मत्ती 13 - सिरमौरी नौवाँ नियम

बीज़ बौणौवाल़ै का उदारण

¹ तैसी दूसै यीशु घोरो दा निकल़ैबा गलील झील कै किनारे जायौ बौठा।

² औरौ ऐशणी बौड़ै भीड़ तैसकै धोरे कौठै हौए कै सै किश्‍ती पांदी चौढ़ै गौआ, औरौ सौबै भीड़ किनारे पांदी खौड़ै रौए।

³ औरौ तैणै तिनुखै उदारण दैयौ बौहिती बातौ बुली, “ऐक किसान आपणै खेतौ दा बीज़ बोंदा हौटा।

⁴ बोन्दै बैई किछै बीज़ बाटौ कै मियाल़ो पुंडे छुटै औरौ चुड़कुल़ै आयौ तिनुखै खाए दिए।

⁵ किछै बिज़ शोकरेड़े जोमीनो पांदी छुटै, जिथै तिनुखै बौहितै माटी ना भैटी, औरौ डुंगै माटी ना भैटणौ कै बौजैह शै तावल़ै जामै गौवै।

⁶ पौरौ सुरज निकल़णौ पांदी सै फोखे गौवै, औरौ तिथकै जोड़ डुंगी ना थी इथकारिए सै शोकै गौवै।

⁷ किछै बिज़ झाड़ी मुंजी छुटै, औरौ झाड़ीए जामेयोंदे बिज़ दबाए दिए।

⁸ पौरौ किछै बीज़ बड़िया जोमीनो पांदी छुटै, औरौ बौहितै फौल़े गौवै; औरौ कुणजैई बीज़ तीस गुणा, कुणजैई बीज़ साठ गुणा, औरौ कुणजैई बीज़ शौ गुणा फौल़े गौवै।”

⁹ “जिनु कुणिए मैरै बात शुणी लोए, सै ध्यान सै शोणेया।”

उदारणो का मकसद

¹⁰ औरौ चैलै तैसकै धोरे आयौ पूछु, “तू लोगौआरी उदारण दैयौ किथुखै बातौ कौरे?”

¹¹ तैणै जोवाब दिया, “तुऔं खै तौ पौरमेशवरे आपणै राज्य कै भैद बौताए राए, पौरौ तिनुखै ना दैय रैई।

¹² जिथुखै जैसकैंई औसौ, तैसीखै पौरमेशवर बौहितै सौमझ दैला। पौरौ जैसकैंई किछै बै सौमझ ना आथी, तौ पौरमेशवर तैसी कैईंदै सैजै सौमझ बै उंढी कौरदा जू तैसीकैईं औसौए।

¹³ हांव तिनुआरी उदारणो दी इथकारिए बातौ कौरु की सैजै दैखदै बैई बै ना दैखौ औरौ शुणदै बैई बै ना शुणौ औरौ किछै ना सौमझौ।

¹⁴ तिनकै बारै दै यशायाह पौरमेशवर कै बातौ बौताणौवाल़ै कै ऐजै भविष्यवाणी पूरी हौं: ‘तुऐं कानो लैई तौ शुणल़ै, पौरौ सौमझदै ना; औरौ आखी लैई तौ दैखलै, पौरौ तोंवारै किछै ना सौमझीदुं।’

¹⁵ ‘जिथुखै इनु लोगौ का मन सुस्त हौए गौआ, औरौ सै कानो लैई ऊंचु शुणौ औरौ तिनुऐ आपणी आखी बंद कौरे रैई; कोदी ऐशै नी हौं कै सै आखी लैई तौ दैखौ, औरौ कानो लैई शुणौ औरौ मनो दौ सौमझौ, औरौ मैरै ढौबौ फैरै जांव, औरौ हांव तिनुखै ठीक कौरु।’”

¹⁶ “पौरौ धन्‍य औसौ तुंआरी आखी, कै सै दैखौ औरौ तोंवारै कान कै सै शुणौए।

¹⁷ जिथुखै हांव तुऔं खै साचौ बुलू, कै बौहितै पौरमेशवर कै बातौ बौताणौवाल़ै औरौ धरमीए चोऊ कै जू बातौ तुऐं दैखौए, दैखौ, पौरौ ना दैखी, औरौ जू बातौ तुऐं शुणौए, शुणौ, पौरौ ना शुणी।”

बिज़ बौणौवाल़ै उदारण का बखान

¹⁸ ऐबै तुऐं बिज़ बौणौवाल़ै उदारण का मतलब शुणौ।

¹⁹ जू कुणिए पौरमेशवर कै राज्य का वचन शोणेयो ना सौमझौ, औरौ जू किछै तैसकै मन दो बौए राए थियु तिथु दुष्ट शैतान आयौ चुराएयो लौए जांव; ऐजौ सैजौई औसौ जू बाटो कै मियाल़ो पुंडु बौए राए थियु।

²⁰ औरौ जू पथरीली जोमीनो पांदी बौए राए थियु, “ऐजै सैजै औसौ जू पौरमेशवर का वचन खै शोणेयो तौलोंई खुशी सै मानौए।”

²¹ पौरौ पौरमेशवर कै वचन कै आपणै मनो कै भीतरै बौठणौ ना दैंव, औरौ ऐसी बौजैह शै सैजै दैणिक दूसौ तौड़ी टिकयौंदे रौंव; इथकै बाद जोबै पौरमेशवर कै वचन की बौजैह शै तिनु पांदी दुख औरौ तकलीफ आंव, तौ सै तौलोंई बिशवाश कौरणा छोड़े दैंव।

²² जू झाड़ी मुंजी बोए राए, सैजै ऐजै लोग औसौ जिनुवै पौरमेशवर कै वचन कै शुणा, पौरौ आपणै जीवन कै चिन्‍ता, औरौ धन-दोलत कै धौखै कै बौजैह शै वचन कै मानणा छोड़े दैंव; औरौ सैजै बिना फोल़ कै जिन्दगी जियौं।

²³ औरौ जू बड़िया जोमीनो पांदी बौए राए थिए, ऐजै सैजै लोग औसौ; जू पौरमेशवर का वचन शोणेयो सौमझौ औरौ आपणै जीवन दै कैई फोल़ लांव। जैशैकै तीस गुणा बिज़ वाल़ै पोधै, साठ गुणा बिज़ वाल़ै, औरौ शौ गुणा बिज़ वाल़ै पोधै।

गियुँ औरौ जोंगली बिज़ का उदारण

²⁴ यीशुए तिनुखै ऐक उदारण होजो दिया, “स्वर्ग का राज्य, तैसी किसान कै साए औसौ जैणै आपणै बागड़ी दै आछै बिज़ बौए राए।

²⁵ पौरौ जोबै लोग सोतै रौवै थिए तोबै तैसका बौयरै आयौ गियुँ कै बीचौ दै जोंगली बिज़ बौएयो हौटै गौआ।

²⁶ जोबै तुणै निकल़ै औरौ बाली लागी, तोबै जोंगली दाणै कै पौधे बै देखिऐ

²⁷ इथपांदी घोरो कै नोकरे आयौ तैसी बौल़ौ, ओए रै मालिक, का तुऐं आपणै बागड़ी दै आछै बिज़ नै बौए राए थी? तोबै जोंगली दाणै कै पोधै तिंदै कुकै दै आए?

²⁸ तैणै तिनुखै बौल़ौ, ‘ऐजा कोसी बौयरी का काम औसौ।’ नोकरे तैसीखै बौल़ौ, ‘का तैरी इछा औसौ, की आमै जाऐबा खरपतवार कौठै कौरु?’

²⁹ तैणै बौल़ौ, ‘ना, ऐशै नै कौरेया कोदी खरपतवार कौठै कौरदै बैई तुऐं तिथकै साथै गियुँ बै उंढे ना घाड़ो।

³⁰ काटणौ तौड़ी दु कै ऐक साथै जामणौ दैंव, औरौ काटणौ कै सौमय हांव काटणौवाल़ौ खै बुलूबा कै आगै खरपतवार कौठै कौरेयौ जौल़ाणौ खै तिनकै पूल़ै बानै पांव, औरौ गियुँ मैरै कोठारो दै कौठै कौरौ।’ ”

राई कै बिज़ का उदारण

³¹ तैणै तिनुखै ऐक उदारण हौजौ दिया, “स्वर्ग का राज्य राई कै दाणै कै जैशणा औसौ, जैसी कोसी आदमीए आपणै बागड़ी दा जाएयो बौए दिया।

³² सै सौबी बीजौ दा नानड़ा औसौ पौरौ जोबै बौड़ै जांव तोबै सौबी शागौ मुंजीदा बौड़ा हौए जांव, औरौ ऐशणा डाल़ बौणै जांव, की गौयण कै चुड़कुल़ै आयौ तिथकै डाल़ी पांदी कोएलाण बाणौ।”

खमीर का उदारण

³³ तैणै तिनुखै ऐक उदारण होजो शुणाया, की स्वर्ग का राज्य खमीर कै जैशणा औसौ जैसीखै कोसी बैटमाणिशै लायो बौहितै नाजो आरी मिलाए दिया औरौ हौंदै-हौंदै सै सौबै खमीर हौए गौ।

उदारणो का इस्तैमाल

³⁴ ऐजी सौबै बातौ यीशुए उदारण दैयौ लोगौ खै बुली, औरौ सै हमैशा तिनुखै उदारण देएयो तिनुआरी बातौ कौरौ थिया।

³⁵ की जू वचन पौरमेशवर कै बातौ बौताणौवाल़ै कै दवारा बौल़ै राए थिया, सै पूरा हौंव की हांव उदारण दैणौ खै आपणौ मुं खुलबा: “हांव तिनु बातौ खै जू दुनिया कै बाणणौ दी औगौड़ियौ छिपैयौंदी औसौ, तिनुखै बौतांदा।”

जोंगली बिज़ कै उदारणो कै व्याख्या

³⁶ तोबै यीशु भीड़ छोडे़बा घोरो खै ओऊवा, औरौ तैसकै चैलै तैसकै धोरे आयौ बौल़ौ, “की बागड़ी कै जोंगली दाणै का उदारण आमुखै सौमझाए दै।”

³⁷ यीशुए तिनुखै जोवाब दिया, “की आछै बिज़ का बौणौवाल़ा किसान हांव आदमी का बैटा औसौ।”

³⁸ बागड़ी दुनिया कै लोग औसौ, औरौ आछौ बिज़ राज्य कै लोग औसौ, औरौ जोंगली बिज़ दुष्ट शैतान कै लोगौ औसौ।

³⁹ जैसी बौयरीए तिनुखै बोए राए सै शैतान औसौ; कटणी तैसी सौमय कै बौतांव जौल़ौ दुनिया का अन्त हौए जाला: औरौ काटणौ वाल़ै स्‍वर्गदूत औसौ।

⁴⁰ जैशैखै जोंगली दाणै कौठै कौरौ औरौ फोकै दैंव तैशैकैई दुनिया कै अन्त दो हौंदौ।

⁴¹ हांव आदमी का बैटा आपणै स्‍वर्गदूतौ खै भैजदा, औरौ आपणै राज्य मुंजी शै सौबै पाप कौरणौवाल़ै कै औरौ कुकर्म कौरणौवाल़ै खै कौठै कौरदा।

⁴² औरौ स्‍वर्गदूत तिनुखै आग कै कुण्डो दै पांदा, तिथै रुणु औरौ दांद चाकणौ हौंदौ।

⁴³ तैसी सौमय धरमी लोग आपणै पिता कै राज्य दै सुरज कै जैशणै चौमकदै; “जिनु कुणिए मैरी बात शुणी लोए, सै ध्यान शै शोणेया।”

गुप्‍त धन

⁴⁴ “स्वर्ग का राज्य ऐक खजाने साए औसौ, जैसी ऐकी आदमीए ऐकी बागड़ी दो दाबी दियु, औरौ ओकी आदमीए तिथु आयौ दैखौ औरौ पाछु दाबी दियु, औरौ खुश हौयौ आगु हौटा औरौ आपणौ सौब ठुँ बैकेबा तियौं बागड़ी खै मोलै लोए।”

कीमती मौती

⁴⁵ “औरौ हौजौ स्वर्ग का राज्य बणिऐ साए औसौ, जू आछै हीरे की ताको दा थिया।

⁴⁶ जोबै तैसीखै कीमती हीरा भैटा तौ तैणै जाऐबा सौब ठुँ बैकै पोऊँ औरौ हीरे खै मोलै लौआ।”

जालो का उदारण

⁴⁷ “हौजौ स्वर्ग का राज्य तैसी बोहिती माछी थामणो कै जालो साए औसौ, जू समुन्द्रो दो बैगाए राए, औरौ सौबी भान्त की माछी खै खिंचैयौ लांव।

⁴⁸ औरौ जोबै जाल भोरै गौ, तौ मोछुवारै जाल कै किनारे पांदी खिंचौ, औरौ बौठैबा आछी-आछी माछी खै बासनौ दी कौठी कौरी, औरौ बैकार-बैकार माछी कै बैगाए दी।

⁴⁹ दुनिया कै अन्त दो ऐशैखैई हौंदौ; औरौ स्‍वर्गदूत आयौ दुष्ट लोगौ खै धरमी लोगौ शै जौई कौरदै।

⁵⁰ औरौ दुष्ट लोगौ कै आग कै कुण्ड दै बैगाए दैंदै। तिथै रुणु औरौ दांद को चाकणौ हौंदौ।”

नुई औरौ पुराणी शिक्षा का मोल

⁵¹ “का तुऐं ऐजी सौबै बातौ सौमझी?” चैलै तैसी जोवाब दिया, “हौर।”

⁵² यीशुए तिनुकै बौल़ौ, “इथकारिए हरेक यहूदी शास्त्री जू स्वर्ग कै राज्य का चैला बौणै रौआ, तैसी घोरो कै ठोगड़े साए औसौ जोबै सै पुराणी औरौ नुई शिक्षाओं खै तैसी ठाँव शै बायरै घाड़ो जिथै सै ओकी कै मौदद कौरणौ कारिए तिनु कौठी कौरौ।”

यीशु को नासरत गांव दो औटेयौ आणौ

⁵³ जोबै यीशुए ऐजै सौबै उदारण बौल़ै पाए, तौ तिथैदा हौटै गौआ।

⁵⁴ औरौ आपणै नासरत गांव दा आयौ तिनकै यहूदी सभा-घोरो दा तिनुखै ऐशणा उपदैश दैंदा लागै गौआ; कै सै हैरान हौयौ बौलदै लागै; की “ऐसीखै ऐजा ज्ञान औरौ चौमत्कार कै काम कुकै दै भैटी?

⁵⁵ का ऐजा बाढ़ोई का बैटा ना आथी? औरौ ऐसकै माँ को नांव मरियम औरौ ऐसकै भाई को नांव याकूब औरौ यूसुफ औरौ शमौन औरौ यहूदा ना आथी?

⁵⁶ औरौ का तैसकी बोईणी इथै आमु मुंजी ना रौंव? तोबै बै ऐजौ सौबै ऐसीखै कुकै दो भैटौ?”

⁵⁷ इथकारिए तिनुऐ तैसकै बातौ पांदी बिशवाश ना कौरी। पौरौ यीशुए तिनुखै बौल़ौ, “पौरमेशवर कै बातौ बौताणौवाल़ै आपणै देश औरौ आपणै घोर छोड़ेयौ ओकते सारै ठाँव दा आदर पाव।”

⁵⁸ औरौ यीशुए तिथै तिनकै बिशवाश ना कौरणौ कै बौजैह शै चौमत्कार कै काम ना कौरी।