मत्ती 15 - सिरमौरी नौवाँ नियम

भोवारो औरौ आज्ञा तौड़णौ का सवाल

¹ तोबै यरूशलेम शहर दै किछै फरीसी लोग औरौ यहूदी शास्त्री यीशु कै धोरे आयौ बौलदै लागै,

² “तैरै चैलै बुड़ेईको कै भोवारो खै किथु टाल़ो, कै बिना हाथ धोए रोटी खांव?”

³ तैणै तिनुखै जोवाब दिया, “कै तुऐं बै आपणै भोवार कै बौजैह शै पौरमेशवर कै आज्ञा किथुखै टाल़ो?

⁴ जिथुखै पौरमेशवरे बौल़ौ, ‘कै आपणै बापू औरौ माँ कै इज्जत कौरेया,’ औरौ ‘जू कुणिए बापू या माँ खै बुरु बौल़ौ, सै मारै दिया जांदा।’

⁵ पौरौ तुऐं इथकै खिलाफ शिखांव, जै कुणिए आपणै माँ-बापू खै बौल़ौ, ‘जू किछै मोदत तुऔं कै दैणै थी, सै पौरमेशवर खै भैंट चौढ़ाए राए।’

⁶ तौ तैसी आपणै माँ बापू का आदर कौरणौ कि जोरुरत ना आथी, ऐशैखैई तुऐं आपणै भोवारो की बौजैह शै पौरमेशवर का वचन टाल़ै दिया।

⁷ ओए रै कपटियो, यशायाहै तोंवारै बारै मुंजी ऐजै भविष्यवाणी ठीक कौरे राए:

⁸ ‘ऐजै लोग ओठो लैई तौ मैरा आदर कौरौ, पौरौ तिनका मन मुं कैईंदा दूर औसौ।

⁹ इनकै आराधना कौरणै मुं कारिए मायनै ना राखौ, जिथुकै ऐजै लोग आदमी कै बाणैयौंदी आज्ञा खै मैरी आज्ञा बोताएयो शिखांव।’”

अशुध्द कौरणौवाल़ी बातौ

¹⁰ औरौ तैणै लोगौ खै आपणै धोरे बोएदैबा तिनुखै बौल़ौ, “शुणौ, औरौ सौमझौ।

¹¹ जू आदमी कै मुँह कै भीतरै जांव, सै आदमी खै अशुध्द ना कौरौ, पौरौ जू मुँह बाटी निकल़ौ, सैजौई आदमी खै अशुध्द कौरौ।”

¹² तोबै चैलै आयौ तैसीखै बौल़ौ, “का तू जाणै कै फरीसी लोग तैरै ऐसी वचन शुणैबा खैजै गौवै?”

¹³ तैणै जोवाब दिया, “हरेक पौधा जू मैरै स्वर्गीय पिताए ना लाए रैई, उपाड़ै दैंदै।

¹⁴ तिनुखै जाणौ दैंव, सै आन्धै मार्ग खै दिखाणै वाल़ै औसौ: आन्धा जै आन्धा खै बाट दिखांव, तौ दुईनै गौढै दै छुटदै।”

¹⁵ इथु शौणैबा, पतरसे यीशु खै बौल़ौ, “ऐजा उदारण आमुखै सौमझाए दै।”

¹⁶ तैणै बौल़ौ, “का तुऐं इबी तौड़ी बै ना सौमझौ?

¹⁷ कै तुऐं ऐजी बात ना जाणौ कै जू किछै आदमी कै मुँह भीतरै जांव सैजौ पेटोऊदु जांव, औरौ सण्डास बाटी निकल़ै जांव?

¹⁸ पौरौ जू किछै मुँह बाटी निकल़ौ, सै मन शै निकल़ौ, औरौ सैजौई आदमी खै अशुध्द कौरौ।

¹⁹ जिथुखै आदमी कै मनो शै बुरै-बुरै विचार, गौलत तरीकै शै सौमबंध बौणाणै, चोरी कौरणा, हत्या कौरणा, नाजायज सौमबंध राखणै, झूठी गवाही औरौ नेंदैया कौरणा ही निकल़ौ।

²⁰ ऐजी बातौ औसौ जू आदमी खै अशुध्द कौरौ, पौरौ बिना हाथ धोवे खाणौ-खाणौ आदमी खै अशुध्द ना कौरौ।”

कनानी जाति कै बैटमाणिश का बिशवाश

²¹ यीशु तिथैदा हौटैबा, सूर औरौ सैदा शहरो कै ढौबौ खै हौटै गौआ।

²² औरौ कनान देश दै रौणौ वाल़ी ऐक बैटमाणिश यीशु कै धोरे आए, औरौ जोर सै बौलदै लागै, “ओए रै प्रभु! दाऊद कै सन्‍तान, मुं पांदी दया कौर, मैरी बैटी खै दुष्टआत्माएं बैजाए पौरैशान कौरे लोए।”

²³ पौरौ तैणै तियौंखै किछै बै जवाब ना दी, औरौ तैसकै चैलै तैसी कैईंदै बिन्तै कौरेयौ बौल़ौ, “इयौंकै आगु भैज; जिथुखै अमारै पाछैदै लैलियायो आए रौए।”

²⁴ यीशुए जोवाब दिया, “कै इस्राएल देश कै घोराणे की हाँईचैयौंदी भेड़ो कै छोडे़बा मुखै कोसी कै धोरे ना भैजै रैई।”

²⁵ पौरौ सैजी आए, औरौ तैसीखै प्रणाम कौरेयौ बौलदै लागै, “ओए रै प्रभु, मैरै मोदत कौर।”

²⁶ तैणै जोवाब दिया, “जिथुकै यहूदी लोगौ कै रोटी लोएबा कुते कै आगै फेरकाणै आछी ना आथी (यहूदी लोग सुंचौ थिए कै सै ओकी जाति कै लोगौ दै आछै औसौ, औरौ कौलोंई-कौलोंई तिनुकै आवारै कुते साए बौल़ौ थिए)।”

²⁷ तियैं बौल़ौ, “ऐजी बात साची औसौ प्रभु; पौरौ कुते बै चूर-चार खांव, जू तिनकै मालिक कै मैजौ पांदी दौ छुटौ।”

²⁸ इथपांदी यीशुए तियोंखै जोवाब देएबा बौल़ौ, “की ओए रै बैटमाणिश, तैरा बिशवाश बौड़ा औसौ: औरौ जैशैखै तू चाए, तांव कारिए तैशैखैई हौए जांदो।” औरौ तियौंकै धी तियौंई घोड़ी दै ठीक हौए गौए।

कैई बीमारों कै ठीक कौरणै

²⁹ यीशु तिथैदा हौटैबा, गलील झीलो कै धोरे ओऊवा, औरौ धारो पांदी हौटै गौआ औरौ तिथै बौठै गौआ।

³⁰ औरौ बैजाए बौड़ै भीड़ तैसकै धोरे आए, औरौ तिनुऐ आपणै साथै लोंगड़े, आन्धै, गुंगै, टुंडै औरौ बौहितै खै लियायो यीशु कै धोरे आए; औरौ तिनुखै तैसकै लातो कै धोरे राखै दिए, औरौ तैणै तिनुखै ठीक कौरे दिए।

³¹ जोबै लोगै दैखौ, कै गुंगै बौलांदै लागै रौवै औरौ टुंडै ठीक हौए रौवै, औरौ लोंगड़े हांडदै लागै रौवै, औरौ आन्धै दैखदै लागै रौवै, तौ सै हैरान हुवे औरौ इस्राएल देश कै पौरमेशवर कै बौड़ाए कौरदै लागै।

चोऊ हजार लोगौ कै खियाणौ

³² यीशुए आपणै चैलै खै बौएदैयौ बौल़ौ, “मुखै इयौं भीड़ौ पांदी गिणौ लागै रोई; जिथुकै सै तीन दूसौ दी उंढी मैरै साथै औसौ, औरौ तिनुकैईं किछै बै खाणौ कै ना आथी; औरौ हांव इनुखै भूखै ना छाड़णै चोऊं; कोदी ऐशैखै नी हौंव कै बाटौ पुंडे खोड़ीयों बेहोश हौए जांव।”

³³ चैलै तैसीखै बौल़ौ, “आमुखै उजाड़ जौगैह दी ऐतरी रोटी कुकै दी भैटदी, कै आमै ऐतरै भीड़ खै छोकाए सौकु?”

³⁴ यीशुए तिनु कैईंदु पूछु, “तुऔं कैंई कैतरी रोटी औसौ?” तिनुऐ बौल़ौ, “आमुवा सात रोटी औरौ दैणिक नानड़ी माछी औसौ।”

³⁵ तोबै तैणै लोगौ खै जोमीनो पांदी बोठणौ कै बौल़ौ।

³⁶ औरौ तिनु साती रोटी औरौ माछी कै उंढी कौरी औरौ पौरमेशवर का धन्यवाद कौरेयौ तुड़ी, औरौ आपणै चैलै खै दैंदा लागा औरौ चैलै लोगौ खै।

³⁷ जोबै सौबै खाएयो छौकै गौवै तोबै चैलै बाद मै बौचेयौंदे टुकड़ै की सात शैकड़ी भोरेयोंदे टिपी।

³⁸ औरौ खाणौवाल़ी बैटमाणिशौ औरौ नानड़िया खै छोड़ेयौ चार हजार मर्द थिए।

³⁹ तोबै यीशुए भीड़ खै भैजै दै, औरौ किश्‍ती पांदी हौटै गौआ, औरौ मगदन इलाके दा ओऊवा।