लूका 4 - सिरमौरी नौवाँ नियमयीशु कै परीक्षा ( मत्ती 4:1-11 ; मर 1:12-13 ) 1 तोबै यीशु पवित्र आत्मा दा भोरेयो यरदन नोंदी शा पाछु ओऊवा, औरौ चाल़ीश रातै-दूसौ तौड़ी पवित्र आत्मा कै शिखाणौ शै उजाड़ जौगैह पांदी फिरदा रौआ। 2 औरौ शैतान तैसीखै परीक्षा कौरदा रौआ तिनी दूसौ तौड़ी तैणै किछै ना खैई औरौ जोबै सैजै दूस पूरै हौए गौए तोबै तैसीखै भूख लागै 3 तोबै शैतानै तैसीखै बौल़ौ, “जै तू सौथी कै पौरमेशवर का बैटा औसौ तौ इयौं बातौ कै साबित कौरणौ कारिए आदैश दै कै ऐजै पाथर रोटी बौणै जांव, ताकि तू इनु खाए सौकै।” 4 यीशुए तैसी जोवाब दिया, “जैशै पवित्र शास्त्र दो लैखै राए कै ‘आदमी सिरफ रोटी शै ही ना बौचै सौकौ।’” 5 तोबै शैतान तैसीखै लौए गौआ औरौ तैसीकै पल भर दै दुनिया कै सौबै राज्य दिखाए। 6 औरौ शैतानै बौल़ौ, “हांव ऐजा सारा औधिकार औरौ ऐजै सारै ठाट-बाट ताखै दैय दैंदा, जिथुकै ऐजौ सौबै मुखै दैय राए। 7 इथकारिए जै तू मुखै ढाल़ कौरे तौ ऐजौ सौबै तैरौ हौए जांदो।” 8 यीशुए तैसी जोवाब दिया, “पवित्र शास्त्र दो लैखै राए: ‘तू आपणै प्रभु पौरमेशवर कै झोकैबा ढाल़ कौर; औरौ सिरफ तैसकै सेवा कौर।’” 9 तोबै सै तैसी यरूशलेम शहर खै लौए गौआ औरौ मन्दिर कै चुटियो पांदी खौड़ा कौरे दिया। औरौ तैसीखै बौल़ौ, “जै तू सौथी कै पौरमेशवर का बैटा औसौ तौ इयौं बातौ कै साबित कौरणौ कारिए आपी खै इथैदा उदा छुड़ा। 10 जिथुखै पवित्र शास्त्र दो लैखै राए, ‘कै सै आपणै स्वर्गदूतौ खै आज्ञा दैंदा कै सैजै तैरै रक्षा कौरदै।’ 11 औरौ ‘सै ताखै हाथौ हाथ थाम्बै दैंदै, कोदी ऐशै नै हौंव तैरै लातो दा पाथरो लैई ढैस लागौ।’ 12 यीशुए तैसीकै जोवाब दिया कै, पवित्र शास्त्र दो ऐजौ बै लैखै राए, ‘कै तू आपणै पौरमेशवर कै परीक्षा नै लोएया।’” 13 जोबै शैतानै सौबै परीक्षा कौरे पाए, तोबै किछै सौमय कारिए तैसकै धोरे दा आगु हौटा। गलील जिले दै सेवा कै काम ( मत्ती 4:12-17 ; मर 1:14-15 ) 14 तोबै यीशु पवित्र आत्मा की अनौखी शौकतै दा भोरेयौ, गलील जिले दा हौटा, औरौ तैसकै चौर्चा गलील जिले कै आंडे-पांढे कै सौबी जौगैह दै फोयलै गौए। 15 औरौ सै तिनकै यहूदी सभा-घोरो दा जाएयो उपदैश दैंदा रौआ, औरौ सौबै तैसकै बौड़ाए कौरदै लागै। नासरत गांव दा यीशु का अनादर ( मत्ती 13:53-58 ; मर 6:1-6 ) 16 तोबै यीशु नासरत गांव दा पाछु ओऊवा, जिथै सै पाला पोसा गौआ थिया, औरौ आपणै भोवार कै हिसाब शै विशांव कै दूसै यहूदी सभा-घोर दा जायौ पवित्र शास्त्र पोढ़णो कारिए खौड़ा हौआ। 17 तौ यशायाह पौरमेशवर कै बातौ बौताणौवाल़ै कै किताब यीशु कै दी, औरौ तैणै किताब खौलेयौ सैजै जगह निकाल़ै जिथै ऐजौ लैखै राए थियु: 18 “प्रभु का पवित्र आत्मा मुं पांदी औसौ, इथकारिए तैणै मैरा अभिषेक कौरे राए, औरौ तैणै मुखै कैदी कै आज़ाद कौरणौ कारिए, आन्धै कै नज़र दैणौ कारिए, औरौ दोबैयौंदे कै छुड़ाणो कारिए, औरौ ऐजौ बौताणौ कारिए कै पौरमेशवर कै दया दिखाणौ का सौमय आए गौआ इथकारिए छाड़ै राए। 19 औरौ प्रभु कै अनुग्रह कै सौमय का प्रचार कौर सौकु।” 20 तोबै तैणै पवित्र किताब बन्द कौरे दै, औरौ सेवक कै हाथौ दै दैय दी औरौ बौठै गौआ: औरौ यहूदी सभा-घोर कै सौबी लोगौ की नज़र तैसी पांदी थी। 21 तोबै यीशु तिनु बौलदा लागा, “ऐलोई पवित्र शास्त्र का ऐजा लैख तोंवारै सामणै पूरा हौआ।” 22 सौबीए तैसकै तारीफ कोरी औरौ जू अनुग्रह की बातौ तैसकै मुँह शै निकल़ौ थी, तिनु शोणेयो सै हैरान हौयौ बौलदै लागै, “का ऐजा यूसुफ का बैटा ना आथी?” 23 तोबै यीशुए भीड़ौ खै बौल़ौ, “तुऐं मुं पांदी ऐजा किस्सा जौरुर बौलदै, ‘कै ओए रै वैध, आपी कै ठीक कौर, जू किछै आमुए शौणै राए कै कफरनहूम नगर दै तुऐं कौरे राए, सैजौ इथै आपणै गांव दौ बै कौर।’” 24 औरौ यीशुए बौल़ौ, “हांव तुऔं कै साचौ बुलू, कै कुणिए बै पौरमेशवर की बातौ बौताणौवाल़ा आपणै देश दै इज्जत ना पांव। 25 मैरै बात शुणौ। हांव तुऔं साचौ बुलू, कै एलिय्याह पौरमेशवर कै बातौ बौताणौवाल़ै कै दूसौ दौ जौल़ौ साढ़े तीन सालो तौड़ी बोरखा ना होई, इथै तौड़ी कै सारै इस्राएल देश दा बैजाए बौड़ा काल़ पौड़ा, तौ इस्राएल देश दै बौहिती विधवाएं थी। 26 पौरौ एलिय्याह कै इस्राएल देश दा कोसी बै विधवा धोरे ना छाड़ी, सिरफ सैदा शहर कै सारफत इलाके दा ऐकी गैर यहूदी विधवा कै धोरे छाड़ा। 27 औरौ एलीशा पौरमेशवर कै बातौ बौताणौवाल़ै कै सौमय इस्राएल देश दै बौहितै कोढ़े थिए, पौरौ सीरिया देश कै गैर यहूदी नामान आदमी कै छोडे़बा तिनु मुंजीदा कुणिए बै ठीक ना कौरी।” 28 ऐजी बातौ शोणेयो कैई जिशैक लोग यहूदी सभा-घोरो दै थिए, सौबै गुस्से शै भोरै गौवै। 29 औरौ ऊबै बिज़यो तैसीकै गांव पौरैशा बायरै गाड़ा, औरौ जैसी धारो पांदी तिनका गांव बौसेयौंदा थिया, तिथकी चुटियो पांदी निया, कै तैसी तिथैदा उदा रीड़ायो मारै दैंव। 30 पौरौ सै तिनकै बीचो मुंजीदा बौचेयौ आगु हौटा। दुष्टआत्मा कै बायरै गाड़णै ( मर 1:21-28 ) 31 तोबै सै गलील जिले कै कफरनहूम नगर दा हौटा, औरौ विशांव कै दूसै लोगौ कै उपदैश दैन्दा लागा। 32 सै तैसकै उपदैश लैई हैरान हौए गौवै जिथु सै औधिकारो कै साथै बौल़ौ थिया। 33 यहूदी सभा-घोरो दा ऐक आदमी थिया, जैसदै ऐक दुष्टआत्मा थी। 34 सै जोर सै लैलयांदा लागा, “ओए रै नासरत गांव कै यीशु, अमारै तांव आरी किछै लैणा दैणा ना आथी? कै तू आमुखै नाश कौरदा आए रौआ? हांव ताखै जाणुए, तू कुण औसौ? तू ही सैजा पवित्र आदमी औसौ जू पौरमेशवर कै ढौबौशा आए रौआ!” 35 यीशुए दुष्टआत्मा खै ऐजौ बौलेयौ झिड़की, “चुपी रौ औरौ ऐसी पौरैशै निकल़ै जा!” तोबै दुष्टआत्माएं तैसकै बीचो दा पोटकेयो बिना नुकसान पोऊंचाए तैसी पौरैशै निकल़ै गौए। 36 इयौं बातौ लैई सौबै हैरान हौए गौवै, औरौ सै आपी मुंजी पूछदै लागै, “ऐजा कैशणा वचन औसौ? औरौ ऐजा आदमी औधिकार औरौ अनौखी शौकतै कै साथै दुष्टआत्मा कै आज्ञा दैंव, औरौ सै निकल़ै जांव।” 37 औरौ ऐशैखैई चौऊ ढौबौ तैसकी चौर्चा हौंदै लागै। पतरस कै शाशु औरौ ओकी लोगौ कै ठीक कौरणा ( मत्ती 8:14-17 ; मर 1:29-34 ) 38 तोबै यीशु यहूदी सभा-घोर दा ऊबा बिज़यो शमौन कै घोरे हौटा शमौन कै शाशु तापो दै पौड़ै रौए थी, औरौ तिनुऐ तियौं कारिए तैसीयादै बिन्तै कौरे। 39 तैणै तियौंकै नेड़िक खौड़ै हौयौ ताप कै ताड़ा औरौ ताप उतरे गौआ, औरौ सै तावल़ै ऊबै बीजयो तिनकै सेवा कौरदै लागै। 40 सुरज डूबणो कै सौमय, जू-जू लोग सान्त-भान्त की बीमारी दै पौड़ेयौंदे थिए, तिनुऐ सौबी कै तैसकै धोरे लियोऊवे, औरौ तैणै ऐकी-ऐकी पांदी हाथ राखैयौ कै ठीक कौरे दिए। 41 औरौ दुष्टआत्मा लैलियायो बौहितै लोगौ पौरैशी निकल़ै गोई, औरौ बौलदी लागी, “कै तू पौरमेशवर का बैटा औसौ,” पौरौ सै तिनु ताड़ौ औरौ बौल़ाणौ नै दैंव थिया, जिथुकै सै जाणौ थी कै सै मसीह औसौ। गलील जिले दा प्रचार ( मर 1:35-39 ) 42 आगलै दूसै झीश हौंदै ही यीशु ऐकी शुनशान जौगैह दा हौटा, औरौ बौड़ै भीड़ तैसीखै जोन्दै-जोन्दै तैसकै धोरे आए, औरौ तैसीकै रौकदै लागै कै तू अमारै धोरे दा आगु नै जा। 43 पौरौ यीशुए तिनुखै बौल़ौ, “मुखै ओकी नोगरो दा बै पौरमेशवर का राज्य का सुसमाचार प्रचार कौरणा जौरुरी औसौ जिथुकै मुखै इथकारिए छाड़ै राए।” 44 औरौ सै गलील जिले कै यहूदी सभा-घोरो दा प्रचार कौरदा रौआ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation