लूका 22 - सिरमौरी नौवाँ नियम

यीशु कै मारणौ कै साजिश

¹ अखमीरी रोटी कौ तैयार जू फसह कौ तैयार थियु, सै आणौवाल़ौ थियु।

² औरौ मुख्य यहूदी पुरोहितो औरौ यहूदी शास्त्री इयौं बातौ कै ताको दै थिए कै तैसी कैशैकै मौरेंई, पौरौ सै लोगौ दै डौरौ थिए।

यहूदा इस्‍करियोती का धौखा

³ तोबै शैतान यहूदा दा सोमाए गौआ, जैसी यहूदा इस्‍करियोती बौल़ौ, औरौ बारौ चैलो मुंजीदा ऐक थिया।

⁴ तैणै जाऐबा मुख्य यहूदी पुरोहितो औरौ मन्दिर कै रोखवाल़ै कै ठोगड़े कै साथै बात कौरे, कै तैसी कैशै तिनकै हाथौ दा पोकड़ैईं।

⁵ सै खुशी होवे, औरौ तैसी पौएसै दैणौ का वादा कौरा।

⁶ तैणै बै मानै पोऊ, औरौ ताको दा थिया, कै जौल़ौ भीड़ ना हौलै तौलौ सै धौखै दा तैसीकै तिनकै हाथौ दा थोमाए दैन्दा।

फसह की तैयारी

⁷ तोबै अखमीरी रोटी कै तैयारो को दूस ओऊ, जिथमुंजी फसह का मेम्ने कै बल़ि कौरणा जौरुरी थी।

⁸ यीशुए पतरस औरौ यूहन्ना कै ऐजौ बौलेयौ कै छाड़ै, कै, “जाऐबा अमारै खाणौ कारिए फसह की तैयारी कौरौ।”

⁹ तिनुऐ तैसीयांदो पूछु, “तू आमुखै कुकै भैजणै चांए, कै आमै फसह कै खाणौ की तैयारी कौरु।”

¹⁰ तैणै तिनु बौल़ौ, “दैखैया, यरूशलेम शहर दा जांदै बैई ऐक आदमी पाणी का घोड़ा टिपेबा तुऔं भैटदा, जैसी घोरे सै जांव तुऐं तैसकै पौछौड़ियौ जाया,

¹¹ औरौ तैसी घोरे कै मालिको बौलेया, ‘गुरु, ताखै बौल़ौ; कै इथै पोऊंणै को घोर कुकै औसौ जिथै हांव आपणै चैलो कै साथै फसह खोऊं?’

¹² सै तुऔं खै शोहे-लैबेंयौंदा उपला बौड़ा कमरा दिखाला, तिथी तैयारी कौरेया।”

¹³ तिनुऐ जाऐबा जैशैखै तैणै तिनुखै बौल़ै राए थियु, तैशैखैई पोऊ, औरौ तिनुऐ फसह का खाणौ तैयार कौरा।

प्रभु का आखरी खाणौ

¹⁴ जोबै सौमय ओऊवा, तौ यीशु बारौ चोणेयौंदे चैलै कै साथै खाणौ खांदा बोठा।

¹⁵ औरौ तैणै तिनु बौल़ौ, “मुखै बौड़ै इछा थै, कै दुख सैयौ मौरणौ दै औगौड़ियौ ऐसी फसह कै तैयारो को खाणौ तोंवारै साथै खोऊं।

¹⁶ जिथुकै हांव तुऔं कै बुलू, कै हांव फसह कै तैयार को खाणौ तांव तौड़ी औटेयौ ना खांदा, जांव तौड़ी पौरमेशवर कै राज्य दा पूरा ना हौए जांव।”

¹⁷ तोबै यीशुए अंगूर कै रस का छाना कौरेयौ पौरमेशवर का धन्यवाद कौरा औरौ बौल़ौ, “इथु लौ औरौ आपी मुंजी बांडै दैंव।

¹⁸ जिथुकै हांव तुऔं कैंई साचौ बुलू, कै जौल़ौ तौड़ी पौरमेशवर का राज्य ना आंव तौलौ तौड़ी हांव अंगूरो का रस इबी दा ऊबा कौलोंई ना पींदा।”

¹⁹ तोबै तैणै रोटी कौरी, औरौ पौरमेशवर का धन्यवाद कौरेयौ तुड़ी, औरौ तिनुखै एजो बौलेयौ दी, “ऐजा मैरा शोरीर औसौ, जू तुऔं कारिए दैय जांव: मैरै याद कारिए ऐशैखैई कौरेया।”

²⁰ ऐशैखैई तैणै खाणौ कै बाद अंगूर कै रसो का भौरेयौंदा छाना ऐजौ बौलेयौ दियु, “ऐजा अंगूर कै रसो का छाना मैरै तैसी लोऊ कै जैशणा औसौ जू तुऔं कारिए बोवाए जांव, जू नोऐं कौरार औसौ।

²¹ पौरौ दैखैया, मैरै थोम्वाणौ वाल़ै का हाथ मैरै साथै मेजो पांदी औसौ।

²² जिथुकै मुं आदमी कै बैटै कारिए जैशै ठोहराए राए, पौरौ तैसी आदमी कै सख्त सौजा भैटदै जू मुखै धौखै शा थोमाला।

²³ तोबै सै आपी मुंजी पूछदै लागै कै आमु मुंजीदा कुण औसौ जू ऐजा काम कौरला?”

कुण बौड़ा सौमझा जांदा?

²⁴ तोबै चैलै मुंजी बैहस हौए कै आमु मुंजी बौड़ा कुण सौमझा जांव?

²⁵ तैणै तिनु बौल़ौ, “बैगानै यहूदियों कै राजा तिनुकै दबायो राखौ औरौ जू तिनु पांदी औधिकार राखौ, सैजै लोगौ शै आपणी तारीफ चांव।

²⁶ पौरौ तुऔं मुंजी ऐशै नै हौणौ चैंई, औरौ जू तुऔं मुंजी बौड़ा औसौ, सै नानड़ै कै जैशणा औसौ औरौ जू प्रधान औसौ, सै सेवक कै जैशणा बौणौ।

²⁷ जिथुकै बौड़ा कुण औसौ, सैजा जू खाणौ खांदा बौठै रौआ या सैजा जू सेवा कौरौ? हां सैजाई जू मैजौ पांदी खाणौ खांदा बौठै रौआ सै खास औसौ पौरौ हांव तोंवारै बीच दा सेवक कै जैशणा औसौ।”

²⁸ “तुऐं सैजै औसौ, जू मैरी परीक्षाओं मुंजी लगातार मैरा साथ दैंदै रौंव,

²⁹ औरौ जैशै मैरै बापूए मुखै ऐक राज्य दैय राए, तैशैखैई हांव बै तुऔं कै ऐक राज्य दुं।

³⁰ ताकि तुऐं मैरै राज्य दै मैरी मेजो पांदी खांव पीयों, पौरौ सिंहासन पांदी औरौ बोठेयो इस्राएल देश कै बारौ गोत्रो का न्याय कौरौ।”

पतरस कै भाजणौ कै बारै मुंजी बौताणौ

³¹ “शमौन, ओए रै शमौन! शुण, शैतानै पौरमेशवर शै तुऔं लोगौ कै परीक्षा लोणो कारिए इजाज़त मांगै राए कै आछै औरौ बुरै लोगौ कै जौई कौरौ, जैशैखै ऐक किसान गियुँ शै भूसो कै जौई कौरौ।

³² पौरौ मोऐं तांव कारिए प्रार्थना कौरे राए कै तू बिशवाश कौरणा छोड़े ना दैय, औरौ जोबै तू मैरै धोरे पाछु आए रौआ, तौ तू आपणै भाईड़ी कै मजबूत कौरेया कै सै मुं पांदी बिशवाश कौरौ।”

³³ पतरसे तैसीखै बौल़ौ, “ओए रै प्रभु हांव तैरै साथै ज़ेलो जाणौ औरौ मौरणौ कै बै तैयार औसौ।”

³⁴ तैणै बौल़ौ, “ओए रै पतरस हांव ताखै बुलू, कै ऐलो कुकड़ै कै, बांक दैणौ दै औगौड़ियौ तू तीन बैई भाजै जाला, कै तू मुखै ना जाणै।”

तानै शुणणौ खै तैयार रौया

³⁵ यीशुए चैलै खै बौल़ौ, “जोबै मोऐं तुऔं बोटुए, औरौ झोल़े, औरौ जूते बिना सुसमाचार प्रचार कौरदै छाड़ै राए थिए तौ का तुऔं कोसी चीज़ौ कै कमी हौए थी?” तिनुऐ बौल़ौ, “कियौंई चीज़ौ कै कमी ना होई।”

³⁶ तोबै यीशुए तिनुखै बौल़ौ, “पौरौ ऐबै लोग अमारै खिलाफ औसौ, तौ जैसिया बोटुआ औसौ सै तैसी उंढा कौरौ, औरौ तैशैखैई झोल़ा बै कौरौ, औरौ जैसिया तलवार ना आथी सै आपणै सदरी बिकैयो ऐक तलवार खोरीदै पाव।

³⁷ जिथुकै हांव तुऔं बुलू, कै ऐजौ पवित्र शास्त्र दो मैरै बारै मुंजी जू लैखै राए सैजौ पूरु हौंव। तिथपांदी लैखै रैई कै, ‘तैसी कानून तौड़णे वाल़ौ कै साथै शामिल कौरा।’ ऐजी बातौ मैरै बारै मुंजी लैखै राए औरौ तावल़ी ही पूरी हौणै वाल़ी औसौ।”

³⁸ तिनुऐ बौल़ौ, “ओए रै प्रभु इथै दो तलवारों औसौ।” तैणै तिनु बौल़ौ, “बोहिती औसौ।”

जैतून धारो पांदी यीशु कै प्रार्थना

³⁹ तोबै यीशु बायरै निकल़ैयो आपणै भोवार कै हिसाब शै जैतून कै धारो पांदी हौटा, औरौ चैलै तैसकै साथै हौटै गौवै।

⁴⁰ तैसी ठाँव दै पोहचेयो तैणै तिनु बौल़ौ, “प्रार्थना कौरौ, कै जोबै तोंवारै परीक्षा हौलै तोबै तुऐं मुं पांदी बिशवाश कौरणा बंद ना कौरौ।”

⁴¹ औरौ सै आपी तिनुदा जौई हौयौ शौ फूट दूर हौटै गौआ, औरौ घुंडू नियुड़ाऐबा प्रार्थना कौरदा लागा।

⁴² “ओए रै पिता, जै तू चांए तौ ऐसी दुख कै छानै कै मैरै धोरे दा हौटाए दै, तोबै बै मैरी नी पौरौ तैरै मोरजी पूरी हौंव।”

⁴³ तोबै स्वर्ग शै ऐक स्‍वर्गदूत तैसकै दैखिया जू तैसी शौकतै दैंव थिया।

⁴⁴ सै जादा बैचैन हौयौ हौजौ बै जादा प्रार्थना कौरदा लागा; औरौ तैसका पसीना मानौ लोऊ की बौड़ै-बौड़ै टिपू साए धोरती पांदी छुटदा लागै रौवा थिया।

⁴⁵ तोबै सै प्रार्थना कौरेयौ बिज़ा औरौ आपणै चैलै कै धोरे आयौ औरौ तिनु उदासी कै मारै सौतेयौंदै दैखै।

⁴⁶ औरौ तिनु बौल़ौ, “काए सोतै रौवै? ऊबै बिज़ो, प्रार्थना कौरौ कै जोबै तोंवारै परीक्षा हौलै तोबै तुऐं मुं पांदी बिशवाश कौरणा बंद ना कौरौ।”

यीशु का बन्दी बोणणा

⁴⁷ यीशुए ऐजौ बौल़ै ही लौ थियु, कै दैखौ ऐक भीड़ आए, औरौ तिनु बारौ मुंजी ऐक जैसकौ नांव यहूदा इस्‍करियोती थियु, जू तिनकै औगौड़ियौ-औगौड़ियौ आए रौआ थिया। सै यीशु कै धोरे ओऊवा कै यीशु खै खौपटेयांव।

⁴⁸ यीशुए तैसी बौल़ौ, “ओए रै यहूदा इस्‍करियोती, का तू हौंगटै लायो मुं आदमी कै बैटै कै थोम्बाणा चांए?”

⁴⁹ तैसकै साथीए जोबै ऐजौ दैखौ कै का हौणौवाल़ौ औसौ, तौ बौल़ौ, “ओए रै प्रभु, का आमै तलवार चोलांव?”

⁵⁰ औरौ तिनुमुंजी शै ऐकीए महायहूदी पुरोहित कै नोकर पांदी तलवार चौलायौ तैसका सोंवा कान काटै दिया।

⁵¹ इथपांदी यीशुए बौल़ौ, “ऐबै बस कौरौ।” औरौ तैसका कान छौयौ तैसीकै ठीक कौर दिया।

⁵² तोबै यीशुए मुख्य यहूदी पुरोहित औरौ मन्दिर कै रौखवाल़ै का ठोगड़ा औरौ बुड़ेईको शै, जू तैसकै धोरे थिए बौल़ौ, “का तुऐं मुखै थामणो कारिए डाकू सौमझेयौ तलवारों औरौ लाठी लोयो निकल़ी रौवै?

⁵³ जौल़ौ हांव मन्दिर दा रौज तोंवारै साथै थिया, तौ तुऐं मुं पांदी हाथ ना पाई, पौरौ ऐजा तोंवारा सौमय औसौ औरौ इनारै का औधिकार औसौ।”

पतरस कौ भाजणौ

⁵⁴ तोबै सै तैसी पाकड़ेयो लोए गौए, औरौ महायहूदी पुरोहित कै घोरे लियोऊवा। औरौ पतरस दूरकै-दूरकै दा तैसकै पौछौड़ियौ-पौछौड़ियौ हांडदा रौआ।

⁵⁵ औरौ जोबै सै आँगणो दै आग बाल़ेयौ कौठै बौठै, तौ पतरस बै तिनकै धोरे बौठै गौआ।

⁵⁶ तोबै ऐक नोकरानी आगी कै पेयाशै दै बौठेयोंदे थी औरौ तैसकै ढौबौ टकटकी लायौ बौलदै लागै, “ऐजा बै तौ ऐसकै ही साथै थिया।”

⁵⁷ पौरौ पतरस ऐजौ बौलेयौ भाजै गौआ, “ओए रै भाएटी हांव तैसी ना जाणु।”

⁵⁸ बिस्तौड़ी तिनुऐ कोसी ओकीए तैसी दैखैयो बौल़ौ, “तू बै तिनु लोगौ मुंजीदा औसौ।” पतरसे बौल़ौ, “ओए रै भाई साब हांव ना आथी।”

⁵⁹ कैई घंटे कै बाद ऐक आदमी होजो निशोंक हौयौ बौलदा लागा, “पाका ऐजा बै तैसकै साथै थिया; जिथुकै ऐजा गलील जिले का औसौ।”

⁶⁰ पतरसे बौल़ौ, “ओए रै भाई साब, हांव ना जाणु कै तुऐं का बौल़ै लो?” तैणै ऐजौ बौल ही लौ थियु कै तौलोंई कुकड़ै बांक दै।

⁶¹ तोबै प्रभु यीशुए पाछु फेरेयो कै पतरस कै ढौबौ दैखौ औरौ पतरस कै प्रभु की सैजै बात याद आए जू तैणै बौल राए थै, “ऐलो कुकड़ै कै बांक दैणै दै आगै तू तीन बैई मुखै भाजै जांदा।”

⁶² औरौ सै बायरै निकल़ैयो हिणकै-हिणकियौं रुन्दा लागा।

यीशु का ठाटा

⁶³ जिनु आदमीए यीशु कै पाकड़ी राए थिया, सै तैसकै ठाटै पाड़ियो पीटदै लागै

⁶⁴ औरौ तैसकी आखी बंद कौरेयौ तैसीयांदो पूछु, “पौरमेशवर शै बातौ कौरेयौ बोता कै ताखै कुणै मारा?”

⁶⁵ औरौ तिनुऐ हौजौ बै बौहिती नेंदैया की बातौ तैसकै खिलाफ दी बुली।

बुड़ेईको औरौ महासभा कै सामणै यीशु

⁶⁶ जोबै दूस हौ तौ लोगौ कै बुड़ेईक औरौ मुख्य यहूदी पुरोहित औरौ यहूदी शास्त्री कौठै हुवे, औरौ तैसी आपणै महासभा दै लोए गौवै औरौ पूछु,

⁶⁷ “का तू पौरमेशवर का बैटा मसीह औसौ। तौ आमुखै बौल़ै दै!” यीशुए तिनु बौल़ौ, “जै हांव तुऔं बुलू तौ तुऐं बिशवाश ना कौरदै।

⁶⁸ औरौ जै हांव तुआंदो पूछु, तौ तुऐं जोवाब ना दैलै।

⁶⁹ पौरौ ऐबै शै हांव आदमी का बैटा सौबिदा शौकतीशाली पौरमेशवर कै सोऐं ढौबौ राज कौरणौ कै बौठेयौंदा रौंदा।”

⁷⁰ इथपांदी सौबीए बौल़ौ, “तौ का तू पौरमेशवर का बैटा औसौ?” तैणै तिनु बौल़ौ, “तुऐं आपी बौल़ै लो कै हांव औसौ।”

⁷¹ तोबै तिनुऐ बौल़ौ, “ऐबै आमु गवाही कै का जौरुरत औसौ जिथुकै आमुए ऐसकी मुँओं शौ आपी ही शुण पोऊँ।”