लूका 9 - सिरमौरी नौवाँ नियम

बारौ चैलै खै भैजै जाणै

¹ तोबै तैणै बारौ चैलै खै बौएदैयौ तिनु सौबी दुष्टआत्माओं औरौ बीमारियों कै दूर कौरणौ कै अनौखी शौकतै औरौ औधिकार दिया।

² औरौ तिनु पौरमेशवर कै राज्य का प्रचार कौरणौ, औरौ बीमारियों कै ठीक कौरणौ कारिए भैजै दिए।

³ औरौ तैणै तिनु बौल़ौ, “बाटो कारिए किछै नै निया, ना तौ डैंगा, ना झोल़ा, ना रोटी ना रुपीये, ना ही दो-दो खोटणो।

⁴ औरौ जैसी कोसी कै घोरे जाऐबा तुऐं रौलै, तिथी रौया, औरौ तिथैदै पाछु आया।

⁵ जू कुणिए तुऔं ना अपनांव तैसी नोगरो पौरैशौ पाछु निकल़ैयो आपणै लातो कै धूल झाड़ै दैया, कै तिनु पांदी गवाही हौंव।”

⁶ औरौ सै निकल़ैयो गांव-गांव सुसमाचार प्रचार कौरदै, औरौ हर कोसी लोगौ कै ठीक कौरदै फिरदै लागै।

हेरोदेस कौ घोबराणो

⁷ औरौ चौथाई देश का राजा हेरोदेस ऐजौ सौबै शोणेयो डौरे गौआ, कै यूहन्ना मौरेयौंदे मुंजीदा जियुंदी हौए गौआ। औरौ किछै नै बुली,

⁸ औरौ कैतरै लोग ऐजौ बौल़ौ, कै एलिय्याह दैखै रौआ, ओकीए ऐजौ, कै पुराणै पौरमेशवर कै बातौ बौताणौवाल़ै मुंजीदा कुणिए जियुंदा हौए गौआ।

⁹ पौरौ हेरोदेसे राजा बौल़ौ, “यूहन्ना बपतिस्मा दाता कौ तौ मोऐं मुंड काटै दियु थियु, ऐबै ऐजा कुण औसौ जैसकै बारै मुंजी ऐजी बातौ शुणीदी लागै रोई?” औरौ तैणै तैसीकै दैखणौ कै कौचिश कौरे।

पाँच हजार लोगौ खै खाणौ खियाणौ

¹⁰ तोबै चोणेयौंदे चैलै पाछु आयौ जू किछै तिनुऐ कौरे राए थियु, सौबै तैसीकैईं बौतौऊं। औरौ सै तिनु जौई कौरेयौ बैतसैदा शहर दै लोए गौआ।

¹¹ ऐजौ जाणैयौ भीड़ तैसकै पौछौड़ियौ हौए गौए, औरौ सै खुश हौयौ तिनुआरी भैटिया, औरौ तिनुआरी पौरमेशवर कै राज्य की बातौ कौरदा लागा, औरौ जू लोग ठीक हौणै चांव थिए, तिनु ठीक कौरे।

¹² जोबै दूस बीतदौ लागौ, तोबै बारौ चैलै आयौ तैसीखै बौल़ौ, “भीड़ौ कै जाणौ दैव, कै चोऊ ढौबौ कै गांवो औरौ बोस्‍तियो दै जायौ आपी कारिए रौणौ कै ठाँव औरौ खाणौ का शुजा कौरौ, जिथुकै आमै इथै शुनशान जौगैह दै औसौ।”

¹³ तैणै तिनु बौल़ौ, “तुऐंई तिनुखै खाणौ खै दैव।” तिनुऐ बौल़ौ, “आमुकैंई दो माछी औरौ पाँच रोटी कै छोड़ेयौ औकौ किछै ना आथी; पौरौ हां, जै आमु जायौ इनु सौबी लोगौ कारिए खाणौ मोलै लियांव, तौ हौए सौकौ।”

¹⁴ (जिथुकै तिथै लमसम पाँच हजार मर्द थिए) औरौ तैणै आपणै चैलै खै बौल़ौ, “तिनु पचाश-पचाश कौरेयौ बारी बारी शै बौठाल़े दैव।”

¹⁵ तिनुऐ ऐशैखैई कौरौ, औरौ सौबी कै बौठाल़े दिए।

¹⁶ तोबै तैणै सैजी पाँच रोटी औरौ दो माछी कौरी, औरौ स्वर्ग कै ढौबौ दैखैयो पौरमेशवर का धन्यवाद कौरा, औरौ रोटी तौड़ै-तौड़ेयो चैलै खै दैंदा लागा।

¹⁷ तोबै सौबै खाएयो छौकै गौवै, औरौ चैलै बौचेयौंदे टुकड़ै की बारौ शैकड़ी भोरेयो टिपी।

पतरस का यीशु खै मसीह मानणा

¹⁸ जोबै तैणै इकली दै प्रार्थना कौरे लोए थी, औरौ चैलै तैसकै साथै थिए, तौ तैणै तिनुआदो पूछु, “लोग मुखै का बौल़ौ?”

¹⁹ तिनुऐ जोवाब दिया, “यूहन्ना बपतिस्मा दाता, पौरौ कुणिए-कुणिए एलिय्याह; औरौ कुणिए ऐजौ बै कै पुराणै पौरमेशवर कै बातौ बौताणौवाल़ै मुंजीदा कुणिए ऐक जियुंदा हौए गौआ।”

²⁰ तैणै तिनुआदो पूछु, “पौरौ तुऐं का बिशवाश कौरौ कै हांव कुण औसौ?” पतरसे जोवाब दिया, “पौरमेशवर का मसीह।”

²¹ तोबै यीशुए आपणै चैलै खै चिताऐबा बौल़ौ, “मैरै बारै मुंजी कोसीयागे नी बौलेया।”

यीशु दवारा आपणी मौरणौ कै बारै मुंजी बौताणौ

²² औरौ तैणै बौल़ौ, “मुं आदमी कै बैटै कारिए जौरुरी औसौ, कै बौहितै दुख झैलू, औरौ बुड़ेईक औरौ मुख्य यहूदी पुरोहित, औरौ यहूदी शास्त्री मुखै नोकारा सौमझेयौ मारै दैलै, पौरौ हांव ती दूसौ कै बाद जियुंदी हौंदा।”

यीशु कै चैलै बौणणौ का मतलब

²³ तैणै सौबी कै बौल़ौ, “जै तुऐं मैरै चैलै बौणणे चांव, तौ तुऔं खै आपणी इछाएं छुड़णी पौड़ली। औरौ रौज आपणा क्रूस टिपेबा मैरै पौछौड़ियौ चालणौ पोड़लो (आपणै क्रूस उठाणौ का मतलब औसौ दुख औरौ नेंदैया सोणै पोड़दै औरौ इथै तौड़ी कै आपणै प्राण बै दैणै पोड़लै)।

²⁴ जिथुकै जू कुणिए इयौं धोरती पांदी आपणै जिन्दगी बौचाणौ कै कौचिश कौरला, सै हमैशा कै जिन्दगी गवांए दैंदा, पौरौ जू कुणिए मुं पांदी बिशवाश कौरलै औरौ जू कुणिए मुं कारिए आपणै जिन्दगी गंवाला, सै स्वर्ग दै हमैशा कै जिन्दगी पांदा।

²⁵ ऐक आदमी खै का भेटलो जै तैसीकै पूरी दुनिया की चीज़ौ भेटली? पौरौ हमैशा कै जिन्दगी खोए दैला, तौ तैसीखै का फायदा हौंदा?

²⁶ जू कुणिए मुं दै औरौ मैरी बातौ दै शरमाले; हांव आदमी का बैटा बै, जोबै पवित्र स्‍वर्गदूतौ कै साथै आपणै पिता कै महिमा कै साथै इयौं धोरती पांदी ओऊंबा, तोबै हांव बै तिनुकै भाजै जांदा, कै तुऐं मैरै चैलै औसौ।

²⁷ हांव तुऔं कैंई साचौ बुलू, तुऔं मुंजी शै किछै लोग जू इथै खौड़ै औसौ, तिनुमुंजी दै कैतरै ऐशणै औसौ, कै सै आपणै मौरणौ दै औगौड़ियौ पौरमेशवर कै राज्य खै आन्दै दैखदै।”

मूसा औरौ एलिय्याह कै साथै यीशु

²⁸ इनु बातौ कै आठ दूसौ बाद सै पतरस, औरौ यूहन्ना, औरौ याकूब खै आपणै साथै नियौ प्रार्थना कौरणौ कारिए ऐकी धारो पांदी हौटै गौआ।

²⁹ जोबै तैणै प्रार्थना कौरे लोए थी, तौ तैसकै मुँह का भैष बौदलै गौआ, औरौ तैसकै खोटणो चिटै हौयौ चौमकौन्दै लागै।

³⁰ तोबै, मूसा, औरौ एलिय्याह ऐजै दो आदमी तैसकै साथै बातौ कौरदै बैई दैखियै।

³¹ ऐजै महिमा सहित दैखियै, औरौ तैसकै मौरणौ की चौर्चा कौरे लोए थै, जू यरूशलेम शहर दौ हौणौवाल़ौ थियु।

³² पतरस औरौ तैसकै साथै छोकैयौ कै नींदो दै थिए, औरौ जोबै सै आछ कौरेयौ बिज़ गौवै, तौ तैसकौ झमाकैदार पेयाशो दैखौ औरौ तिनु दु आदमी कै बै दैखै, जू तैसकै साथै खौड़ै थिए।

³³ जोबै सै तैसकै धोरे दै जांदै लागै, तौ पतरसे यीशु खै बौल़ौ, “ओए रै मालिक, अमारै इथै रौणौ आछौ औसौ: औरौ आमुए तीन तोम्बू बौणौऊंबे, ऐक तांव कारिए, ऐक मूसा कारिए, ऐक एलिय्याह कारिए।” सै ना जाणौ थिया, कै का बौल़ै लो।

³⁴ तैणै ऐजौ बौल़ै लो थियु, कै ऐक बादल़ आयौ तिनु पांदी छाए गौआ, औरौ जोबै सै तैसी बादल़ो शै घेरे गौवै तोबै सै डौरे गौवै।

³⁵ औरौ तैसी बादल़ौ पौरेशो पौरमेशवर कै ऐजौ बौलदै बैई शुणा कै, “ऐजा मैरा बैटा औसौ औरौ मैरा चोणेयौंदा औसौ, ऐसकी शुणौ।”

³⁶ ऐजी आवाज़ खत्म हौन्दै ही तिनुकै यीशु तिथै इकली दैखिया; औरौ जू किछै तिनुऐ दैखै राए थियु, तिनुऐ तैसी सौमय दो तिथकै बारै मुंजी कोसी कैंई किछै ना बुली पौरौ सै चुपी रौवै।

भेइया खै दुष्टआत्मा शै छुटकारा

³⁷ ओकी दूसै जोबै सै धारो पौरैशै उतरे तौ तिनु ऐक बौड़ै भीड़ भैटी।

³⁸ तोबै भीड़ौ मुंजीदै ऐकी आदमीए लैरौ मारैयौ बौल़ौ, “ओए रै गुरुजी, हांव तांव कैईंदै बिन्ती कौरु, कै मैरै बैटै पांदी दया कौर; जिथुकै सै मैरा इकलौता बैटा औसौ।

³⁹ औरौ ऐक दुष्टआत्मा तैसी पाकड़ो औरौ सै एकदम लैरौ मारदा लागौ औरौ सै तैसी ऐशै ओकेड़ो कै तैसकै मुँओं बाटी शेपो आए जांव; औरौ तैसी दबायो बौड़ै मुशकिल शै छोड़ो।

⁴⁰ मोऐं तैरै चैलै कैईंदै बिन्तै कौरे, कै तियौं दुष्टआत्मा कै गाड़ै दैव, पौरौ तिनकै ना गाड़ी।”

⁴¹ यीशुए जोवाब दिया, “ओए रै बिशवाश ना कौरणौवाल़ै औरौ हठीले लोगौ, हांव कोलो तौड़ी तोंवारै साथै रौंदा औरौ कोलो तौड़ी तुऔं झैलदा? आपणै बैटै खै इथै लियांव।”

⁴² सै आन्दा ही लागै रौआ थिया कै दुष्टआत्माएं तैसीकै पोटकेयो मोरोड़ै दिया, पौरौ यीशुए दुष्टआत्मा कै डांटैयौ औरौ भैईया कै ठीक कौरेयौ तैसकै बापू कै सौंपै दिया।

⁴³ तोबै सौबै लोग पौरमेशवर की बौड़ै शौकतै सै हैरान हौए गौवै। पौरौ जोबै सोबै लोग तिनु सौबै कामौ शै जू सै कौरौ थिया, हैरानी कौरे लोए थी, तौ तैणै आपणै चैलै खै बौल़ौ,

⁴⁴ “तुऐं इनु बातौ पांदी ध्यान दैव, जिथुकै हांव आदमी का बैटा, बौयरै कै हाथौ लैई थोम्बाए जाणौ कै औसौ।”

⁴⁵ पौरौ सै इनु बातौ कै सौमझौ नै थिए, औरौ ऐजी बातो तिनुआदी छिपीयोंदी रोई; कै सै तैसी जाणै नी पाव; औरौ सै इनु बातौ कै बारै मुंजी तैसी कैईंदु पूछणो शै डौरौ थिए।

सौबिदा बौड़ा कुण औसौ?

⁴⁶ तोबै चैलै आपी मुंजी बैहस कौरदै लागै कै आमु मुंजी बौड़ा कुण औसौ?

⁴⁷ पौरौ यीशुए तिनकै मन कै विचार जाणै पाए, औरौ ऐकी भेइया खै लोयो आपणै धोरे खौड़ा कौरा।

⁴⁸ औरौ तिनु बौल़ौ, “जू कुणिए मैरै नांव शै ऐसी भेइया कै बै अपनांव, सै मुखै अपनांव; औरौ जू कुणिए मुखै अपनांव सै मैरै भैजणौवाल़ै पौरमेशवर कै अपनांव, जिथुकै जू तुऔं मुंजीदा सौबिदा नानड़ै दा नानड़ा औसौ, सैजाई बौड़ा औसौ।”

जू अमारै खिलाफ नी, सै अमारै ढौबौ औसौ

⁴⁹ तोबै यूहन्नाए यीशु खै बौल़ौ, “ओए रै मालिक, आमुए ऐकी आदमी खै तैरै नांव कै शौकतै शै दुष्टआत्माओं खै घाड़दै बैई दैखा, औरौ आमुए तैसीखै मोना कौरौ, कै ऐशैखै नै कौर, जिथुकै सै आमु जैशणा तैरा चैला ना आथी।”

⁵⁰ यीशुए तैसी बौल़ौ, “तैसी मोना नै कौरौ, जू तोंवारै खिलाफ दै ना आथी, सै तोंवारै ढौबौ औसौ।”

यरूशलेम शहर कै ढौबौ जाणौ

⁵¹ जोबै यीशु कै स्वर्ग उठाए जाणौ कै दूस नेड़िक थिए, तौ तैणै यरूशलेम शहर जाणौ का पाका विचार कौरा।

⁵² तैणै आपणै औगौड़ियौ सौंदेश दैणौवाल़ै छाड़ै। सै सामरी लोगौ कै इलाके कै ऐकी गांव दै हौटै कै तैसी कारिए ठाँव तैयार कौरौ।

⁵³ पौरौ तिनु लोगै यीशु का स्वागत ना कौरी, जिथुकै सै यरूशलेम शहर जांदा लागै रौआ थिया।

⁵⁴ ऐजौ दैखैयो तैसकै चैलै याकूब औरौ यूहन्नाए बौल़ौ, “ओए रै प्रभु यीशु, तू का चांए, कै आमु आज्ञा दै, कै स्वर्ग पौरैशै आग बोरशो औरौ तिनु खत्म कौरे दैंव?”

⁵⁵ पौरौ तैणै तिनु पाछु फिरैयौ झिड़कै (औरौ बौल़ौ, “तुऐं जाणौ ना कै तुऐं कैशणै आत्मा कै औसौ।

⁵⁶ जिथुकै हांव आदमी का बैटा लोगौ कै प्राणो का नाश कौरदा नै पौरौ बौचाणौ कारिए आए रौआ।” औरौ सै कोसी ओकी गांव दै हौटै गौए)

यीशु कै चैलै बाणणौ का मतलब

⁵⁷ जोबै सै बाटौ पुंडे चालै रौवै थिए, तौ कोसीए तैसीकै बौल़ौ, “हांव तैरा चैला बोणणौ कारिए तैरै साथै हांडणा चोऊं।”

⁵⁸ यीशुए तिनु बौल़ौ, “सेयाल़ी कै डुँ औरौ गौयणै कै चुड़कुल़ै कै कोएलाण हौंव, पौरौ मुं आदमी कै बैटै कैंई घोर बै ना आथी जिथै हांव सोतै सौकु।”

⁵⁹ तैणै ओकी कै बौल़ौ, “मैरा चैला बौण।” तैणै बौल़ौ, “ओए रै प्रभु, आगै मुखै घोरो जाणौ दै कै मैरै बापू कै मौरणौ कै बाद, हांव तैसी दबाए दियु, तोबै आयौ हांव तैरा चैला बोणदा।”

⁶⁰ तैणै तैसीखै बौल़ौ, “जू लोग मौरेयौंदे कै जैशणै औसौ, तिनुखै ही आपणै लोगौ कै मौरणौ का इंतजार कौरणौ दैव, पौरौ तू जायौ खै पौरमेशवर कै राज्य का प्रचार कौर।”

⁶¹ ऐकीए हौजौ बौल़ौ, “ओए रै प्रभु, हांव तैरा चैला बोणदा, पौरौ औगौड़ियौ मुखै आपणै घोरो कै जाणौ दै, कै आपणै लोगौ कै विदा कौरेयौ ओऊं।”

⁶² यीशुए तिनुकै बौल़ौ, “जू कुणिए पाछु फिरैयौ दुनिया की चीज़ौ का लालच कौरौ, सै पौरमेशवर कै राज्य कै लायक ना आथी।”