मत्ती 14 - सिरमौरी नौवाँ नियम

हेरोदेस राजा का यीशु कै बारै मुंजी शुणणा

¹ तैसी सौमय दै चौथाई देश का राजा हेरोदेसे यीशु कै चौर्चा शौणै।

² औरौ आपणै नोकर खै बौल़ौ, “ऐजा यूहन्ना बपतिस्मा दाता मौरेयौंदे मुंजीदा जियुंदी हौए गौआ, इथकारिए तैणै चौमत्कार कै काम प्रगट कौरे लौवै।”

यूहन्ना कै मौत

³ जिथुखै हेरोदेस राजाए आपणै भाई फिलिप्पुसे कै घोरवाल़ी हेरोदियास कै बौजैह शै, यूहन्ना बपतिस्मा दाता खै थाम्बैयौ बानै दिया, औरौ कोयदखाने दा पाए दिया।

⁴ जिथुखै यूहन्नाए तैसीखै बौल़ै राए थियु, की इयौंकै राखणा ताखै ठीक ना आथी।

⁵ औरौ सै तैसीखै मारै दैणा चांव थिया, पौरौ लोगौ दा डौरौ थिया, जिथु सै तैसीखै पौरमेशवर कै बातौ बौताणौवाल़ा मानौ थिए।

⁶ पौरौ जोबै हेरोदेस राजा का जन्म दूस ओऊवा, तौ हेरोदियास कै बैटीए जन्म दूसौ कै खुशी पांदी नाचेबा हेरोदेस राजा खै खुश कौरा।

⁷ इथकारिए तैणै शौं खाएयो वचन दिया, “जू किछै तू मांगलै हांव ताखै दैंदाए।”

⁸ तियैं आपणी माँ कै शिखाएयौंदी बातौ कै बौल़ै, “की यूहन्ना बपतिस्मा दाता को मुंड काटैयौ मुखै ऐकी थालौ दौ मोंगाऐ दै।”

⁹ राजा दुखी हौआ, पौरौ आपणी शौं औरौ पोऊंणै की बौजैह शै आज्ञा दै, कै दैय दैंव।

¹⁰ औरौ कोयदखाने दै लोगौ खै भैजैयो यूहन्ना को मुंड कोटवाऐ दियु।

¹¹ औरौ तैसकौ मुंड थालौ उदु लोऊ, औरौ बाईटी खै दैय दियु; औरौ सै तिथुखै आपणी माँ कै धोरे लोए गौए।

¹² औरौ यूहन्ना कै चैलै आयौ, तैसकै लाश खै नियौ दबाए दै, औरौ जायौ यीशु खै समाचार दिया।

पाँच हजार लोगौ कै खियाणौ

¹³ जोबै यीशुए ऐजौ शुणु, तौ सै किश्‍ती पांदी चौढ़ेयौ तिथैदा ऐकी शुनशान जौगैह दा इकली रौणौ हौटै गौआ, औरौ ऐजौ शोणेयो लोग नगर-नगर शै हांडेयो तैसकै पौछौड़ियौ हौटै गौवै।

¹⁴ यीशुए किश्‍ती पौरैशौ उदे आयौ बौड़ी भीड़ दैखै, औरौ तैसी तिनु पांदी गीणौ लागी; औरौ तैणै तिनकै बीमारों खै ठीक कौरे।

¹⁵ जोबै बैल़खौ हौंदौ लागौ, तोबै तैसकै चैलै तैसकै धोरे आयौ बौल़ौ, “ऐजै शुनशान जौगैह औसौ, औरौ बैरीन्दु लागै रौ। लोगौ कै जाणौ दै कै बस्तियौं दै जायौ आपी कारिए खाणौ खै मोलै लोंव।”

¹⁶ औरौ यीशुए तिनुखै बौल़ौ, “तिनकौ जाणौ जौरुरी ना आथी! औरौ तुऐं ही तिनुखै खाणौ खै दैंव।”

¹⁷ तिनुऐ तैसीखै बौल़ौ, “इथै तौ आमुकैंई पाँच रोटी औरौ दो माछी छोड़ेयौ कै किछै नै आथी।”

¹⁸ तैणै बौल़ौ, “तिनुखै इथै मैरै धोरे लांव।”

¹⁹ तोबै यीशुए लोगौ खै घासो पांदी बौठणौ खै बौल़ौ, औरौ तिनी पाँच रोटी औरौ दु माछी कौरी, औरौ स्वर्ग कै ढौबौ दैखैयो पौरमेशवर का धन्यवाद कौरा, औरौ रोटी तौड़ै-तौड़ेयो चैलै खै दैन्‍दा लागा, औरौ चैलै लोगौ खै दी।

²⁰ औरौ सौबै खाएयो छौकै गौवै, औरौ तिनुऐ बौचेयौंदे टुकड़ै की बारौ शैकड़ी भोरेयो टिपी।

²¹ औरौ खाणौवाल़ी बैटमाणिशौ औरौ नानड़िया खै छोड़ेयौ पाँच हजार मर्द कै लमसम थिए।

पाणी पांदी यीशु कौ हांडणौ

²² औरौ यीशुए तौलोंई आपणै चैलै खै किश्‍ती दै बोठाल़ै, कै सै तिनुदै आगै गलील झील कै ओकी ढौबौ पांडे जांव, तांव तौड़ी हांव लोगौ खै आगु डियाल़ु।

²³ सै लोगौ खै डियाल़ेयो, आपी प्रार्थना कौरणौ कै धारो पांदी हौटै गौआ; औरौ बैल़खै दा सै तिथै इकली थिया।

²⁴ तियौं घोड़ी दै किश्‍ती गलील झील कै बीच मुंजी लैहरो दै डगमगाऐ रौए थी, जिथु हावा बैरवें कै थी।

²⁵ औरौ झीशो, बियाणौ दै आगै यीशु झीलो पांदी चालैयौ तिनकै धोरे ओऊवा।

²⁶ औरौ चैलै तैसीखै झीलो पांदी हांडदै बैई दैखैयो घबराए गौवै, औरौ बौलदै लागै, “कै सै भूत औसौ!” औरौ डौर कै मारै लेलयांदै लागै।

²⁷ पौरौ यीशुए तौलोंई तिनुआरी बातौ कौरी, औरौ बौल़ौ, “हिम्मत राखौ, हांव औसौ; डौरेया नै।”

²⁸ पतरसे तैसीखै जोवाब दिया, “ओए रै प्रभु, जै तू ही औसौ, तौ मुखै आपणै धोरे पाणी पांदी हांडणौ कै आज्ञा दै।”

²⁹ औरौ तैणै बौल़ौ, “आए जा!” तोबै पतरस किश्‍ती पौरैशा ओतरेयो यीशु कै धोरे जाणौ कारिए पाणी पांदी हांडदा लागा।

³⁰ पौरौ हवा दैखैयो डौरे गौआ, औरौ जोबै डुबदा लागा औरौ जोर सै लैरौ मारैयौ बौल़ौ, “ओए रै प्रभु, मुखै बौचा।”

³¹ यीशुए तौलोंई आपणा हाथ बोढ़ायो तैसीखै थामा, औरौ तैणै बौल़ौ, “ओए रै कम बिशवाश कौरणौवाल़ै, तुऐं किथुखै शक कौरा?”

³² जोबै सै किश्‍ती पांदी ओऊवा, तौ हवा रौकै गौए।

³³ इथपांदी जू किश्‍ती दै थिए, तिनुऐ तैसीखै झोकैबा ढाल़ कौरेयौ बौल़ौ, “तू सौथी कै, पौरमेशवर का बैटा औसौ।”

यीशु दवारा गन्नेसरत प्रदेश दै कैई बीमारों कै ठीक कौरणै

³⁴ यीशु औरौ तैसकै चैलै किश्‍ती शै गलील झील कै पार कौरेयौ गन्नेसरत प्रदेश दै पोऊंचे।

³⁵ औरौ तिथै कै लोगै तैसीखै पोयछाणैयो नेड़ी-बैड़ी कै सौबी देशो दै खोबर भैजी दी, औरौ सौबी बीमारों खै तैसकै धोरे लोऊवे।

³⁶ औरौ तैसी कैईंदै बिन्ती कौरदै लागै, कै सै तिनु आपणै खोटणो कै ही छुणौ दैंव; औरौ जैतरै तैसीखै छुआ, सैजै ठीक हौए गौवै।