मत्ती 10 - सिरमौरी नौवाँ नियम

बारौ चैलै

¹ तोबै तैणै आपणै बारौ चैलै खै आपणै धोरे बोईदै औरौ तिनु दुष्टआत्मा पांदी औधिकार दिया, कै तिनुखै निकाल़ौ औरौ सौबी भान्त की बीमारियों औरौ कमजोरी खै दूर कौरौ।

² बारौ चोणेयौंदे चैलै कै नांव ऐजै औसौ: आगला शमौन जैसकौ नांव तैणै पतरस राखौ, औरौ तैसका भाई अन्द्रियास; जब्दी का बैटा याकूब औरौ तैसका भाई यूहन्ना।

³ फिलिप्‍पुस औरौ बरतुल्मै थोमा औरौ मामला लोणो वाल़ा मत्ती, हलफईस का बैटा याकूब औरौ तद्दै,

⁴ शमौन कनानी, जिथका मतलब औसौ खिजकुटा, औरौ यहूदा इस्‍करियोती, जैणै तैसीखै पोकड़वाऐ बै दिया।

चैलै खै सेवा कारिए छाड़णै

⁵ इनु बारौ चैलै खै यीशुए ऐजै आज्ञा देएयो भैजै कै, “बैगानै यहूदी लोगौ कै ढौबौ नै जाया, औरौ सामरी लोगौ कै कोसी नोगरो दै नै जाया।

⁶ पौरौ इस्राएल देश कै घोराणे कै खौऐयौंदी भेड़ो कै धोरे जाया।

⁷ औरौ हांडदै-हांडदै प्रचार कौरौ, औरौ बौल़ौ कै स्वर्ग का राज्य नेड़िक आए गौआ।

⁸ बीमारों खै ठीक कौरौ: औरौ मौरेयौंदे खै जियुंदी कौरौ, कोढ़ियों खै शुध्द कौरौ: औरौ दुष्टआत्मा खै घाड़ो: तुऐं मुफ्त पाए राए, मुफ्त ही दैंव।

⁹ आपणै बटुवे दु ना सूनु, औरौ ना पौयसै औरौ ना तांबा राखैया।

¹⁰ बाटो पुंडे खै ना तौ झोल़ा राखैया, औरौ ना दो खोटणो, ना जूते औरौ ना डैंगा राखैया, जिथुकै मजदूर कै तिनकौ खाणौ भैटिणौ चैंई।

¹¹ जैसी कोसी नोगरो या गांव दै जांव तौ पौता कौरेया कै तिथै कुण आछौ औसौ? औरौ तांव तौड़ी तिथैदै नै निकल़ौ, तैसकैई घोरे रौव।

¹² औरौ घोरे कै भिटै जांदै ही तैसीखै आशीष दैया।

¹³ जै तैसी घोरो कै लोग लायक हौलै तौ तोंवारै शान्तै तिनु पांदी बौणैयौंदे रौंदै, औरौ जै सै लायक नै हौलै तौ तोंवारै शान्तै तोंवारै धोरे पाछु आन्दै।

¹⁴ औरौ जू कुणिए तुऔं खै ना अपनांव, औरौ तुंआरी बातौ ना शुणौ, तौ तैसी घोरे या नोगर दै पाछु निकल़दै बैई आपणै लातो कै धूल बै झाड़ै दैया।

¹⁵ हांव तुऔं खै साचौ बुलू, न्याय कै दूसै तैसी नोगरो कै हालत सदोम औरौ अमोरा कै नोगरो कै हालत शै बै बैजाए जादा बुरी होंदी।”

आणौवाल़ा चैईथा सौमय

¹⁶ “दैखौ, हांव तुऔं भेड़ो कै जैशणै भेड़ियों कै बीच मुंजी छाड़ै दियु, इथकारिए शोंगोऊं कै जैशणै बुध्दिमान औरौ कबूतरों कै जैशणै भोल़ै बौणैया।

¹⁷ पौरौ लोगौ कैईंदै चौकश रौया, जिथु सै तुऔं खै महासभाओ दै निलै औरौ तुऔं यहूदी सभा-घोरो दै कौड़ै लान्दै।

¹⁸ तुऔं मुं कारिए राज्यपालो औरौ राजाओं कै सामणै तिनु पांदी, औरौ सौब देशो पांदी गवाह हौणौ कारिए पाहुंचाऐ जांदै।

¹⁹ जोबै सै तुऔं खै पाकोड़ल़ै तौ ऐजै फिकर नै कौरेया, कै आमै का बुलू बै औरौ का कौरुबै, जिथुकै जू किछै तुऔं कै बौलणौ हौल़ौ, सैजौ तुऔं तौलोंई बौताए दैंदै।

²⁰ पौरौ बापू पौरमेशवर कै आत्मा तुऔं खै बौताए दैला कै तोंवारै का बौलणौ।

²¹ लोग आपणै बिशवाशी भाईयों खै मार दैणौ कारिए थोमाले। औरौ बापू बै आपणै नानड़िया आरी ऐशैखैई कौरलै, औरौ नानड़िया आपणै माँ-बापू कै खिलाफ हौए जांदै, औरौ तिनु ओकी लैई मोरवाए दैंदै।

²² औरौ तुऐं मैरै चैलै औसौ इथकारिए सौबै लोग तुऔंआरी बैर कौरलै; औरौ जू आपणै मौरणौ कै सौमय तौड़ी मुं पांदी भोरोशा राखलै पौरमेशवर तैसीकै बौचाल़ा।

²³ जौल़ौ सै तुऔं खै ऐकी नगर दै सतालै, तौ ओकी नोगरो दै दौड़ै जाया। हांव तुऔं कै साचौ बुलू, की तुऐं इस्राएल देश कै सौबी नोगरो दै इबी तौड़ी हौटै बै ना रोली तोबै हांव आदमी का बैटा तुऔं दा आगै आए जांदा।”

चैला हौणौ का मतलब

²⁴ “चैला आपणै गुरु दा बौड़ा ना हौंव; औरौ ना ही नोकर आपणै मालिक दा बौड़ा हौंव।

²⁵ चैलै का गुरु कै जैशणा हौणा, औरौ नोकरो का आपणै मालिक कै जैशणा हौणा काफी औसौ; औरौ जोबै तिनुऐ मुखै घोरो कै मालिक कै शैतान बौल़ै राए तौ ऐजै मैरै घोरो कै लोगौ कै हौजौ बै बुरै नांव शै बौईददै।

कोस दौ डौरी?

²⁶ औरौ तिनु लोगौ शै नै डौरेया जू तुऔं धमकी दैंव। सैजा सौमय आए गौआ जोबै सौबै किछै ढौकैयौंदो सामणै आए जांदो औरौ जू किछै छिपैयौंदो औसौ सैजौ सौबै लोग जाणै पांदै।

²⁷ जू हांव तुऔं खै इनारै दो बुलू, तिथुखै पेयाशै दो बौल़ौ, औरौ जू कानो-कान शुणौ तिथका छोतौ पांदी दा प्रचार कौरौ।

²⁸ जू शोरीर खै मारै सौकौ, पौरौ आत्मा खै ना मार सौकौ, तिनुदै नै डौरेया पौरौ पौरमेशवर दै डौरेया जू आत्मा औरौ शोरीर दु खै नरक दा नाश कौरे सौकौ।

²⁹ का चिड़कुल़ै का जोड़ा बैजाए सोसता ना बिको? तोबै बै जै तिनुमुंजी दी ऐक बै जोमीनो पांदी छुटै जांव तौ पिता कै तिनकै बारै मुंजी पौता चालै जांव।

³⁰ पौरमेशवर तोंवारै जिन्दगी कै सौबी बातौ कै परवाह कौरौ। औरौ सै ऐजौ बै जाणौ कै तोंवारै मुंडो दै कैतरै बाल़ औसौ।

³¹ इथकारिए डौरेया नै, तुऐं बौहितै चिड़कुल़ै दै बै बौड़ैयो औसौ।”

यीशु कै मानणा या ना मानणा

³² “जू कुणिए आदमी कै सामणै बौल़ौ, कै सै मैरै चैलै औसौ तिनुखै हांव बै आपणै स्वर्गीय पिता कै सामणै बुलूबा कै ऐजै मैरै चैलै औसौ।

³³ पौरौ जै कुणिए ओकी आदमी कै सामणै ऐजौ बौलणौ शै डौरौए कै ऐजै मैरै चैलै औसौ, तौ हांव आपणै पिता शै जू स्वर्ग दा औसौ, बौलदा कै ऐजै मैरै चैलै ना आथी।”

³⁴ “ऐशै नै सौमझैया, की हांव धोरती पांदी लोगौ कै बीच शान्तै लांदा आए रौआ, हांव शान्तै लांदा नै पौरौ लोगौ कै बीच मुंजी लोड़ाए कौरवाणौ कारिए आए रौआ।

³⁵ पौरौ हांव तौ इथकारिए आए रौआ, कै आदमी खै तिनकै बापू शै, बैटी खै तियांरै माँ शै, औरौ बहू खै तियांरी शाशु कै खिलाफ कौरे दियु।

³⁶ आदमी कै दुशमन तैसकै घोरो कै ही लोग हौंदै।

³⁷ जू माँ बापू खै मुं दा जादा प्यार कौरौ, सै मैरै लायक ना आथी, औरौ जू बैटा या बैटी खै मुं दा जादा प्यार कौरौ, सै मैरा चैला बौणणौ कै लायक ना आथी।

³⁸ औरौ जू मैरै चैलै हौणौ की बौजैह शै दुख सैहणौ औरौ मौरणौ कारिए बै तैयार ना आथी, सै मैरा चैला बाणणौ कै लायक ना आथी।

³⁹ जू आपणै जिन्दगी बौचाणौ कै कौचिश कौरला, सै सौदा कै जिन्दगी गवांए दैला, औरौ जू मैरी बौजैह शै आपणै जिन्दगी गवाऐ दैला, सै स्वर्ग दै सौदा खै जिन्दगी पाला।”

इनाम

⁴⁰ “जू कुणिए मैरै नांव शै तुऔं खै अपनांव, सै मुखै अपनांव; औरौ जू कुणिए मुखै अपनांव, सै पौरमेशवर कै अपनांव, जैणै मुखै छाड़ै राए।

⁴¹ जू पौरमेशवर कै बातौ बौताणौवाल़ै खै तैसकै बातौ बौताणौवाल़ै जाणैयौ अपनांव औसौ, सै पौरमेशवर कै बातौ बौताणौवाल़ै कै जैशणा ही इनाम पाला, औरौ जू धरमी जाणैयौ धरमी खै अपनांव सै भोल़ै आदमी कै जैशणा ही इनाम पाला।

⁴² जू कुणिए इनु नानड़ै मुंजीदा ऐकी कै मैरा चैला जाणैबा सिरफ ऐक गिलास शैल़ै पाणी का पियालै, हांव तुऔं खै साचौ बुलू, कै पौरमेशवर जौरुर तैसी आदमी कै इनाम दैला।”