मत्ती 22 - सिरमौरी नौवाँ नियम

बैयाव कै खाणौ का उदारण

¹ यीशु हौजौ तिनुखै उदारण देएयो बौलदा लागा।

² “स्वर्ग का राज्य ऐसी ऐकी उदारण साए औसौ, ऐक राजा जैणै आपणै बैटै का बैयाव बाणा।

³ औरौ तैणै आपणै नोकरो खै भैजै, कै नेवता देएयोंदे लोगौ कै बैयाव खाणौ खै बोईदौ, पौरौ तिनुऐ आणौ ना चैंई।

⁴ तोबै तैणै हौजौ ओकी नोकरो खै ऐजौ बौलेबा भैजा कै, ‘नेवता देएयोंदे लोगौ कै बौल़ौ मोऐं स्वाद खाणौ बौणाए राखौ, औरौ बौहितै बौड़ी दावत तैयार कौरे राए औरौ सौबै ठुँ तैयार औसौ; बैयाव कै खाणौ मुंजी आंव।’

⁵ पौरौ सै जाणैयौ बै अणजाण बौणै, औरौ कुणिए आपणै खेतौ कै, औरौ कुणिए आपणै धियाड़ी पांदी हौटै।

⁶ औरौ किछै लोगै राजा कै नोकरो खै पाकड़ेयो तिनकी बैज्जती कौरी औरौ तिनु मारै दिए।

⁷ जोबै राजाए ऐजौ शुणु तोबै तैसी गुस्सा ओऊवा, औरौ तैणै आपणै सैना भैजैयो तिनु हथियारों खै नाश कौरे दिए, औरौ तिनकै गांव खै फोकै दिए।

⁸ तोबै तैणै आपणै दासो खै बौल़ौ, ‘बैयाव कौ खाणौ तौ तैयार औसौ, पौरौ नेवता देएयोंदे लोग लायक ना आथी।

⁹ इथकारिए शोड़कै दै जाव, औरौ जैतरै लोग तुऔं खै भैटलै, सौबी खै बैयाव कि दावत दै बौएदैयौ लांव।’

¹⁰ तोबै तिनु नोकरे शोड़कै पुंडे जायौ, का बुरै, औरौ का आछै, जैतरै भैटी सौबी खै कौठै कौरे; औरौ बैयाव को घोर पोऊंणै लैई भोरै दियु।”

¹¹ “जोबै राजा पोऊंणै खै दैखदा भीतरै ओऊवा; तौ तैणै ऐक आदमी दैखा, जैणै बैयाव कै सोही ढंग कै खोटणो ना बाम्बै रैई थी।

¹² तैणै तैसी कैईंदु पूछु, ‘ओए रै दोस्त; तू बैयाव कै खोटणो बाम्बै बिना इथै किथुखै ओऊवा?’ पौरौ सै चुपी रोआ।

¹³ तोबै राजाए सेवको खै बौल़ौ, ‘ऐसकै हाथ लात बानैबा ऐसीखै बायरै इनारै दा राखै दो, तिथै सिरफ रुणु औरौ दांद पीशणो हौंदौ।’

¹⁴ ऐशैखैई जू इबी पाछलै औसौ सै औगौड़ियौ कौरे जांदै, औरौ जू आपी खै औगौड़ियौ सौमझौ सै पाछलै कौरे जांदै।”

महाराजा (कैसर) कै मामला दैणा

¹⁵ तोबै फरीसी लोगै जाऐबा आपी मुंजी बिचार कौरा, कै यीशु खै तैसकी बातौ दा कैशैखै फोशांई।

¹⁶ पौरौ तिनुऐ आपणै चैलै खै हेरोदियों कै साथी तैसकै धोरे ऐजौ बौलदा भैजा, “ओए रै गुरुजी, आमै जाणुए, कै तू साचा औसौ, औरौ कोसी कै पोरवा ना कौरे कै लोग मुखै का बौलल़ै; औरौ पौरमेशवर कै बाट सोच्‍चाई शै शिखांए। जिथुकै तू आदमी कै मुं दैखैयो बातौ ना कौरे।

¹⁷ इथकारिए तू आमु बोता तू का सौमझै? का रोम कै महाराजा (कैसर) खै मूसा कै कानून कै हिसाब सै आमुखै कर दैणौ चैंई या ना दैणौ चैंई?”

¹⁸ यीशुए तिनकै दुष्टता जाणैयौ बौल़ौ, “ओए रै कपटियो, तुऐं मुखै किथुखै पोरखौ?

¹⁹ रोम का सिका मुखै दिखाव।” तोबै तिनुऐ तैसकै धोरे ऐक चांदी का सिका लियोऊवा, जू रोम देश का सिका थिया, जिथकै धियाड़ी ऐकी दूसौ कै बोराबर थी।

²⁰ तैणै तिनु कैईंदु पूछु, “इथपांदी छाप औरौ नांव कोसको औसौ?”

²¹ तिनुऐ तैसीखै बौल़ौ, “महाराजा (कैसर) का।” तोबै यीशुए तिनुखै बौल़ौ, “जू महाराजा कौ औसौ, सैजौ महाराजा खै दैंव; औरौ जू पौरमेशवर कौ औसौ, सैजौ पौरमेशवर खै दैंव।”

²² इथु शौणैबा सै हैरान हौए गौवै, औरौ तैसी छोडे़बा हौटै गौवै।

मौरेयौंदे का जियुंदी हौणौ का सवाल

²³ तैसी दूसै सदूकी लोग जू बौल़ौ थिए की मौरेयौंदे का जियुंदी हौणा आथी नै, यीशु कै धोरे आए, औरौ तैसी कैईंदु पूछु।

²⁴ “ओए रै गुरुजी, मूसाए बौल़ै राए थियु, कै जै कुणिए बिना ओलादै कै मौरे जांव, तौ तैसका भाई तैसकै घोरवाल़ी आरी बैयाव कौरेयौ आपणै भाईड़ी कै ओलाद पौयदा कौरे सौकौ।

²⁵ ऐबै अमारै कागे सात भाई थिए; आगला बैयाव बाणैयो मौरे गौआ; औरौ ओलाद ना हौणौ कै बौजैह शै आपणै घोरवाल़ी खै आपणै भाई कारिए छोड़े दै।

²⁶ ऐशैखैई दूजै औरौ तिजै बै ऐशैकैई कौरौ, औरौ सात भाई बेओलाद मौरे गौवै।

²⁷ सौबी कै बाद सैजी बैटमाणिश बै मौरे गौए।

²⁸ ऐबै, आमुखै बोता जै मौरेयौंदे कै जियुंदी हौणौ पांदी सैजी विधवा बैटमाणिश, जू साती भाईड़ीआरी बियाए राए थै, सै तिनुमुंजी दै कोसके घोरवाल़ी हौन्दै?”

²⁹ यीशुए तिनुखै जोवाब दिया, “तुऐं गौलत औसौ जिथु तुऐं पवित्र शास्त्र औरौ पौरमेशवर कै अनौखी शौकतै कै ना जाणौ।

³⁰ जिथु मौरेयौंदे कै जियुंदी हौणौ पांदी सै बैयाव ना कौरदै, औरौ ना तिनुमुंजी बियाव हौन्दै; पौरौ स्वर्ग दै रौणौवाल़ै स्‍वर्गदूतौ कै जैशणै हौन्दै।

³¹ पौरौ मौरेयौंदे कै जियुंदी हौणौ कै बारै मुंजी का तुऐं ऐजा वचन ना पौड़ै रैई जू पौरमेशवरे तुऔं बौल़ै राए।

³² ‘कै हांव तैरै पुराणिया अब्राहम, इसहाक, औरौ याकूब का पौरमेशवर औसौ।’ जू मौरेयौंदे का ना आथी, पौरौ जियुंदै का पौरमेशवर औसौ।”

³³ इथु शौणैबा लोग यीशु कै उपदैश लैई हैरान हौए गौवै।

सौबी दै बौड़ी आज्ञा

³⁴ जोबै फरीसी लोगै शुणु, कै यीशुए जवाब देएबा सदूकी लोगौ को मुँह बोन्‍द कौरे दियु, तौ सै कौठै होवे।

³⁵ औरौ तिनुमुंजी दै ऐक यहूदी शास्त्र कै ऐकी ज्ञानीए तैसी पौरखणौ कारिए ओऊवा औरौ तैसी कैईंदु पूछु।

³⁶ “ओए रै गुरुजी मूसा कै कानून मुंजीदै कुणजै आज्ञा बौड़ै औसौ?”

³⁷ तैणै तैसीखै बौल़ौ, “तू पौरमेशवर आपणै प्रभु आरी आपणै सारै मन शै औरौ आपणै सारै प्राण शै औरौ आपणी सारी बुध्‍दि शै प्यार राखैया।

³⁸ बौड़ी औरौ मुख्य आज्ञा तौ ऐजै औसौ।

³⁹ औरौ तियौंई साए ऐजै दूजै बै औसौ, कै तू आपणै पड़ोसी आरी तैशणा प्यार कौर जैशणा आपिआरी कौरे।

⁴⁰ ऐजी दो आज्ञा सौबै मूसा कै कानून औरौ पौरमेशवर कै बातौ बौताणौवाल़ै का आधार औसौ।”

मसीह दाऊद का बैटा या दाऊद का प्रभु औसौ?

⁴¹ जौल़ौ फरीसी लोग कौठै थिए, तौ यीशुए तिनु कैईंदु पूछु,

⁴² “कै मसीह कै बारै मुंजी तुऐं का सुंचौ? सै कोसका बैटा औसौ?” तिनुऐ तैसीखै बौल़ौ, “राजा दाऊद का।”

⁴³ यीशुए तिनु कैईंदु पूछु, “तौ दाऊद पवित्र आत्मा दै हौयौ तैसीखै प्रभु किथुखै बौल़ौ?

⁴⁴ ‘की प्रभुए मैरै प्रभु खै बौल़ौ; मैरै सोऐं ढौबौ खै बौठ, जांव तौड़ी हांव तैरै बौयरी कै हराए ना दियु।’

⁴⁵ जोबै राजा दाऊद तैसीखै प्रभु बौल़ौ, तौ सै तैसका बैटा कैशै बौणा?”

⁴⁶ कुणिए बै तैसकै जवाब नै दैय सौकी; पौरौ तैसी दूसौ शै कोसी कै बै हौजौ तैसीयादै किछै पूछणो कै हिम्मत ना होई।