मत्ती 24 - सिरमौरी नौवाँ नियम

यीशु दवारा मंदिर कै नाश हौणौ कै बारै मुंजी बौताणौ

¹ जोबै यीशु मन्दिरो पौरैशा निकल़ैयो जांदा लागै रौआ थिया, तोबै तैसकै चैलै तैसीखै मन्दिरो कै कारीगरी दिखाणौ खै तैसकै धोरे आए।

² तैणै तिनुखै बौल़ौ, “तुऐं जू ऐजौ सौबै दैखै लौ हांव तुऔंखै साचौ बुलू, इथै पाथरो पांदी पाथर बै चोकना-चूर हौए जांदै औरौ ऐक बै पाथर आपणी जौगैह पांदी ना रौंदा।”

यीशु कै पाछु आणौ का निशान

³ जोबै सै जैतून धारो पांदी बौठै रौआ थिया, तोबै चैलै एकान्त जौगैह दै तैसकै धोरे आयौ बौल़ौ, “आमुखै बौताए दै ऐजी बातौ कोलो हौंदी? तैरै आणा का औरौ दुनिया कै अन्त का कुणजा निशान हौंदा?”

⁴ यीशुए तिनुखै जवाब दिया “चौकश रौया कै कुणिए तुऔं खै भोरमाऐ नै दैंव।

⁵ जिथुखै बौहितै लोग ऐशणै हौंदै जू मैरै औधिकार का दावा कौरदै औरौ बौलदै कै, ‘हांव ही मसीहा औसौ,’ औरौ बौहितै खै भोरमाए दैंदै।

⁶ तुऐं लोड़ाई कै औरौ लोड़ाइयों कै चौर्चा शुणल़ै, दैखैया घोबराया नी; जिथुकै इनु बातौ का हौणा जौरुरी औसौ, पौरौ तैसी सौमय दुनिया का अन्त ना हौंदा।

⁷ जिथुकै सौबै देश औरौ राज्य ऐकी दूजै कै खिलाफ हौए जांदै, औरौ जौगैह-जौगैह काल़ पौड़दा औरौ भुईचोल़ हौन्दै।

⁸ ऐजी सौबै बातौ कठिन सौमय कै शुरुआत ही हौन्दै जैशै बैटमाणिशौ कै सुजणौ की पीड़ो हौंव।

⁹ तोबै सैजै लोग जू तोंवारै खिलाफ औसौ कौल़ेश दैणौ खै तुऔं खै थोमाले औरौ तुऔं खै मारै दैंदै जिथुकै तुऐं मैरै चैलै औसौ इथकारिए सौबै देशो कै लोग तुऔंआरी बैर कौरलै।

¹⁰ तोबै बौहितै सारै लोग मुं पांदी बिशवाश कौरणा छोड़े दैलै औरौ ऐकी दूजै खै पोकड़वाले औरौ ऐकी दुजैआरी बोयर राखदै।

¹¹ बौहितै झूठै पौरमेशवर कै बातौ बौताणौवाल़ै आलै, औरौ बौहितै लोगौ खै धौखा दैलै।

¹² अधरम कै बोड़णो शै ओका ओकीआरी प्यार ना कौरदा।

¹³ पौरौ जू आपणै मौरणौ कै सौमय तौड़ी मुं पांदी भोरोशा राखलै पौरमेशवर तिनुखै बौचायौ राखला।

¹⁴ औरौ पौरमेशवर कै राज्य का ऐजा सुसमाचार सारै जगत पांदी प्रचार कौरा जाला, तोबै सौबी देशो कै लोगौ खै इयौं बातौ कै मानणौ का मौका भैटदा तोबै दुनिया का अन्त हौए जांदा।”

कोष्टी की शुरुआत

¹⁵ “पोढ़णो वाल़ै इथुकै सौमझौ: जोबै ऐक दूसै तुऐं ऐक बुरै चीज़ मन्दिर दै, जिथकै चौर्चा दानिय्येल़ पौरमेशवर कै बातौ बौताणौवाल़ै कै ढौबौशै हौए रौए थी पवित्र जौगैह दै खौड़ै हौएयौंदै दैखलै।

¹⁶ तोबै जू लोग यहूदिया प्रदेश दै हौंव सैजै चुरिणौ कारिए धारो कै ढौबौ दौड़ै जाया।

¹⁷ जू घोरो कै छोतौ पांदी हौलै, सै आपणै समान लोणो कारिए घोरे खै भीतरै नै जाया,

¹⁸ औरौ जू खेतौ दै हौलै, सै आपणै खोटणो लेयांदै पाछु घोरे नै आया।

¹⁹ तिनु दूसौ दी जू होल़किणु औरौ जू दूध पियाणौ वाल़ी हौली, तिनुखै भागणौ बैजाए मुशकिल हौंदौ।

²⁰ प्रार्थना कौरेया कौरौ; कै तुऔं जाड़ै मुंजी या विशांव कै दूसै नी भागणौ पौड़ौ।

²¹ जिथुकै तैसी सौमय ऐशणा बौड़ा कौल़ेश हौंदा जैशणा दुनिया कै शुरुआत शै उंढा ऐलो तौड़ी ना होई रैई औरौ ना कौलोंई हौंदा।

²² औरौ जै पौरमेशवर तिनु दुखो कै सौमय कै ना घोटांदा, तौ कुणिए आदमी बै ना बौचदा; पौरौ चोणेयौंदे की बौजैह शै सैजै दूस घोटाए जांदै।

²³ तैसी सौमय जै कुणिए तुऔं खै बौल़ौ, कै दैख मसीह इथै औसौ! या तिथै औसौ तौ बिशवाश नै कौरेया।”

²⁴ “जिथु झूठै मसीह औरौ झूठै पौरमेशवर की बातौ बोताणौवाल़ै आन्दै, औरौ बौड़ै निशान औरौ अनौखै काम देखालै, औरौ हौए सौकौ तौ जिनु लोगौ खै पौरमेशवरे चोणे राए तिनु बै बोरमाए दैंदै।

²⁵ दैखौ, मोऐं आगैई तुऔं ऐजी सौबै बातौ बौल़ै दी।

²⁶ इथकारिए जै सै तुऔं बौल़ौ, ‘दैखौ, मसीह शुनशान जौगैह पुंडा औसौ।’ तौ तैसी दैखणौ कारिए बायरै ना जाया, ‘दैखौ सै कोठारियों दा औसौ,’ तौ बिशवाश नी कौरेया।”

²⁷ “जिथुकै जैशै बिजली पूरब शै निकल़ैयो पशिचमो तौड़ी चौमकैयो जांव, तैशैकैई मुं आदमी कै बैटै का बै आणा हौंदा।

²⁸ सौबी खै ऐजा पौता चालै जांदा कै कुकै हांव रौंव, जिथु सौबै जाणौ कै जिथै लाश औसौ तिथै घिईज कौठै हौंव।”

आदमी कै बैटै का औटेयौ आणा

²⁹ “दुखो का सौमय बितणौ कै बाद सुरज औरौ चांद पेयाशो ना दैंदै। औरौ तारै गौयण पौरैशै छुटी जांदै औरौ गौयण कै शौकतीशाली चीज़ौ आपणै ठाँव पौरैशी हिंजाल़ी जान्दी।

³⁰ तोबै मुं आदमी कै बैटै का निशान गौयण दा दैखिंदा औरौ तोबै धोरती कै सौबै जाति कै लोग छाती पीटदै, औरौ मुं आदमी कै बैटै खै अनौखी शौकतै औरौ महिमा कै साथै गौयणै कै बादल़ौ पांदी आन्दै दैखदै।

³¹ हांव आदमी का बैटा आपणै स्‍वर्गदूतौ कै तुरही कै बौड़ै आवाज़ो कै साथै भैजदा जू चोऊ दिशाओं शै गौयण कै ओकी कुणै तौड़ी जायौ मैरै चोणेयौंदे लोगौ खै कौठै कौरदै।”

अंजीर कै डाल़ शै शिक्षा

³² “अंजीर कै डाल़ो कैईंदा ऐजा उदारण शिखौ जोबै तिथकी डाल़ी नोरम हौए जांव, औरौ पात निकल़दै लागौ; तौ तुऐं जाणै पांव, कै गर्मी का सौमय नेड़िक औसौ।

³³ ऐशैखैई तुऐं इनु सौबी बातौ खै हौन्दै दैखौ, तौ जाणै पाया कै हांव आदमी का बैटा तावल़ा आणौवाल़ा औसौ। औरौ ऐजौ हौणौ ही वाल़ौ औसौ।

³⁴ हांव तुऔं कैंई साचौ बुलू कै किछै जियुंदै लोग तांव तौड़ी बै जियुंदै रोन्दै जोबै ऐजै दुख हौन्दै।

³⁵ गौयण औरौ धोरती टोल़े जालै, पौरौ मैरी बातौ हमैशा रोन्दी।”

जागेयौंदे रौया

³⁶ “ऐजी बातौ कियों घोड़ी औरौ कोसी दूसै हौंदी कुणिए ना जाणौ, ना स्वर्ग कै स्‍वर्गदूत औरौ ना पौरमेशवर का बैटा; पौरौ सिरफ पिता ही तैसी दूसौ कै जाणौ।

³⁷ जैशै अमारै पुराणिया नूह कै दूसौ दो थियु, तैशैखैई मुं आदमी कै बैटै का आणा बै हौंदा।

³⁸ जिथुकै जैशै जलप्रलय शै औगौड़ियौ कै दूसौ दै जैसी दूसौ तौड़ी नूह जहाजो पांदी ना बुठी तैसी दूसौ तौड़ी लोग खांव-पियौं थिए, औरौ तिनुमुंजी बैयाव हौंव थिए।

³⁹ औरौ जांव तौड़ी जलप्रलय आयौ तिनु सौबी खै बोवायो नी लोए गौए तांव तौड़ी तिनुकै किछै बै पौता ना चाली। तैशैखैई मुं आदमी कै बैटै का आणा बै हौंदा।

⁴⁰ तैसी सौमय दो जोणे खेतौ दै हौन्दै, ऐक आगु निंदै औरौ ओका छोड़े दैंदै।

⁴¹ दो बैटमाणिशौ चाकी पिशदी रौंदी, ऐक आगु निंदै औरौ औकै छोड़े दैंदै।

⁴² इथकारिए यीशुए आपणै चैलै खै बौल़ौ, तुऐं ना जाणौ कै तोंवारा प्रभु कोसी दूसै आन्दा।

⁴³ पौरौ ऐजौ जाणै पाव कै जै घोरो का मालिक जाणदा कै चोर कोसी सौमय आन्दा, तोबै सै बिजी रौंदा, औरौ आपणै घोरो दै चोरी ना हौणौ दैंदा।

⁴⁴ इथकारिए तुऐं बै तैयार रौया, जिथुकै जैसी सौमय कै बारै मुंजी तुऐं सोंचै बै ना रैई तैसी सौमय हांव आदमी का बैटा आए जांदा।”

बिशवाश लायक नोकर औरौ दुष्ट नोकर

⁴⁵ “औरौ ऐक भोरोशे लायक औरौ ईमानदार नोकर सैजा औसौ, जैसीकै मालिक तैसी ओकी नोकरो कै दैखभाल कौरणौ औरौ तिनुकै खियाणौ पियाणौ कै जुमैवार दैय सौकौ।

⁴⁶ धन्‍य औसौ, सैजा नोकर, जैसी तैसका मालिक पाछु आयौ ऐशैखैई कौरदै पांव।

⁴⁷ हांव तुऔं खै साचौ बुलू; सै तैसी आपणै सारी धन जायदात पांदी औधिकारी बौणादा।

⁴⁸ पौरौ जै सै दुष्ट नोकर सुंचदा लागौ, कै मैरै मालिक कै आणौ दै देर औसौ।

⁴⁹ औरौ आपणै साथी नोकरो खै पिटदा लागौ, औरौ पिणौ वाल़ै कै साथै खांव पियौं।

⁵⁰ तौ तैसी नोकर का मालिक ऐशणै दूसै पाछु आला, जौल़ौ तैणै तैसकै ठोल़नाए नी कौरे रैली, औरौ ऐशणै सौमय दा जू सै ना जाणौ।

⁵¹ तोबै सै तैसीखै सख्त सौजा दैला औरौ तैसकै ठाँव छल, कपटी वाल़ै लोगौ कै साथै हौंदा जिथै रुणु औरौ दांद पिशणौ हौंदौ।”