसौ औरौ सै ओधरंग की बीमारी की बौजैह शै हांडै ना सौकौ, औरौ सै बैजाए दुखी औसौ।” 7 यीशुए तैसीखै बौल़ौ, “हांव आयौ तैसीखै ठीक कौरदा।” 8 सूबेदारे जोवाब दिया कै, “ओए रै प्रभु हांव इथकै लायक ना आथी, की तू मैरै घोरे आए, पौरौ सिरफ जातै लैई बौल़ै दै तौ मैरा सेवक ठीक हौए जांदा। 9 हांव जाणुए कै हांव बै कोसी आदमी कै औधिकारियो तौड़ी औसौ, औरौ सिपाही बै मैरै हाथ दै औसौ, जै ऐकी खै बुलू, जा तौ सै जांवए, औरौ दूजै खै बुलू आ, तौ सै आए जांव, औरौ आपणै नोकर खै बुलू, ऐजौ कौर तौ सै कौरौए।” 10 ऐजौ शौणैबा यीशु हैरान हौए गौआ, औरौ जू तैसकै पाछैदै आए रौवै थिए, तिनुखै बौल़ौ, “हांव तुऔं खै साचौ बुलू, कै मुखै इस्राएल देश दा ऐक बै ऐशणा आदमी ना भैटी जू ऐसी बैगानै यहूदी कै जैशणा मुं पांदी बिशवाश कौरौ। 11 औरौ हांव तुऔं खै बुलू, की बौहितै सारै बैगानै यहूदी लोग पूरब औरौ पश्चिम दै आयौ अब्राहम, इसहाक औरौ याकूब कै साथै स्वर्ग राज्य कै दावत मुंजी शामिल हौंदै। 12 पौरौ यहूदी राज्य कै लोगौ खै बायरै इनारै दै पाए दैन्दै: तिथै रुणु औरौ दांदो कौ चाकणौ हौंदौ।” 13 औरौ यीशुए रोमी सूबेदार कै बौल़ौ, “घोरे जा जैशणा तैरा बिशवाश औसौ, तैशैखैई तैरै साथै हौए जांव।” औरौ तैसका सेवक तैसी सौमय ठीक हौए गौआ। पतरस कै घोरे कैई बीमारों कै ठीक कौरणै ( मर 1:29-34 ; लूका 4:38-41 ) 14 जोबै यीशु पतरस कै घोरे ओऊवा तौ तैसकी शाशु कै तैज तापो दै पौड़ेयौंदे दैखी। 15 तैणै तियांरा हाथ छुआ औरौ तियांरा ताप उतरे गौआ, औरौ सै बिज़यो तैसकै सेवा कौरदै लागै। 16 जोबै बैल़खौ हौ तोबै तिनुऐ तैसकै धोरे बैजाए लोगौ खै लियोऊवे जिनुदी दुष्टआत्माएं थी औरौ तैणै तिनु दुष्टआत्माओं खै आपणै वचन लैई निकाल़ै दी, औरौ सौबी बीमारो खै ठीक कौरे दिए। 17 ताकि जू वचन यशायाह पौरमेशवर कै बातौ बौताणौवाल़ै कै दवारा बौल़ै राए थिया सैजा पूरु हौंव, “तैणै आपी अमारै कमजोरियों खै औरौ अमारी बीमारी खै दूर कौरी।” यीशु का चैला बोणणौ का मोल ( लूका 9:57-62 ) 18 यीशुए आपणै चोऊ ढौबौ खै बौहितै भीड़ कै दैखैयो आपणै चैलै खै बौल़ौ, “उंढे आंव गलील झील कै ओकी ढौबौ कै चालौ।” 19 जैशैकैई सै जांदै लागै रौवै थिए तोबै ऐकी यहूदी शास्त्रीए तैसकै धोरे आयौ बौल़ौ, “ओए रै गुरु, हांव तैरा चैला बोणणौ कारिए तैरै साथै हांडणा चोऊं।” 20 यीशुए तैसीखै बौल़ौ, “सेयाल़ी कै डुँ औरौ गौयणै कै चुड़कुल़ै कै कोएलाण हौंव, पौरौ मुं आदमी कै बैटै कैंई घोर बै ना आथी जिथै हांव सोतै सौकु।” 21 औरौ ऐकी चैलै तैसीखै बौल़ौ, “ओए रै प्रभु आगै मुखै घोरो जाणौ दै मैरै बापू कै मौरणौ कै बाद, हांव तैसी दबाए दियु तोबै आयौ हांव तैरा चैला बोणदा।” 22 यीशुए तैसीखै बौल़ौ, “तू मैरा चैला बोणणौ कारिए मैरै साथै हांड, जू लोग मौरेयौंदे कै जैशणै औसौ, तिनुखै ही आपणै लोगौ कै मौरणौ का इंतजार कौरणौ दैव।” तूफानों कै चुपी कौरणौ ( मर 4:35-41 ; लूका 8:22-25 ) 23 जोबै सै किश्ती पांदी हौटा, तौ तैसकै चैलै तैसकै पाछैदै हौए गौवै। 24 औरौ गलील झील दौ ऐशणौ बौड़ौ तूफान ओऊं औरौ किश्ती फालो लैई झीलो मुंजी डुबदे लागै, औरौ यीशु सोतै रौआ थिया। 25 तोबै चैलै तैसकै धोरे आयौ तैसीखै बिजाल़ा औरौ बौल़ौ, “ओए रै प्रभु, आमुखै बौचा, आमै सौबै डुबदे लागै रौवै?” 26 यीशुए तिनुखै बौल़ौ, “ओए रै बिशवाश ना कौरणौवाल़ै लोगौ, किथुकै डौरे रौवै?” तोबै तैणै ऊबै बिज़यो फालो औरौ पाणी कै ताडै़, औरौ हवा चालणे रौकै गौए, औरौ सौबै शान्त हौए गौ। 27 औरौ लोग हैरान हौयौ बौलदै लागै कै, “ऐजा कैशणा आदमी औसौ? कै हवा औरौ फालो बै काबू दी कौरे सौकौ!” दुष्टआत्माओं कै सुंगरों कै झुंडो दै छाड़णै ( मर 5:1-20 ; लूका 8:26-39 ) 28 जोबै सै झील कै पार गदरेनियों कै इलाके खै पोऊंचा, तौ दो आदमी जिनुदी दुष्टआत्माएं थी, कब्रो पोरदै निकल़ैयो तैसीखै भैटी। जू ऐतरै खतरनाक थिए, कै कुणिए बै तियौं बाटो पुंडा जाए नै सौकौ थिया। 29 औरौ दैखौ, तिनुऐ लैरौ मारैबा बौल़ौ, “ओए रै पौरमेशवर का बैटा, अमारै तांवआरी कुणजाई लैणा दैणा ना आथी? औरौ का तू सौमय दा आगै आमुखै दुख दैंदा इथै आए रौआ?” 30 तिनुदा किछै दूर बौहितै सुंगरों का ऐक बौड़ा झुंड चोरे रौआ थिया। 31 दुष्टआत्माएं तैसीखै ऐजौ बौलेयौ बिन्ती कौरे की, “जै तू आमुखै निकाल़ै दैय, तौ सुंगरों कै झुंड दै छाड़ै दै।” 32 तैणै तिनुखै बौल़ौ, “जांव!” औरौ सैजी दुष्टआत्माएं निकल़ैयो सुंगरों कै बीतरै पिल़ची गोई औरौ सौबै झुंड डांगौ कै किनारे ढौबौ दोऊड़ै औरौ पाणी दै डुबेयो मौरे गौवै। 33 औरौ चोराणोवाल़ै दौड़ै गौवै, औरौ नोगरो दै जाएयो ऐजी सौबै बातौ औरौ जिनुदी दुष्टआत्मा थी तिनका सौबै हाल शुणौऊवा। 34 औरौ सौबै नगर कै लोग यीशु आरी भैट कौरदै निकल़ै गौवै, औरौ तैसी दैखैयो बिन्तै कौरे, कै अमारै इलाके पौरैशा आगु जा। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation