मत्ती 27 - सिरमौरी नौवाँ नियम

पिलातुस कै सामणै यीशु

¹ जोबै झीशींदै मुख्य यहूदी पुरोहितो, औरौ लोगौ कै बुड़ेईके यीशु कै मारणौ कै सलाह कौरी।

² औरौ तिनुऐ यीशु खै बाना औरौ नियौ राज्यपाल पिलातुस कै हाथौ दा सौंपै दिया।

यहूदा इस्‍करियोती कै आत्म हत्या

³ जोबै तैसीखै पोकड़ाणौ वाल़ै यहूदा इस्‍करियोती कै पौता लागा कै तैसीखै मोरवाणो कारिए दोषी ठोहराए राए तौ सै पोछतौऊवा औरौ सैजै तीस चांदी कै सिक्‍कै मुख्य यहूदी पुरोहित औरौ बुड़ेईक कै धोरे लोऊवे।

⁴ औरौ बौल़ौ, “मोऐं निर्दोष आदमी खै मारणौ कारिए थोम्बाएबा पाप कौरे राए!” तिनुऐ बौल़ौ, “आमु इथकै बारै मुंजी किछै परवाह ना आथी? तू आपी इथकारिए जुमैवार औसौ।”

⁵ तोबै सै तिनु सिक्‍कै खै मन्दिर कै आँगणो दै फैरकायो आगु हौटा औरौ बायरै जाऐबा आपी खै फांशी लाए।

⁶ मुख्य यहूदी पुरोहित तिनु सिक्‍कै कै लोयो बौल़ौ, “इनु सिक्‍कै खै मन्दिर कै भण्डार दै राखणै अमारै कानून कै हिसाब सै ठीक ना आथी जिथुकै ऐजौ कोसी कै लोऊ बोवाणो का दाम औसौ।”

⁷ औरौ तिनुऐ योजना बाणैयो तिनु सिक्‍कै खै ओकी देशो कै लोगौ कि मुर्दै दफनाणो कारिए कुम्‍हारो कै बागड़ी मोलै लोए।

⁸ इथकारिए तियौं बागड़ी खै ऐलो तौड़ी बै लोऊ कै बागड़ै बौल़ौ।

⁹ तोबै जू वचन यिर्मयाह पौरमेशवर कै बातौ बौताणौवाल़ै दवारा बौल़ै राए थिया, सै पूरा हौआ, “तिनुऐ सैजै तीस चांदी कै सिक्‍कै औरौ सैजी कीमत जू इस्राएल देश कै लोगै यहूदा कै दैणौ कारिए मानै राए थै सैजै आगु कौरे।

¹⁰ औरौ जैशै प्रभुए मुखै आज्ञा दैय राए थी तैशैखैई तिनुऐ कुम्‍हार कै खेत कै रुपये देएयो मोलै लोए।”

पिलातुस का यीशु शै सवाल

¹¹ जोबै यीशु राज्यपाल पिलातुस कै सामणै खौड़ा थिया तौ राज्यपाले तैसी पूछु, “का तू यहूदियों का राजा औसौ?” यीशुए तैसी बौल़ौ, “तुऐं आपी ही लौ बौल़ै।”

¹² जोबै मुख्य यहूदी पुरोहित औरौ बुड़ेईके तैसी पांदी दोष लाए लौआ थिया, तौ तैणै किछै बै जोवाब ना दी।

¹³ इथपांदी राज्यपाल पिलातुसे तैसी बौल़ौ, “का तैरै ना शुणियों कै ऐजै तैरै खिलाफ दी कैतरी गवाही दैंव?”

¹⁴ पौरौ तैणै तैसी ऐकी बै बातौ का जोवाब ना दी, इथै पांदी राज्यपाल पिलातुस खै बै बैजाए हैरानी हौए।

यीशु कै छौड़णौ दा पिलातुस नाकामयाब

¹⁵ औरौ राज्यपाल का ऐजा भोवार थिया कै तैसीकै फसह कै तैयारो मुंजी लोगौ कारिए कोसी ऐकी कैदी कै आज़ाद कौरणा पौड़ौ थिया, जैसीखै लोग चांव थिए।

¹⁶ तैसी सौमय तिनकै इथै बरअब्‍बा नांव का ऐक मानैयौंदा कोयदै थिया।

¹⁷ औरौ जोबै सै कौठै हुवे तौ पिलातुसे तिनु बौल़ौ, “तुऐं कोसी चांव की हांव तुऔं कारिए छोड़े दियु? बरअब्‍बा कै, या यीशु खै जैसकै मसीह बौल़ौ?”

¹⁸ जिथुकै सै जाणौ थिया, कै तिनुऐ यीशु खै रिशो की बौजैह शै थोमाए राए थिया।

¹⁹ जोबै सै न्याय आसन पांदी बौठै रौआ थिया तोबै तैसकै घोरवाल़ीए तैसी बैवरा दिया, “तू तैसी धरमी कै मामलै दा हाथ नी लाया जिथुकै मोऐं ऐलो सुईणै मुंजी तैसकी बौजैह शै बौहिता दुख सैय राए।”

²⁰ मुख्य यहूदी पुरोहिते औरौ बुड़ेईके लोगौ खै उकसोऊवे, कै सै बरअब्‍बा ही खै आज़ाद कौरणौ कै मांग कौरौ। औरौ यीशु कै नाश कौरौ।

²¹ राज्यपाले तिनुवांदो पूछु, “इनु दुईनै मुंजीदा कोसी खै चांव कै हांव तुऔं कारिए छोड़े दियु?” तिनुऐ बौल़ौ, “बरअब्‍बा कै।”

²² पिलातुसे तिनुआदो पूछु, “तोबै यीशु खै जैसकै मसीह बौल़ौ, का कौरणौ?” सौबीए तैसी बौल़ौ, “यीशु खै क्रूसो पांदी किलियों खत्म कौरौ।”

²³ राज्यपाल पिलातुसे तिनुखै बौल़ौ, “किथुखै, ऐणै का बुरु कौरे राए?” पौरौ सैजै हौजौ बै लेलयाए लैलियायो बौलदै लागै, “तैसीखै क्रूसो पांदी चौढ़ाव।”

²⁴ जोबै पिलातुसे दैखौ, कै किछै बै बौणै ना रैई पौरौ इथकै उलटु रोल़ा बोड़दा ही गौआ, तोबै तैणै पाणी लैई भीड़ौ खै सामणै आपणै हाथ धोवे। औरौ बुलू, “हांव ऐसी धरमी खै लोऊ शै निर्दोष औसौ; तुऐंई जाणौ।”

²⁵ सौबै लोगै जवाब दिया, “ऐसकै लोऊ का इलजाम आमु पांदी औरौ अमारै सन्तानों पांदी हौंव।”

ऐसकै लोऊ का इलजाम आमु पांदी औरौ अमारै सन्‍तान पांदी हौंव

²⁶ इथपांदी तैणै बरअब्‍बा खै तिनु कारिए छोड़े दिया, औरौ यीशु दै कौड़ै लाएबा रोमी सैनिकौ खै दैय दिया, कै क्रूसो पांदी किलियों खत्म कौरौ।

सिपाहियो दवारा यीशु कै बैज्जती

²⁷ तोबै राज्यपाल कै सिपाहीए यीशु खै महल दा नियौ खै औरौ सौबै सैनिक तैसखै चोऊ ढौबौ कौठै हौए गौवै।

²⁸ औरौ तैसकै खोटणो उतारेयो तैसीखै लाल रंगो का लोइया बोम्बाए दिया।

²⁹ औरौ कांडे को मुकुट बुणयो तैसकै मुंडौ पांदी राखौ, औरौ तैसकै सोऐं हाथौ दा डैंगा दिया, औरौ तैसकै औगौड़ियौ घुंडू नियुड़ायो खै तैसका मजाक उड़ांदै लागै औरौ बौल़ौ, “ओए रै यहूदियों कै राजा, नमशकार!”

³⁰ औरौ तैसी पांदी थूकु; औरौ सैजैई डैंगै कौरेयौ खै तैसकै मुंडौ पांदी मारदै लागै।

³¹ जोबै तिनुऐ तैसका ठाटा कौरे पाए तौ तैसी पौरैशै खोटणो उंढे खोलाएबा तैसकैई खोटणो बोंम्बाऐ; औरौ तोबै तैसीखै क्रूसो पांदी चौढ़ाणौ कारिए लोए गौवै।

यीशु कौ क्रूस पांदी चौढ़ाए जाणौ

³² बायरै जांदी बैई तिनु सिकन्‍दर औरौ रूफुस का पिता शमौन, ऐक कुरेनी शहर का आदमी भैटा, तिनुऐ तैसीखै खामखैई खै थाम्बा कै तैसकौ क्रूस टिपयौ आगु नीयों।

³³ औरौ यीशु कै तियौं जौगैह पांदी लियोऊवा, जिथुकै गुलगुता बौल़ौ, जिथका मतलब खोपड़ी कै जौगैह।

³⁴ तिनुऐ तैसीखै कौडुवा रस औरौ अंगूर कै रस मिलायौ पिणौ कारिए दिया, पौरौ यीशुए तिथु सिरफ चाखो पौरौ पी ना।

³⁵ तोबै तिनुऐ तैसीखै क्रूसो पांदी चौढ़ौऊवा, औरौ चिट्ठी पायौ, तैसकै खोटणो आपी मुंजी बान्डै दिए।

³⁶ औरौ ऐक पहर दूस हौए गौ थियु, जोबै तिनुऐ तैसीखै क्रूसो पांदी चौढ़ौऊवा।

³⁷ औरौ यीशु कै मुंडो दै ऊबौड़े तौकती किलियों लाए दै जिथपांदी लैखै राए थियु कै, “ऐजा यहूदी लोगौ का राजा यीशु औसौ।”

³⁸ तोबै तिनुऐ तैसकै साथै दो डाकू, ऐक तैसकै सोऐं ढौबौ औरौ ऐक डैरै ढौबौ क्रूसो पांदी चौढ़ाए।

³⁹ औरौ आणौ जाणौवाल़ै लोग मुंड हिंजाल़ै-हिन्जालेबा तैसीकै ऐजौ बौलेयौ नेंदैया कौरदै लागौ थिए।

⁴⁰ औरौ ऐजौ बौल़ै लो थियु, “का रै मन्दिरो का ढाल़णौवाल़ा, औरौ ती दूसौ दा बाणणौवाल़ा! जै तू पौरमेशवर का बैटा औसौ, तौ क्रूसो पांदी दा उदा ओतरेयो आपी खै बौचा।”

⁴¹ ऐशैखैई मुख्य यहूदी पुरोहित बै, यहूदी शास्त्रीयों, औरौ बुड़ेईक समैंत, आपी मुंजी ठाटै लायौ बौल़ौ थिए,

⁴² “ऐणै ओकी खै तौ बौचाए, पौरौ आपी खै नी बौचाए सौकी, ऐजा तौ ‘इस्राएल देश का राजा’ औसौ, ऐबै क्रूसो पांदी दा उदा उतरी जा कै आमै दैखैयो बिशवाश कौरु।

⁴³ तैणै पौरमेशवर पांदी भोरोशा राखा, जै सै ऐसीखै चांव, तौ ऐबै ऐसीखै छुड़ाए दैंव, पौरौ तैणै बौल़ौ, ‘हांव पौरमेशवर का बैटा औसौ।’”

⁴⁴ इथकारिए डाकू बै जू तैसकै साथै क्रूसो पांदी टांगेयोंदै थिए, सैजै बै तैसकै नेंदैया कौरौ थिए।

यीशु का प्राण छोड़णा

⁴⁵ दुफारियौ दै ऊबै ती बोजे तौड़ी तैसी सारै देशो दौ इनारौ छाएयौंदौ रौ।

⁴⁶ लमसम ती बोजे यीशुए बौड़ै शब्द शै पुकारैबा बौल़ौ, “इलोई, इलोई, लमा शबकतनी?” जिथका मतलब ऐजा औसौ, “ओए रै मैरै पौरमेशवर तुऐं मुखै किथुखै छोड़े दिया?”

⁴⁷ जू तिथै खौड़ै थिए, तिनुमुंजी दै कुणिए ऐजौ शौणैबा बौल़ौ, “ऐणै पौरमेशवर कै बातौ बौताणौवाल़ै एलिय्याह खै पुकारै लौआ।”

⁴⁸ औरौ तिनुमुंजी ऐक तावल़ा दोऊड़ा औरौ सपंज कै खाटे अंगूर कै रस मुंजी डुबोयो औरौ डैंगै पांदी राखैयौ तैसीखै चुशणौ कै दियु।

⁴⁹ औरौ बौल़ौ, “रौकै जाव; दैखुबै कै एलिय्याह ऐसीखै बौचाणौ आन्‍दा कै ना।”

⁵⁰ तोबै यीशुए बौड़ै शब्द शै बौलेयौ, आपणै प्राण छोड़े।

⁵¹ तोबै सैजा मोटा पोरदा जू यरूशलेम मन्दिर दा टांगेयोंदा थिया, ऊपरौ दा धैनै तौड़ी फाटेबा दौ टुकड़ै हौए गौआ। औरौ धोरती हिंजल़ी गौए औरौ चट्टान तिड़कै गौए।

⁵² औरौ कब्रो खोले गोई, औरौ मौरेयौंदे पवित्र लोगौ की बौहिती लाशो जियुंदी होई।

⁵³ औरौ तैसकै मौरेयौंदे मुंजीदै जियुंदी हौणौ खै बाद सै कब्रो पांदी दै निकल़ैयो खै पवित्र नगर दै हौटै, औरौ बौहितै खै दैखियै।

⁵⁴ तोबै सूबेदार औरौ जिनिए तैसकै साथै यीशु कै रोखवाल़ी कौरे लोए थै, भुईचोल़ औरौ जू किछै हौए रौ थियु, दैखैबा डौरे गौवै, औरौ बौल़ौ, “सौथीखै ऐजा आदमी, पौरमेशवर का बैटा थिया।”

⁵⁵ तिथै बौहिती बैटमाणिशौ जू गलील जिले शै यीशु कै सेवा कौरदी बैई तैसकै साथै आए रैई थी दूर दु ऐजौ सौबै दैख लो थियु।

⁵⁶ तिनुमुंजी मगदेला गांव कै मरियम, औरौ याकूब औरौ योसेस खै माता मरियम, औरौ जब्दी कै बैटै खै माँ थी।

यीशु का दफनाया जाणा

⁵⁷ जोबै बैल़खौ हौ तौ यूसुफ नांव का अरिमतियाह शहरो का ऐक सैठ आदमी, जू आपी ही यीशु का चैला थिया, ओऊवा।

⁵⁸ तैणै राज्यपाल पिलातुस खै धोरे जाऐबा यीशु खै लाश मांगै। इथपांदी पिलातुसे दैय दैणौ कै आज्ञा दै।

⁵⁹ यूसुफे लाश लोयो तैसी साफ चादरै दा लोपेटा।

⁶⁰ औरौ तैसी आपणै नोऐं कब्र दा राखा, जू तैणै चट्टान दै खुणायै राए थी, औरौ कब्रो कै दवारो पांदी बौड़ा पाथर रोड़कायो आगु हौटा।

⁶¹ मगदेला गांव कै मरियम औरौ दूजै मरियम तिथै क्रब खै धोरे बौठै रोई थी।

यीशु कै कब्रो पांदी पोयरा

⁶² ओकी दूसै विशांव कै दूसै जू तैयारी कै दूसौ कै बाद को दूस थियु, मुख्य यहूदी पुरोहित, औरौ फरीसी लोग पिलातुस कै भैटिंदै हौटै।

⁶³ औरौ बौल़ौ “ओए रै महाराज, आमु याद औसौ कै तैसी झूठै आदमीए आपणै जीतै जी बौल़ै राए थियु, कै मैरै मौरणौ कै ती दूसौ बाद हांव हौजौ जियुंदा हौए जांदा।

⁶⁴ ऐशै आज्ञा दै कै तिजै दूसौ तौड़ी सैनिक ध्यान शै कब्र कै रोखवाल़ै कौरेया, जै तुऐं ऐशै नै कौरलै तौ तैसकै चैलै आयौ, यीशु कै लाश चुरियौ लोए जालै औरौ लोगौ शै बौलदै लागले, सै मौरेयौंदे मुंजीदा बै जियुंदा हौआ, तोबै पाछला धौखा आगलै दा बै बुरा हौंदा।”

⁶⁵ पिलातुसे तिनुखै बौल़ौ, “तोंवारै धोरे बौहितै रोमन सैनिक तौ औसौए, जांव जैतरो तुऔं शै हौए सौकौ तिशैक कब्र कै रोखवाल़ै कौरौ।”

⁶⁶ सैनिक आगु हौटै औरौ तिनुऐ कब्रो कै दवारो पांदी भारी पाथर रिड़ोयो तिथपांदी मोहर लाएबा कब्रो कै रोखवाल़ै कौरे।