मत्ती 25 - सिरमौरी नौवाँ नियम

दुल्है कै ठोल़नाए कौरदी दस कुवांरियों का उदारण

¹ “तोबै यीशुए आपणै चैलै कै बौल़ौ, जोबै हांव आदमी का बैटा पाछु आन्दा, तोबै स्वर्ग का राज्य दु‌‌ल्हन कै तिनु दस कुंवारी सहैली साए औसौ जू आपणी मशालों लोएयों दुल्है शै भैटिणौ कारिए तैसकै बियाव कै जशन दी हुटी।

² तिनुमुंजी पाँच मूर्ख औरौ पाँच सौमझदार थी।

³ मूर्ख कुवांरीए आपणी मशाल तौ नी, पौरौ आपणै साथै जादा जैतून का तेल ना नी।

⁴ पौरौ सौमझदार कुवांरीए आपणै मशाल कै साथै आपणै जरकीन दो जैतून कौ तेल बै भोरै दियु।

⁵ जोबै दुल्है कै आणौ दै देर हौए गौए, तोबै सौबै कुवांरियों ऊघांदी लागी औरौ सोतै गोई।”

⁶ “आधी रातै शोर हौआ कै दैखौ, दूल्हा आन्दा लागै रौआ, तैसीआरी भैटिणौ कै चालौ।

⁷ तोबै सैजी सौबै कुवांरियां ऊबी बिज़यो आपणी मशाल ठीक कौरदी लागी।

⁸ औरौ मूर्ख कुवांरीए सौमझदारो खै बौल़ौ, ‘आपणै जैतून कै तेलो मुंजी दो किछै आमुखै बै दैंव जिथुखै अमारी मशालों हिशदै लागै रोई।’

⁹ पौरौ सौमझदार कुवांरीए जोवाब दिया ऐजौ तेल आमुखै औरौ तुऔंखै पूरु ना हौंदौ, आछौ तौ ऐजौ औसौ, कै तुऐं तेल बेचणैवाल़ै कै धोरे जायौ खै आपी कारिए तेल खौरेदैयौ लेयांव।

¹⁰ जोबै सै मोलै लोन्दी चालै रोई थी, तोबै दूल्हा आए गौआ, औरौ जू तैयार थी, सैजी तैसकै साथै बैयाव कै घोरो दी हौटै गोई औरौ दवार बंद कौरे थियु।

¹¹ तिथकै बाद सैजी ओकी कुवांरियां बै पाछु आयौ रुंदै बैई दुल्है खै बुलदी लागी, ‘ओए रै मालिक, ओए रै मालिक आमु कारिए दवार खोले दै।’

¹² तैणै जवाब दिया, हांव तुऔं खै साचौ बुलू, हांव तुऔं खै ना जाणु।

¹³ इथकारिए जागदै रौव, जिथुकै ना तौ तुऐं तैसी दूस खै जाणौ औरौ ना तैसी सौमय कै जोबै हांव पाछु आन्‍दा।”

ती नोकरो का उदारण

¹⁴ “जोबै हांव हौजौ पाछु आन्दा तोबै स्वर्ग का राज्य ऐशैखै हौंदा जैशैकै ऐक आदमी जैणै प्रदेशो जांदी बैई आपणै नोकरो खै बौएदैयौ आपणै जायदात पौरैशा किछै पोयसा देएयो तिनुखै बौल़ौ, कै जोबै हांव हौटै जोऊंबा तोबै तिनु पौयसै खोर्च कौरेयौ जादा धन कोमाया।

¹⁵ तैणै ऐकी खै सूनै कै पाँच झोल़े दिए, जिथका दाम बीश सालो कै धियाड़ी कै बोराबर औसौ। औरौ दूजै कै दो सूनै कै झोल़े दिए, औरौ तिजै खै ऐक सूनै का झोल़ा दिया, औरौ सौबी खै तिनकी काबलियत कै हिसाब शै दियु, औरौ तोबै प्रदेश खै हौटा।

¹⁶ तोबै जैसीखै पाँच झोल़े दैय रौए थिए, तैणै शट जाऐबा तिनुलैई लैण-देण कौरा औरौ पाँच झोल़े हौजौ कमाए।

¹⁷ ऐशैकैई जैसीखै दो झोल़े भैटी रौवै थिए, तैणै बै दो हौजौ कमाए।

¹⁸ पौरौ जैसीखै ऐक भैटी रौआ थिया तैणै जाऐबा जोमीनो दा गढा खुणा, औरौ आपणै मालिको कै रुपये चोरे दियै।

¹⁹ बौहितै दूसौ खै बाद तिनु नोकरो का मालिक ओऊवा, तिनु बौएदैयौ तिनु कैईंदा पौयसै का हिसाब किताब लोन्दा लागा।

²⁰ जैसीखै पाँच सूनै कै झोल़े भैटी रौवै थिए, तैणै आयौ बौल़ौ, ‘ओए रै मालिक तुऐं मुखै पाँच झोल़े दैय राए थिए, दैख मोऐं पाँच हौजौ राए कमाए जिथकै पाँच झोल़े कै धियाड़ी बिश सालो कै धियाड़ी कै बोराबर औसौ।’

²¹ तैसकै मालिकै तैसी बौल़ौ, ‘बौहुत बोड़िया, ओए रै आछै औरौ बिशवाश लायक नोकर तू थोड़ै पौयसै सभाल़णो दा बै बिशवाश लायक रौआ, हांव ताखै बौहितै चीज़ौ का औधिकारी बौणान्‍दा। आपणै मालिक कै खुशी दा शामिल हौव।’

²² औरौ जैसीकै दो झोल़े भैटी रौवै थिए, तैणै बै आयौ खै बौल़ौ, ‘ओए रै मालिक तुऐं मुखै दो झोल़े सौंपै राए थिए, दैख, मोऐं दो झोल़े हौजौ कमाए।’

²³ तैसकै मालिकै तैसी बौल़ौ, ‘बौहुत बोड़िया ओए रै आछै औरौ बिशवाश लायक नोकर, तू थोड़ै पौयसै सभाल़णो दा बै बिशवाश लायक रौआ, हांव ताखै बौहितै चीज़ौ का औधिकारी बौणान्दा, आपणै मालिक कि खुशी दा शामिल हौव।’

²⁴ तोबै जैसीखै ऐक झोल़ा भैटी रौआ थिया, तैणै आयौ बुलू, ‘ओए रै मालिक, हांव ताखै जाणुए कै तू कठोर आदमी औसौ, तू ओकी लोगौ कै काम शै फायदा कमाणौ कै उमीद कौरे औरौ जिथै बिज़ ना बोए तिथै दो कौठौ कौरे।’

²⁵ इथकारिए हांव डौरे गौआ कै जै मोऐं तैरा पोयसा खोए दिया, तौ तू मुखै सौजा दैला, औरौ जायौ खै तैरा झोल़ा जोमीनो मुंजी दबाए दिया; दैख, ‘जू तैरौ औसौ, सै ऐजौ औसौ।’

²⁶ तैसकै मालिकै तैसी जवाब दिया, ओए रै दुष्ट औरौ आलसी दास; जोबै तू ऐजौ जाणै थिया, कै हांव ओकी लोगौ कै टोली लैई फायदा कमाणौ की उमीद कौरु औरौ जिथै बिज़ ना बौऊं तिथै दो कौठौ कौरु।

²⁷ तौ ताखै चैंई थियु कै मैरै पौयसै खै बैंक दा जमा कौरदा, तोबै हांव आपणा धन ब्याज समैंत लोन्दा।

²⁸ तोबै मालिकै ओकी नोकरो कै बौल़ौ, इथकारिए ऐजा सूनै का झोल़ा तैसी कैईंदा उंढा कौरो, औरौ जेसियागै दस सूनै कै झोल़े औसौ, तैसीखै दैय दौ।

²⁹ जिथुकै जैसी कोसी कैंई किछै औसौ तैसी हौजौ दैंदै औरौ तैसीकैईं बौहितु हौए जालो; पौरौ जैसी कैंई किछै ना आथी, तैसी कैईंदु सैजौ बै जू तैसीकैईं औसौ, उंडु कौरदै।

³⁰ ऐसी निकम्मे नोकर खै इनारै दा पाए दैव, जिथै रुणु औरौ दांद पीशणो हौंदौ।”

यीशु दुनिया का न्याय कौरदा

³¹ “जोबै हांव आदमी का बैटा आपणै महिमा दा आन्दा, औरौ सौबै स्‍वर्गदूत तैसखै साथै आलै, तोबै हांव सौबी लोगौ का न्याय कौरणौ कारिए आपणै महिमा कै सिंहासनों पांदी बोठदा।

³² औरौ सौब जाति कै लोग मैरै धोरे खौड़ै कौरे जांदै, औरौ जैशैखै चौराणौवाल़ा भेड़ो खै बकरियों शै जोई कौरौ, ऐशैखैई हांव बै तिनुकै ऐकी-दूजै शै जौई कौरे दैन्दा।

³³ औरौ हांव धरमी लोगौ कै आपणै सोऐं औरौ अधरमी लोगौ कै डैरै ढौबौ खौड़ा कौरदा।

³⁴ तोबै यीशु राजा आपणै सोऐं ढौबौ खौड़ै हौणौवाल़ै कै बौलदा, ‘ओए रै मैरै पिता खै धन्‍य लोगौ, आव, तैसी राज्य कै औधिकारी हौए जाव जू दुनिया कै शुरु सै तुऔं कारिए तैयार कौरे राए।

³⁵ जोबै हांव भूखा थिया, तौ तुऐं मुखै खाणौ दियु, जोबै हांव तीशा थिया, तौ तुऐं मुखै पाणी पियोऊ, जोबै हांव प्रदेशी थिया, तौ तुऐं मुखै आपणै घोरे बोइदा।

³⁶ जोबै हांव नांगा थिया, तुऐं मुखै बामणौ खोटणो दियै, जोबै हांव बीमार थिया, तौ तुऐं मैरै दैखभाल कोरी, जोबै हांव कोयदी दा थिया, तुऐं मुखै भैटिंदै ओऊवे।’

³⁷ तोबै धरमी लोग तैसी जोवाब दैन्‍दै, ‘ओए रै प्रभु आमुए कोबे ताखै भूखा दैखा, औरौ खियोऊं? या तीशा दैखा औरौ पाणी पियोऊ?

³⁸ आमुए कोलो ताखै प्रदेशी दैखा औरौ आपणै घोरो पुंडा राखा, या नांगा दैखा औरौ खोटणो बोम्बाए।

³⁹ आमुए कोलो ताखै बीमार या ज़ेलो दा दैखा औरौ तुंआरी भैटिंदै आए।’

⁴⁰ तोबै हांव राजा तिनुखै जोवाब दैन्दा, ‘हांव तुऔं कैंई साचौ बुलू, कै जू तुऐं मैरै इनु नानड़ै शै नानड़ै साथी बिशवाशी मुंजी कोसी ऐकी खै साथै कौरौ, सैजौ मैरै ही साथै कौरे राए।’

⁴¹ तोबै सै डैरै ढौबौ खौड़ै हौणौवाल़ै कै बौलदा, ‘ओए रै शरापित लोगौ, मैरै सामणै शै तियौं सौदा कै आग दै हौटै जांव, जू शैतान औरौ तैसखै दुष्टआत्मा खै पौरमेशवरे तैयार कौरे राए।

⁴² जोबै हांव भूखा थिया, तोबै तुऐं मुखै खाणौ खै ना दी, हांव तीशा थिया, औरौ तुऐं मुखै पाणी ना पियाई।

⁴³ हांव प्रदेशी थिया, औरौ तुऐं मुखै आपणै घोरो दा ना राखी, हांव नांगा थिया, औरौ तुऐं मुखै लुस्कै नै बोम्बेई, हांव बीमार औरौ ज़ेलो दा थिया, औरौ तुऐं मैरा ध्यान नै राखी।’

⁴⁴ तोबै सैजै लोग जोवाब दैंदै, ‘ओए रै प्रभु आमुए ताखै कोलो भूखा, या तीशा, या प्रदेशी, या नांगा, या बीमार, या ज़ेलो दा दैखा, औरौ तैरै सेवा ना कौरी।’

⁴⁵ तोबै हांव तिनुकै जोवाब दैन्‍दा, ‘हांव तुऔं खै साचौ बुलू कै तुऐं जू इनु नानड़ै शै नानड़ै मुंजी कोसी ऐकी कै साथै नै कौरी, सै मैरै साथै बै ना कौरी।’

⁴⁶ औरौ सैजै लोग जू डैरै ढौबौ औसौ सौदा कै सौजा भुकतदै पौरौ धरमी लोग सौदा कै जिन्दगी दै जांदै।”