लूका 20 - सिरमौरी नौवाँ नियम

यहूदी लोगौ का यीशु कैईंदा सवाल

¹ ऐक दूस ऐशै हौ, कै जोबै तैणै मन्दिर दा लोगौ खै उपदैश दैय लौआ थिया, औरौ सुसमाचार प्रचार कौरे लौआ थिया, तौ मुख्य यहूदी पुरोहित औरौ यहूदी शास्त्री, किछै बुड़ेईक तैसकै धोरे ओऊवे।

² औरौ बौलदै लागै, “आमु बोता, कै तू ऐजै काम कोसके औधिकार शै कौरे औरौ सैजा कुण औसौ, जैणै ताखै ऐजा औधिकार दैय राए?”

³ तैणै तिनु जोवाब दिया, “हांव बै तुंआदै ऐक बात पूछु मुखै बौतांव।

⁴ जोबै यूहन्नाए लोगौ खै बपतिस्मा दिया, तौ तैसीखै ऐजा कौरणौ का औधिकार पौरमेशवरे दिया, या लोगै।”

⁵ “तोबै सै आपी मुंजी चौर्चा कौरदै लागै कै जै आमै जोवाब दियु, ‘स्वर्गो कै ढौबौशै,’ तौ सै बौलदा, ‘कै तोबै तुऐं हौजौ तैसका बिशवाश किथुखै ना की?’

⁶ औरौ जै आमु बुलूबे, ‘ऐजा औधिकार आदमियों कै ढौबौशा,’ तौ सौबै लोग आमु पांदी पथराव कौरदै, जिथुकै सै सौथीखै जाणौ थिए, कै यूहन्ना पौरमेशवर कै बातौ बौताणौवाल़ा थिया।”

⁷ औरौ तिनुऐ जोवाब दिया, “आमु ना जाणु कै सै कोसके औरौ शा थिया।”

⁸ यीशुए तिनुखै बौल़ौ, “हांव बै तुऔं खै ना बौतांदा कै हांव ऐजै काम कोसी औधिकार शै कौरु।”

दुष्ट किसानो का उदारण

⁹ तोबै यीशुए लोगौ कै ऐक उदारण दिया, “ऐकी आदमीए अंगूरो का बाग लौआ, औरौ किसानो खै तिथकै ओधयाल़ी दैयौ बौहितै दूसौ कारिए प्रदेश हौटै गौआ।

¹⁰ जोबै सौमय ओऊवा, तौ तैणै किसानो कै धोरे ऐक नोकरो खै छाड़ा, कै अंगूरो कै बागड़ी पौरैशै किछै हिस्सा तैसकै धोरे लियांव, पौरौ किसाने तैसी पीटैयो खाली हाथ छाड़ै दिया।

¹¹ तोबै खेतौ कै मालिकै ऐक ओका नोकर छाड़ा औरौ तिनुऐ तैसी पीटैयो औरौ तैसकी बैज्जती कौरेयौ खाली हाथ पाछु भैजा।

¹² तोबै तैणै तीजा छाड़ा, औरौ तिनुऐ तैसीखै घायल कौरेयौ निकाल़ै दिया।

¹³ तोबै अंगूरो कै बागो कै मालिकै बौल़ौ, ‘कै हांव का कौरु? हांव आपणै लाड़कु बैटै कै छाडुबा, जौरुर सै ऐसका आदर कौरलै।’

¹⁴ जोबै किसाने तैसी दैखा तौ आपी मुंजी सुंचदै लागै, ‘ऐजाई तौ वारिस औसौ, चालौ, आमै ऐसीखै बै मारै दियुंबे, औरौ जमीन-जायदात अमारै हौए जालै।’

¹⁵ औरौ तिनुऐ तैसीखै अंगूरो कै खेतौ कै बायरै लाएबा मारै दिया। इथकारिए ऐबै अंगूरो कै खेतौ का मालिक तिनु किसानो कै साथै का कौरदा?

¹⁶ सै आयौ तिनु किसानो कै मारै दैंदा, औरौ अंगूरो कै बागड़ी ओकी कै दैय दैंदा।” ऐजौ शोणेयो तिनुऐ बौल़ौ, “पौरमेशवर ऐशै ना कौरौ।”

¹⁷ तैणै तिनकै ढौबौ दैखैयो बौल़ौ, “हौजौ पवित्र शास्त्र दौ ऐजौ लैखै राए: ‘जैसी पाथरो कै मिस्रिए फेरकाए दिया थिया, सैजा पाथर कोंड़ियारा बौणै गौआ।’

¹⁸ जू कुणिए तैसी पाथरो पांदी रिड़लु सै चकनाचूर हौए जांदो औरौ जिथपांदी सै रिड़ल़ा तिथुखै पिशै दैंदा।”

यहूदी शास्त्रीयों औरौ मुख्य यहूदी पुरोहित की चाल

¹⁹ तैसी सौमय यहूदी शास्त्री औरौ मुख्य यहूदी पुरोहित यीशु खै थामणा चांव थिए, जिथुकै सैजै सौमझै गौवै थिए, कै यीशुए तिनकै खिलाफ उदारण बौल़ै राए पौरौ सै लोगौ दै डौरे।

²⁰ औरौ सै तैसकै ताको दै रौवै औरौ आपणै भेदिए छाड़ै, कै सै धरम का भैष बौदल़ैयो तैसकी कुणजै ना कुणजै बात पाकड़ो, ताकि तैसी राज्यपाल कै हाथौ औरौ औधिकार दा सौंपै दैंव।

²¹ तिनुऐ तैसीयांदो ऐजौ पूछु, “ओए रै गुरुजी आमु जाणुए कै तू ठीक बौल़ै, औरौ शिखाए बै औसौ औरौ कोसीआरी भैदभाव ना कौरे; औरौ पौरमेशवर कै बाट सौचाई सै बौताए।

²² का रोम कै महाराजा (कैसर) खै मूसा कै कानून कै हिसाब शै आमुखै कर दैणौ चैंई या ना दैणा चैंई?”

²³ तैणै तिनकै चलाकी कै जाणैयौ तिनु बौल़ौ,

²⁴ “मुखै ऐक रोमी सिका दिखाव। जिथकै धियाड़ी ऐकी दूसौ कै धियाड़ी कै बोराबर थै। इथपांदी कोसके छाप औरौ नांव औसौ?” तिनुऐ बौल़ौ, “रोम देश कै महाराजा (कैसर) कै छाप औरौ नांव औसौ।”

²⁵ यीशुए तिनुखै बौल़ौ, “तौ जू महाराजा को औसौ, सैजौ महाराजा खै दैव, औरौ जू पौरमेशवर कौ औसौ सैजौ पौरमेशवर खै दैंव।”

²⁶ तिनकै लोगौ कै सामणै इनु बातौ दै तैसी पाकड़ी ना, औरौ तैसकै जोवाब लैई हैरान हौयौ चुपी रौए गौवै।

मौरेयो जियुंदी हौणौ औरौ बैयाव

²⁷ तोबै सदूकी लोग जू बौल़ौए, कै मौरेयौंदे मुंजीदै जियुंदी हौणौ आथी ना, तिनुमुंजी कुणिए यीशु कै धोरे आयौ पूछु।

²⁸ “ओए रै गुरुजी, मूसाए आमु कारिए पवित्र शास्त्र दो ऐजौ लैख राए, ‘जै कोसी का भाई आपणै घोरवाल़ी कै रौंदै बैई बिना ओलाद कै मौरे जांव, तौ तैसका भाए तैसकै घोरवाल़ी आरी बैयाव कौरे पाव औरौ आपणै भाई कारिए ओलाद पौयदा कौरौ।’

²⁹ ऐक बैई ऐकी कुड़बे दै सात भाए थिए। जैठा भाईड़ी बियाव कौरेयौ बेओलाद मौरे गौआ।

³⁰ तोबै दूजै औरौ तिजै भाईए तियौंआरी बियाव बाणा।

³¹ ऐशैखैई सात कै सात भाए बेओलाद मौरे गौए।

³² आखरी दी सैजी बैटमाणिश बै मौरे गौए।

³³ ऐबै, आमुखै बोता जै मौरेयौंदे का जियुंदी हौणौ पांदी सैजी विधवा बैटमाणिश, जू साती भाईड़ीआरी बियाए रौए थै, सै तिनुमुंजी दै कोसके घोरवाल़ी हौलै?”

³⁴ यीशुए तिनु बौल़ौ, “ऐसी जमाने कै ओलादै मुंजी तौ बैयाव-शादी हौंव।

³⁵ पौरौ जू लोग ऐसी लायक हौंदै, कै सै ऐसी जमाने दै औरौ मौरेयौंदे मुंजीदै जियुंदी हौए जालै, तौ तिनुमुंजी बैयाव ना हौंदै।

³⁶ तोबै सै कौलोंई ना मोरदै, जिथुकै सै स्‍वर्गदूतौ कै जैशणै हौंदै औरौ मौरेयौंदे कै जियुंदी हौणौ पांदी नानड़िया हौणै शै सै पौरमेशवर कै बै नानड़िया हौंदै।

³⁷ पौरौ इयौं बातौ खै कै मौरेयौंदे जियुंदी हौंव, मूसाए बै जोल़ेयौंदे झाड़ी कै कथा दो बौताए राए, कै सै प्रभु कै, ‘अब्राहम, इसहाक औरौ याकूब का पौरमेशवर बौल़ौ।’

³⁸ पौरमेशवर तौ मौरेयौंदे का नी, पौरौ जियुंदै का पौरमेशवर औसौ, जिथुकै तैसकै नेड़िक सौबै जियुंदी औसौ।”

³⁹ तोबै ऐजौ शोणेयो यहूदी शास्त्रीयों मुंजीदै कुणिए ऐजौ बौल़ौ, “ओए रै गुरु तुऐं आछौ बौल़ौ।”

⁴⁰ औरौ इथकै बाद तिनु यीशु शै किछै पूछणो कै हिम्मत ना होई।

मसीह राजा दाऊद का बैटा या दाऊद का प्रभु औसौ?

⁴¹ तोबै तैणै तिनुवांदो पूछु, “मसीह कै राजा दाऊद का बैटा कैशै बौल़ौ?

⁴² राजा दाऊदे तौ आपणै भजन संहिता कै किताबो दो लैखै राए, ‘प्रभुए मैरै प्रभु कैंई बौल़ौ, मैरै सोऐं ढौबौ बौठ,

⁴³ जांव तौड़ी कै हांव तैरै बौयरी कै हराए ना दियु।’

⁴⁴ ऐशैखैई राजा दाऊद तैसीखै प्रभु बौल़ौ, तौ सै तैसका बैटा कैशै बौणा?”

यहूदी शास्त्रीयों कै खिलाफ चैलै कै चोकशाणै

⁴⁵ जोबै लोगै शौणै लौ थियु, तौ यीशुए आपणै चैलै खै बौल़ौ,

⁴⁶ “यहूदी शास्त्रीयों कैईंदै चौकश रौया, जिनुकै लाम्बै-लाम्बै खोटणो बाम्बणै आछै लागौ, औरौ जू बाज़ारो कै लोगौ कैईंदै इज्जत पाणै चांव। औरौ तिनु यहूदी सभा-घोर दै खास-खास ठाँव औरौ बोईदुत मुंजी बै आदर दैणौ वाल़ी जौगैह दौ बोठणौ बोड़िया लागौ।

⁴⁷ सै विधवाओं कै घोरो पांदी कब्जा कौरणा चांव, औरौ देखाणौ कारिए बौड़ी बार तौड़ी प्रार्थना कौरदै रौंव। पौरमेशवर जौरुर तिनुकै कौड़ै सौजा दैन्दा।”