मत्ती 23 - सिरमौरी नौवाँ नियम

शास्त्रीयों औरौ फरीसी लोगौ की नेंदैया

¹ तोबै यीशुए भीड़ौ खै औरौ आपणै चैलै खै बौल़ौ,

² “यहूदी शास्त्री औरौ फरीसी लोग औधिकार कै साथै मूसा कै कानून का बखान कौरणौ कै सौमझ राखौ।

³ इथकारिए जू किछै सै तुऔं खै बौल़ौ सैजौ कौरेया औरौ मानैया, पौरौ तिनु जैशणै काम नी कौरेया औरौ ना तिनकै उदारण कै मानैया जिथुखै सै उपदैश तौ दैंवए, पौरौ तिनु आज्ञा खै ना मानौ।

⁴ सैजै सौबै ठुँ कै कानून बौणांव जू मानणै लोगौ कारिए चैईथै औसौ, सै लोगौ शै जबरदस्ती तिनु नियमौ खै मानणौ खै बौल़ौ। पौरौ आपी तिनु नियमौ खै ना मानौ।

⁵ सै कैई तरह कै नियम बौणांव जिनु मानणै औरौ कौरणै लोगौ कारिए चैईथै औसौ, सै आपणै ताबीजों खै जिथपांदी शास्त्र कै वचन हौंव, तिनु माथै पांदी औरौ बाऐ पांदी बानो, औरौ आपणै खोटणो खै पालै बौढ़ाव।

⁶ यहूदी सभा-घोरो दै खास-खास ठाँव औरौ बोईदुत मुंजी बै आदर दैणौ वाल़ी जौगैह,

⁷ बाज़ारो दै लोगौ कैईंदै इज्जत पाणै औरौ आदमी मुंजी गुरु बोणणौ, तिनु आछौ लागौ।

⁸ पौरौ तुऐं गुरु नै बौणैया, पौरौ तोंवारा ऐकैई गुरु औसौ, औरौ तुऐं सौबै भाईटु जैशणै औसौ।

⁹ आपणै पिता कै छोडे़बा कोसी कै बै धोरती पांदी आपणै पिता कै बौदलै आदर नै दैया, जिथु तोंवारा पिता सिरफ पौरमेशवर औसौ, जू स्वर्ग दा औसौ।

¹⁰ औरौ मालिक बै नै बौलेया, जिथु तोंवारा ऐकैई मालिक औसौ, मतलब मसीह।

¹¹ जू तुऔं मुंजी बौड़ा औसौ, सै तोंवारा नोकर बौणौ।

¹² जिथु जू कुणिए आपी कै बौड़ा सौमझला, सै नानड़ा कौरा जांदा, औरौ जू कुणिए आपी कै नानड़ा सौमझला, सै बौड़ा कौरा जांदा।”

¹³ “ओए रै कपटी यहूदी शास्त्रीयों औरौ फरीसी लोगौ तुऔं पांदी हाय, तुऐं लोगौ कारिए स्वर्ग कै राज्य का दवार बन्‍द कौरौ, ना तौ आपी तिन्‍दै जांव औरौ ना तिन्‍दै ओकी कै जाणौ दैंव।

¹⁴ ओए रै शास्त्रीयों औरौ फरीसी लोगौ तुऔं पांदी हाय, तुऐं विधवाओं कै घोरो कै लुटो औरौ धरमी बोणणौ कारिए बौड़ी बार तौड़ी प्रार्थना कौरदै रौंव: इथकारिए तुऔं कड़ी सौजा भैटदै।”

¹⁵ “ओए रै कपटी यहूदी शास्त्रीयों औरौ फरीसी लोगौ तुऔं पांदी हाय, तुऐं ऐकी आदमी खै आपणै गुट दा लाणौ कारिए सौबी जौगैह दै घुमो फिरो, औरौ जोबै सै बिशवाश दा आए जांव, तौ तैसी आपी दा बै जादा नरको दा जाणौ कै लायक बाणै दैंव।”

¹⁶ “ओए रै आन्धै नेताओं, तुऔं पांदी हाय, तुऐं शिखांव कै जै कुणिए आदमी मन्दिर कै शौं खाला तौ तैसीकै किछै फोरक ना पौड़ौ, पौरौ जै कुणिए मन्दिर कै सूनै कि शौं खाला तौ फोरक पौड़ौ।

¹⁷ ओए रै मूर्खो औरौ आन्धै, कुण बौड़ा औसौ, सूनु या सैजा मन्दिर जिथलैई सूनु पवित्र हौंव?

¹⁸ तुऐं ऐजौ बै शिखांव कै जै कुणिए वेदी खै शौं खाला तौ किछै फोरक ना पौड़ौ, पौरौ तुऐं बौल़ौ जू तौफा वेदी पांदी औसौ, जै कुणिए तिथकै शौं खाला तौ इथलैई फोरक पौड़ौ।

¹⁹ ओए रै आन्धै कुण बौड़ा औसौ, भैंट या वेदी जिथलैई भैंट पवित्र हौंव।

²⁰ इथकारिए जू वेदी कै शौं खांव, सै तिथकी, औरौ जू किछै तिथपांदी औसौ, तिथकी बै शौं खांव,

²¹ जू मन्दिर कै शौं खाला, सै तैसी पौरमेशवर कै बै शौं खांव जू तिंदा रौंव।

²² जू स्वर्ग कै शौं खांव सै पौरमेशवर कै सिंहासन कै औरौ तैसी पांदी बौठणौवाल़ै कै बै शौं खांव।”

²³ “ओए रै कपटी यहूदी शास्त्रीयों औरौ फरीसी लोगौ तुऔं पांदी हाय, तुऐं पुदीने, औरौ सौंफ, औरौ जींरे का देशवाँ भाग तौ दैंव, पौरौ तुऔं कानून कै गम्भीर बातौ औरौ न्याय, औरौ दया, औरौ भोरोशे कै लायक हौणौ चैंई औरौ तुऔं कै देशवाँ भाग दैणा चैंई, आछौ हौंदौ कै तुऐं इनु बै कौरदै रोन्दै, औरौ तिनु बै ना छोड़दै।

²⁴ ओए रै आन्धै अगुवे, तुऐं मामुली नियम मानणौ कै तौ बैजाए चौकश रौंव जैशैकै जू तुऐं पियोंए तिथ पौरैशै माक्‍खी उंढी घाड़ो पौरौ तुऐं पौरमेशवर कै आज्ञाओं कै जू बैजाए खास औसौ तिनु टाल़ै दैंव ऐजी बातौ ऊँट कै घौटै दैणौ साए औसौ।”

²⁵ “ओए रै कपटी यहूदी शास्त्रीयों, औरौ फरीसी लोगौ, तुऔं पांदी हाय! तुऐं आपी कै धरमी बौणौ पौरौ तोंवारै मन लालच औरौ मतलब शै भोरेयोंदे औसौ।

²⁶ ओए रै आन्धै फरीसी लोगौ, आगै तुऔं लालचै औरौ मतलबी स्‍वभाव बंद कौर दैणा चैंई। तोबै तुऐं सैजौई कौर पांदै जू धरमी कौरौ। ऐजौ ऐकी ऐशणी थाली साए हौंदौ जू बायरै औरौ भीतरै दु ढौबौशै साफ हौंव।

²⁷ ओए रै कपटी यहूदी शास्त्रीयों, औरौ फरीसी लोगौ, तुऔं पांदी हाय! तुऐं चुणै फैरेयौंदी कब्रो कै साए औसौ जू औपरौशी तौ कामकी दैखियौं, पौरौ भीतरै मुर्दै की हाड़की औरौ सौबी बान्त कै गन्दगी लैई भोरेयौंदी हौंव।

²⁸ ऐशैकैई तुऐं बै औपरौशै तौ आदमी कै धरमी दैखियौं, पौरौ भीतरो दै ढोंग औरौ अधरम लैई भोरियोदैं हौंव।”

²⁹ “ओए रै कपटी यहूदी शास्त्रीयों, औरौ फरीसी लोगौ, तुऔं पांदी हाय! जिथुकै तोंवारै पुराणिया जिनुवै पौरमेशवर कै बातौ बौताणौवाल़ै कै जान शै मारै दिए थिए पौरौ ऐबै तिनु धरमी लोगौ की कब्रो कै आदर दैंव।

³⁰ औरौ बौल़ौए, ‘जै आमु आपणै पुराणिया कै दूसौ दै हौन्दै तौ पौरमेशवर कै बातौ बौताणौवाल़ै कै लोऊ दै तिनकै साझी ना हौन्दै।’

³¹ इयौं बातौ लैई तुऐं ऐजौ साबित लो कौरे कै तुऐं सौथी कै तिनु लोगौ कै संतान औसौ जिनुवै पौरमेशवर कै बातौ बौताणौवाल़ै का खून कौरे राए।

³² औरौ तुऐं आपी तियौं बुराई कै पूरा कौरणौवाल़ै औसौ जू बुराए तोंवारै पुराणिया शुरु कौरे राए थी।

³³ ओए रै जोहरिले दानो कै नानड़िया कै जैशणै लोगौ, तुऐं नरक कै सौजा शै ना बोचदै।

³⁴ इथकारिए दैखौ, हांव तोंवारै धोरे पौरमेशवर कै बातौ बौताणौवाल़ै औरौ बुध्दिमानों औरौ यहूदी शास्त्रीयों खै भैजदा; औरौ तुऐं तिनुमुंजी दै कोसी खै मारै दैंदै औरौ कोसी कै क्रूसो पांदी चौढ़ांदै, औरौ कोसी कै आपणै यहूदी सभा-घोरो दै कौड़ै लान्दै, औरौ ऐकी नगर शै दूजै नगर तौड़ी लोताड़दै फिरले।

³⁵ धरमी हाबिल सै लैयौ खै बिरिक्‍याह कै बैटै जकर्याह तौड़ी, जैसी तुऐं मन्दिरो औरौ वेदी कै बीच दा मारै दिया थिया, सौबी धरमी लोगौ का खून कौरा ऐजौ सौबै लोऊ बोवाणो कै दोषी तुऐं आपी हौंदै।

³⁶ हांव तुऔं खै साचौ बुलू, इनु सौबी खून कै सौजा ऐसी सौमय कै पीढ़ी पांदी आन्दी।”

यीशु कौ यरूशलेम शहर पांदी रुणु

³⁷ “ओए रै यरूशलेम शहर कै लोगौ! तुऐं तिनु पौरमेशवर कै बातौ बौताणौवाल़ै कै मार दियै, जू पुराणै सौमय दै रौंव थिए, औरौ तिनु लोगौ खै पाथरो शै मारै दिए जिनु तोंवारै धोरे छाड़ै राए थिए। किशैक बैई मोऐं ऐजौ चोऊ कै जैशै मुरगी आपणै नानड़िया कै आपणै पाखौ तौड़ी रोखवाल़ी कारिए कौठै कौरौ, तैशैखैई हांव बै तोंवारै नानड़िया कै कौठै कौरु, पौरौ तुऐं ऐजौ ना चांव।

³⁸ दैखौ, तोंवारा मन्दिर तुऔं कारिए उजाड़ छोड़े जांव।

³⁹ पौरौ हांव तुऔं खै बुलू, कै ऐबै शै जौल़ौ तौड़ी तुऐं ना बौल़ौ, ‘धन्‍य औसौ सैजा, जू प्रभु कै औधिकार कै साथै आंव।’ तांव तौड़ी तुऐं मुखै औटेयौ कौलोंई ना दैखदै।”